ಕೇರಳದಲ್ಲಿ 'ಸ್ಕೈ ಡೈನಿಂಗ್' ಅವಘಡ: 150 ಅಡಿ ಎತ್ತರದಲ್ಲಿ ಸಿಲುಕಿದ ಪ್ರವಾಸಿಗರು, ಕ್ರೇನ್ ಮಾಲೀಕರ ವಿರುದ್ಧ ಕೇಸ್
ಈ ರೆಸ್ಟೋರೆಂಟ್ ಸ್ಥಳೀಯ ಆಡಳಿತದಿಂದ ಯಾವುದೇ ಪರವಾನಗಿ ಪಡೆಯದೆ ಅಕ್ರಮವಾಗಿ ಕಾರ್ಯನಿರ್ವಹಿಸುತ್ತಿತ್ತು ಎಂಬುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಜಿಲ್ಲಾ ಆಡಳಿತವು ರೆಸ್ಟೋರೆಂಟ್‌ಗೆ 'ಸ್ಟಾಪ್ ಮೆಮೊ' ಜಾರಿ ಮಾಡಿದೆ.
ಬೆಂಕಿ ಮತ್ತು ರಕ್ಷಣಾ ಕಾರ್ಯಾಚರಣೆ ನಡೆಯುವ ಮೊದಲು, ಗುಂಪು ನೆಲದಿಂದ ಸುಮಾರು 150 ಅಡಿ ಎತ್ತರದಲ್ಲಿ ಎರಡು ಗಂಟೆಗಳಿಗೂ ಹೆಚ್ಚು ಕಾಲ ಸಿಲುಕಿಕೊಂಡಿತ್ತು.
ಇಡುಕ್ಕಿಯ ಆನಚಾಲ್‌ನಲ್ಲಿರುವ 'ಸ್ಕೈ ಡೈನಿಂಗ್' ರೆಸ್ಟೋರೆಂಟ್‌ನಲ್ಲಿ ಕ್ರೇನ್ ಕೈಕೊಟ್ಟ ಪರಿಣಾಮ, ಇಬ್ಬರು ಮಕ್ಕಳು ಸೇರಿದಂತೆ ನಾಲ್ವರು ಪ್ರವಾಸಿಗರು ಸುಮಾರು ಎರಡು ಗಂಟೆಗಳ ಕಾಲ 150 ಅಡಿ ಎತ್ತರದಲ್ಲಿ ನಡು ಆಕಾಶದಲ್ಲೇ ಸಿಲುಕಿಕೊಂಡ ಆತಂಕಕಾರಿ ಘಟನೆ ಶುಕ್ರವಾರ ನಡೆದಿದೆ.
ಘಟನೆಗೆ ಸಂಬಂಧಿಸಿದಂತೆ ಸಾರ್ವಜನಿಕ ಸುರಕ್ಷತೆಯನ್ನು ಕಡೆಗಣಿಸಿದ ಆರೋಪದ ಮೇರೆಗೆ ವೆಲ್ಲತೋವಲ್ ಪೊಲೀಸರು ರೆಸ್ಟೋರೆಂಟ್ ನಿರ್ವಾಹಕರ ವಿರುದ್ಧ ಪ್ರಕರಣ ದಾಖಲಿಸಿದ್ದಾರೆ. ಭೂಮಾಲೀಕ ಆನಚಾಲ್‌ನ ಸೋಜನ್ ಜೋಸೆಫ್ ಮತ್ತು ನಿರ್ವಾಹಕ ಉಡುಂಬನ್ನೂರ್‌ನ ಪ್ರವೀಣ್ ಎಂಬುವವರ ವಿರುದ್ಧ ಭಾರತೀಯ ನ್ಯಾಯ ಸಂಹಿತೆ ಸೆಕ್ಷನ್ 125 (ಮಾನವ ಜೀವಕ್ಕೆ ಅಪಾಯ ತಂದೊಡ್ಡುವುದು) ಮತ್ತು ಕೇರಳ ಪೊಲೀಸ್ ಕಾಯ್ದೆಯ ಸೆಕ್ಷನ್ 118(e) ಅಡಿಯಲ್ಲಿ ಕೇಸ್ ದಾಖಲಿಸಲಾಗಿದೆ.
ರವಾನೆಯಾಯ್ತು 'ಸ್ಟಾಪ್ ಮೆಮೊ'
ಈ ರೆಸ್ಟೋರೆಂಟ್ ಸ್ಥಳೀಯ ಆಡಳಿತದಿಂದ ಯಾವುದೇ ಪರವಾನಗಿ ಪಡೆಯದೆ ಅಕ್ರಮವಾಗಿ ಕಾರ್ಯನಿರ್ವಹಿಸುತ್ತಿತ್ತು ಎಂಬುದು ತನಿಖೆಯಲ್ಲಿ ಬೆಳಕಿಗೆ ಬಂದಿದೆ. ಈ ಹಿನ್ನೆಲೆಯಲ್ಲಿ ಜಿಲ್ಲಾ ಆಡಳಿತವು ರೆಸ್ಟೋರೆಂಟ್‌ಗೆ 'ಸ್ಟಾಪ್ ಮೆಮೊ' (ಕಾರ್ಯನಿರ್ವಹಣೆ ಸ್ಥಗಿತಗೊಳಿಸುವ ನೋಟಿಸ್) ಜಾರಿ ಮಾಡಿದೆ. ಇಡುಕ್ಕಿ ಜಿಲ್ಲಾಧಿಕಾರಿಗಳು ಈ ಬಗ್ಗೆ ಗ್ರಾಮ ಅಧಿಕಾರಿಯಿಂದ ಸಮಗ್ರ ವರದಿ ಕೇಳಿದ್ದಾರೆ.
ರಕ್ಷಣೆ ಹೇಗೆ?
ಸುದ್ದಿ ವಾಹಿನಿಗಳಲ್ಲಿ ಪ್ರಸಾರವಾದ ವರದಿಯನ್ನು ಗಮನಿಸಿದ ಅಗ್ನಿಶಾಮಕ ದಳದ ಸಿಬ್ಬಂದಿ ಕೂಡಲೇ ಸ್ಥಳಕ್ಕೆ ಧಾವಿಸಿದರು. ಹಗ್ಗದ ಮೂಲಕ ಕಾರ್ಯಾಚರಣೆ ನಡೆಸಿ, ಒಂದೇ ಕುಟುಂಬದ ನಾಲ್ವರು ಸದಸ್ಯರನ್ನು ಸುರಕ್ಷಿತವಾಗಿ ಕೆಳಗೆ ಇಳಿಸುವಲ್ಲಿ ಯಶಸ್ವಿಯಾಗಿದ್ದಾರೆ.