ಶಬರಿಮಲೆ ಚಿನ್ನ ಕಳ್ಳತನ: ಪಿಣರಾಯಿ ವಿಜಯನ್ ವಿರುದ್ಧ ರಮೇಶ್ ಚೆನ್ನಿತ್ತಲ ಗಂಭೀರ ಆರೋಪ
ಪ್ರಕರಣಕ್ಕೆ ಸಂಬಂಧಿಸಿದಂತೆ ತಿರುವಾಂಕೂರು ದೇವಸ್ವಂ ಮಂಡಳಿಯ ಮಾಜಿ ಅಧ್ಯಕ್ಷರಾದ ಎ. ಪದ್ಮಕುಮಾರ್ ಮತ್ತು ಎನ್. ವಾಸು ಅವರನ್ನು ವಿಶೇಷ ತನಿಖಾ ದಳ ಈಗಾಗಲೇ ಬಂಧಿಸಿದೆ.
ಕೇರಳ ಕಾಂಗ್ರೆಸ್ ನಾಯಕ ರಮೇಶ್ ಚೆನ್ನಿತ್ತಲ
ಶಬರಿಮಲೆ ದೇವಾಲಯದಲ್ಲಿ ಚಿನ್ನ ನಾಪತ್ತೆಯಾಗಿರುವುದು ವಿಶ್ವದಾದ್ಯಂತ ಇರುವ ಕೋಟ್ಯಂತರ ಅಯ್ಯಪ್ಪ ಭಕ್ತರ ಭಾವನೆಗೆ ಧಕ್ಕೆ ತಂದಿದೆ. ಈ ಪ್ರಕರಣದಲ್ಲಿ ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ಅವರು ಆರೋಪಿಗಳನ್ನು ರಕ್ಷಿಸಲು ಪ್ರಯತ್ನಿಸುತ್ತಿದ್ದಾರೆ ಎಂದು ಕಾಂಗ್ರೆಸ್ ನಾಯಕ ರಮೇಶ್ ಚೆನ್ನಿತ್ತಲ ಆರೋಪಿಸಿದ್ದಾರೆ.
ಪ್ರಕರಣಕ್ಕೆ ಸಂಬಂಧಿಸಿದಂತೆ ತಿರುವಾಂಕೂರು ದೇವಸ್ವಂ ಮಂಡಳಿಯ ಮಾಜಿ ಅಧ್ಯಕ್ಷರಾದ ಎ. ಪದ್ಮಕುಮಾರ್ ಮತ್ತು ಎನ್. ವಾಸು ಅವರನ್ನು ವಿಶೇಷ ತನಿಖಾ ದಳ ಈಗಾಗಲೇ ಬಂಧಿಸಿದೆ. ಆದರೆ, "ಇವರು ಕೇವಲ ರಾಜಕೀಯ ಬೆಂಬಲವಿಲ್ಲದೆ ಇಂತಹ ಕೃತ್ಯ ಎಸಗಲು ಸಾಧ್ಯವಿಲ್ಲ. ಇವರ ಹಿಂದೆ ಸಿಎಂ ಮತ್ತು ಸರ್ಕಾರದ ಕೈವಾಡವಿದೆ," ಎಂದು ಚೆನ್ನಿತ್ತಲ ಸಂಶಯ ವ್ಯಕ್ತಪಡಿಸಿದ್ದಾರೆ.
ಯಾರು ಆ "ದೇವತಾ ಮನುಷ್ಯ"?
ಬಂಧಿತ ಮಾಜಿ ಅಧ್ಯಕ್ಷ ಪದ್ಮಕುಮಾರ್ ಅವರು ಈ ಪ್ರಕರಣದಲ್ಲಿ "ದೇವತಾ ಮನುಷ್ಯ"ರೊಬ್ಬರ ಕೈವಾಡವಿದೆ ಎಂದು ಹೇಳಿಕೆ ನೀಡಿದ್ದರು ಎನ್ನಲಾಗಿದೆ. ಇದನ್ನು ಉಲ್ಲೇಖಿಸಿದ ಚೆನ್ನಿತ್ತಲ, "ಮಾರ್ಕ್ಸ್‌ವಾದಿ ಪಕ್ಷದಲ್ಲಿ ಪಿಣರಾಯಿ ವಿಜಯನ್ ಅವರನ್ನು ಬಿಟ್ಟರೆ ಬೇರೆ ಯಾರು 'ದೇವರಂತಿರುವ' ವ್ಯಕ್ತಿ ಇದ್ದಾರೆ?," ಎಂದು ಪರೋಕ್ಷವಾಗಿ ಸಿಎಂ ಅವರನ್ನೇ ಗುರಿಯಾಗಿಸಿ ಪ್ರಶ್ನಿಸಿದ್ದಾರೆ. ಸಿಎಂ ಮತ್ತು ಸರ್ಕಾರದ ಬೆಂಬಲ ಇರುವುದರಿಂದಲೇ ತನಿಖೆ ಸಚಿವರ ಹಂತಕ್ಕೆ ತಲುಪುತ್ತಿಲ್ಲ ಎಂದು ಅವರು ದೂರಿದ್ದಾರೆ.
ಅಯ್ಯಪ್ಪ ಸ್ವಾಮಿಗೆ ಭಕ್ತರು ಅತ್ಯಂತ ಭಕ್ತಿಯಿಂದ ಚಿನ್ನ ಸೇರಿದಂತೆ ಬೆಲೆಬಾಳುವ ವಸ್ತುಗಳನ್ನು ಕಾಣಿಕೆಯಾಗಿ ನೀಡುತ್ತಾರೆ. ಆದರೆ, ಈಗ ದೇವಸ್ಥಾನದ ಚಿನ್ನವೇ ಸುರಕ್ಷಿತವಾಗಿಲ್ಲ ಎಂಬುದು ಭಕ್ತರಲ್ಲಿ ಆತಂಕ ಮೂಡಿಸಿದೆ. ತಮ್ಮ ಕ್ಷೇತ್ರದ ಭಕ್ತರೊಬ್ಬರು ದೇವರಿಗೆ ನೀಡಿದ್ದ ಚಿನ್ನದ ಪಾತ್ರೆಗಳು ಸುರಕ್ಷಿತವಾಗಿದೆಯೇ ಅಥವಾ ಕಳ್ಳತನವಾಗಿದೆಯೇ ಎಂದು ಆತಂಕ ವ್ಯಕ್ತಪಡಿಸಿದ್ದಾರೆ ಎಂದು ಚೆನ್ನಿತ್ತಲ ಉದಾಹರಣೆ ನೀಡಿದರು.
ಶಬರಿಮಲೆ ದೇವಾಲಯದ ಚಿನ್ನ ನಾಪತ್ತೆ ಪ್ರಕರಣದ ತನಿಖೆಯನ್ನು ಎಸ್‌ಐಟಿ ನಡೆಸುತ್ತಿದ್ದು, ಟಿಡಿಬಿಯ ಇಬ್ಬರು ಮಾಜಿ ಅಧ್ಯಕ್ಷರು ಸೇರಿದಂತೆ ಹಲವರನ್ನು ಬಂಧಿಸಲಾಗಿದೆ. ಇದೀಗ ವಿರೋಧ ಪಕ್ಷಗಳು ಈ ವಿಷಯವನ್ನು ಮುಂದಿಟ್ಟುಕೊಂಡು ಎಲ್‌ಡಿಎಫ್ ಸರ್ಕಾರದ ವಿರುದ್ಧ ಮುಗಿಬಿದ್ದಿವೆ. "ಎರಡನೇ ಬಾರಿ ಅಧಿಕಾರಕ್ಕೆ ಬಂದಿರುವ ಪಿಣರಾಯಿ ಸರ್ಕಾರದಲ್ಲಿ ಚಿನ್ನ ಕಳ್ಳತನ ಪ್ರಕರಣಗಳು ಹೆಚ್ಚಾಗುತ್ತಿವೆ. ಹಿಂದೆ ಚಿನ್ನದ ಕಳ್ಳಸಾಗಣೆ, ಈಗ ದೇವರ ಚಿನ್ನ ಕಳ್ಳತನ," ಎಂದು ಚೆನ್ನಿತ್ತಲ ವಾಗ್ದಾಳಿ ನಡೆಸಿದ್ದಾರೆ.