ಧರ್ಮಸ್ಥಳ ಅಸ್ಥಿಪಂಜರ: ವಿಧಿ ವಿಜ್ಞಾನ ತನಿಖೆಯ ಹಾದಿ ಬಗ್ಗೆ ಡಾ. ಸೂರ್ಯಕುಮಾರ್ ವಿಶ್ಲೇಷಣೆ ಇಲ್ಲಿದೆ

ಇತ್ತೀಚೆಗೆ ಧರ್ಮಸ್ಥಳದಲ್ಲಿ ಪತ್ತೆಯಾದ ಅಸ್ಥಿಪಂಜರದ ಪ್ರಕರಣವು ವ್ಯಾಪಕ ಕುತೂಹಲಕ್ಕೆ ಕಾರಣವಾಗಿದ್ದು, ಇದರ ತನಿಖೆಯು ಹೇಗೆ ಮುಂದುವರಿಯಲಿದೆ ಎಂಬ ಬಗ್ಗೆ ವಿಧಿ ವಿಜ್ಞಾನ ಹಾಗೂ ಮೆಡಿಸಿನ್ ತಜ್ಞರಾದ ಡಾ. ಸೂರ್ಯಕುಮಾರ್ ಅವರು 'ದ ಫೆಡರಲ್'ಗೆ ನೀಡಿದ ಸಂದರ್ಶನದಲ್ಲಿ ಬೆಳಕು ಚೆಲ್ಲಿದ್ದಾರೆ. ಅವರ ಪ್ರಕಾರ, ಇಂತಹ ಪ್ರಕರಣಗಳ ತನಿಖೆಯು ವೈಜ್ಞಾನಿಕವಾಗಿ ಎರಡು ಪ್ರಮುಖ ಹಂತಗಳಲ್ಲಿ ನಡೆಯುತ್ತದೆ.

ಮೊದಲಿಗೆ, ಪೊಲೀಸರು ಪತ್ತೆಹಚ್ಚಿದ ಅಸ್ಥಿಪಂಜರವನ್ನು ವಿಧಿ ವಿಜ್ಞಾನ ಮೆಡಿಸಿನ್ ವಿಭಾಗಕ್ಕೆ ರವಾನಿಸಲಾಗುತ್ತದೆ. ಇಲ್ಲಿ, ತಜ್ಞರು ಅಸ್ಥಿಪಂಜರದ ಪ್ರಾಥಮಿಕ ವಿಶ್ಲೇಷಣೆ ನಡೆಸುತ್ತಾರೆ. ಮೂಳೆಗಳು ಎಷ್ಟೇ ಹಳೆಯದಾಗಿದ್ದರೂ, ಮೃತಪಟ್ಟ ವ್ಯಕ್ತಿ ಗಂಡೊ ಅಥವಾ ಹೆಣ್ಣೊ ಹಾಗೂ ಅವರ ಅಂದಾಜು ವಯಸ್ಸನ್ನು ನಿಖರವಾಗಿ ಪತ್ತೆಹಚ್ಚಬಹುದು. ಜೊತೆಗೆ, ಮೃತರ ಎತ್ತರವನ್ನು ಸಹ ಅಂದಾಜಿಸಲಾಗುತ್ತದೆ. ಆದರೆ, ನಿಖರವಾದ ಎತ್ತರವನ್ನು ತಿಳಿಯಲು ದೇಹದ ಸಂಪೂರ್ಣ ಮೂಳೆಗಳು ಲಭ್ಯವಿರಬೇಕಾಗುತ್ತದೆ, ಇಲ್ಲವಾದಲ್ಲಿ ಇದನ್ನು ನಿರ್ಧರಿಸುವುದು ಕಷ್ಟಸಾಧ್ಯ. ಈ ಎಲ್ಲಾ ಮಾಹಿತಿಗಳನ್ನು ಒಳಗೊಂಡ ವರದಿಯನ್ನು ವಿಭಾಗವು ಕೇವಲ ಒಂದು ದಿನದಲ್ಲಿ ಸಿದ್ಧಪಡಿಸಿ ಮುಂದಿನ ತನಿಖಾ ಹಂತಕ್ಕೆ ಕಳುಹಿಸುತ್ತದೆ.

ಎರಡನೇ ಹಾಗೂ ಅತ್ಯಂತ ನಿರ್ಣಾಯಕ ಹಂತವು ವಿಧಿ ವಿಜ್ಞಾನ ಪ್ರಯೋಗಾಲಯದಲ್ಲಿ (FSL) ನಡೆಯುತ್ತದೆ. ಮೆಡಿಸಿನ್ ವಿಭಾಗದ ವರದಿಯ ಆಧಾರದ ಮೇಲೆ ಇಲ್ಲಿ ಆಳವಾದ ಪರೀಕ್ಷೆಗಳನ್ನು ನಡೆಸಲಾಗುತ್ತದೆ. ಅಸ್ಥಿಪಂಜರದಿಂದ ಡಿಎನ್ಎ ಮಾದರಿಗಳನ್ನು ಸಂಗ್ರಹಿಸಿ ವ್ಯಕ್ತಿಯ ಗುರುತನ್ನು ಪತ್ತೆ ಹಚ್ಚುವುದು ಈ ಹಂತದ ಪ್ರಮುಖ ಉದ್ದೇಶ. ಒಂದು ವೇಳೆ ಮೃತರ ಕುಟುಂಬದವರು ಪತ್ತೆಯಾದರೆ, ಅವರ ರಕ್ತದ ಮಾದರಿಯನ್ನು ಪಡೆದು ಅಸ್ಥಿಪಂಜರದ ಡಿಎನ್ಎ ಜೊತೆ ಹೋಲಿಕೆ ಮಾಡಿ ಗುರುತನ್ನು ಖಚಿತಪಡಿಸಲಾಗುತ್ತದೆ. ಇದಲ್ಲದೆ, ಸಾವಿಗೆ ನಿಖರ ಕಾರಣವನ್ನು ಕಂಡುಹಿಡಿಯಲು ಸಹ ಪ್ರಯತ್ನಿಸಲಾಗುತ್ತದೆ. ಮೂಳೆಗಳ ಮೇಲಿರುವ ಗಾಯದ ಗುರುತುಗಳು ಅಥವಾ ಇತರೆ ಸಾಕ್ಷ್ಯಗಳನ್ನು ವಿಶ್ಲೇಷಿಸಿ ವ್ಯಕ್ತಿಯು ಹೇಗೆ ಮೃತಪಟ್ಟಿರಬಹುದು ಎಂಬ ತೀರ್ಮಾನಕ್ಕೆ ಬರಲಾಗುತ್ತದೆ.

ಪ್ರಕರಣದ ಪ್ರಾಮುಖ್ಯತೆ ಆಧರಿಸಿ, ಅಗತ್ಯಬಿದ್ದರೆ ಹೆಚ್ಚಿನ ವಿಶ್ಲೇಷಣೆಗಾಗಿ ಹೈದರಾಬಾದ್​​ನಲ್ಲಿರುವ ಅತ್ಯಾಧುನಿಕ ಎಫ್ಎಸ್ಎಲ್ ಕೇಂದ್ರಕ್ಕೆ ಮಾದರಿಗಳನ್ನು ಕಳುಹಿಸುವ ಸಾಧ್ಯತೆಯೂ ಇದೆ ಎಂದು ಡಾ. ಸೂರ್ಯಕುಮಾರ್ ತಿಳಿಸಿದ್ದಾರೆ. ಈ ಎರಡೂ ಹಂತಗಳ ವೈಜ್ಞಾನಿಕ ತನಿಖೆಗಳು ಪೂರ್ಣಗೊಂಡ ನಂತರವೇ ಪ್ರಕರಣದ ಸಂಪೂರ್ಣ ಚಿತ್ರಣ ಲಭ್ಯವಾಗಿ, ತನಿಖೆಗೆ ಒಂದು ನಿರ್ದಿಷ್ಟ ದಿಕ್ಕು ಸಿಗಲಿದೆ.