ಎಸ್‌ಟಿಪಿಗಳೇ ಬೆಂಗಳೂರಿನ ಕೆರೆಗಳ ಪಾಲಿನ 'ಮೃತ್ಯುಪಾಶ'! ಶೇ. 90ರಷ್ಟು ಘಟಕಗಳು ಕೇವಲ ಹೆಸರಿಗಷ್ಟೇ!!

ಒಂದು ಕಾಲದಲ್ಲಿ ʼಕೆರೆಗಳ ನಗರಿʼ, ʼಉದ್ಯಾನ ನಗರಿʼ ಎಂದು ಖ್ಯಾತವಾಗಿದ್ದ ಬೆಂಗಳೂರು ಇಂದು ಜಾಗತಿಕ ಮಟ್ಟದಲ್ಲಿ ತಂತ್ರಜ್ಞಾನ ರಾಜಧಾನಿಯಾಗಿ ಗುರುತಿಸಿಕೊಂಡಿದೆ. 'ಸಿಲಿಕಾನ್ ವ್ಯಾಲಿ' ಎಂಬ ಹಣೆಪಟ್ಟಿಯ ಅಡಿಯಲ್ಲಿ ನಗರವು ಆರ್ಥಿಕವಾಗಿ ಬೆಳೆದಿದ್ದರೂ, ಪರಿಸರದ ದೃಷ್ಟಿಯಿಂದ ದಿವಾಳಿಯಾಗುತ್ತಿದೆ.

ನಗರದ ಸೌಂದರ್ಯಕ್ಕೆ ಮತ್ತು ಅಂತರ್ಜಲಕ್ಕೆ ಆಧಾರವಾಗಿದ್ದ ಕೆರೆಗಳು ಇಂದು ಕೊಳಚೆ ನೀರಿನ ಹರಿವಿನಿಂದಾಗಿ ಸಾವಿನ ದವಡೆಯಲ್ಲಿವೆ. ಈ ದುಸ್ಥಿತಿಗೆ ಪ್ರಮುಖ ಕಾರಣ ಬೆಂಗಳೂರಿನಲ್ಲಿರುವ ತ್ಯಾಜ್ಯ ನೀರು ಸಂಸ್ಕರಣಾ ಘಟಕಗಳ (ಎಸ್‌ಟಿಪಿ-Sewage Treatment Plants) ಶೋಚನೀಯ ಸ್ಥಿತಿ. ಇತ್ತೀಚಿನ ಅಂಕಿ-ಅಂಶಗಳ ಪ್ರಕಾರ, ನಗರದ ಶೇಕಡಾ 90ರಷ್ಟು ಎಸ್‌ಟಿಪಿಗಳು ಕೇವಲ ಹೆಸರಿಗಷ್ಟೇ ಅಸ್ತಿತ್ವದಲ್ಲಿದ್ದು, ಕಾರ್ಯನಿರ್ವಹಣೆಯಲ್ಲಿ ಸಂಪೂರ್ಣ ವಿಫಲವಾಗಿರುವುದು ಅತ್ಯಂತ ಕಳವಳಕಾರಿ ಸಂಗತಿಯಾಗಿದೆ.

ನಗರದ ಪ್ರಮುಖ ಜೀವನಾಡಿಯಾಗಬೇಕಿದ್ದ ಒಳಚರಂಡಿ ವ್ಯವಸ್ಥೆ ಮತ್ತು ತ್ಯಾಜ್ಯ ನೀರು ಸಂಸ್ಕರಣಾ ಘಟಕಗಳು ಇಂದು ಅಕ್ಷರಶಃ ಜೀವ ಕಳೆದುಕೊಂಡಿವೆ. ಇದು ಕೇವಲ ಆಡಳಿತಾತ್ಮಕ ವೈಫಲ್ಯವಷ್ಟೇ ಅಲ್ಲ, ಬದಲಿಗೆ ನಗರದ ಭವಿಷ್ಯದ ಮೇಲೆ ನಡೆಯುತ್ತಿರುವ ಗಂಭೀರ ಪ್ರಹಾರವಾಗಿದೆ. ಬೆಂಗಳೂರು ನಗರವು ಪ್ರತಿದಿನ ಸುಮಾರು 1,400 ರಿಂದ 1,600 ಮಿಲಿಯನ್ ಲೀಟರ್‌ಗಳಷ್ಟು (ಎಂಎಲ್‌ಡಿ) ಕೊಳಚೆ ನೀರನ್ನು ಉತ್ಪಾದಿಸುತ್ತದೆ. ಆದರೆ, ಈ ಪೈಕಿ ಸಂಸ್ಕರಣೆಯಾಗುತ್ತಿರುವುದು ಕೇವಲ ಅರ್ಧದಷ್ಟು ಮಾತ್ರ ಎಂದು ಅಧಿಕೃತ ದಾಖಲೆಗಳು ಹೇಳುತ್ತವೆ.

ಆದರೆ ವಾಸ್ತವ ಏನೆಂದರೆ, ಬೆಂಗಳೂರು ಜಲಮಂಡಳಿ ಮತ್ತು ವಸತಿ ಸಮುಚ್ಚಯಗಳ ಅಡಿಯಲ್ಲಿರುವ ನೂರಾರು ಎಸ್ಟಿಪಿಗಳಲ್ಲಿ ಶೇ. 90ರಷ್ಟು ಘಟಕಗಳು ವೈಜ್ಞಾನಿಕ ಮಾನದಂಡಗಳನ್ನು ಅನುಸರಿಸುತ್ತಿಲ್ಲ.

ಖಾಸಗಿ ಅಪಾರ್ಟ್‌ಮೆಂಟ್‌ಗಳಲ್ಲಿರುವ ಸಣ್ಣ ಎಸ್ಟಿಪಿಗಳಿಂದ ಹಿಡಿದು ಬೃಹತ್ ಸರ್ಕಾರಿ ಘಟಕಗಳವರೆಗೆ ಎಲ್ಲವೂ ತಾಂತ್ರಿಕ ದೋಷ, ನಿರ್ವಹಣಾ ವೆಚ್ಚದ ಕೊರತೆ ಮತ್ತು ಭ್ರಷ್ಟಾಚಾರದ ಸುಳಿಗೆ ಸಿಲುಕಿವೆ. ಸಂಸ್ಕರಿಸದ ನೀರನ್ನು ನೇರವಾಗಿ ರಾಜಕಾಲುವೆಗಳಿಗೆ ಬಿಡುವುದರಿಂದ ಬೆಳ್ಳಂದೂರು ಮತ್ತು ವರ್ತೂರು ಕೆರೆಗಳಲ್ಲಿ ನೊರೆ ಉಕ್ಕುತ್ತಿರುವುದು ಜಾಗತಿಕ ಮಟ್ಟದಲ್ಲಿ ನಗರಕ್ಕೆ ಮುಜುಗರ ತಂದಿದೆ.

ಎಸ್‌ಟಿಪಿಗಳ ವೈಫಲ್ಯಕ್ಕೆ ಪ್ರಮುಖ ಕಾರಣಗಳು

ಅಧಿಕ ನಿರ್ವಹಣಾ ವೆಚ್ಚ ಮತ್ತು ವಿದ್ಯುತ್ ಬಿಲ್

ಒಳಚರಂಡಿ ಸಂಸ್ಕರಣಾ ಘಟಕಗಳು ನಿರಂತರವಾಗಿ ಕಾರ್ಯನಿರ್ವಹಿಸಬೇಕು. ಇದರಲ್ಲಿರುವ ಏರಿಯೇಷನ್‌ ಟ್ಯಾಂಕ್‌ಗಳಲ್ಲಿ ಬ್ಯಾಕ್ಟೀರಿಯಾಗಳನ್ನು ಜೀವಂತವಾಗಿಡಲು ಆಮ್ಲಜನಕ ಪೂರೈಕೆ ಅತ್ಯಗತ್ಯ. ಆದರೆ, ಬೆಂಗಳೂರಿನ ಅನೇಕ ಕಡೆ ವಿದ್ಯುತ್‌ ಕಣ್ಣು ಮುಚ್ಚಾಲೆ ಸಾಮಾನ್ಯವಾಗಿದೆ. ಟ್ರಾನ್ಸ್‌ಫಾರ್ಮರ್‌ ಸುಟ್ಟು ಹೋದರೆ ವಾರಗಟ್ಟಲೆ ದುರಸ್ತಿಯಾಗುವುದಿಲ್ಲ. ಜನರೇಟರ್‌ಗಳಿಗೆ ಡಿಸೇಲ್‌ ಹಾಕಲು ಅನುದಾನದ ಕೊರತೆ ಇರುತ್ತದೆ. ವಿದ್ಯುತ್‌ ಇಲ್ಲದೆ ಮೋಟಾರ್‌ಗಳು ನಿಂತಾಗ, ಸಂಸ್ಕರಣಾ ಪ್ರಕ್ರಿಯೆ ಅರ್ಧಕ್ಕೆ ನಿಲ್ಲುತ್ತದೆ ಮತ್ತು ಆ ನೀರು ಕೊಳೆತು ದುರ್ನಾತ ಬೀರಲಾರಂಭಿಸುತ್ತದೆ. ಅಲ್ಲದೇ, ಖಾಸಗಿ ಅಪಾರ್ಟ್‌ಮೆಂಟ್‌ಗಳಲ್ಲಿ ಎಸ್‌ಟಿಪಿಗಳನ್ನು ನಡೆಸುವುದು ಅತ್ಯಂತ ದುಬಾರಿಯಾಗಿದೆ. ವಿದ್ಯುತ್ ಬಿಲ್ ಮತ್ತು ಯಂತ್ರೋಪಕರಣಗಳ ದುರಸ್ತಿಗಾಗಿ ಲಕ್ಷಾಂತರ ರೂಪಾಯಿ ವೆಚ್ಚವಾಗುತ್ತದೆ. ಇದನ್ನು ಉಳಿಸಲು ಅನೇಕ ವಸತಿ ಸಮಿತಿಗಳು ರಾತ್ರೋರಾತ್ರಿ ಸಂಸ್ಕರಿಸದ ನೀರನ್ನು ಚರಂಡಿಗೆ ಬಿಡುತ್ತವೆ.

ಹಳೆಯ ತಂತ್ರಜ್ಞಾನ ಮತ್ತು ಸಿಬ್ಬಂದಿ ಸಮಸ್ಯೆ

ಬೆಂಗಳೂರಿನ ಅನೇಕ ಎಸ್‌ಟಿಪಿಗಳು ದಶಕಗಳಷ್ಟು ಹಳೆಯ ತಂತ್ರಜ್ಞಾನವನ್ನು ಹೊಂದಿವೆ. ಇಂದಿನ ರಾಸಾಯನಿಕಯುಕ್ತ ತ್ಯಾಜ್ಯವನ್ನು ಶುದ್ಧೀಕರಿಸುವ ಸಾಮರ್ಥ್ಯ ಈ ಘಟಕಗಳಿಗಿಲ್ಲ. ಇದರ ಜತೆಗೆ ತಾಂತ್ರಿಕ ಸಿಬ್ಬಂದಿ ಮತ್ತು ಕಾವಲುದಾರರ ಅಭಾವ ಸಮಸ್ಯೆಯು ಎದುರಾಗಿದೆ. ಎಸ್‌ಟಿಪಿಗಳ ನಿರ್ವಹಣೆಗೆ ನುರಿತ ತಾಂತ್ರಿಕ ಸಿಬ್ಬಂದಿಯ ಅಗತ್ಯ ಇದೆ. ಯಂತ್ರಗಳ ದೋಷಗಳನ್ನು ಸರಿಪಡಿಸಲು, ರಾಸಾಯನಿಕಗಳ ಪ್ರಮಾಣವನ್ನು ನಿರ್ಧರಿಸಲು ತಜ್ಞರು ಬೇಕು. ಆದರೆ, ಬಹುತೇಕ ಘಟಕಗಳಲ್ಲಿ ಗುತ್ತಿಗೆ ಆಧಾರದ ಮೇಲೆ ನೇಮಕಗೊಂಡಿರುವ ಕಾವಲುದಾರರೇ ಆಪರೇಟರ್ಗಳಾಗಿ ಕೆಲಸ ಮಾಡುತ್ತಿದ್ದಾರೆ. ಅವರಿಗೆ ತಾಂತ್ರಿಕ ಜ್ಞಾನದ ಕೊರತೆ ಇರುವುದರಿಂದ, ಯಂತ್ರಗಳು ಕೆಟ್ಟರೆ ದುರಸ್ತಿ ಮಾಡುವವರಿಲ್ಲದೆ ತಿಂಗಳುಗಟ್ಟಲೆ ಘಟಕಗಳು ಸ್ಥಗಿತಗೊಳ್ಳುತ್ತವೆ.

ಮಿಶ್ರಿತ ತ್ಯಾಜ್ಯ ನೀರು

ಇದು ಬೆಂಗಳೂರಿನ ಅತ್ಯಂತ ದೊಡ್ಡ ತಾಂತ್ರಿಕ ಎಡವಟ್ಟು. ವೈಜ್ಞಾನಿಕವಾಗಿ ಮಳೆ ನೀರು ಹರಿಯುವ ಚರಂಡಿ ಮತ್ತು ಒಳಚರಂಡಿ ಬೇರೆ ಬೇರೆಯಾಗಿರಬೇಕು. ಆದರೆ, ಬೆಂಗಳೂರಿನಲ್ಲಿ ಇವೆರಡೂ ಒಂದಕ್ಕೊಂದು ಬೆರೆತುಹೋಗಿವೆ. ಮಳೆಗಾಲದಲ್ಲಿ ಮಳೆ ನೀರು ರಭಸವಾಗಿ ಒಳಚರಂಡಿ ಪೈಪ್‌ಗಳಿಗೆ ನುಗ್ಗುತ್ತದೆ. ಇದರಿಂದಾಗಿ ಎಸ್‌ಟಿಪಿಗಳಿಗೆ ಬರುವ ನೀರಿನ ಪ್ರಮಾಣ ಹಠಾತ್ ಏರಿಕೆಯಾಗುತ್ತದೆ.

ಫಿಲ್ಟರಿಂಗ್ ಘಟಕಗಳು ಈ ಒತ್ತಡವನ್ನು ತಡೆದುಕೊಳ್ಳಲಾಗದೆ ಕೆಟ್ಟು ಹೋಗುತ್ತವೆ. ಹೀಗಾಗಿ ಮಳೆಗಾಲದಲ್ಲಿ ಎಸ್‌ಟಿಪಿಗಳು ಇದ್ದೂ ಇಲ್ಲದಂತಾಗುತ್ತವೆ. ಮಳೆನೀರು ಮತ್ತು ಒಳಚರಂಡಿ ನೀರು ಒಂದೇ ಕಾಲುವೆಯಲ್ಲಿ ಹರಿಯುವುದರಿಂದ, ಮಳೆಗಾಲದಲ್ಲಿ ಎಸ್ಟಿಪಿಗಳ ಮೇಲೆ ವಿಪರೀತ ಒತ್ತಡ ಬಿದ್ದು ಅವು ಕಾರ್ಯ ಸ್ಥಗಿತಗೊಳಿಸುತ್ತವೆ.

ಅನುದಾನದ ಕೊರತೆ ಮತ್ತು ನಿರ್ಲಕ್ಷ್ಯ

ಎಸ್‌ಟಿಪಿಗಳ ನಿರ್ಮಾಣಕ್ಕೆ ಕೋಟಿ ಕೋಟಿ ಖರ್ಚು ಮಾಡುವ ಸರ್ಕಾರ, ಅದರ ನಿರ್ವಹಣೆಗೆ ಅಗತ್ಯವಿರುವ ಅನುದಾನವನ್ನು ಒದಗಿಸುವಲ್ಲಿ ಎಡವುತ್ತಿದೆ. ಹಳೆಯ ಯಂತ್ರಭಾಗಗಳನ್ನು ಬದಲಾಯಿಸಲು, ಪೈಪ್‌ಲೈನ್‌ ದುರಸ್ತಿ ಮಾಡಲು ಹಣವಿಲ್ಲ ಎಂಬ ಕಾರಣವನ್ನು ಅಧಿಕಾರಿಗಳು ನೀಡುತ್ತಾರೆ. ಖಾಸಗಿ ಅಪಾರ್ಟ್‌ಮೆಂಟ್‌ಗಳಲ್ಲಿ ಎಸ್‌ಟಿಪಿ ನಿರ್ವಹಣೆ ದುಬಾರಿ ಎಂಬ ಕಾರಣಕ್ಕೆ, ರಾತ್ರಿ ವೇಳೆ ಕದ್ದುಮುಚ್ಚಿ ಸಂಸ್ಕರಣೆಯಾಗದ ನೀರನ್ನು ಚರಂಡಿಗೆ ಬಿಡುವ ಪ್ರವೃತ್ತಿ ಹೆಚ್ಚಾಗಿದೆ ಎಂದು ಮೂಲಗಳು ಹೇಳಿವೆ. 

 ಹಳೆಯ ಸಾಮರ್ಥ್ಯ ಮತ್ತು ಹೊಸ ಹೊರೆ

ಬೆಂಗಳೂರಿನ ಬಹುತೇಕ ಎಸ್‌ಟಿಪಿಗಳು ದಶಕಗಳ ಹಿಂದೆ ಸ್ಥಾಪನೆಯಾದವು. ಅಂದಿನ ಜನಸಂಖ್ಯೆ ಮತ್ತು ನೀರಿನ ಬಳಕೆಗೆ ಅನುಗುಣವಾಗಿ ಅವುಗಳನ್ನು ವಿನ್ಯಾಸಗೊಳಿಸಲಾಗಿತ್ತು. ಆದರೆ, ಕಳೆದ 10-15 ವರ್ಷಗಳಲ್ಲಿ ನಗರದ ವಿಸ್ತೀರ್ಣ ಮತ್ತು ಜನಸಂಖ್ಯೆ ಸ್ಫೋಟಕವಾಗಿ ಬೆಳೆದಿದೆ. ಹೊಸ ಬಡಾವಣೆಗಳು, ಬೃಹತ್ ಅಪಾರ್ಟ್ಮೆಂಟ್ ಸಂಕೀರ್ಣಗಳು ತಲೆ ಎತ್ತಿವೆ. ಇವು ಉತ್ಪಾದಿಸುವ ತ್ಯಾಜ್ಯ ನೀರಿನ ಪ್ರಮಾಣ ಹಳೆಯ ಘಟಕಗಳ ಸಾಮರ್ಥ್ಯಕ್ಕಿಂತ ಹಲವು ಪಟ್ಟು ಹೆಚ್ಚಿದೆ. ಪರಿಣಾಮವಾಗಿ, ಘಟಕಗಳು ಓವರ್‌ಲೋಡ್‌  ಆಗಿ, ಸಂಸ್ಕರಣೆ ಸಾಧ್ಯವಾಗದೆ ನೀರನ್ನು ಹಾಗೆಯೇ ಹೊರಬಿಡಲಾಗುತ್ತಿದೆ ಎಂಬ ದೂರುಗಳು ಕೇಳಿಬಂದಿವೆ. 

ಪರಿಸರದ ಮೇಲಾಗುತ್ತಿರುವ ಗಂಭೀರ ಪರಿಣಾಮಗಳು

ಎಸ್‌ಟಿಪಿಗಳ ವೈಫಲ್ಯವು ಕೇವಲ ನೀರಿನ ಸಮಸ್ಯೆಯಲ್ಲ, ಇದು ಸರಣಿ ಅನಾಹುತಗಳಿಗೆ ನಾಂದಿ ಹಾಡುತ್ತಿದೆ. ಸಂಸ್ಕರಿಸದ ನೀರು ಮಣ್ಣಿನ ಪದರದ ಮೂಲಕ ಅಂತರ್ಜಲವನ್ನು ಸೇರುತ್ತಿದೆ. ಇದರಿಂದ ಬೆಂಗಳೂರಿನ ಅನೇಕ ಬಡಾವಣೆಗಳಲ್ಲಿ ಬೋರ್‌ವೆಲ್ ನೀರು ಕುಡಿಯಲು ಯೋಗ್ಯವಾಗಿ ಉಳಿದಿಲ್ಲ.

ಈ ನೀರಿನಲ್ಲಿ ನೈಟ್ರೇಟ್ ಮತ್ತು ಭಾರ ಲೋಹಗಳ ಅಂಶ ಹೆಚ್ಚಾಗಿರುವುದು ಪತ್ತೆಯಾಗಿದೆ. ಕಲುಷಿತ ಕೆರೆಗಳ ಸುತ್ತಮುತ್ತ ವಾಸಿಸುವ ಜನರಲ್ಲಿ ಚರ್ಮವ್ಯಾಧಿ, ಉಸಿರಾಟದ ಸಮಸ್ಯೆ ಮತ್ತು ಕ್ಯಾನ್ಸರ್‌ನಂತಹ ರೋಗಗಳು ಹೆಚ್ಚುತ್ತಿವೆ.

ವಿಷಕಾರಿ ನೀರಿನಿಂದ ಬೆಳೆದ ತರಕಾರಿಗಳು ನಗರದ ಮಾರುಕಟ್ಟೆಯನ್ನು ಸೇರುತ್ತಿದ್ದು, ಇಡೀ ಜನಸಂಖ್ಯೆಯ ಆರೋಗ್ಯದ ಮೇಲೆ ಪರಿಣಾಮ ಬೀರುತ್ತಿದೆ. ಕೆರೆಗಳಲ್ಲಿರುವ ಮೀನುಗಳು ಮತ್ತು ಜಲಚರಗಳು ಆಮ್ಲಜನಕದ ಕೊರತೆಯಿಂದ ಸಾವನ್ನಪ್ಪುತ್ತಿವೆ. ವಲಸೆ ಬರುವ ಪಕ್ಷಿಗಳ ಸಂಖ್ಯೆಯೂ ಗಣನೀಯವಾಗಿ ಇಳಿಕೆಯಾಗಿದೆ ಎಂಬುದು ಪರಿಸರ ಮಾಲಿನ್ಯ ನಿಯಂತ್ರಣ ಮಂಡಳಿ ಅಧಿಕಾರಿಗಳ ಅಭಿಪ್ರಾಯವಾಗಿದೆ.

ಪರಿಹಾರದ ಮಾರ್ಗಗಳು 

ಹಳೆಯ ಎಸ್ಟಿಪಿಗಳ ಸಾಮರ್ಥ್ಯವನ್ನು ಇಂದಿನ ಜನಸಂಖ್ಯೆಗೆ ತಕ್ಕಂತೆ ಹೆಚ್ಚಿಸಬೇಕು. ಹಳೆಯ ತಂತ್ರಜ್ಞಾನದ ಬದಲಿಗೆ ಆಧುನಿಕ ತಂತ್ರಜ್ಞಾನ ಅಳವಡಿಸಿಕೊಳ್ಳಬೇಕಾಗಿದೆ. ಮಳೆ ನೀರು ಮತ್ತು ಒಳಚರಂಡಿ ಮಾರ್ಗಗಳನ್ನು ಕಟ್ಟುನಿಟ್ಟಾಗಿ ಬೇರ್ಪಡಿಸಬೇಕು. ವಿದ್ಯುತ್ ಸಮಸ್ಯೆಗೆ ಪರಿಹಾರವಾಗಿ, ಎಸ್‌ಟಿಪಿ ಘಟಕಗಳಲ್ಲಿ ಸೋಲಾರ್ ಪ್ಯಾನಲ್‌ಗಳನ್ನು ಅಳವಡಿಸಿ, ವಿದ್ಯುತ್ ವ್ಯವಸ್ಥೆ ರೂಪಿಸಬೇಕು. ಕಾರ್ಯನಿರ್ವಹಿಸದ ಅಪಾರ್ಟ್‌ಮೆಂಟ್‌ ಎಸ್‌ಟಿಪಿಗಳ ಮೇಲೆ ಮತ್ತು ನಿರ್ವಹಣೆಯಲ್ಲಿ ಲೋಪ ಎಸಗುವ ಗುತ್ತಿಗೆದಾರರ ಮೇಲೆ ಭಾರೀ ದಂಡ ವಿಧಿಸಬೇಕು. ತಾಂತ್ರಿಕ ಜ್ಞಾನವಿರುವ ಸಿಬ್ಬಂದಿಯನ್ನು ನೇಮಿಸಿ, ಅವರಿಗೆ ನಿಯಮಿತವಾಗಿ ತರಬೇತಿ ನೀಡಬೇಕು.

ಬಿಡಬ್ಲ್ಯೂಎಸ್‌ಎಸ್‌ಬಿ ವ್ಯಾಪ್ತಿಯಲ್ಲಿ 34 ಪ್ರಮುಖ ಸಂಸ್ಕರಣಾ ಘಟಕ

ಬೆಂಗಳೂರು ನಗರದ ಒಳಚರಂಡಿ ವ್ಯವಸ್ಥೆಯನ್ನು ಬಲಪಡಿಸಲು ಮತ್ತು ಕೆರೆಗಳ ಮಾಲಿನ್ಯವನ್ನು ತಡೆಗಟ್ಟಲು ಜಲಮಂಡಳಿಯು ಒಟ್ಟು 34 ಪ್ರಮುಖ ಸಂಸ್ಕರಣಾ ಘಟಕಗಳನ್ನು ನಿರ್ವಹಿಸುತ್ತಿದೆ. ನಗರದ ವಿವಿಧ ಭಾಗಗಳಲ್ಲಿರುವ ಘಟಕಗಳ ಸಾಮರ್ಥ್ಯ ಮತ್ತು ರಾಷ್ಟ್ರೀಯ ಹಸಿರು ನ್ಯಾಯಾಧಿಕರಣದ ನಿರ್ದೇಶನದಂತೆ ನಡೆಯುತ್ತಿರುವ ಸುಧಾರಣಾ ಕ್ರಮಗಳನ್ನು ಕೈಗೊಳ್ಳಲಾಗಿದೆ.

ನಗರದ ವೇಗದ ಬೆಳವಣಿಗೆಗೆ ಅನುಗುಣವಾಗಿ ನಾಗರಿಕ ಸೌಲಭ್ಯಗಳನ್ನು ಒದಗಿಸುವುದು ಸವಾಲಿನ ಕೆಲಸವಾಗಿದೆ. ತ್ಯಾಜ್ಯ ನೀರನ್ನು ಸಂಗ್ರಹಿಸಿ ಸಂಸ್ಕರಣಾ ಘಟಕಗಳಿಗೆ ಸಾಗಿಸಲು ಜಲಮಂಡಳಿಯು ಬೃಹತ್ ಕೊಳವೆಮಾರ್ಗದ ಜಾಲವನ್ನು ಹೊಂದಿದೆ.

ಸಣ್ಣ ವ್ಯಾಸದ ಒಳಚರಂಡಿ ಮಾರ್ಗಗಳು ಸುಮಾರು 6995 ಕಿ.ಮೀ. ಉದ್ದದ ಜಾಲವಿದ್ದು, ಇದು ಮನೆಗಳಿಂದ ತ್ಯಾಜ್ಯ ನೀರನ್ನು ಸಂಗ್ರಹಿಸುತ್ತದೆ. ಇನ್ನು, ಹೆಚ್ಚಿನ ವ್ಯಾಸದ ಒಳಚರಂಡಿ ಮಾರ್ಗಗಳು ಸುಮಾರು 1482 ಕಿ.ಮೀ. ಉದ್ದವಿದ್ದು, ಇವು ಸಂಗ್ರಹವಾದ ನೀರನ್ನು ಮುಖ್ಯ ಸಂಸ್ಕರಣಾ ಘಟಕಗಳಿಗೆ ತಲುಪಿಸುತ್ತವೆ. ಒಟ್ಟಾರೆಯಾಗಿ ನಗರದಲ್ಲಿ ಸುಮಾರು 8477 ಕಿ.ಮೀ. ಉದ್ದದ ಒಳಚರಂಡಿ ವ್ಯವಸ್ಥೆ ಜಾರಿಯಲ್ಲಿದೆ ಎಂದು ಬಿಡಬ್ಲ್ಯೂಎಸ್‌ಎಸ್‌ಬಿ ಹೇಳಿದೆ. 

ಕೆ.ಸಿ. ವ್ಯಾಲಿ ಭಾಗವು ಅತಿ ಹೆಚ್ಚು ಅಂದರೆ 458 ಲಕ್ಷ ಲೀಟರ್ ಸಂಸ್ಕರಣಾ ಸಾಮರ್ಥ್ಯವನ್ನು ಹೊಂದಿದೆ. ಇದು ನಗರದ ಪ್ರಮುಖ ಜಲಾನಯನ ಪ್ರದೇಶಗಳ ತ್ಯಾಜ್ಯ ನೀರನ್ನು ನಿರ್ವಹಿಸುತ್ತದೆ. ಲಾಲ್ ಬಾಗ್ ಮತ್ತು ಕಬ್ಬನ್ ಪಾರ್ಕ್‌ನಲ್ಲಿರುವ ಘಟಕಗಳು ಸಣ್ಣ ಪ್ರಮಾಣದವುಗಳಾಗಿದ್ದರೂ, ಉದ್ಯಾನವನಗಳ ನಿರ್ವಹಣೆಗೆ ಸಂಸ್ಕರಿಸಿದ ನೀರನ್ನು ಬಳಸುವಲ್ಲಿ ಪ್ರಮುಖ ಪಾತ್ರ ವಹಿಸುತ್ತಿವೆ. ಬೆಳ್ಳಂದೂರು ಅಮಾನಿಕೆರೆ ಘಟಕವು (90 ಲಕ್ಷ ಲೀಟರ್) ಕೆರೆಗೆ ಸೇರುವ ತ್ಯಾಜ್ಯ ನೀರನ್ನು ತಡೆಗಟ್ಟಲು ನಿರ್ಣಾಯಕವಾಗಿದೆ. ಕಗ್ಗದಾಸಪುರ ಕೆರೆಯ ಮಾಲಿನ್ಯ ತಡೆಗಟ್ಟಲು 17.90 ಕೋಟಿ ರೂ. ವೆಚ್ಚದಲ್ಲಿ ದಿನಕ್ಕೆ 5 ದಶಲಕ್ಷ ಲೀಟರ್ (50 ಲಕ್ಷ ಲೀಟರ್) ಸಾಮರ್ಥ್ಯದ ಹೊಸ  ಎಸ್‌ಟಿಪಿ ಘಟಕವನ್ನು ಸ್ಥಾಪಿಸಲಾಗುತ್ತಿದೆ. ಈ ಯೋಜನೆಗೆ ಕರ್ನಾಟಕ ರಾಜ್ಯ ಮಾಲಿನ್ಯ ನಿಯಂತ್ರಣ ಮಂಡಳಿಯು ಅನುದಾನ ನೀಡಿದೆ ಎಂದು ತಿಳಿಸಿದೆ. 

ಬೆಳ್ಳಂದೂರು ಮತ್ತು ವರ್ತೂರು ಕೆರೆಗಳ ರಕ್ಷಣೆಗೆ ಕ್ರಮ ಕೈಗೊಳ್ಳಲಾಗಿದೆ. ಈ ಎರಡು ಕೆರೆಗಳ ಮಾಲಿನ್ಯಕ್ಕೆ ಅತಿ ದೊಡ್ಡ ಕಾರಣವಾದ ಕೋರಮಂಗಲ ಮತ್ತು ಚಲ್ಲಘಟ್ಟ ಕಣಿವೆಯ ಹಳೆಯ ಸಂಸ್ಕರಣಾ ಘಟಕಗಳನ್ನು ಉನ್ನತೀಕರಿಸಲಾಗುತ್ತಿದೆ. ಹಳೆಯ ತಂತ್ರಜ್ಞಾನವನ್ನು ಬದಲಿಸಿ, ಶುದ್ಧೀಕರಿಸಿದ ನೀರಿನ ಗುಣಮಟ್ಟವನ್ನು ಅಂತಾರಾಷ್ಟ್ರೀಯ ಮಾನದಂಡಗಳಿಗೆ ತರುವುದು ಮುಖ್ಯ ಉದ್ದೇಶವಾಗಿದೆ. ಮಹಾತ್ಮ ಗಾಂಧಿ ಗ್ರಾಮೀಣ ಅಭಿವೃದ್ಧಿ ಸಂಸ್ಥೆಯ ಆವರಣದಲ್ಲಿ 10 ಎಂ.ಎಲ್.ಡಿ ಸಾಮರ್ಥ್ಯದ ಹೊಸ  ಎಸ್‌ಟಿಪಿ ಘಟಕವನ್ನು ನಿರ್ಮಿಸಲಾಗುತ್ತಿದೆ. 15ನೇ ಆರ್ಥಿಕ ಆಯೋಗದ ನಿಧಿಯಡಿ ಈ ಕೆಲಸ ನಡೆಯುತ್ತಿದೆ ಎಂದು ಸ್ಪಷ್ಟನೆ ನೀಡಿದೆ.