`ಕಾಂತಾರ: ಅಧ್ಯಾಯ 1' ರ 'ರಾಜ'ನಿಗೆ ಪತ್ನಿ ಪಾರ್ವತಿಯಿಂದ ಭಾವನಾತ್ಮಕ ನೃತ್ಯ ಗೌರವ

ರಿಷಬ್‌ ಶೆಟ್ಟಿ ಅವರ 'ಕಾಂತಾರ: ಅಧ್ಯಾಯ 1' ಚಿತ್ರದಲ್ಲಿ ಪ್ರಮುಖ ಪಾತ್ರದಲ್ಲಿ ನಟಿಸಿರುವ ಜಯರಾಮ್ ಪ್ರೇಕ್ಷಕರಿಂದ ಸಾಕಷ್ಟು ಪ್ರೀತಿಯನ್ನು ಪಡೆಯುತ್ತಿದ್ದಾರೆ.  ಮಲಯಾಳಂನ ಹಿರಿಯ ಪ್ರಸಿದ್ಧ ನಟ ರಾಜಶೇಖರನ್ ಎಂಬ ರಾಜನ ಪಾತ್ರವನ್ನು 'ಕಾಂತಾರ: ಅಧ್ಯಾಯ 1' ರಲ್ಲಿ ನಿರ್ವಹಿಸಿದ್ದಾರೆ. ಈ ಸಿನಿಮಾದಲ್ಲಿ ಅವರು ಅನೇಕ ರಹಸ್ಯಗಳನ್ನು ಇಟ್ಟುಕೊಳ್ಳುತ್ತಾರೆ. ಬ್ಲಾಕ್‌ಬಸ್ಟರ್ 'ಕಾಂತಾರ' ಚಿತ್ರದ ಪೂರ್ವಭಾವಿ ಕಥೆಯಾದ 'ಕಾಂತಾರ: ಅಧ್ಯಾಯ 1' ಜಯರಾಮ್‌ಗೆ ಅವರ ಅಭಿಮಾನಿಗಳು ಯಾವಾಗಲೂ ನಿರೀಕ್ಷಿಸುತ್ತಿದ್ದ ದೊಡ್ಡ 'ಇಮೇಜ್ ಬ್ರೇಕ್' ಅನ್ನು ನೀಡಿದೆ. ಪ್ರಮುಖ ಪಾತ್ರದಲ್ಲಿನ ಅವರ ಅಭಿನಯಕ್ಕೆ ಪ್ರೇಕ್ಷಕರು ಮತ್ತು ವಿಮರ್ಶಕರು ಭಾರೀ ಪ್ರೀತಿ ತೋರಿದ್ದಾರೆ. ಇದೀಗ ಅವರ ಪತ್ನಿ ವಿಶೇಷವಾಗಿ ಅಭಿನಂದನೆ ಸಲ್ಲಿಸಿದ್ದಾರೆ. 

ದಶಕಗಳ ಕಾಲ ನಟನೆಯಿಂದ ವಿರಾಮ ತೆಗೆದುಕೊಂಡಿದ್ದ ಮಲಯಾಳಂನ ಖ್ಯಾತ ನಟಿ ಹಾಗೂ ನೃತ್ಯಗಾರ್ತಿ ಪಾರ್ವತಿ ಜಯರಾಮ್ (ಅಶ್ವತಿ) ಅವರು, ಇದೀಗ ಸಂಗೀತ ಮತ್ತು ನೃತ್ಯದ ಮೂಲಕ ತಮ್ಮ ಅಭಿಮಾನಿಗಳ ಮುಂದೆ ಬಂದಿದ್ದಾರೆ. ಕನ್ನಡದ ಬ್ಲಾಕ್‌ಬಸ್ಟರ್ ಸಿನಿಮಾ 'ಕಾಂತಾರ'ದ  'ವರಾಹರೂಪಂ'ಗೆ ನೃತ್ಯ ಸಂಯೋಜನೆ ಮಾಡಿ, ಪ್ರದರ್ಶನ ನೀಡಿದ ವಿಡಿಯೋವನ್ನು ಪಾರ್ವತಿ ತಮ್ಮ ವೈಯಕ್ತಿಕ ಇನ್‌ಸ್ಟಾಗ್ರಾಮ್ ಖಾತೆಯಲ್ಲಿ ಹಂಚಿಕೊಂಡಿದ್ದು, ಅದು ಈಗ ವೈರಲ್ ಆಗಿದೆ.

 "ಕಾಂತಾರದಿಂದ ಈ ಸಂಗೀತ ನನ್ನೊಳಗೆ ಜೀವಂತವಾಗಿದೆ... ಕಾಂತಾರ: ಎ ಲೆಜೆಂಡ್ - ಅಧ್ಯಾಯ 1 ರೊಂದಿಗೆ, ಅದು ಮತ್ತೆ ಹೊರಹೊಮ್ಮಿದೆ. ಕಾಡುವ, ದೈವಿಕ ಮತ್ತು ಅಚಲ" ಎಂದು ಪಾರ್ವತಿ ತಮ್ಮ ಪುಟದಲ್ಲಿ ಬರೆದಿದ್ದಾರೆ. "ಅಲೌಕಿಕ ಸಂಗೀತಕ್ಕಾಗಿ ಅಜನೀಶ್ ಲೋಕನಾಥ್ ಅವರಿಗೆ, ಆತ್ಮವನ್ನು ಕಲಕುವ ಸೃಷ್ಟಿಗಾಗಿ ಅಸಾಧಾರಣ ಪ್ರತಿಭಾನ್ವಿತ ರಿಷಭ್ ಶೆಟ್ಟಿ ಅವರಿಗೆ ಮತ್ತು ದೃಶ್ಯವನ್ನು ದೃಶ್ಯ ಸಿಂಫನಿಯಾಗಿ ಪರಿವರ್ತಿಸಿದ್ದಕ್ಕಾಗಿ ಅರವಿಂದ್ ಎಸ್. ಕಶ್ಯಪ್ ಅವರಿಗೆ ನನ್ನ ವಿನಮ್ರ ಗೌರವ. ಅಂತಿಮವಾಗಿ, ಆತ್ಮದೊಂದಿಗೆ ವಾಸಿಸುವ ಮ್ಯಾಜಿಕ್‌ಗಾಗಿ ನನ್ನ ರಾಜ ರಾಜಶೇಖರನ್ - ನನ್ನ ಪತಿ ಜಯರಾಮ್ ಅವರಿಗೆ ಧನ್ಯವಾದಗಳು" ಎಂದು ಹಿರಿಯ ನಟಿ ಮುಕ್ತಾಯಗೊಳಿಸಿದರು.

ವಿಡಿಯೋದೊಂದಿಗೆ ಪಾರ್ವತಿ ಅವರು, "ಕಾಂತಾರ ಬಿಡುಗಡೆಯಾದಾಗಿನಿಂದ ಈ ಸಂಗೀತ ನನ್ನೊಳಗೆ ಜೀವಿಸಿದೆ... ಮತ್ತು 'ಕಾಂತಾರ: ಎ ಲೆಜೆಂಡ್-ಚಾಪ್ಟರ್ 1' ನೊಂದಿಗೆ, ಇದು ಮತ್ತೆ ಉದಯಿಸಿದೆ. ಈ ಸಂಗೀತಕ್ಕಾಗಿ ಅಜನೀಶ್ ಲೋಕನಾಥ್ ಅವರಿಗೆ, ಆತ್ಮವನ್ನು ಕಲಕುವ ಸೃಷ್ಟಿಗಾಗಿ ಅಸಾಮಾನ್ಯ ಪ್ರತಿಭೆಯ ರಿಷಬ್ ಶೆಟ್ಟಿಗೆ ಮತ್ತು ದೃಶ್ಯವನ್ನು ದೃಶ್ಯ ಸಿಂಫನಿಯಾಗಿ ಮಾರ್ಪಡಿಸಿದ ಅರವಿಂದ್ ಎಸ್. ಕಶ್ಯಪ್ ಅವರಿಗೆ ಇದು ನನ್ನ ನಮ್ರ ಅರ್ಪಣೆ. ಮತ್ತು ಕೊನೆಯದಾಗಿ ಆದರೆ ಎಂದಿಗೂ ಕಡಿಮೆಯಿಲ್ಲದ ನನ್ನ ರಾಜ, ರಾಜಶೇಖರ, ನನ್ನ ಪತಿ, ಜಯರಾಮ್ ಅವರಿಗೆ, ಆತ್ಮದಲ್ಲಿ ಉಳಿದಿರುವ ಈ ಮಾಂತ್ರಿಕತೆಗಾಗಿ ನಿಮ್ಮೆಲ್ಲರಿಗೂ ಧನ್ಯವಾದಗಳು" ಎಂದು ಬರೆದಿದ್ದಾರೆ.

ಇತ್ತೀಚೆಗೆ, ಪಾರ್ವತಿ ಅವರು ತಮ್ಮ ಮಗಳು ಮಾಳವಿಕಾ ಜಯರಾಮ್ ಅವರ ಸಂಗೀತ್ ನೈಟ್‌ನಲ್ಲೂ ನೃತ್ಯ ಪ್ರದರ್ಶನ ನೀಡುವ ಮೂಲಕ ಗಮನ ಸೆಳೆದಿದ್ದರು. ಅವರ ಮಕ್ಕಳು, ನಟ ಕಾಳಿದಾಸ್ ಜಯರಾಮ್ ಮತ್ತು ಮಾಳವಿಕಾ ಜಯರಾಮ್ ಅವರು ಈ ಸಂತೋಷದ ಕ್ಷಣಗಳ ತುಣುಕುಗಳನ್ನು ತಮ್ಮ ಇನ್‌ಸ್ಟಾಗ್ರಾಮ್ ಸ್ಟೋರಿಗಳಲ್ಲಿ ಹಂಚಿಕೊಂಡಿದ್ದರು.

ರಿಷಬ್‌ ಶೆಟ್ಟಿ ಅವರ 'ಕಾಂತಾರ: ಚಾಪ್ಟರ್ 1' ಭಾರತದಲ್ಲಿ ಅದ್ಭುತ ಮೂರನೇ ವಾರಾಂತ್ಯವನ್ನು ದಾಖಲಿಸುವ ಮೂಲಕ ದಕ್ಷಿಣದ ಗಣ್ಯ ಚಲನಚಿತ್ರಗಳ ಕ್ಲಬ್‌ಗೆ ಸೇರಿದೆ. ಕರ್ನಾಟಕ, ಕೇರಳ, ತಮಿಳುನಾಡು ಮತ್ತು ಆಂಧ್ರಪ್ರದೇಶ ಸೇರಿದಂತೆ ದಕ್ಷಿಣದ ರಾಜ್ಯದಲ್ಲಿ ಕನಿಷ್ಠ 50 ಕೋಟಿ ರೂ. ಗಳಿಸಿದ 'ಬಾಹುಬಲಿ 2', 'ಕೆಜಿಎಫ್: ಚಾಪ್ಟರ್ 2' ಮತ್ತು 'ಜೈಲರ್' ಚಿತ್ರಗಳ ನಂತರ ಈ ಸಾಧನೆ ಮಾಡಿದ ನಾಲ್ಕನೇ ಸಿನಿಮಾ ಇದಾಗಿದೆ. ಕಾಂತಾರ ಬಾಕ್ಸ್ ಆಫೀಸ್‌ನಲ್ಲಿ 18 ದಿನಗಳ ನಂತರ, 'ಕಾಂತಾರ: ಚಾಪ್ಟರ್ 1' ಒಟ್ಟು 524.15 ಕೋಟಿ ರೂ. ನಿವ್ವಳ ಗಳಿಕೆ ಮಾಡಿದೆ.