Sanju Samson: ಸಂಜು ಸ್ಯಾಮ್ಸನ್​ಗೆ 24 ಲಕ್ಷ ರೂಪಾಯಿ ದಂಡ!

ಇಂಡಿಯನ್​ ಪ್ರೀಮಿಯರ್ ಲೀಗ್ (IPL) 2025ರ ಗುಜರಾತ್ ವಿರುದ್ಧದ ಪಂದ್ಯದಲ್ಲಿ ರಾಜಸ್ಥಾನ ರಾಯಲ್ಸ್ (RR) ತಂಡದ  ನಾಯಕ ಸಂಜು ಸ್ಯಾಮ್ಸನ್​ ತಮ್ಮ ತಂಡಕ್ಕೆ ನೀಡಿರುವ ನಿಗದಿ ಸಮಯದಲ್ಲಿ ಓವರ್​ ಮುಗಿಸದ (slow over-rate) ತಪ್ಪಿಗಾಗಿ ದಂಡ ಕಟ್ಟಬೇಕಾಗಿದೆ.  ಈ ಪಂದ್ಯವು ಏಪ್ರಿಲ್ 8ರಂದು ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆಯಿತು.  ರಾಜಸ್ಥಾನ ತಂಡ ಸೋಲು ಎದುರಿಸಿದ ಬಳಿಕ ಸ್ಯಾಮ್ಸನ್​ಗೆ  24 ಲಕ್ಷದ ರೂಪಾಯಿ ದಂಡ ವಿಧಿಸಲಾಗಿದೆ.

ಬಿಸಿಸಿಐ ಪ್ರಕಾರ,  ಸಂಜು ಸ್ಯಾಮ್ಸನ್ ನೇತೃತ್ವದ ಬಳಗ ಋತುವಿನಲ್ಲಿ ಮಾಡಿದ ಎರಡನೇ  ತಪ್ಪು ಇದಾಗಿದ್ದು, ಐಪಿಎಲ್​ ಸಂಹಿತೆಯ ಆರ್ಟಿಕಲ್​ 2.22ರಡಿ  ಅವರಿಗೆ ದಂಡ ವಿಧಿಸಲಾಗಿದೆ. ಈ ಮೊದಲು ಚೆನ್ನೈ ಸೂಪರ್ ಕಿಂಗ್ಸ್ (CSK) ವಿರುದ್ಧದ ಪಂದ್ಯದಲ್ಲಿ ಗುಜರಾತ್​ ಬಳಗ ಓವರ್​ ಮುಗಿಸಲು ವಿಳಂಬ ಮಾಡಿದ್ದರಿಂದ ಆ ವೇಳೆ ನಾಯಕ ಸ್ಥಾನದಲ್ಲಿ ಇದ್ದ ರಿಯಾನ್ ಪರಾಗ್‌ಗೆ  12 ಲಕ್ಷ ರೂಪಾಯಿ ದಂಡ ವಿಧಿಸಲಾಗಿತ್ತು. ಈಗ ಗುಜರಾತ್ ಟೈಟಾನ್ಸ್ ವಿರುದ್ಧದ ಪಂದ್ಯದಲ್ಲಿ ಸಹ ತಂಡವು ತಮ್ಮ ಓವರ್‌ಗಳನ್ನು ಸಮಯಕ್ಕೆ ಮುಗಿಸಲು ವಿಫಲವಾಗಿ ಮತ್ತೊಂದು ಬಾರಿ ದಂಡದ ಬರೆ ಎಳೆದುಕೊಂಡಿದೆ.  ಈ ಪಂದ್ಯದಲ್ಲಿ ಆರ್​ಆರ್​​ ತಂಡ ಎದುರಾಳಿ ನೀಡಿದ್ದ 218 ರನ್ ಗುರಿ ಬೆನ್ನಟ್ಟಲು ಹೋಗಿ ಕೇವಲ 159 ರನ್‌ಗಳಿಗೆ ಸೀಮಿತಗೊಂಡಿತ್ತು. 

ದಂಡದ ವಿವರ

ಬಿಸಿಸಿಐ ಹೇಳಿಕೆ ಪ್ರಕಾರ, "ಇದು ತಂಡದ ಋತುವಿನ ಎರಡನೇ ಉಲ್ಲಂಘನೆಯಾಗಿದ್ದು, ಆರ್ಟಿಕಲ್ 2.22ರಡಿ ಸ್ಯಾಮಸನ್‌ಗೆ 24 ಲಕ್ಷ ರೂಪಾಯಿ ದಂಡ ವಿಧಿಸಲಾಗಿದೆ. ಇದಲ್ಲದೆ, ತಂಡದ ಉಳಿದ ಸದಸ್ಯರು, ಒಳಗೊಂಡಂತೆ ಇಂಪ್ಯಾಕ್ಟ್ ಪ್ಲೇಯರ್‌ಗೆ ತಮ್ಮ ಪಂದ್ಯ ಶುಲ್ಕದ ಶೇಕಡಾ 25  ಅಥವಾ  6 ಲಕ್ಷ ರೂ. ಯಾವುದೇ ಕಡಿಮೆಯೋ ಆ ಶೇಕಡಾವಾರು ದಂಡ ವಿಧಿಸಲಾಗಿದೆ. ಈ ಹಿಂದೆ ಇದ್ದ, ಮೊದಲೆರಡು ಉಲ್ಲಂಘನೆಗಳ ನಂತರ ಒಂದು ಪಂದ್ಯದ ನಿಷೇಧವಿರುವ ನಿಯಮವನ್ನು ಬಿಸಿಸಿಐ ತೆಗೆದುಹಾಕಿದ್ದು, ಈಗ ತ್ರೈವಾರ್ಷಿಕ ಡಿಮೆರಿಟ್ ಪಾಯಿಂಟ್ ವ್ಯವಸ್ಥೆ ಜಾರಿಗೆ ತಂದಿದೆ.

ಸ್ಯಾಮ್ಸನ್​​ ಆಟಕ್ಕೆ ಸಿಗದ ಬೆಂಬಲ

ಗುಜರಾತ್ ಟೈಟಾನ್ಸ್ ವಿರುದ್ಧದ ಪಂದ್ಯದಲ್ಲಿ ಸ್ಯಾಮ್ಸನ್​ 40 ರನ್ ಗಳಿಸಿದರೂ, ತಂಡದ ಉಳಿದ ಮುಖ್ಯ ಬ್ಯಾಟರ್​ಗಳು ತಮ್ಮ ಸಾಮರ್ಥ್ಯ ಸಾಬೀತುಪಡಿಸಲು ವಿಫಲರಾದರು. ಪ್ರಸಿದ್ ಕೃಷ್ಣ (3 ವಿಕೆಟ್​ 24ರನ್​) ಅವರ ಬೌಲಿಂಗ್​ ಗುಜರಾತ್​ಗೆ ಮೇಲುಗೈ ಸಾಧಿಸಲು ನೆರವಾಯಿತು. ಶಿಮ್ರಾನ್ ಹೆಟ್ಮಾಯರ್​ 52 ರನ್ ಬಾರಿಸಿದ ಹೊರತಾಗಿಯೂ ಆರ್​ಆರ್​​ 19.2 ಓವರ್‌ಗಳಲ್ಲಿ 159ರಲ್ಲಿ ಆಲೌಟ್ ಆಯಿತು.

ದಂಡದ ವಿಧಾನ ಕುರಿತು ಸಾಮಾಜಿಕ ಜಾಲತಾಣಗಳಲ್ಲಿ ಚರ್ಚೆಗಳು ಜೋರಾಗಿವೆ. ಕೆಲವರು ಬಿಸಿಸಿಐನ ದಂಡದ ಪ್ರಮಾಣವನ್ನು ಪ್ರಶ್ನಿಸುತ್ತಿದ್ದಾರೆ. ಆದರೆ ಇದು ಐಪಿಎಲ್​ ನಿಯಮಗಳ ಮೂಲವಾಗಿದ್ದು, ತಂಡಗಳು ಸಮಯ ಪಾಲನೆಯಲ್ಲಿ ಗಮನಹರಿಸಬೇಕೆಂಬ ಸಂದೇಶವನ್ನು ನೀಡುತ್ತದೆ.