IPL 2025: ಐಪಿಎಲ್ 2025ರ ಪರಿಷ್ಕೃತ ವೇಳಾಪಟ್ಟಿ ಪ್ರಕಟ: ಮೇ 17 ರಿಂದ ಪಂದ್ಯಾವಳಿ ಪುನರಾರಂಭ, ಜೂನ್ 3ಕ್ಕೆ ಫೈನಲ್

ಭಾರತ ಮತ್ತು ಪಾಕಿಸ್ತಾನದ ನಡುವಿನ ಸಂಘರ್ಷದ ಕಾರಣದಿಂದಾಗಿ ಅರ್ಧದಲ್ಲೇ ಸ್ಥಗಿತಗೊಂಡಿದ್ದ ಇಂಡಿಯನ್ ಪ್ರೀಮಿಯರ್ ಲೀಗ್ (ಐಪಿಎಲ್) 2025 ರ ಪಂದ್ಯಾವಳಿಯು ಇದೀಗ ಪರಿಷ್ಕೃತ ವೇಳಾಪಟ್ಟಿಯೊಂದಿಗೆ ಮೇ 17 ರಿಂದ ಪುನರಾರಂಭಗೊಳ್ಳಲು ಸಿದ್ಧವಾಗಿದೆ. ಬಿಸಿಸಿಐ ಸೋಮವಾರ ಉಳಿದಿರುವ ಪಂದ್ಯಗಳ ಹೊಸ ವೇಳಾಪಟ್ಟಿಯನ್ನು ಪ್ರಕಟಿಸಿದೆ.

ಪಂದ್ಯಾವಳಿಯು ಶನಿವಾರ (ಮೇ 17) ರಂದು ಬೆಂಗಳೂರಿನಲ್ಲಿ ರಾಯಲ್ ಚಾಲೆಂಜರ್ಸ್ ಬೆಂಗಳೂರು (ಆರ್‌ಸಿಬಿ) ಮತ್ತು ಕೋಲ್ಕತ್ತಾ ನೈಟ್ ರೈಡರ್ಸ್ (ಕೆಕೆಆರ್) ನಡುವಿನ ಪಂದ್ಯದೊಂದಿಗೆ ಮತ್ತೆ ಶುರುವಾಗಲಿದೆ. ಐಪಿಎಲ್‌ನ ಫೈನಲ್ ಪಂದ್ಯವು ಜೂನ್ 3 ರಂದು ನಡೆಯಲಿದೆ.

ಕಳೆದ ಗುರುವಾರ (ಮೇ 8) ಡೆಲ್ಲಿ ಕ್ಯಾಪಿಟಲ್ಸ್ ಮತ್ತು ಪಂಜಾಬ್ ಕಿಂಗ್ಸ್ ನಡುವಿನ ಪಂದ್ಯದ ಮಧ್ಯದಲ್ಲಿ ಆಟಗಾರರು ಮತ್ತು ಪ್ರೇಕ್ಷಕರ ಸುರಕ್ಷತೆಯನ್ನು ಗಮನದಲ್ಲಿಟ್ಟುಕೊಂಡು ಟೂರ್ನಮೆಂಟ್ ಅನ್ನು ತಾತ್ಕಾಲಿಕವಾಗಿ ಸ್ಥಗಿತಗೊಳಿಸಲಾಗಿತ್ತು. ಇದೀಗ ಭಾರತ ಮತ್ತು ಪಾಕಿಸ್ತಾನ ಕದನ ವಿರಾಮಕ್ಕೆ ಒಪ್ಪಿಕೊಂಡಿರುವುದರಿಂದ ಪಂದ್ಯಾವಳಿ ಪುನರಾರಂಭಗೊಂಡಿದೆ.

ಪ್ಲೇಆಫ್ ಪಂದ್ಯಗಳು ಸೇರಿದಂತೆ ಒಟ್ಟು 17 ಪಂದ್ಯಗಳು ದೇಶದ ಆರು ವಿವಿಧ ಸ್ಥಳಗಳಲ್ಲಿ ನಡೆಯಲಿವೆ. ಪ್ಲೇಆಫ್ ಪಂದ್ಯಗಳ ಸ್ಥಳಗಳನ್ನು ಲೀಗ್ ಹಂತದ ಪಂದ್ಯಗಳು ಮುಗಿದ ನಂತರ ಬಹಿರಂಗಪಡಿಸಲಾಗುವುದು ಎಂದು ಬಿಸಿಸಿಐ ತಿಳಿಸಿದೆ.

ಪ್ಲೇಆಫ್ ಪಂದ್ಯಗಳ ದಿನಾಂಕಗಳು

• ಕ್ವಾಲಿಫೈಯರ್ 1: ಮೇ 29 (ಸಂಜೆ 7:30)
• ಎಲಿಮಿನೇಟರ್: ಮೇ 30 (ಸಂಜೆ 7:30)
• ಕ್ವಾಲಿಫೈಯರ್ 2: ಜೂನ್ 1 (ಸಂಜೆ 7:30)
• ಫೈನಲ್: ಜೂನ್ 3 (ಸಂಜೆ 7:30)

ಐಪಿಎಲ್ 2025 ರ ಪರಿಷ್ಕೃತ ವೇಳಾಪಟ್ಟಿ (ಉಳಿದಿರುವ ಲೀಗ್ ಪಂದ್ಯಗಳು)

• ಮೇ 17: ಆರ್‌ಸಿಬಿ vs ಕೆಕೆಆರ್, ಬೆಂಗಳೂರು (ಸಂಜೆ 7:30)
• ಮೇ 18: ಆರ್‌ಆರ್ vs ಪಿಬಿಕೆಎಸ್, ಜೈಪುರ (ಮಧ್ಯಾಹ್ನ 3:30)
• ಮೇ 18: ದೆಹಲಿ vs ಗುಜರಾತ್‌, ದೆಹಲಿ (ಸಂಜೆ 7:30)
• ಮೇ 19: ಎಲ್‌ಎಸ್‌ಜಿ vs ಎಸ್‌ಆರ್‌ಎಚ್, ಲಕ್ನೋ (ಸಂಜೆ 7:30)
• ಮೇ 20: ಸಿಎಸ್‌ಕೆ vs ಆರ್‌ಆರ್, ದೆಹಲಿ (ಸಂಜೆ 7:30)
• ಮೇ 21: ಮುಂಬೈ vs ದೆಹಲಿ, ಮುಂಬೈ (ಸಂಜೆ 7:30)
• ಮೇ 22: ಗುಜರಾತ್‌ vs ಎಲ್‌ಎಸ್‌ಜಿ, ಅಹಮದಾಬಾದ್ (ಸಂಜೆ 7:30)
• ಮೇ 23: ಆರ್‌ಸಿಬಿ vs ಎಸ್‌ಆರ್‌ಎಚ್, ಬೆಂಗಳೂರು (ಸಂಜೆ 7:30)
• ಮೇ 24: ಪಂಜಾಬ್‌ vs ಡೆಲ್ಲಿ, ಜೈಪುರ (ಸಂಜೆ 7:30)
• ಮೇ 25: ಗುಜರಾತ್‌ vs ಸಿಎಸ್‌ಕೆ, ಅಹಮದಾಬಾದ್ (ಮಧ್ಯಾಹ್ನ 3:30)
• ಮೇ 25: ಎಸ್‌ಆರ್‌ಎಚ್ vs ಕೆಕೆಆರ್, ದೆಹಲಿ (ಸಂಜೆ 7:30)
• ಮೇ 26: ಪಂಜಾಬ್‌ vs ಮುಂಬೈ, ಜೈಪುರ (ಸಂಜೆ 7:30)
• ಮೇ 27: ಎಲ್‌ಎಸ್‌ಜಿ vs ಆರ್‌ಸಿಬಿ, ಲಕ್ನೋ (ಸಂಜೆ 7:30)

ಪಂದ್ಯಾವಳಿ ಪುನರಾರಂಭಗೊಳ್ಳುತ್ತಿರುವ ಹಿನ್ನೆಲೆಯಲ್ಲಿ, ಕೆಲವು ತಂಡಗಳು ಈಗಾಗಲೇ ಅಭ್ಯಾಸವನ್ನು ಶುರು ಮಾಡಿವೆ. ಶುಭಮನ್ ಗಿಲ್‌ ನೇತೃತ್ವದ ಗುಜರಾತ್‌ ಟೈಟಾನ್ಸ್ ತಂಡವು ಅಹಮದಾಬಾದ್‌ನ ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ತರಬೇತಿ ಪುನರಾರಂಭಿಸಿದೆ ಎಂದು ವರದಿಯಾಗಿದೆ.