Shubman Gill: ಗುಜರಾತ್ ಟೈಟಾನ್ಸ್ ನಾಯಕ ಶುಭ್‌ಮನ್ ಗಿಲ್‌ಗೆ ಗೆಲುವಿನ ನಡುವೆಯೇ ದಂಡದ ಬಿಸಿ

ಡೆಲ್ಲಿ ವಿರುದ್ಧ ಅಮೋಘ ವಿಜಯ ಸಾಧಿಸಿರುವ ಗುಜರಾತ್ ಟೈಟಾನ್ಸ್ (ಜಿಟಿ) ತಂಡದ ನಾಯಕ ಶುಭ್‌ಮನ್ ಗಿಲ್ ಅವರಿಗೆ ನಿಧಾನಗತಿಯ ಓವರ್ ರೇಟ್ ಕಾಯ್ದುಕೊಂಡಿದ್ದಕ್ಕಾಗಿ 12 ಲಕ್ಷ ರೂಪಾಯಿ ದಂಡ ವಿಧಿಸಲಾಗಿದೆ. ಈ ಪಂದ್ಯದಲ್ಲಿ ಜಿಟಿ ತಂಡವು 7 ವಿಕೆಟ್‌ಗಳಿಂದ ಭರ್ಜರಿ ಜಯ ಗಳಿಸಿದ್ದರೂ ದಂಡದ ಕಾರಣಕ್ಕೆ ಸಂಭ್ರಮಿಸಲು ಅವಕಾಶ ಸಿಕ್ಕಿಲ್ಲ.

ನರೇಂದ್ರ ಮೋದಿ ಕ್ರೀಡಾಂಗಣದಲ್ಲಿ ನಡೆದ ಈ ರೋಚಕ ಪಂದ್ಯದಲ್ಲಿ ಜಿಟಿ ತಂಡವು ಡಿಸಿ ವಿರುದ್ಧ 204 ರನ್‌ಗಳ ಗುರಿಯನ್ನು 19.2 ಓವರ್‌ಗಳಲ್ಲಿ ಯಶಸ್ವಿಯಾಗಿ ಬೆನ್ನಟ್ಟಿತು. ಜೋಸ್ ಬಟ್ಲರ್‌ರ ಅಮೋಘ 97* ರನ್‌ (54 ಎಸೆತ, 11 ಬೌಂಡರಿ, 4 ಸಿಕ್ಸ್‌) ಜಯದಲ್ಲಿ ಪ್ರಮುಖ ಪಾತ್ರ ವಹಿಸಿತು. ಆದರೆ, ತಂಡವು ನಿಗದಿತ ಸಮಯದಲ್ಲಿ ತನ್ನ ಓವರ್‌ಗಳನ್ನು ಪೂರೈಸಲು ವಿಫಲವಾದ ಕಾರಣ, ಐಪಿಎಲ್‌ನ ಕೋಡ್ ಆಫ್ ಕಂಡಕ್ಟ್‌ನ ಆರ್ಟಿಕಲ್ 2.22 ಪ್ರಕಾರ ಗಿಲ್‌ಗೆ ದಂಡ ವಿಧಿಸಲಾಗಿದೆ. ಇದು ಜಿಟಿಯ ಈ ಋತುವಿನ ಮೊದಲ ಓವರ್ ರೇಟ್ ಉಲ್ಲಂಘನೆಯಾಗಿದ್ದು, ಹೀಗಾಗಿ ಗಿಲ್‌ಗೆ 12 ಲಕ್ಷ ರೂಪಾಯಿ ದಂಡವನ್ನು ವಿಧಿಸಲಾಗಿದೆ ಎಂದು ಐಪಿಎಲ್ ತನ್ನ ಹೇಳಿಕೆಯಲ್ಲಿ ತಿಳಿಸಿದೆ.

ಹಲವರಿಗೆ ದಂಡದ ಬಿಸಿ

ದಂಡ ಹಾಕಿಸಿಕೊಂಡವರಲ್ಲಿ ಶುಭ್‌ಮನ್ ಗಿಲ್ ಜತೆ ಹಲವರಿದ್ದಾರೆ. ಡಿಸಿಯ ಅಕ್ಷರ್ ಪಟೇಲ್, ರಾಜಸ್ಥಾನ ರಾಯಲ್ಸ್‌ನ ಸಂಜು ಸ್ಯಾಮ್ಸನ್ ಮತ್ತು ರಿಯಾನ್ ಪರಾಗ್, ಮುಂಬೈ ಇಂಡಿಯನ್ಸ್‌ನ ಹಾರ್ದಿಕ್ ಪಾಂಡ್ಯ, ರಾಯಲ್ ಚಾಲೆಂಜರ್ಸ್ ಬೆಂಗಳೂರಿನ ರಜತ್ ಪಾಟಿದಾರ್ ಮತ್ತು ಲಕ್ನೋ ಸೂಪರ್ ಜೈಂಟ್ಸ್‌ನ ರಿಷಭ್ ಪಂತ್ ಕೂಡ ಇದೇ ರೀತಿಯ ಓವರ್ ರೇಟ್ ಉಲ್ಲಂಘನೆಗಾಗಿ ದಂಡಕ್ಕೆ ಒಳಗಾಗಿದ್ದಾರೆ. ಈ ವರ್ಷ ಐಪಿಎಲ್, ಪುನರಾವರ್ತಿತ ಓವರ್ ರೇಟ್ ಉಲ್ಲಂಘನೆಗಾಗಿ ಆಟಗಾರರನ್ನು ನಿಷೇಧಿಸುವ ಬದಲು ಕೇವಲ ದಂಡ ಮತ್ತು ಡಿಮೆರಿಟ್ ಪಾಯಿಂಟ್‌ಗಳನ್ನು ವಿಧಿಸುವ ನಿಯಮವನ್ನು ಜಾರಿಗೆ ತಂದಿದೆ.

ಪಂದ್ಯದಲ್ಲಿ ಏನಾಯಿತು?

ಪಂದ್ಯದಲ್ಲಿ ಡಿಸಿ ಮೊದಲು ಬ್ಯಾಟ್ ಮಾಡಿ, ಪ್ರಸಿದ್ಧ್ ಕೃಷ್ಣನ 4 ವಿಕೆಟ್ (4/41) ಸೇರಿದಂತೆ ಜಿಟಿಯ ಬೌಲರ್‌ಗಳ ಶಿಸ್ತಿನ ಬೌಲಿಂಗ್‌ಗೆ 20 ಓವರ್‌ಗಳಲ್ಲಿ 203/8 ರನ್ ಗಳಿಸಿತು. ಜವಾಬಾಗಿ, ಜಿಟಿಯ ಚೇಸ್‌ನಲ್ಲಿ ಜೋಸ್ ಬಟ್ಲರ್‌ರ ಸ್ಫೋಟಕ ಬ್ಯಾಟಿಂಗ್ ತಂಡವು 4 ಎಸೆತಗಳು ಬಾಕಿಯಿರುವಂತೆ ಗುರಿಯನ್ನು ತಲುಪಲು ಸಹಾಯ ಮಾಡಿತು. ಆದರೆ, ಅಹಮದಾಬಾದ್‌ನ 41 ಡಿಗ್ರಿ ಸೆಲ್ಸಿಯಸ್ ಶಾಖದಲ್ಲಿ ಆಟಗಾರರು ಡಿಹೈಡ್ರೇಷನ್ ಮತ್ತು ಸೆಳೆತದಿಂದ ಬಳಲುತ್ತಿದ್ದರಿಂದ ಪಂದ್ಯದಲ್ಲಿ ಆಗಾಗ ಸ್ಟಾಪೇಜ್‌ಗಳು ಉಂಟಾದವು. ಇದು ಓವರ್ ರೇಟ್ ಮೇಲೆ ಪರಿಣಾಮ ಬೀರಿತು ಎಂದು ವರದಿಗಳು ತಿಳಿಸಿವೆ.