Adhar App: ಫೇಸ್ ಡಿಟೆಕ್ಟ್, ಎಐ ಆಧಾರಿತ ಆ್ಯಪ್ ಸಿದ್ಧಪಡಿಸಿದ ಆಧಾರ್; ಏನಿದರ ವಿಶೇಷತೆ?
Adhar App: ಈ ಆ್ಯಪ್ ಪ್ರಸ್ತುತ ಬೀಟಾ ಆವೃತ್ತಿಯಲ್ಲಿದ್ದು, ಶೀಘ್ರದಲ್ಲೇ ಎಲ್ಲ ಬಳಕೆದಾರರಿಗೂ ಲಭ್ಯವಾಗುವ ನಿರೀಕ್ಷೆಯಿದೆ. ಕೇಂದ್ರ ಐಟಿ ಮತ್ತು ಎಲೆಕ್ಟ್ರಾನಿಕ್ಸ್ ಸಚಿವ ಅಶ್ವಿನಿ ವೈಷ್ಣವ್ ಅವರು ಈ ಆ್ಯಪ್ ಬಿಡುಗಡೆಯನ್ನು ಪ್ರಕಟಿಸಿದ್ದಾರೆ.;
ಸಾಂದರ್ಭಿಕ ಚಿತ್ರ.
ಭಾರತದ ವಿಶಿಷ್ಟ ಗುರುತಿನ ಪ್ರಾಧಿಕಾರ (UIDAI) ಆಧಾರ್‌ಗಾಗಿ ಹೊಸ ಮೊಬೈಲ್ ಆ್ಯಪ್ ಒಂದನ್ನು ಬಿಡುಗಡೆ ಮಾಡಿದ್ದು, ಫೇಸ್‌ಐಡಿ ಮತ್ತು ಕೃತಕ ಬುದ್ಧಿಮತ್ತೆ (AI) ಆಧಾರಿತ ತಂತ್ರಜ್ಞಾನದೊಂದಿಗೆ ಅದು ಕಾರ್ಯನಿರ್ವಹಿಸಲಿದೆ. ಈ ಆ್ಯಪ್ ಪ್ರಸ್ತುತ ಬೀಟಾ ಆವೃತ್ತಿಯಲ್ಲಿದ್ದು, ಶೀಘ್ರದಲ್ಲೇ ಎಲ್ಲ ಬಳಕೆದಾರರಿಗೂ ಲಭ್ಯವಾಗುವ ನಿರೀಕ್ಷೆಯಿದೆ. ಕೇಂದ್ರ ಐಟಿ ಮತ್ತು ಎಲೆಕ್ಟ್ರಾನಿಕ್ಸ್ ಸಚಿವ ಅಶ್ವಿನಿ ವೈಷ್ಣವ್ ಅವರು ಈ ಆ್ಯಪ್ ಬಿಡುಗಡೆಯನ್ನು ಪ್ರಕಟಿಸಿದ್ದಾರೆ.
ಆಪ್‌ನ ವಿಶೇಷತೆಗಳೇನು?
- ಫೇಸ್‌ಐಡಿ ದೃಢೀಕರಣ : ಈ ಆ್ಯಪ್‌ನ ಮೂಲಕ ಬಳಕೆದಾರರು ತಮ್ಮ ಮುಖದ ಗುರುತಿನ ಮೂಲಕ ಕ್ಷಣಮಾತ್ರದಲ್ಲಿ ತಮ್ಮ ಗುರುತನ್ನು ದೃಢೀಕರಿಸಬಹುದು. ಇದು ಆಧಾರ್ ಕಾರ್ಡ್‌ನ ಭೌತಿಕ ಪ್ರತಿಯನ್ನು (ಹಾರ್ಡ್ ಕಾಫಿ) ಸಾಗಿಸುವ ಅಗತ್ಯ ತೆಗೆದುಹಾಕುತ್ತದೆ.
- ಕ್ಯೂಆರ್ ಕೋಡ್ ಆಧಾರಿತ ದೃಢೀಕರಣ: ಬಳಕೆದಾರರು ಕ್ಯೂಆರ್ ಕೋಡ್ ಸ್ಕ್ಯಾನ್ ಮಾಡುವ ಮೂಲಕ ತಮ್ಮ ಗುರುತನ್ನು ತಕ್ಷಣವೇ ಪರಿಶೀಲಿಸಬಹುದು. ಇದನ್ನು ಹೋಟೆಲ್‌ಗಳು, ಅಂಗಡಿಗಳು ಮತ್ತು ಪ್ರಯಾಣದ ಸಂದರ್ಭಗಳಲ್ಲಿ ದಾಖಲೆ ತೋರಿಸಲು ಬಳಸಬಹುದು.
- ಗೌಪ್ಯತೆ ಮತ್ತು ಸುರಕ್ಷತೆ: ಈ ಆ್ಯಪ್ ಸಂಪೂರ್ಣ ಡಿಜಿಟಲ್ ಆಗಿದ್ದು, ಬಳಕೆದಾರರ ಒಪ್ಪಿಗೆಯಿಲ್ಲದೆ ಯಾವುದೇ ಮಾಹಿತಿ ಹಂಚಿಕೊಳ್ಳುವುದಿಲ್ಲ. ಫೇಸ್‌ಐಡಿ ತಂತ್ರಜ್ಞಾನವು ಮೋಸ, ಡೇಟಾ ಸೋರಿಕೆ ಮತ್ತು ದುರುಪಯೋಗ ತಡೆಗಟ್ಟಲು ಹೆಚ್ಚುವರಿ ಸುರಕ್ಷತಾ ಫೀಚ್ ಹೊಂದಿರುತ್ತದೆ.
- ಕಾಗದರಹಿತ ವ್ಯವಸ್ಥೆ: ಈ ಆ್ಯಪ್ ಇದ್ದರೆ ಆಧಾರ್‌ನ ಫೋಟೊಕಾಪಿಗಳನ್ನು ಸಲ್ಲಿಸುವ ಅಗತ್ಯವಿಲ್ಲ, ಇದರಿಂದ ಗೌಪ್ಯತೆ ಸಂಬಂಧಿತ ಸಮಸ್ಯೆಗಳನ್ನು ಕಡಿಮೆ ಮಾಡಲಾಗುತ್ತದೆ.
ಆ್ಯಪ್‌ನ ಉದ್ದೇಶವೇನು?
ಈ ಆ್ಯಪ್‌ನ ಮುಖ್ಯ ಉದ್ದೇಶವು ಆಧಾರ್ ದೃಢೀಕರಣವನ್ನು ಯುಪಿಐ ಪಾವತಿಯಂತೆ ಸರಳಗೊಳಿಸುದಾಗಿದೆ. ಆಧಾರ್ ಪರಿಶೀಲನೆಯನ್ನು ಯುಪಿಐ ಪಾವತಿಯಂತೆ ಸರಳವಾಗಿಸಲಾಗಿದೆ ಎಂದು ಸಚಿವ ಅಶ್ವಿನಿ ವೈಷ್ಣವ್ ತಮ್ಮ ಎಕ್ಸ್ ಖಾತೆಯಲ್ಲಿ ತಿಳಿಸಿದ್ದಾರೆ. ಈ ಆ್ಯಪ್‌ನಿಂದಾಗಿ ಆಧಾರ್ ಕಾರ್ಡ್‌ನ ದುರುಪಯೋಗ ತಡೆಗಟ್ಟಬಹುದು ಮತ್ತು ಸೇವೆಗಳನ್ನು ಸುಲಭವಾಗಿ ಪಡೆಯಬಹುದು.
ಗೌಪ್ಯತೆ ಕಾಳಜಿ
ಈ ಆ್ಯಪ್‌ನ ಬಿಡುಗಡೆಯೊಂದಿಗೆ, ಕೆಲವು ಗೌಪ್ಯತೆ ಸಂಬಂಧಿತ ಚರ್ಚೆಗಳು ಸಹ ಆರಂಭವಾಗಿವೆ. ಫೇಸ್‌ಐಡಿ ತಂತ್ರಜ್ಞಾನವು ಸ್ಪೂಫಿಂಗ್ ದಾಳಿಗಳಿಗೆ ಒಳಗಾಗಬಹುದು ಎಂಬ ಆತಂಕವಿದೆ. ಆದರೆ, UIDAI ಈ ಆ್ಯಪ್ನಲ್ಲಿ ಎನ್‌ಕ್ರಿಪ್ಶನ್, ಆಂಟಿ-ಸ್ಪೂಫಿಂಗ್ ತಂತ್ರಜ್ಞಾನ ಮತ್ತು ಬಯೋಮೆಟ್ರಿಕ್ ಲಾಕಿಂಗ್‌ನಂತಹ ಸುರಕ್ಷತಾ ವೈಶಿಷ್ಟ್ಯಗಳನ್ನು ಸೇರಿಸಿದೆ ಎಂದು ತಿಳಿಸಿದೆ.
ಎಲ್ಲರಿಗೂ ಲಭ್ಯವೇ?
ಒಂದು ಬಾರಿ ಆ್ಯಪ್ ಸಿದ್ಧಗೊಂಡ ಬಳಿಕ ಎಲ್ಲರಿಗೂ ಲಭ್ಯವಾಗಲಿದೆ. ಆದರೆ ಪ್ರಸ್ತುತ ಆ್ಯಪ್ ಬೀಟಾ ಟೆಸ್ಟಿಂಗ್ ಹಂತದಲ್ಲಿದ್ದು, ಆಧಾರ್ ಸಂವಾದ ಕಾರ್ಯಕ್ರಮದಲ್ಲಿ ಭಾಗವಹಿಸುವವರಿಗೆ ಮತ್ತು ಕೆಲವು ಆಯ್ದ ಗುಂಪುಗಳಿಗೆ ಲಭ್ಯವಿದೆ. ಬಳಕೆದಾರರ ಪ್ರತಿಕ್ರಿಯೆಯ ಆಧಾರದ ಮೇಲೆ ಶೀಘ್ರದಲ್ಲೇ ಸಾಮಾನ್ಯ ಜನರಿಗೆ ಬಿಡುಗಡೆ ಮಾಡುವ ಯೋಜನೆಯಿದೆ.
ಹೊಸ ಆಧಾರ್ ಆಪ್ ಭಾರತದ ಡಿಜಿಟಲ್ ಗುರುತಿನ ವ್ಯವಸ್ಥೆಯಲ್ಲಿ ಕ್ರಾಂತಿಕಾರಕ ಬದಲಾವಣೆಯನ್ನು ತರಲಿದೆ. ಇದು ಗೌಪ್ಯತೆ, ಸುರಕ್ಷತೆ ಮತ್ತು ಸುಲಭತೆಯನ್ನು ಒದಗಿಸುವ ಗುರಿಯನ್ನು ಹೊಂದಿದ್ದು, ಆಧಾರ್ ಸೇವೆಗಳನ್ನು ಇನ್ನಷ್ಟು ಪರಿಣಾಮಕಾರಿಯಾಗಿ ಮಾಡಲಿದೆ