'ಅಬ್​ ಕಿ ಬಾರ್​ ಮೋದಿ ಸರ್ಕಾರ್' ಕರ್ತೃ; ಜಾಹೀರಾತು ಲೋಕದ ದಂತಕಥೆ ಪಿಯೂಷ್ ಪಾಂಡೆ ಇನ್ನಿಲ್ಲ

ಭಾರತೀಯ ಜಾಹೀರಾತು ಜಗತ್ತಿಗೆ ಹೊಸ ಭಾಷ್ಯ ಬರೆದ, ಫೆವಿಕಾಲ್, ಕ್ಯಾಡ್ಬರಿಯಂತಹ ಅಸಂಖ್ಯಾತ ಸ್ಮರಣೀಯ ಜಾಹೀರಾತುಗಳ ಹಿಂದಿನ ಸೃಜನಶೀಲ ಶಕ್ತಿ, 'ಜಾಹೀರಾತು ಲೋಕದ ಪಿತಾಮಹ' ಎಂದೇ ಖ್ಯಾತರಾಗಿದ್ದ ಪಿಯೂಷ್ ಪಾಂಡೆ (70) ಅವರು ಶುಕ್ರವಾರ ಮುಂಬಯಿಯಲ್ಲಿ ನಿಧನರಾಗಿದ್ದಾರೆ.

ಕಳೆದ ಕೆಲವು ದಿನಗಳಿಂದ ಕೆಲವೊಂದು ಸೋಂಕಿನಿಂದ ಬಳಲುತ್ತಿದ್ದ ಅವರು ಚಿಕಿತ್ಸೆ ಫಲಕಾರಿಯಾಗದೆ ಇಹಲೋಕ ತ್ಯಜಿಸಿದ್ದಾರೆ. ಅವರ ನಿಧನಕ್ಕೆ ಜಾಹೀರಾತು, ಕಾರ್ಪೊರೇಟ್ ಮತ್ತು ರಾಜಕೀಯ ಕ್ಷೇತ್ರಗಳ ಗಣ್ಯರು ಕಂಬನಿ ಮಿಡಿದಿದ್ದಾರೆ.

ಸ್ಮರಣೀಯ ಜಾಹೀರಾತುಗಳ ರೂವಾರಿ

ಪಿಯೂಷ್ ಪಾಂಡೆ ಅವರ ಹೆಸರು ಕೇಳಿದೊಡನೆ ನೆನಪಾಗುವುದು ಅವರು ಸೃಷ್ಟಿಸಿದ ಜನಪ್ರಿಯ ಜಾಹೀರಾತುಗಳು. ಬ್ರ್ಯಾಂಡ್‌ಗಳಿಗೆ ಕೇವಲ ಪ್ರಚಾರ ನೀಡದೆ, ಜನರ ಮನಸ್ಸಿನಲ್ಲಿ ದಶಕಗಳ ಕಾಲ ಉಳಿಯುವಂತಹ ಕಥೆಗಳನ್ನು ಕಟ್ಟಿಕೊಟ್ಟ ಹೆಗ್ಗಳಿಕೆ ಅವರದ್ದು. ಅವರ ಕೆಲವು ಅತ್ಯುತ್ತಮ ಕೃತಿಗಳು ಭಾರತೀಯರ ನಿತ್ಯಜೀವನದ ಭಾಗವಾಗಿವೆ.

* ಕ್ಯಾಡ್​ಬರಿಯ 'Kuch Khaas Hai' ಅಭಿಯಾನ

* ಫೆವಿಕಾಲ್‌ನ ಹಾಸ್ಯಮಯ ಮತ್ತು ಭಾವನಾತ್ಮಕ ಜಾಹೀರಾತುಗಳು

* ಏಷ್ಯನ್ ಪೇಂಟ್ಸ್‌ನ 'Har Khushi Mein Rang Laye'

* ವೊಡಾಫೋನ್‌ನ ಜನಪ್ರಿಯ ಪಗ್ ಮತ್ತು ಝೂಝೂ ಜಾಹೀರಾತುಗಳು

* ಫೆವಿಕ್ವಿಕ್‌ನ 'Todo Nahin, Jodo' ಪರಿಕಲ್ಪನೆ

* ಪಾಂಡ್ಸ್‌ನ 'Googly Woogly Woosh'

ರಾಜಕೀಯ, ಸಾಮಾಜಿಕ ಕ್ಷೇತ್ರಕ್ಕೂ ವಿಸ್ತರಿಸಿದ್ದ ಪ್ರತಿಭೆ

ಕೇವಲ ಕಾರ್ಪೊರೇಟ್ ಉತ್ಪನ್ನಗಳಿಗೆ ಮಾತ್ರವಲ್ಲದೆ, ರಾಜಕೀಯ ಮತ್ತು ಸಾಮಾಜಿಕ ಅಭಿಯಾನಗಳಿಗೂ ಪಿಯೂಷ್ ಪಾಂಡೆ ತಮ್ಮ ಸೃಜನಶೀಲತೆಯ ಸ್ಪರ್ಶ ನೀಡಿದ್ದರು. 2014ರ ಲೋಕಸಭಾ ಚುನಾವಣೆಯಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಪ್ರಚಾರಕ್ಕಾಗಿ ಅವರು ಸಿದ್ಧಪಡಿಸಿದ "Ab ki baar, Modi sarkar" ಘೋಷವಾಕ್ಯ ದೇಶದಾದ್ಯಂತ ಜನಪ್ರಿಯವಾಯಿತು. ಇದಲ್ಲದೆ, ಅಮಿತಾಭ್ ಬಚ್ಚನ್ ಅವರನ್ನೊಳಗೊಂಡ ಪೋಲಿಯೊ ನಿರ್ಮೂಲನಾ ಜಾಗೃತಿ ಅಭಿಯಾನ, ಗುಜರಾತ್ ಪ್ರವಾಸೋದ್ಯಮ ಮತ್ತು ಕ್ಯಾನ್ಸರ್ ರೋಗಿಗಳ ಸಂಘದಂತಹ ಸಾರ್ವಜನಿಕ ಸೇವಾ ಜಾಹೀರಾತುಗಳೂ ಅವರ ಹೆಗ್ಗಳಿಕೆಗೆ ಸೇರಿವೆ.

ಬಹುಮುಖ ಪ್ರತಿಭೆ 

ಪಿಯೂಷ್ ಪಾಂಡೆ ಅವರ ಪ್ರತಿಭೆ ಜಾಹೀರಾತು ಲೋಕಕ್ಕೆ ಮಾತ್ರ ಸೀಮಿತವಾಗಿರಲಿಲ್ಲ. ಅವರು ಚಲನಚಿತ್ರ, ಸಂಗೀತ ಮತ್ತು ಸಾಮಾಜಿಕ ಕ್ಷೇತ್ರಗಳಲ್ಲೂ ತಮ್ಮ ಹೆಜ್ಜೆಗುರುತುಗಳನ್ನು ಮೂಡಿಸಿದ್ದಾರೆ. ದೇಶದಾದ್ಯಂತ ಜನಪ್ರಿಯವಾದ ರಾಷ್ಟ್ರೀಯ ಭಾವೈಕ್ಯತಾ ಗೀತೆ 'Mile Sur Mera Tumhara'ಗೆ ಸಾಹಿತ್ಯ ಬರೆದಿದ್ದು ಅವರೇ. ಇದಲ್ಲದೆ, 'ಭೋಪಾಲ್ ಎಕ್ಸ್‌ಪ್ರೆಸ್' ಚಿತ್ರಕ್ಕೆ ಸಹ-ಚಿತ್ರಕಥೆಗಾರರಾಗಿ ಕೆಲಸ ಮಾಡಿದ್ದರು ಹಾಗೂ 2013ರಲ್ಲಿ ತೆರೆಕಂಡ ಜಾನ್ ಅಬ್ರಹಾಂ ಅಭಿನಯದ 'ಮದ್ರಾಸ್ ಕೆಫೆ' ಚಿತ್ರದಲ್ಲಿ ಸಣ್ಣ ಪಾತ್ರದಲ್ಲಿ ನಟಿಸಿ ಗಮನ ಸೆಳೆದಿದ್ದರು.

ಓಗಿಲ್ವಿಯಲ್ಲಿ ನಾಲ್ಕು ದಶಕಗಳ ಪಯಣ

1982ರಲ್ಲಿ ಜಾಹೀರಾತು ಸಂಸ್ಥೆ 'ಓಗಿಲ್ವಿ'ಗೆ ಸೇರಿದ ಪಾಂಡೆ, ಸನ್‌ಲೈಟ್ ಡಿಟರ್ಜೆಂಟ್‌ಗಾಗಿ ತಮ್ಮ ಮೊದಲ ಜಾಹೀರಾತನ್ನು ಬರೆದರು. ನಂತರ ಸಂಸ್ಥೆಯ ಸೃಜನಶೀಲ ವಿಭಾಗಕ್ಕೆ ಕಾಲಿಟ್ಟು, ಮುಂದೆಂದೂ ಹಿಂತಿರುಗಿ ನೋಡಲಿಲ್ಲ. ಸುಮಾರು ನಾಲ್ಕು ದಶಕಗಳ ಕಾಲ ಓಗಿಲ್ವಿಯಲ್ಲಿ ಸೇವೆ ಸಲ್ಲಿಸಿದ ಅವರು, ಸಂಸ್ಥೆಯ ಮುಖ್ಯ ಸೃಜನಶೀಲ ಅಧಿಕಾರಿ (ವಿಶ್ವದಾದ್ಯಂತ) ಮತ್ತು ಭಾರತದ ಕಾರ್ಯನಿರ್ವಾಹಕ ಅಧ್ಯಕ್ಷರ ಹುದ್ದೆಗೇರಿದ್ದರು. ಅವರ ನಾಯಕತ್ವದಲ್ಲಿ 'ಓಗಿಲ್ವಿ ಇಂಡಿಯಾ' ಸತತ 12 ವರ್ಷಗಳ ಕಾಲ ದೇಶದ ನಂಬರ್ ಒನ್ ಜಾಹೀರಾತು ಏಜೆನ್ಸಿಯಾಗಿ ಹೊರಹೊಮ್ಮಿತ್ತು.

ಸಂದ ಪ್ರಶಸ್ತಿ, ಗೌರವಗಳು

ತಮ್ಮ ಅನುಪಮ ಸೇವೆಗಾಗಿ ಪಿಯೂಷ್ ಪಾಂಡೆ ಅವರು ಹಲವಾರು ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಪ್ರಶಸ್ತಿಗಳಿಗೆ ಭಾಜನರಾಗಿದ್ದರು. 2016ರಲ್ಲಿ ಭಾರತ ಸರ್ಕಾರ ಅವರಿಗೆ ಪದ್ಮಶ್ರೀ ಪ್ರಶಸ್ತಿ ನೀಡಿ ಗೌರವಿಸಿತ್ತು. ಇತ್ತೀಚೆಗೆ 2024ರಲ್ಲಿ ಅವರಿಗೆ ಪ್ರತಿಷ್ಠಿತ LIA ಲೆಜೆಂಡ್ ಪ್ರಶಸ್ತಿಯೂ ಸಂದಿತ್ತು.