ಮುಟ್ಟಿನ ವೇದನೆ ಬಗ್ಗೆ ಮಾತನಾಡಿದ ರಶ್ಮಿಕಾ; ಮತ್ತೆ ಟ್ರೆಂಡ್​ ಆದ 'ನ್ಯಾಷನಲ್ ಕ್ರಶ್'

ಈ ಹಿಂದೆ `ಚಲನಚಿತ್ರೋದ್ಯಮದಲ್ಲಿ 9 ರಿಂದ 4 ಗಂಟೆಗಳ ಕೆಲಸದ ಸಮಯ'ದ ಕುರಿತಾದ ತಮ್ಮ ಹೇಳಿಕೆಗಳಿಂದ ಸುದ್ದಿಯಾಗಿದ್ದ ನಟಿ ರಶ್ಮಿಕಾ ಮಂದಣ್ಣ ಈಗ ತಮ್ಮ ಮತ್ತೊಂದು ವಿಭಿನ್ನ ಹೇಳಿಕೆಯ ಮೂಲಕ ಮತ್ತೆ ಚರ್ಚೆಯ ಕೇಂದ್ರಬಿಂದುವಾಗಿದ್ದಾರೆ. ಈ ಬಾರಿ, ಅವರು ಮುಟ್ಟಿನ ಅವಧಿಯ ಬಗ್ಗೆ ನೀಡಿರುವ ಹೇಳಿಕೆಗಳು ಸಾಮಾಜಿಕ ಮಾಧ್ಯಮದಲ್ಲಿ ಭಾರಿ ಚರ್ಚೆ ಮತ್ತು ಪರ-ವಿರೋಧದ ಅಭಿಪ್ರಾಯಗಳನ್ನು ಹುಟ್ಟುಹಾಕಿವೆ.

ಇತ್ತೀಚೆಗೆ ನಟ ಜಗಪತಿ ಬಾಬು ಅವರ ಚಾಟ್ ಶೋ 'ಜಯಮ್ಮು ನಿಶ್ಚಿತಮ್ಮು ರಾ' ದ ಇತ್ತೀಚಿನ ಸಂಚಿಕೆಯಲ್ಲಿ ರಶ್ಮಿಕಾ ಅತಿಥಿಯಾಗಿ ಭಾಗವಹಿಸಿದ್ದರು. ಮುಂಬರುವ ಸಂಚಿಕೆಯ ಪ್ರೋಮೋವೊಂದು ಈಗ ವೈರಲ್ ಆಗಿದೆ. ಈ ಪ್ರೋಮೋದಲ್ಲಿ, ಜಗಪತಿ ಬಾಬು ಅವರು, ಪುರುಷರಿಗೂ ಮುಟ್ಟು ಬರಬೇಕೆಂದು ನೀವು ಬಯಸುತ್ತೀರಾ? ಎಂದು ರಶ್ಮಿಕಾ ಅವರನ್ನು ಪ್ರಶ್ನಿಸುತ್ತಾರೆ. ಇದಕ್ಕೆ ಉತ್ತರಿಸಿದ ರಶ್ಮಿಕಾ, ಹೌದು ಸರ್. ಪುರುಷರು ಒಮ್ಮೆಯಾದರೂ ಮುಟ್ಟು ಆಗಬೇಕು, ಇದರಿಂದ ಅವರಿಗೆ ಆ ನೋವು ತಿಳಿಯುತ್ತದೆ ಎಂದು ನೇರವಾಗಿ ಹೇಳಿದ್ದಾರೆ. ಮಹಿಳೆಯರು ಪ್ರತಿ ತಿಂಗಳು ಅನುಭವಿಸುವ ನೋವನ್ನು ಪುರುಷರು ಅರ್ಥಮಾಡಿಕೊಳ್ಳಲು ಒಮ್ಮೆಯಾದರೂ ಈ ಅನುಭವವಾಗಬೇಕು ಎಂಬುದು ಅವರ ಅಭಿಪ್ರಾಯವಾಗಿದೆ.

ರಶ್ಮಿಕಾ ಅವರ ಈ ಹೇಳಿಕೆ ಸಾಮಾಜಿಕ ಜಾಲತಾಣಗಳಲ್ಲಿ ಬಿಸಿಬಿಸಿ ಚರ್ಚೆಗಳನ್ನು ಹುಟ್ಟುಹಾಕಿದೆ. ಕೆಲವು ನೆಟಿಜನ್‌ಗಳು ಅವರ ಈ ದೃಷ್ಟಿಕೋನವನ್ನು ಬೆಂಬಲಿಸಿ ಪ್ರಶಂಸೆ ವ್ಯಕ್ತಪಡಿಸಿದ್ದರೆ, ಇನ್ನು ಕೆಲವರು ಇದನ್ನು ಟೀಕಿಸಿ ಆನ್‌ಲೈನ್‌ನಲ್ಲಿ ವಾದ-ವಿವಾದಗಳಿಗೆ ಕಾರಣರಾಗಿದ್ದಾರೆ.

ನಮಗೆ ಪ್ರತಿ ತಿಂಗಳು ರಕ್ತಸ್ರಾವವಾಗುವುದಿಲ್ಲ, ಆದರೆ ನಮಗೆ ಪ್ರತಿದಿನ ಒಳಗೆ ರಕ್ತಸ್ರಾವವಾಗುತ್ತದೆ. ಇಎಂಐ ಪಾವತಿಸಲು, ಕುಟುಂಬಗಳನ್ನು ಪೋಷಿಸಲು ಮತ್ತು ಇನ್ನೂ ಸವಲತ್ತು ಪಡೆದವರು ಎಂದು ಕರೆಯಲ್ಪಡುತ್ತಿದ್ದರೂ ಹದಿನಾಲ್ಕು ಗಂಟೆಗಳ ಕಾಲ ಕೆಲಸ ಮಾಡುವುದು. ಎಂಬ ಪ್ರತಿಕ್ರಿಯೆಗಳು ವ್ಯಕ್ತವಾಗಿದೆ. 

ರಶ್ಮಿಕಾ ಅವರ ಮೂಲ ಉದ್ದೇಶ ನಿಜವಾಗಿದ್ದರೂ, ಇಂತಹ ಮಾತುಗಳು ತಮ್ಮದೇ ಆದ ನೋವು, ಒತ್ತಡ ಮತ್ತು ಮೌನ ಯಾತನೆಗಳನ್ನು ಎದುರಿಸುತ್ತಿರುವ ಪುರುಷರನ್ನು ತಿರಸ್ಕರಿಸಿದಂತೆ ಕಾಣಬಹುದು ಎಂದು ಹಲವು ನೆಟ್ಟಿಗರು ಗಮನಸೆಳೆದರು. ಅನೇಕರಿಗೆ, ಇದು ಲಿಂಗಭೇದಕ್ಕಿಂತ ಹೆಚ್ಚಾಗಿ, ಪ್ರತಿಯೊಬ್ಬರೂ ಗಮನಕ್ಕೆ ಬಾರದೆ ಎದುರಿಸುವ ಅದೃಶ್ಯ ಯುದ್ಧಗಳ ಬಗ್ಗೆ ಮಾತನಾಡುತ್ತದೆ.

ಕೆಲವು ಸಾಮಾಜಿಕ ಮಾಧ್ಯಮ ಬಳಕೆದಾರರು ಹೇಳುವಂತೆ, ನಿಜವಾದ ಸಹಾನುಭೂತಿ ಎಂದರೆ ಪುರುಷರು ಮತ್ತು ಮಹಿಳೆಯರು ನೋವಿನ ಹೋಲಿಕೆಯನ್ನು ನಿಲ್ಲಿಸಿ ದಯೆ ಮತ್ತು ಗೌರವದಿಂದ ಪರಸ್ಪರ ಅರ್ಥಮಾಡಿಕೊಳ್ಳಲು ಆರಂಭಿಸಿದಾಗ ಮಾತ್ರ ಸಾಧ್ಯ ಎಂದು ಒಬ್ಬರು ಅಭಿಪ್ರಾಯಪಟ್ಟಿದ್ದಾರೆ. 

ಈ ಎಲ್ಲಾ ಟೀಕೆಗಳ ನಡುವೆ ನಟಿ ರಶ್ಮಿಕಾ ಮಂದಣ್ಣ ಅವರ ನಟನೆ 'ದಿ ಗರ್ಲ್‌ಫ್ರೆಂಡ್' ಸಿನಿಮಾ ಇಂದು ಬಿಡುಗಡೆಯಾಗಿದೆ. ರಾಹುಲ್ ರವೀಂದ್ರನ್ ನಿರ್ದೇಶನದ ಈ ಚಿತ್ರದಲ್ಲಿ ದೀಕ್ಷಿತ್ ಶೆಟ್ಟಿ ಮತ್ತು ಅನು ಎಮ್ಯಾನುಯೆಲ್ ಅವರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.