50ರ ಹರೆಯದ ರಘು ದೀಕ್ಷಿತ್ ಗ್ರ್ಯಾಮಿ ನಾಮಿನಿ ವಾರಿಜಾಶ್ರೀ ಜೊತೆ ವಿವಾಹ
ರಘು ದೀಕ್ಷಿತ್ ಅವರು ಈ ಹಿಂದೆ ನೃತ್ಯ ಸಂಯೋಜಕಿ ಮಯೂರಿ ಉಪಾಧ್ಯ ಅವರನ್ನು 2005 ರಲ್ಲಿ ವಿವಾಹವಾಗಿದ್ದರು ಮತ್ತು 2019 ರಲ್ಲಿ ವಿಚ್ಛೇದನ ಪಡೆದಿದ್ದರು.
ಗ್ರ್ಯಾಮಿ ನಾಮಿನಿ ವಾರಿಜಾಶ್ರೀ ಜೊತೆ ರಘು ದೀಕ್ಷಿತ್ ವಿವಾಹ
ಖ್ಯಾತ ಗಾಯಕ ಹಾಗೂ ಸಂಗೀತ ಸಂಯೋಜಕ ರಘು ದೀಕ್ಷಿತ್ ಅವರು ತಮ್ಮ ಜೀವನದಲ್ಲಿ ಮತ್ತೊಂದು ಹೊಸ ಅಧ್ಯಾಯ ಆರಂಭಿಸಲು ಸಜ್ಜಾಗಿದ್ದಾರೆ. ಗ್ರ್ಯಾಮಿ ಪ್ರಶಸ್ತಿಗೆ ನಾಮನಿರ್ದೇಶನಗೊಂಡಿರುವ ಪ್ರತಿಭಾವಂತ ಗಾಯಕಿ ಮತ್ತು ಕೊಳಲುವಾದಕಿ ವಾರಿಜಾಶ್ರೀ ವೇಣುಗೋಪಾಲ್ ಅವರೊಂದಿಗೆ ಅವರು ವೈವಾಹಿಕ ಜೀವನಕ್ಕೆ ಕಾಲಿಡಲಿದ್ದಾರೆ. ದೀರ್ಘಕಾಲದ ಸ್ನೇಹಿತರಾಗಿದ್ದ ಈ ಸಂಗೀತ ಜೋಡಿ, ಇದೇ ತಿಂಗಳ ಕೊನೆಯಲ್ಲಿ ನಡೆಯಲಿರುವ ಒಂದು ಸರಳ ಮತ್ತು ಆಪ್ತ ಸಮಾರಂಭದಲ್ಲಿ ಹಸೆಮಣೆ ಏರಲಿದ್ದಾರೆ.
ಬೆಂಗಳೂರು ಟೈಮ್ಸ್‌ಗೆ ನೀಡಿದ ವಿಶೇಷ ಸಂದರ್ಶನದಲ್ಲಿ, 50 ವರ್ಷದ ರಘು ದೀಕ್ಷಿತ್ ಅವರು 34 ವರ್ಷದ ವಾರಿಜಾಶ್ರೀ ಅವರನ್ನು ವಿವಾಹವಾಗುತ್ತಿರುವ ವಿಷಯವನ್ನು ಖಚಿತಪಡಿಸಿದ್ದಾರೆ. ತಮ್ಮ ಸಂಬಂಧವು ಸ್ನೇಹದಿಂದ ಪ್ರಾರಂಭವಾಗಿ, ಕ್ರಮೇಣ ಪ್ರೀತಿ ಮತ್ತು ಒಡನಾಟವಾಗಿ ಬೆಳೆಯಿತು ಎಂದು ಅವರು ಹೇಳಿದ್ದಾರೆ.
"ನಾನು ಪ್ರಾಮಾಣಿಕವಾಗಿ ಹೇಳಬೇಕೆಂದರೆ, ಹೀಗಾಗುತ್ತದೆಂದು ನಾನು ನಿರೀಕ್ಷಿಸಿರಲಿಲ್ಲ. ನನ್ನ ಮುಂದಿನ ಜೀವನದುದ್ದಕ್ಕೂ ಒಂಟಿಯಾಗಿರಲು ನನ್ನನ್ನು ಸಿದ್ಧಪಡಿಸಿಕೊಂಡಿದ್ದೆ, ಆದರೆ ವಿಧಿ ಬೇರೆಯೇ ಯೋಜನೆಗಳನ್ನು ಮಾಡಿತ್ತು. ನಮ್ಮಿಬ್ಬರ ಆಸಕ್ತಿಗಳು ಒಂದೇ ಆಗಿದ್ದು, ನಾವು ಉತ್ತಮ ಸಂಪರ್ಕ ಹೊಂದಿದ್ದೇವೆ. ವಾರಿಜಾಶ್ರೀ ಅವರ ಪೋಷಕರ ಆಶೀರ್ವಾದದೊಂದಿಗೆ ಈ ಹೊಸ ಜೀವನವನ್ನು ಆರಂಭಿಸಲು ಉತ್ಸುಕರಾಗಿದ್ದೇವೆ" ಎಂದು ರಘು ಸಂತಸ ಹಂಚಿಕೊಂಡಿದ್ದಾರೆ.
ಈ ಹಿಂದೆ ಫೆಬ್ರವರಿಯಲ್ಲಿ, ವಾರಿಜಾಶ್ರೀ ಅವರ ಗ್ರ್ಯಾಮಿ ನಾಮನಿರ್ದೇಶನಕ್ಕೆ ಅಭಿನಂದಿಸಿ ಇನ್‌ಸ್ಟಾಗ್ರಾಮ್‌ನಲ್ಲಿ ಪೋಸ್ಟ್ ಮಾಡಿದ್ದ ರಘು, ಅವರನ್ನು "ನನ್ನ ಸ್ನೇಹಿತೆ ಎಂದು ಹೇಳಲು ಹೆಮ್ಮೆಪಡುತ್ತೇನೆ" ಎಂದು ಬರೆದುಕೊಂಡಿದ್ದರು.
ವಾರಿಜಾಶ್ರೀ: ಅಂತರರಾಷ್ಟ್ರೀಯ ಖ್ಯಾತಿಯ ಕಲಾವಿದೆ
ವಾರಿಜಾಶ್ರೀ ವೇಣುಗೋಪಾಲ್ ಅವರು ಅಂತರರಾಷ್ಟ್ರೀಯ ಮಟ್ಟದಲ್ಲಿ ಹೆಸರು ಮಾಡಿರುವ ಕಲಾವಿದೆ. ಕರ್ನಾಟಕ ಸಂಗೀತ ಮತ್ತು ಜಾಝ್ ಸಂಗೀತವನ್ನು ಸೃಷ್ಟಿ ಮಾಡಿ 'ಕರ್ನಾಟಕ ಸ್ಕ್ಯಾಟ್ ಸಿಂಗಿಂಗ್' ಎಂಬ ವಿಶಿಷ್ಟ ಕಲಾ ಪ್ರಕಾರವನ್ನು ಸೃಷ್ಟಿಸಿದ ಕೀರ್ತಿ ಇವರದ್ದು. ಪ್ರಸಿದ್ಧ ಸಂಗೀತಗಾರರಾದ ಎಚ್.ಎಸ್. ವೇಣುಗೋಪಾಲ್ ಮತ್ತು ಟಿ.ವಿ. ರಾಮ ಅವರ ಪುತ್ರಿಯಾಗಿರುವ ವಾರಿಜಾಶ್ರೀ, ‘ಚಾರ್ಕಾಫೋನಿಕ್ಸ್’, ‘EYM ಟ್ರಿಯೊ’ ಮತ್ತು ‘ಸ್ನಾರ್ಕಿ ಪಪ್ಪಿ’ಯಂತಹ ಅಂತರರಾಷ್ಟ್ರೀಯ ಬ್ಯಾಂಡ್‌ಗಳೊಂದಿಗೆ ಕೆಲಸ ಮಾಡಿದ್ದಾರೆ.
ರಘು ದೀಕ್ಷಿತ್ ಅವರು ಈ ಹಿಂದೆ ನೃತ್ಯ ಸಂಯೋಜಕಿ ಮಯೂರಿ ಉಪಾಧ್ಯ ಅವರನ್ನು 2005ರಲ್ಲಿ ವಿವಾಹವಾಗಿದ್ದು, 2019ರಲ್ಲಿ ವಿಚ್ಛೇದನ ಪಡೆದಿದ್ದರು.