Roller Coaster Accident: ರೋಲರ್ ಕೋಸ್ಟರ್ ಅವಘಡ: ಮದುವೆ ನಿಶ್ಚಯವಾಗಿದ್ದ ಯುವತಿ ಸಾವು
ಪ್ರಿಯಾಂಕಾ ಮತ್ತು ನಿಖಿಲ್ ಅರ್ಧ ದಿನ ವಾಟರ್ ರೈಡ್‌ಗಳಲ್ಲಿ ಕಳೆದ ನಂತರ, ಸಂಜೆ 6:15ರ ಸುಮಾರಿಗೆ ರೋಲರ್ ಕೋಸ್ಟರ್ ರೈಡ್‌ಗೆ ಹೋಗಿದ್ದರು. ರೈಡ್ ನಲ್ಲಿ ಎತ್ತರಕ್ಕೆ ತಲುಪಿದಾಗ ರೋಲರ್ ಕೋಸ್ಟರ್‌ನ ಒಂದು ಕಂಬವು (ಸ್ಟ್ಯಾಂಡ್) ಏಕಾಏಕಿ ಮುರಿದುಬಿದ್ದಿದೆ.;
ನವದೆಹಲಿಯ ಕಪಾಸೇರಾ ಪ್ರದೇಶದಲ್ಲಿರುವ ಅಮ್ಯೂಸ್‌ಮೆಂಟ್ ಪಾರ್ಕ್‌ನಲ್ಲಿ ನಡೆದ ರೋಲರ್ ಕೋಸ್ಟರ್ ಅವಘಡದಲ್ಲಿ 24 ವರ್ಷದ ಯುವತಿಯೊಬ್ಬಳು ದಾರುಣವಾಗಿ ಮೃತಪಟ್ಟಿದ್ದಾಳೆ. ಯುವತಿಯನ್ನು ಪ್ರಿಯಾಂಕಾ ಎಂದು ಗುರುತಿಸಲಾಗಿದೆ ಎಂದು ಇಂಡಿಯಾ ಟುಡೆ ವರದಿ ಮಾಡಿದೆ.
ಪ್ರಿಯಾಂಕಾ ತನ್ನ ಭಾವೀ ಪತಿ ನಿಖಿಲ್ ಜೊತೆಗೆ ಫನ್ ಎನ್ ಫುಡ್ ವಿಲೇಜ್‌ಗೆ ತೆರಳಿದ್ದರು. ಫೆಬ್ರವರಿ 2023ರಲ್ಲೇ ಈ ಜೋಡಿಯ ನಿಶ್ಚಿತಾರ್ಥ ಆಗಿತ್ತು. 2026 ರ ಫೆಬ್ರವರಿಯಲ್ಲಿ ಮದುವೆಯೂ ನಿಗದಿಯಾಗಿತ್ತು. ಪ್ರಿಯಾಂಕಾ ಮತ್ತು ನಿಖಿಲ್ ಅರ್ಧ ದಿನ ವಾಟರ್ ರೈಡ್‌ಗಳಲ್ಲಿ ಕಳೆದ ನಂತರ, ಸಂಜೆ 6:15ರ ಸುಮಾರಿಗೆ ರೋಲರ್ ಕೋಸ್ಟರ್ ರೈಡ್‌ಗೆ ಹೋಗಿದ್ದರು. ರೈಡ್ ನಲ್ಲಿ ಎತ್ತರಕ್ಕೆ ತಲುಪಿದಾಗ ರೋಲರ್ ಕೋಸ್ಟರ್‌ನ ಒಂದು ಕಂಬವು (ಸ್ಟ್ಯಾಂಡ್) ಏಕಾಏಕಿ ಮುರಿದುಬಿದ್ದಿದೆ.
ಇದರ ಪರಿಣಾಮವಾಗಿ ಪ್ರಿಯಾಂಕಾ ತನ್ನ ಸೀಟಿನಿಂದ ಕೆಳಗೆ ಜಾರಿ ಬಿದ್ದಿದ್ದಾರೆ. ಗಂಭೀರ ಗಾಯಗಳಾಗಿದ್ದ ಆಕೆಯನ್ನು ಕೂಡಲೇ ಆಸ್ಪತ್ರೆಗೆ ಸಾಗಿಸಲಾಯಿತಾದರೂ ಅಷ್ಟರಲ್ಲೇ ಆಕೆ ಕೊನೆಯುಸಿರೆಳೆದಿದ್ದಾರೆ. ವರದಿಯ ಪ್ರಕಾರ, ಪ್ರಿಯಾಂಕಾ ಕಿವಿ, ಮೂಗು ಮತ್ತು ಗಂಟಲಿನಿಂದ ರಕ್ತಸ್ರಾವ (ENT bleed), ಬಲಗಾಲಿನಲ್ಲಿ ಗಾಯ, ಎಡಗಾಲಿನಲ್ಲಿ ಚುಚ್ಚಿದ ಗಾಯ ಮತ್ತು ಬಲಗೈ ಮತ್ತು ಎಡ ಮೊಣಕಾಲಿನಲ್ಲಿ ಹಲವಾರು ಸವೆತಗಳು ಉಂಟಾಗಿ, ಗಂಭೀರ ಗಾಯಕ್ಕೆ ಒಳಗಾಗಿದ್ದರು ಎಂದು ತಿಳಿದುಬಂದಿದೆ.
ಕಾನೂನು ಕ್ರಮ ಮತ್ತು ತನಿಖೆ
ಈ ಘಟನೆಯ ಬಗ್ಗೆ ಕಪಾಸೇರಾ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಾಗಿದೆ. ಪ್ರಿಯಾಂಕಾ ಕುಟುಂಬವು ಅಮ್ಯೂಸ್‌ಮೆಂಟ್ ಪಾರ್ಕ್‌ನ ಆಡಳಿತದ ವಿರುದ್ಧ ಕಿಡಿಕಾರಿದ್ದು. ಸೂಕ್ತ ಸುರಕ್ಷತಾ ಮಾನದಂಡಗಳನ್ನು ಪಾಲಿಸಿಲ್ಲ. ಪ್ರಿಯಾಂಕಾ ಬಿದ್ದ ನಂತರ ಸಮಯಕ್ಕೆ ಸರಿಯಾಗಿ ಆಸ್ಪತ್ರೆಗೆ ಕೊಂಡೊಯ್ಯಲಾಗಿಲ್ಲ ಮತ್ತು ಘಟನೆಯನ್ನು ಮುಚ್ಚಿಹಾಕಲು ರೋಲರ್ ಕೋಸ್ಟರ್ ಪ್ರದೇಶವನ್ನು ತಕ್ಷಣವೇ ಮುಚ್ಚಲಾಗಿದೆ ಎಂದು ಪ್ರಿಯಾಂಕಾ ಅವರ ಸಹೋದರ ಮೋಹಿತ್ ಆರೋಪಿಸಿದ್ದಾರೆ.