ವೀಸಾ ಹಗರಣ: ಡೆಲ್ಲಿ ಕೋರ್ಟ್‌ ಮಹತ್ವದ ಆದೇಶ- ಕಾರ್ತಿ ಚಿದಂಬರಂಗೆ ಬಿಗ್‌ ಶಾಕ್‌!

ಬಹುಚರ್ಚಿತ ಚೀನಾ ವೀಸಾ ಹಗರಣಕ್ಕೆ ಸಂಬಂಧಿಸಿದಂತೆ ಕಾಂಗ್ರೆಸ್ ಸಂಸದ ಕಾರ್ತಿ ಚಿದಂಬರಂ ಮತ್ತು ಇತರ ಆರು ಮಂದಿಯ ವಿರುದ್ಧ ದೋಷಾರೋಪಣೆ (Charges) ಹೊರಿಸುವಂತೆ ದೆಹಲಿ ನ್ಯಾಯಾಲಯವು ಮಂಗಳವಾರ (ಡಿಸೆಂಬರ್ 23) ಮಹತ್ವದ ಆದೇಶ ನೀಡಿದೆ. ಸಿಬಿಐ ವಿಶೇಷ ನ್ಯಾಯಾಧೀಶರಾದ ದಿಗ್ ವಿನಯ್ ಸಿಂಗ್ ಅವರು ಈ ಆದೇಶವನ್ನು ಹೊರಡಿಸಿದ್ದಾರೆ.

ಏನಿದು ವೀಸಾ ಹಗರಣ?

2011ರಲ್ಲಿ ಕಾರ್ತಿ ಚಿದಂಬರಂ ಅವರ ತಂದೆ ಪಿ. ಚಿದಂಬರಂ ಅವರು ಕೇಂದ್ರ ಗೃಹ ಸಚಿವರಾಗಿದ್ದ ಅವಧಿಯಲ್ಲಿ ಈ ಹಗರಣ ನಡೆದಿದೆ ಎಂದು ಆರೋಪಿಸಲಾಗಿದೆ. ಪಂಜಾಬ್ ಮೂಲದ 'ತಲ್ವಂಡಿ ಸಾಬೊ ಪವರ್ ಲಿಮಿಟೆಡ್' (TSPL) ಎಂಬ ವಿದ್ಯುತ್ ಕಂಪನಿಯು ಚೀನಾದ ಕಂಪನಿಗೆ ಕಾಮಗಾರಿಯನ್ನು ನೀಡಿತ್ತು. ಕೆಲಸ ವಿಳಂಬವಾಗುತ್ತಿದ್ದ ಕಾರಣ, ಕಂಪನಿಯು ತನ್ನ ಚೀನಾ ಕಾರ್ಮಿಕರಿಗೆ ಈಗಾಗಲೇ ನಿಗದಿಯಾಗಿದ್ದ ಸೀಲಿಂಗ್‌ಗಿಂತ ಹೆಚ್ಚಿನ ವೀಸಾಗಳನ್ನು ಮರುಬಳಕೆ ಮಾಡಲು ಮುಂದಾಗಿತ್ತು.

50 ಲಕ್ಷ ರೂ. ಲಂಚದ ಆರೋಪ

ಸಿಬಿಐ ದಾಖಲಿಸಿರುವ ಎಫ್‌ಐಆರ್ ಪ್ರಕಾರ, 263 ಚೀನಾ ಪ್ರಜೆಗಳಿಗೆ ವೀಸಾ ಮರುಬಳಕೆ ಮಾಡಲು ಅನುಮತಿ ಕೊಡಿಸುವ ಸಲುವಾಗಿ ಕಾರ್ತಿ ಚಿದಂಬರಂ ಅವರ ಆಪ್ತ ಭಾಸ್ಕರರಾಮನ್ ಮೂಲಕ 50 ಲಕ್ಷ ರೂಪಾಯಿ ಲಂಚ ಪಡೆಯಲಾಗಿದೆ. ಈ ಹಣವನ್ನು ಮುಂಬೈ ಮೂಲದ 'ಬೆಲ್ ಟೂಲ್ಸ್ ಲಿಮಿಟೆಡ್' ಎಂಬ ಸಂಸ್ಥೆಯ ಮೂಲಕ ನಕಲಿ ಕನ್ಸಲ್ಟೆನ್ಸಿ ಬಿಲ್‌ಗಳನ್ನು ಸೃಷ್ಟಿಸಿ ವರ್ಗಾಯಿಸಲಾಗಿತ್ತು ಎಂದು ತನಿಖಾ ಸಂಸ್ಥೆ ಆರೋಪಿಸಿದೆ.

ನ್ಯಾಯಾಲಯದ ಕ್ರಮ

ಪ್ರಕರಣದ ಎಂಟು ಆರೋಪಿಗಳ ಪೈಕಿ ಏಳು ಜನರ ವಿರುದ್ಧ ಕ್ರಿಮಿನಲ್ ಪಿತೂರಿ, ವಂಚನೆ ಮತ್ತು ಭ್ರಷ್ಟಾಚಾರ ತಡೆ ಕಾಯ್ದೆಯಡಿ ದೋಷಾರೋಪಣೆ ಹೊರಿಸಲು ನ್ಯಾಯಾಲಯ ನಿರ್ಧರಿಸಿದೆ. ಆದರೆ, ಚೇತನ್ ಶ್ರೀವಾಸ್ತವ ಎಂಬುವವರನ್ನು ಸಾಕ್ಷ್ಯಾಧಾರಗಳ ಕೊರತೆಯಿಂದಾಗಿ ಪ್ರಕರಣದಿಂದ ಬಿಡುಗಡೆ ಮಾಡಲಾಗಿದೆ. ಕಾರ್ತಿ ಚಿದಂಬರಂ, ಭಾಸ್ಕರರಾಮನ್, ವೈರಲ್ ಮೆಹ್ತಾ ಸೇರಿದಂತೆ ಏಳು ಮಂದಿ ಈಗ ಅಧಿಕೃತವಾಗಿ ವಿಚಾರಣೆಯನ್ನು ಎದುರಿಸಲಿದ್ದಾರೆ.

ಈ ಬೆಳವಣಿಗೆಯು ಕಾರ್ತಿ ಚಿದಂಬರಂಗೆ ದೊಡ್ಡ ಕಾನೂನು ಹಿನ್ನಡೆಯಾಗಿ ಪರಿಣಮಿಸಿದ್ದು, ಮುಂದಿನ ದಿನಗಳಲ್ಲಿ ವಿಚಾರಣೆ ತೀವ್ರಗೊಳ್ಳಲಿದೆ. ಈಗಾಗಲೇ ಸಿಬಿಐ ಹಗರಣಕ್ಕೆ ಸಂಬಂಧಿಸಿದಂತೆ ಕ್ರಿಮಿನಲ್ ಪಿತೂರಿ ಮತ್ತು ಭ್ರಷ್ಟಾಚಾರದ ಬಗ್ಗೆ ತನಿಖೆ ನಡೆಸುತ್ತಿದೆ. ಈ ಹಗರಣದಲ್ಲಿ ಹಣ ನಡೆದಿದೆಯೇ ಎಂಬ ಬಗ್ಗೆ ಇಡಿ ತನಿಖೆ ಮಾಡುತ್ತಿದೆ.

ಲಂಚದ ಹಣ ವರ್ಗಾವಣೆ ಹೇಗೆ? 

ಲಂಚದ ಹಣವನ್ನು ನೇರವಾಗಿ ಪಡೆಯದೆ ಅತ್ಯಂತ ಚಾಣಾಕ್ಷತನದಿಂದ ವರ್ಗಾಯಿಸಲಾಗಿತ್ತು ಎಂದು ತನಿಖಾ ಸಂಸ್ಥೆಗಳು ಹೇಳಿವೆ. ಮುಂಬೈ ಮೂಲದ 'ಬೆಲ್ ಟೂಲ್ಸ್ ಲಿಮಿಟೆಡ್' ಎಂಬ ಕಂಪನಿಯ ಹೆಸರಿನಲ್ಲಿ ನಕಲಿ ಬಿಲ್‌ಗಳನ್ನು (Invoices) ಸೃಷ್ಟಿಸಲಾಯಿತು. 'ವೀಸಾ ಕೆಲಸದ ಕನ್ಸಲ್ಟೆನ್ಸಿ ವೆಚ್ಚ' ಎಂದು ತೋರಿಸಿ ಹಣವನ್ನು ಈ ಕಂಪನಿಗೆ ವರ್ಗಾಯಿಸಲಾಗಿತ್ತು. ನಂತರ ಆ ಹಣವನ್ನು ನಗದಿನ ರೂಪದಲ್ಲಿ ಕಾರ್ತಿ ಚಿದಂಬರಂ ಅವರ ಆಪ್ತರಿಗೆ ತಲುಪಿಸಲಾಯಿತು.

ಪ್ರಕರಣದ ಪ್ರಮುಖ ಆರೋಪಿಗಳು

ಕಾರ್ತಿ ಚಿದಂಬರಂ: ಕಾಂಗ್ರೆಸ್ ಸಂಸದ ಮತ್ತು ಪ್ರಮುಖ ಆರೋಪಿ.

ಎಸ್. ಭಾಸ್ಕರರಾಮನ್: ಕಾರ್ತಿ ಅವರ ಆಪ್ತ ಮತ್ತು ವ್ಯವಹಾರಗಳ ಉಸ್ತುವಾರಿ.

ತಲ್ವಂಡಿ ಸಾಬೊ ಪವರ್ ಲಿಮಿಟೆಡ್ (TSPL): ಲಂಚ ನೀಡಿದ ಆರೋಪ ಎದುರಿಸುತ್ತಿರುವ ಕಂಪನಿ.

ಬೆಲ್ ಟೂಲ್ಸ್ ಲಿಮಿಟೆಡ್: ಹಣ ವರ್ಗಾವಣೆಗೆ ಬಳಸಲಾದ ಸಂಸ್ಥೆ.