3 ವರ್ಷಗಳಲ್ಲಿ 19 ಹುಲಿ ಸಾವು: ಬಲ್ಹರ್ಷಾ-ಗೊಂಡಿಯಾ ರೈಲು ಮಾರ್ಗವೇ ಹುಲಿಗಳಿಗೆ ಮೃತ್ಯುಪಾಶ

ಮಹಾರಾಷ್ಟ್ರ ಮತ್ತು ತೆಲಂಗಾಣ ಗಡಿಯಲ್ಲಿರುವ ಬಲ್ಹರ್ಷಾ-ಗೊಂಡಿಯಾ ರೈಲು ಮಾರ್ಗವು ಹುಲಿಗಳ ಪಾಲಿಗೆ "ಸಾವಿನ ಹಾದಿ"ಯಾಗಿ ಮಾರ್ಪಟ್ಟಿದೆ. ಭಾನುವಾರ (ನವೆಂಬರ್ 30) ರಾತ್ರಿ ಮತ್ತೊಂದು ಹುಲಿ ವೇಗವಾಗಿ ಬಂದ ರೈಲಿಗೆ ಸಿಲುಕಿ ಮೃತಪಟ್ಟಿದ್ದು, ವನ್ಯಜೀವಿ ಪ್ರೇಮಿಗಳಲ್ಲಿ ಆತಂಕ ಹೆಚ್ಚಿಸಿದೆ. ಇದರೊಂದಿಗೆ ಕಳೆದ ಮೂರು ವರ್ಷಗಳಲ್ಲಿ ಈ ರೈಲು ಮಾರ್ಗದಲ್ಲಿ ಮೃತಪಟ್ಟ ಹುಲಿಗಳ ಸಂಖ್ಯೆ 19ಕ್ಕೆ ಏರಿಕೆಯಾಗಿದೆ .

ತೆಲಂಗಾಣದ ಕೊಮರಂ ಭೀಮ್ ಆಸಿಫಾಬಾದ್ ಜಿಲ್ಲೆಯ ಸಿರ್ಪುರ (ಟಿ) ಮಂಡಲದ ಬಳಿ ಭಾನುವಾರ ರಾತ್ರಿ ಸುಮಾರು 11 ಗಂಟೆಗೆ ಗೊಂಡಿಯಾದಿಂದ ಬಲ್ಹರ್ಷಾಗೆ ತೆರಳುತ್ತಿದ್ದ ಪ್ರಯಾಣಿಕರ ರೈಲು ಡಿಕ್ಕಿ ಹೊಡೆದು ಹುಲಿಯೊಂದು ಸ್ಥಳದಲ್ಲೇ ಸತ್ತಿದೆ. ಈ ಹುಲಿ ಮಹಾರಾಷ್ಟ್ರದ ತದೋಬಾ ಅಂಧಾರಿ ಹುಲಿ ಸಂರಕ್ಷಿತ ಪ್ರದೇಶದಿಂದ ತೆಲಂಗಾಣದ ಕಾವಲ್ ಹುಲಿ ಸಂರಕ್ಷಿತ ಪ್ರದೇಶದತ್ತ ತೆರಳುತ್ತಿತ್ತು ಎಂದು ಅರಣ್ಯಾಧಿಕಾರಿ ಕೆ. ಶ್ರೀನಿವಾಸ್ ತಿಳಿಸಿದ್ದಾರೆ .

ರೈಲ್ವೆ ಇಲಾಖೆಯ ನಿರ್ಲಕ್ಷ್ಯಕ್ಕೆ ಆಕ್ರೋಶ

ಹುಲಿಗಳ ಸರಣಿ ಸಾವಿನ ಬಗ್ಗೆ ವರದಿ ನೀಡುವಂತೆ ಮಹಾರಾಷ್ಟ್ರ ಹೈಕೋರ್ಟ್ ಆದೇಶ ನೀಡಿದ್ದರೂ, ಅರಣ್ಯ ಇಲಾಖೆ ಸಮರ್ಪಕವಾಗಿ ಸ್ಪಂದಿಸಿಲ್ಲ. ವನ್ಯಜೀವಿಗಳು ಸುರಕ್ಷಿತವಾಗಿ ದಾಟಲು ಕೆಳಸೇತುವೆಗಳನ್ನು  ನಿರ್ಮಿಸುವಂತೆ ಮಾಡಿದ ಮನವಿಗಳನ್ನೂ ರೈಲ್ವೆ ಇಲಾಖೆ ಕಡೆಗಣಿಸಿದೆ. ಪರಿಣಾಮವಾಗಿ, ಈ ಮಾರ್ಗದಲ್ಲಿ ವನ್ಯಜೀವಿಗಳ ಸಾವು ಮುಂದುವರಿದಿದೆ. 2025ರಲ್ಲೇ ಚಂದ್ರಾಪುರ ಜಿಲ್ಲೆಯಲ್ಲಿ ರೈಲು ಅಪಘಾತಗಳಿಂದ 3 ಹುಲಿಗಳು, 1 ಚಿರತೆ ಸೇರಿದಂತೆ ಒಟ್ಟು 12 ವನ್ಯಜೀವಿಗಳು ಮೃತಪಟ್ಟಿವೆ. .

ಹೆಚ್ಚುತ್ತಿರುವ ಹುಲಿಗಳ ಸಂಖ್ಯೆ ಮತ್ತು ಸ್ಥಳಾವಕಾಶದ ಕೊರತೆ

ಮಹಾರಾಷ್ಟ್ರದಲ್ಲಿ ತದೋಬಾ, ಪೆಂಚ್ ಸೇರಿದಂತೆ ಆರು ಹುಲಿ ಸಂರಕ್ಷಿತ ಪ್ರದೇಶಗಳಿದ್ದು, ಹುಲಿಗಳ ಸಂಖ್ಯೆ ಗಣನೀಯವಾಗಿ ಏರಿಕೆಯಾಗಿದೆ. ಪ್ರಾದೇಶಿಕ ಸ್ಥಳಾವಕಾಶದ ಕೊರತೆಯಿಂದಾಗಿ ಹುಲಿಗಳು ನೆರೆಯ ತೆಲಂಗಾಣದ ಕಾವಲ್ ಅರಣ್ಯದತ್ತ ವಲಸೆ ಹೋಗುತ್ತವೆ. ಈ ಸಂದರ್ಭದಲ್ಲಿ ರೈಲು ಹಳಿಗಳನ್ನು ದಾಟುವಾಗ ವೇಗವಾಗಿ ಬರುವ ರೈಲುಗಳಿಗೆ ಸಿಲುಕಿ ಪ್ರಾಣ ಕಳೆದುಕೊಳ್ಳುತ್ತಿವೆ .

ಜಾರಿಯಾಗದ ಶಿಫಾರಸುಗಳು

ವನ್ಯಜೀವಿಗಳ ಓಡಾಟಕ್ಕೆ ಅನುಕೂಲವಾಗುವಂತೆ ಅರಣ್ಯ ಪ್ರದೇಶದ ಪ್ರಮುಖ ಮಾರ್ಗಗಳಲ್ಲಿ ಕೆಳಸೇತುವೆ ಮತ್ತು ಮೇಲ್ಸೇತುವೆಗಳನ್ನು ನಿರ್ಮಿಸುವಂತೆ ಭಾರತೀಯ ವನ್ಯಜೀವಿ ಸಂಸ್ಥೆ (WII) ಶಿಫಾರಸು ಮಾಡಿತ್ತು. ಮಧ್ಯಪ್ರದೇಶದ ಬಾಲಾಘಾಟ್-ನೈನ್ಪುರ ಮಾರ್ಗದಲ್ಲಿ ಇಂತಹ 12 ಸುರಕ್ಷಿತ ಮಾರ್ಗಗಳನ್ನು ನಿರ್ಮಿಸಲಾಗಿದೆ. ಆದರೆ, ಬಲ್ಹರ್ಷಾ-ಗೊಂಡಿಯಾ ಮಾರ್ಗದಲ್ಲಿ ಈ ಪ್ರಸ್ತಾಪಗಳು ಜಾರಿಯೇ ಆಗಿಲ್ಲ. ಅರಣ್ಯ ಇಲಾಖೆ ಮತ್ತು ರೈಲ್ವೆ ಇಲಾಖೆಯ ನಿರ್ಲಕ್ಷ್ಯದ ವಿರುದ್ಧ ಪರಿಸರವಾದಿಗಳು ಬಾಂಬೆ ಹೈಕೋರ್ಟ್‌ನ ನಾಗ್ಪುರ ಪೀಠದಲ್ಲಿ ಸಾರ್ವಜನಿಕ ಹಿತಾಸಕ್ತಿ ಅರ್ಜಿ (PIL) ಸಲ್ಲಿಸಿದ್ದಾರೆ .

ಈ ರೈಲು ಮಾರ್ಗದಲ್ಲಿ ಸುರಕ್ಷತಾ ಕ್ರಮಗಳನ್ನು ಕೈಗೊಳ್ಳದಿದ್ದರೆ, ರಾಷ್ಟ್ರೀಯ ಪ್ರಾಣಿ ಹುಲಿಗಳ ಸಾವು ಹೀಗೆಯೇ ಮುಂದುವರಿಯುವ ಆತಂಕವಿದೆ.