ಬಿಗ್ ಬಾಸ್ ಮನೆಯಲ್ಲಿ ಮಹಾ ಟ್ವಿಸ್ಟ್: ಎಲಿಮಿನೇಷನ್ ಇಲ್ಲ, ಸಿಕ್ತು ಫೈನಲ್‌ಗೆ ಡೈರೆಕ್ಟ್ ಎಂಟ್ರಿ

'ಒಂಟಿ vs ಜಂಟಿ' ಎಂಬ ವಿಶಿಷ್ಟ ಪರಿಕಲ್ಪನೆಯೊಂದಿಗೆ ಆರಂಭವಾಗಿರುವ 'ಬಿಗ್ ಬಾಸ್ ಕನ್ನಡ ಸೀಸನ್ 12' ರಿಯಾಲಿಟಿ ಶೋ, ಪ್ರತಿ ವಾರವೂ ಅನಿರೀಕ್ಷಿತ ತಿರುವುಗಳ ಮೂಲಕ ಪ್ರೇಕ್ಷಕರನ್ನು ತುದಿಗಾಲಲ್ಲಿ ನಿಲ್ಲಿಸುತ್ತಿದೆ. ಪರಿಸರ ಉಲ್ಲಂಘನೆಯ ವಿವಾದದ ನಡುವೆಯೂ, ನಿರೂಪಕ ಕಿಚ್ಚ ಸುದೀಪ್ ಅವರು ವಾರಾಂತ್ಯದ ಸಂಚಿಕೆಯಲ್ಲಿ ವೇದಿಕೆಗೆ ಮರಳಿ, ಸ್ಪರ್ಧಿಗಳು ಮತ್ತು ಪ್ರೇಕ್ಷಕರಿಗೆ ದೊಡ್ಡ ಆಘಾತ ನೀಡಿದ್ದಾರೆ

ಈ ವಾರದ ನಾಮಿನೇಷನ್ ಪಟ್ಟಿಯಲ್ಲಿ ಒಟ್ಟು ಹತ್ತು ಸ್ಪರ್ಧಿಗಳಿದ್ದರು. ಇದರಲ್ಲಿ ಸೋಲೋ ಸ್ಪರ್ಧಿಗಳಾದ ಜಾನ್ವಿ, ರಕ್ಷಿತಾ, ಧನುಷ್, ಅಶ್ವಿನಿ ಗೌಡ ಮತ್ತು ಜೋಡಿ ಸ್ಪರ್ಧಿಗಳಾದ ಸ್ಪಂದನಾ-ಮಾಲು, ಅಭಿಷೇಕ್-ಅಶ್ವಿನಿ, ಹಾಗೂ ರಶಿಕಾ-ಮಂಜು ಭಾಷಿಣಿ ಸೇರಿದ್ದರು. ಎಲಿಮಿನೇಷನ್ ಪ್ರಕ್ರಿಯೆ ಆರಂಭವಾದಾಗ, ಸ್ಪಂದನಾ-ಮಾಲು ಮತ್ತು ರಶಿಕಾ-ಮಂಜು ಬಾಷಿಣಿ ಜೋಡಿಗಳು ಅತಿ ಕಡಿಮೆ ಮತಗಳನ್ನು ಪಡೆದು ಅಂತಿಮ ಹಂತದಲ್ಲಿದ್ದರು.

, 'ಎಕ್ಸ್‌ಪೆಕ್ಟ್ ದಿ ಅನ್‌ಎಕ್ಸ್‌ಪೆಕ್ಟೆಡ್' ಎಂಬ ಸೀಸನ್‌ನ ಧ್ಯೇಯವಾಕ್ಯಕ್ಕೆ ತಕ್ಕಂತೆ, ಈ ವಾರ ಯಾವುದೇ ಎಲಿಮಿನೇಷನ್ ಇರುವುದಿಲ್ಲ ಎಂದು ಸುದೀಪ್ ಘೋಷಿಸಿದರು. ಬದಲಿಗೆ, ಅತಿ ಕಡಿಮೆ ಮತ ಪಡೆದಿದ್ದ ಮಾಲು ನಿಪನಾಲ್ ಮತ್ತು ಸ್ಪಂದನಾ ಸೋಮಣ್ಣ ಜೋಡಿಯನ್ನು ಮನೆಯಿಂದ ಹೊರ ಕಳುಹಿಸುವ ಬದಲು, ಅವರನ್ನು ನೇರವಾಗಿ ಮೊದಲ ಫೈನಲ್‌ನ ಫೈನಲಿಸ್ಟ್‌ಗಳು ಎಂದು ಘೋಷಿಸಿ ಎಲ್ಲರನ್ನೂ ಅಚ್ಚರಿಗೊಳಿಸಿದರು.

"ಈ ಬಾರಿ ಜನರು ಎಲಿಮಿನೇಷನ್‌ಗೆ ಮತ ಹಾಕಲಿಲ್ಲ; ಅವರು ಫಿನಾಲೆಗೆ ಹೋಗಲು ಮತ ಹಾಕಿದರು. ನೀವು ಈಗ ಫಿನಾಲೆಯ ಫೈನಲಿಸ್ಟ್ ಆಗಿದ್ದೀರಿ," ಎಂದು ಹೇಳಿದ ಸುದೀಪ್, ಈ ಜೋಡಿಗೆ ಮುಂದಿನ ವಾರ ಇಮ್ಯೂನಿಟಿ ಸಿಗಲಿದೆ ಎಂದೂ ತಿಳಿಸಿದರು.

ಇತಿಹಾಸದಲ್ಲೇ ಮೊದಲು 'ಎರಡು ಫಿನಾಲೆ'

ಬಿಗ್ ಬಾಸ್ ಕನ್ನಡದ ಇತಿಹಾಸದಲ್ಲೇ ಮೊದಲ ಬಾರಿಗೆ, ಈ ಸೀಸನ್‌ನಲ್ಲಿ ಎರಡು ಫೈನಲ್‌ಗಳನ್ನು ನಡೆಸಲಾಗುತ್ತಿದೆ. ಬಿಗ್ ಬಾಸ್ ಘೋಷಿಸಿರುವಂತೆ, ಮೊದಲ ಫೈನಲ್ ಮೂರನೇ ವಾರದಲ್ಲಿ ನಡೆಯಲಿದ್ದು, ಇದರಲ್ಲಿ ಸಾಮೂಹಿಕ ಎಲಿಮಿನೇಷನ್ ನಡೆಯುವ ಸಾಧ್ಯತೆಯಿದೆ. ಈ ಹೊಸ ನಿಯಮವು ಆಟದ ರೋಚಕತೆಯನ್ನು ಮತ್ತಷ್ಟು ಹೆಚ್ಚಿಸಿದೆ.

ಮೊದಲ ವಾರದಲ್ಲಿ ಅಮಿತ್ ಮತ್ತು ಕರಿಬಸಪ್ಪ ಅವರು ಮನೆಯಿಂದ ಹೊರನಡೆದಿದ್ದು, ಪ್ರಸ್ತುತ ಕಾಕ್ರೋಚ್ ಸುಧಿ, ಮಂಜು ಭಾಷಿಣಿ, ಮಾತಿನ ಮಲ್ಲಿ ಮಲ್ಲಮ್ಮ, ಕಾವ್ಯ ಶೈವ, ಗಿಲ್ಲಿ ನಟ, ಧನುಷ್ ಗೌಡ, ಅಶ್ವಿನಿ ಗೌಡ, ಅಭಿಷೇಕ್ ಶ್ರೀಕಾಂತ್, ರಶಿಕಾ ಶೆಟ್ಟಿ, ಚಂದ್ರಪ್ರಭಾ ಸೇರಿದಂತೆ ಹಲವು ಸ್ಪರ್ಧಿಗಳು ಬಿಗ್ ಬಾಸ್ ಮನೆಯಲ್ಲಿದ್ದಾರೆ.