ಬಾಂಗ್ಲಾದೇಶದ ಭವಿಷ್ಯ ಅನಿಶ್ಚಿತ: 2026ರ ಚುನಾವಣೆವರೆಗೂ ಸವಾಲುಗಳ ಸುಳಿ!

ಬಾಂಗ್ಲಾದೇಶದಲ್ಲಿ ಫೆಬ್ರವರಿ 2026ರಲ್ಲಿ ನಡೆಯಲಿರುವ ಸಂಸದೀಯ ಚುನಾವಣೆಗಳತ್ತ ಇಡೀ ದೇಶದ ಚಿತ್ತ ನೆಟ್ಟಿದೆ. ಆದರೆ, ದೇಶದ ಪರಿಸ್ಥಿತಿ ಅಷ್ಟು ಸುಲಭವಿಲ್ಲ. 2024ರ ಜುಲೈನಲ್ಲಿ ನಡೆದ ಪ್ರತಿಭಟನೆಗಳಿಂದಾಗಿ ಕಾನೂನು ಸುವ್ಯವಸ್ಥೆ ಹದಗೆಟ್ಟಿದೆ. ಪ್ರಮುಖ ರಾಜಕೀಯ ಪಕ್ಷಗಳಲ್ಲೇ ಭಿನ್ನಾಭಿಪ್ರಾಯಗಳು ಮೂಡಿವೆ. ಜೊತೆಗೆ, ಆರ್ಥಿಕ ಸ್ಥಿತಿಯೂ ಡೋಲಾಯಮಾನವಾಗಿದೆ. ಈ ಎಲ್ಲ ಕಾರಣಗಳಿಂದಾಗಿ, 2026ರ ಚುನಾವಣೆ ಮುಗಿಯುವವರೆಗೆ ಬಾಂಗ್ಲಾದೇಶವು ಒಂದು ಸೂಕ್ಷ್ಮ ಹಾದಿಯಲ್ಲಿ ಸಾಗಲಿದೆ.

ನಾಯಕರ ಮುಂದಿದೆ ದೊಡ್ಡ ಪರೀಕ್ಷೆ

ದೇಶದ ಪ್ರಮುಖ ನಾಯಕರಾದ ತಾತ್ಕಾಲಿಕ ಮುಖ್ಯಸ್ಥ ಮುಹಮ್ಮದ್ ಯೂನುಸ್ ಮತ್ತು ಬಾಂಗ್ಲಾದೇಶ ನ್ಯಾಷನಲಿಸ್ಟ್ ಪಾರ್ಟಿ (BNP) ನಾಯಕ ತಾರಿಕ್ ರಹಮಾನ್ ಇಬ್ಬರೂ ಹಲವು ಸವಾಲುಗಳನ್ನು ಎದುರಿಸುತ್ತಿದ್ದಾರೆ.

ತಮ್ಮದೇ ಪಕ್ಷವಾದ ಬಿಎನ್​​ಪಿಯಲ್ಲಿ ಇರುವ ಒಡಕುಗಳನ್ನು ಸರಿಪಡಿಸುವುದು ರಹಮಾನ್‌ಗೆ ದೊಡ್ಡ ಸವಾಲು. ಪಕ್ಷದ ಕೆಲವು ಕಾರ್ಯಕರ್ತರು ಇದೇ ವರ್ಷದ ಅಂತ್ಯದೊಳಗೆ ಚುನಾವಣೆ ನಡೆಸಬೇಕೆಂದು ಒತ್ತಾಯಿಸುತ್ತಿದ್ದಾರೆ. ಈ ಒತ್ತಡಗಳನ್ನು ಹೇಗೆ ನಿಭಾಯಿಸುತ್ತಾರೆ ಎಂಬುದರ ಮೇಲೆ ರಹಮಾನ್ ನಾಯಕತ್ವದ ಪರೀಕ್ಷೆ ನಡೆಯಲಿದೆ.

ತಾತ್ಕಾಲಿಕ ಸರ್ಕಾರದ ಕೆಲವು ಸದಸ್ಯರು ಫೆಬ್ರವರಿ ಗಡುವಿಗೆ ಒಪ್ಪುತ್ತಿಲ್ಲ. ಸುಧಾರಣಾ ಕಾರ್ಯಗಳಿಗೆ ಹೆಚ್ಚು ಸಮಯ ಬೇಕು ಎಂದು ಹೇಳುತ್ತಾ, ಚುನಾವಣೆಗಳನ್ನು ಏಪ್ರಿಲ್‌ಗಿಂತ ಮೊದಲು ನಡೆಸಬಾರದು ಎಂದು ವಾದಿಸುತ್ತಿದ್ದಾರೆ. ಇವರನ್ನು ಒಪ್ಪಿಸುವುದು ಯೂನುಸ್‌ಗೆ ಸವಾಲಾಗಿದೆ.

ಬೇಗನೆ ಚುನಾವಣೆ ಬೇಕಿದೆ; ಯಾಕೆ?

ಬಹುತೇಕರು ಫೆಬ್ರವರಿಯ ಚುನಾವಣೆಯು ರಾಜಕೀಯ ಪಕ್ಷಗಳಿಗೆ ಹಾಗೂ ಜನಸಾಮಾನ್ಯರಿಗೆ ಕೊಂಚ ನೆಮ್ಮದಿ ತರುತ್ತದೆ ಎಂದು ನಂಬಿದ್ದಾರೆ. ತಿಂಗಳುಗಟ್ಟಲೆ ಇದ್ದ ಅನಿಶ್ಚಿತತೆ ಸರ್ಕಾರಿ ಕಾರ್ಯಗಳ ಮೇಲೆ ಹಾಗೂ ಆರ್ಥಿಕತೆಯ ಮೇಲೆ ಕೆಟ್ಟ ಪರಿಣಾಮ ಬೀರಿದೆ. ಇದರಿಂದ ಜನರ ಮನಸ್ಸಿನಲ್ಲಿ ದೇಶದ ಭವಿಷ್ಯದ ಬಗ್ಗೆ ಆತಂಕ ಹೆಚ್ಚಾಗಿದೆ.

ಒಂದು ಚುನಾಯಿತ ಸರ್ಕಾರವಿದ್ದರೆ ದೇಶದ ಸವಾಲುಗಳನ್ನು ಉತ್ತಮವಾಗಿ ಎದುರಿಸಬಹುದು, ಮತ್ತು ಬಾಂಗ್ಲಾದೇಶದಲ್ಲಿ ಪ್ರಜಾಪ್ರಭುತ್ವ ಸರಿಯಾದ ಹಾದಿಯಲ್ಲಿದೆ ಎಂದು ವಿದೇಶಗಳಿಗೆ ಭರವಸೆ ನೀಡಬಹುದು ಎಂದು ವ್ಯಾಪಕವಾಗಿ ನಂಬಲಾಗಿದೆ. ಭಾರತಕ್ಕೂ ಇದು ಅನುಕೂಲ. ಚುನಾಯಿತ ಸರ್ಕಾರದೊಂದಿಗೆ ಬೇಗನೆ ಸಂಬಂಧಗಳನ್ನು ಗಟ್ಟಿಗೊಳಿಸಿಕೊಳ್ಳಲು ಮತ್ತು ಅವರ ನೀತಿಗಳನ್ನು ಅರ್ಥಮಾಡಿಕೊಳ್ಳಲು ಇದು ಅವಕಾಶ ನೀಡುತ್ತದೆ.

ಯೂನುಸ್-ತಾರಿಕ್ ಭೇಟಿಯ ರಹಸ್ಯ

ತಾತ್ಕಾಲಿಕ ಸರ್ಕಾರ ಮತ್ತು ಬಿಎನ್​​ಪಿ ನಡುವೆ ಭಿನ್ನಾಭಿಪ್ರಾಯಗಳು ಹೆಚ್ಚುತ್ತಿದ್ದಾಗ, ಲಂಡನ್‌ನಲ್ಲಿ ನಡೆದ ಯೂನುಸ್-ರಹಮಾನ್ ಭೇಟಿ ಬಹಳ ಮುಖ್ಯವಾಗಿತ್ತು. ಬಾಂಗ್ಲಾದೇಶದ ರಾಜಕೀಯ ವಿಶ್ಲೇಷಕರ ಪ್ರಕಾರ, ಈ ಮೊದಲ ಭೇಟಿ ರಾಜಕೀಯ ಗೊಂದಲಗಳನ್ನು ನಿವಾರಿಸಿ, ಇಬ್ಬರ ನಡುವೆ ಉತ್ತಮ ತಿಳುವಳಿಕೆಗೆ ಅಡಿಪಾಯ ಹಾಕಿದೆ.

ಜನವರಿ 2024ರಲ್ಲಿ ನಡೆದ ಕೊನೆಯ ಚುನಾವಣೆಯಲ್ಲಿ ಶೇಖ್ ಹಸೀನಾ ಅವರ ಅವಾಮಿ ಲೀಗ್ ಗೆದ್ದಿತ್ತು. ಆದರೆ, ವಿರೋಧ ಪಕ್ಷಗಳು ಚುನಾವಣೆಯನ್ನು ಬಹಿಷ್ಕರಿಸಿದ್ದವು. 2024ರ ಆಗಸ್ಟ್‌ನಲ್ಲಿ ವಿದ್ಯಾರ್ಥಿಗಳು ಸರ್ಕಾರಿ ಉದ್ಯೋಗದ ಕೋಟಾ ವ್ಯವಸ್ಥೆಯ ವಿರುದ್ಧ ನಡೆಸಿದ ಪ್ರತಿಭಟನೆಗಳು ಅವಾಮಿ ಲೀಗ್ ಸರ್ಕಾರದ ವಿರುದ್ಧದ ದೊಡ್ಡ ಆಂದೋಲನವಾಗಿ ಬದಲಾದವು. ಇದು ಹಸೀನಾ ಅವರು ಅಧಿಕಾರದಿಂದ ಕೆಳಗಿಳಿದು ಭಾರತಕ್ಕೆ ಪಲಾಯನ ಮಾಡುವಂತೆ ಆಯಿತು.

"20 ವರ್ಷಗಳ ನಂತರ ಮೊದಲ ಬಾರಿಗೆ ಬಾಂಗ್ಲಾದೇಶದ ಜನರು ತಮ್ಮ ಮತ ಚಲಾಯಿಸಲು ಸಾಧ್ಯವಾಗಲಿದೆ" ಎಂದು ಬಿಎನ್​ಪಿಯ ಹಿರಿಯ ನಾಯಕ ಅಮೀರ್ ಖುಸ್ರೋ ಮಹಮೂದ್ ಚೌಧರಿ ಢಾಕಾದಲ್ಲಿ ಹೇಳಿದ್ದಾರೆ. ಲಂಡನ್ ಭೇಟಿಯ ಫಲಿತಾಂಶವು ಪ್ರಜಾಪ್ರಭುತ್ವ ಸರಿಯಾದ ಹಾದಿಯಲ್ಲಿದೆ ಎಂಬ ಭರವಸೆ ನೀಡಿದೆ ಎಂದಿದ್ದಾರೆ.

ಫೆಬ್ರವರಿ ಒಪ್ಪಂದ - ಒಂದು ರಾಜಿ ಸೂತ್ರ

ಫೆಬ್ರವರಿಯಲ್ಲಿ ಚುನಾವಣೆ ನಡೆಸುವ ಒಪ್ಪಂದವು ಯೂನುಸ್ ಮತ್ತು ರಹಮಾನ್ ಇಬ್ಬರಿಗೂ ಒಂದು ರಾಜಿ ಸಂಧಾನ. ವಿಶ್ವ ವಿಖ್ಯಾತ ಆರ್ಥಿಕತಜ್ಞರಾದ ಯೂನುಸ್ ಅವರನ್ನು ಹಸೀನಾ ಅಧಿಕಾರದಿಂದ ಕೆಳಗಿಳಿದ ನಂತರ ದೇಶವನ್ನು ಸ್ಥಿರಗೊಳಿಸಲು ಮತ್ತು ಆರ್ಥಿಕತೆಯನ್ನು ಸರಿಪಡಿಸಲು ತಾತ್ಕಾಲಿಕ ಸರ್ಕಾರದ ಮುಖ್ಯಸ್ಥರನ್ನಾಗಿ ನೇಮಿಸಲಾಗಿತ್ತು.

ಅನೇಕ ವಿದ್ಯಾರ್ಥಿ ನಾಯಕರು, ಯೂನುಸ್ ಅವರ ರಾಜಕೀಯ ವ್ಯವಸ್ಥೆಯನ್ನು ಶುದ್ಧೀಕರಿಸುವ ಸುಧಾರಣಾ ಕಾರ್ಯಕ್ರಮವನ್ನು ಬೆಂಬಲಿಸಿದ್ದರು. ಸಂಪೂರ್ಣ ಸುಧಾರಣೆಗಳ ನಂತರವೇ ಚುನಾವಣೆ ನಡೆಯಬೇಕೆಂದು ಅವರು ಬಯಸಿದ್ದರು. ಯೂನುಸ್ ಮೊದಲು ಸುಧಾರಣೆಗಳು ಮುಗಿದ ನಂತರ ಮುಂದಿನ ಏಪ್ರಿಲ್‌ನಲ್ಲಿ ಚುನಾವಣೆ ನಡೆಸಲು ಸಲಹೆ ನೀಡಿದ್ದರು. ಆದರೆ, ಬಿಎನ್​ಪಿ ವರ್ಷಾಂತ್ಯದೊಳಗೆ ಚುನಾವಣೆ ಬೇಕು ಎಂದು ಒತ್ತಾಯಿಸಿದ್ದರಿಂದ ಈ ವಿಚಾರದಲ್ಲಿ ಘರ್ಷಣೆ ಶುರುವಾಯಿತು.

ಬಿಎನ್​ಪಿ ಆರಂಭದಲ್ಲಿ ಯೂನುಸ್ ಅವರ ಸುಧಾರಣೆಗಳನ್ನು ಬೆಂಬಲಿಸಿತ್ತು. ಆದರೆ, ಈ ಸುಧಾರಣೆಗಳು ಚುನಾವಣೆಯನ್ನು ವಿಳಂಬಗೊಳಿಸಬಾರದು, ಉಳಿದ ಸುಧಾರಣೆಗಳನ್ನು ಚುನಾಯಿತ ಸರ್ಕಾರವೇ ಮಾಡಬಹುದು ಎಂದು ವಾದಿಸಿತ್ತು. ಇತ್ತೀಚೆಗೆ, ಬಿಎನ್​​ಪಿ ಮತ್ತು ವಿದ್ಯಾರ್ಥಿಗಳ ನಡುವೆ ಸಂಬಂಧ ಹಳಸಿ ವಾಗ್ವಾದಗಳು ಆರಂಭಗೊಂಡಿವೆ.

ಕಾನೂನು ಮತ್ತು ಸುವ್ಯವಸ್ಥೆ: ದೊಡ್ಡ ತಲೆನೋವು

ವೀಕ್ಷಕರ ಪ್ರಕಾರ, ಯೂನುಸ್ ಮತ್ತು ಬಿಎನ್​​ಪಿ ತಮ್ಮ ಬೆಂಬಲಿಗರನ್ನು ಫೆಬ್ರವರಿಯ ಚುನಾವಣೆಗೆ ಒಪ್ಪಿಸಿದರೂ, ಕಾನೂನು ಮತ್ತು ಸುವ್ಯವಸ್ಥೆಯು ದೊಡ್ಡ ಸವಾಲಾಗಿ ಉಳಿಯಲಿದೆ. ಕಳೆದ ವರ್ಷದ ಜುಲೈ ಪ್ರತಿಭಟನೆಗಳಿಂದ ಕಾನೂನು ಸುವ್ಯವಸ್ಥೆ ದುರ್ಬಲವಾಗಿದೆ. ಹೆಚ್ಚಿನ ಪೊಲೀಸರು ಕೆಲಸಕ್ಕೆ ಮರಳಿದ್ದರೂ, ಅವರ ಆತ್ಮವಿಶ್ವಾಸ ಮತ್ತು ಅಧಿಕಾರ ಕಡಿಮೆಯಾಗಿದೆ.

ಈ ಪರಿಸ್ಥಿತಿಯಲ್ಲಿ, ಬಾಂಗ್ಲಾದೇಶದ ಸೇನೆಯೇ ಕಾನೂನು ಸುವ್ಯವಸ್ಥೆಯನ್ನು ಕಾಪಾಡುತ್ತಿದೆ ಮತ್ತು ನಗರಗಳು ಹಾಗೂ ಪಟ್ಟಣಗಳಲ್ಲಿ ಹೆಚ್ಚುತ್ತಿರುವ ಅಪರಾಧಗಳನ್ನು ನಿಯಂತ್ರಿಸಬೇಕಾಗಿದೆ. ಚುನಾವಣೆಯನ್ನು ಔಪಚಾರಿಕವಾಗಿ ಘೋಷಿಸಿದ ನಂತರ, ರಾಜಕೀಯ ಪಕ್ಷಗಳ ನಡುವೆ ಘರ್ಷಣೆಗಳು ಮತ್ತು ಅಪರಾಧಗಳು ಹೆಚ್ಚಾಗುವ ಸಾಧ್ಯತೆಯಿದೆ ಎಂದು ತಜ್ಞರು ಹೇಳಿದ್ದಾರೆ. ಚುನಾವಣೆಯ ಸಮಯದಲ್ಲಿ ಶಾಂತಿ ಕಾಪಾಡುವಲ್ಲಿ ಸೇನೆಯ ಪಾತ್ರ ಅತ್ಯಂತ ನಿರ್ಣಾಯಕವಾಗಿರಲಿದೆ.

ಭಾರತ ಮತ್ತು ಬಿಎನ್​​ಪಿ ಸಂಬಂಧ

ಭಾರತಕ್ಕೆ ಬಿಎನ್​ಪಿಯೊಂದಿಗೆ ಹಿಂದೆ ಇದ್ದ ಅನುಭವ (ವಿಶೇಷವಾಗಿ ಜಮಾತ್-ಎ-ಇಸ್ಲಾಮಿಯೊಂದಿಗಿನ ಸಂಬಂಧದಿಂದಾಗಿ) ಅಷ್ಟೇನು ಉತ್ತಮವಾಗಿರಲಿಲ್ಲ. ಆದರೆ, ಇತ್ತೀಚೆಗೆ ಜಮಾತ್ ಮತ್ತು ಬಿಎನ್​​ಪಿ ನಡುವಿನ ಸಂಬಂಧ ಹಳಸಿದೆ.

ವರದಿಗಳ ಪ್ರಕಾರ, ಜಮಾತ್‌ನೊಂದಿಗೆ ಮೈತ್ರಿ ಸಾಧ್ಯವಾಗದಿದ್ದರೆ, ಬಿಎನ್​ಪಿ ಕೆಲವು ಇಸ್ಲಾಮಿಕ್ ಪಕ್ಷಗಳನ್ನು ತಮ್ಮ ಮೈತ್ರಿಕೂಟದಲ್ಲಿ ಸೇರಿಸಿಕೊಳ್ಳಬಹುದು. ಜಮಾತ್ ಸರ್ಕಾರಕ್ಕೆ ಸೇರಲು ಬಯಸದೆ ಇರಬಹುದು, ಬದಲಿಗೆ ಬಾಂಗ್ಲಾದೇಶವನ್ನು ಇಸ್ಲಾಮಿಕ್ ರಾಷ್ಟ್ರವನ್ನಾಗಿ ಮಾಡಲು ದೊಡ್ಡ ಇಸ್ಲಾಮಿಕ್ ಪಕ್ಷಗಳ ಒಕ್ಕೂಟವನ್ನು ರಚಿಸುವ ಯೋಜನೆ ಹೊಂದಿದೆ.

ಶೇಖ್ ಹಸೀನಾ ಅವರ ರಾಜಕೀಯ ಭವಿಷ್ಯ ಅನಿಶ್ಚಿತವಾಗಿರುವಾಗ, ಜಮಾತ್ ಇಲ್ಲದ ಬಿಎನ್​ಪಿ ಸರ್ಕಾರವು ಭಾರತಕ್ಕೆ ಹೆಚ್ಚು ಸ್ವೀಕಾರಾರ್ಹವಾಗಬಹುದು. ಮುಂದಿನ ಮೈತ್ರಿಗಳು ಮತ್ತು ಬಿಎನ್​ಪಿಯ ಕಾರ್ಯತಂತ್ರಗಳ ಮೇಲೆ ಇದು ಸಂಪೂರ್ಣವಾಗಿ ಅವಲಂಬಿತವಾಗಿದೆ. ಚುನಾವಣೆಯ ಘೋಷಣೆಯಾದ ನಂತರ, ಭಾರತವು ತನ್ನ ಸುದೀರ್ಘ ಗಡಿಯನ್ನು ಹಂಚಿಕೊಳ್ಳುವ ನೆರೆಯ ದೇಶದ ಬೆಳವಣಿಗೆಗಳ ಮೇಲೆ ಸೂಕ್ಷ್ಮವಾಗಿ ಗಮನವಿಡಲಿದೆ.