'ಕೂಲಿ' vs 'ವಾರ್ 2': ಬಾಕ್ಸ್ ಆಫೀಸ್ ಸ್ಪರ್ಧೆಯಲ್ಲಿ ರಜನಿಕಾಂತ್ ಸಿನಿಮಾ ಮೇಲುಗೈ
'ಕೂಲಿ' ತನ್ನ 18ನೇ ದಿನ, ಅಂದರೆ ಬಿಡುಗಡೆಯಾದ ಮೂರನೇ ಭಾನುವಾರ, 3 ಕೋಟಿ ರೂ.ಗಳನ್ನು ಗಳಿಸಿದೆ.;
ಕೂಲಿ ಸಿನಿಮಾ
ರಜನಿಕಾಂತ್ ನಟನೆಯ ಮತ್ತು ಲೋಕೇಶ್ ಕನಕರಾಜ್ ನಿರ್ದೇಶನದ ಕ್ರೈಮ್ ಥ್ರಿಲ್ಲರ್ ಸಿನಿಮಾ 'ಕೂಲಿ' ಮತ್ತು ಹೃತಿಕ್ ರೋಷನ್ ಹಾಗೂ ಜೂನಿಯರ್ ಎನ್‌ಟಿಆರ್‌ ನಟನೆಯ ಅಯಾನ್ ಮುಖರ್ಜಿ ಅವರ 'ವಾರ್ 2' ಸಿನಿಮಾಗಳು ಸ್ವಾತಂತ್ರ್ಯ ದಿನಾಚರಣೆಯ ಮುನ್ನಾದಿನ ಬಿಡುಗಡೆಯಾಗಿ 18 ದಿನಗಳನ್ನು ಪೂರೈಸಿವೆ. ಈ ಎರಡೂ ಚಿತ್ರಗಳಲ್ಲಿ, ದೇಶೀಯ ಬಾಕ್ಸ್ ಆಫೀಸ್ ಗಳಿಕೆಯಲ್ಲಿ 'ಕೂಲಿ' ಸಿನಿಮಾ 'ವಾರ್ 2' ಗಿಂತ ಅಧಿಕ ಲಾಭ ಗಳಿಸಿದೆ.
18 ದಿನಗಳ ಬಾಕ್ಸ್ ಆಫೀಸ್ ಗಳಿಕೆ
'ಕೂಲಿ' ತನ್ನ 18ನೇ ದಿನ, ಅಂದರೆ ಬಿಡುಗಡೆಯಾದ ಮೂರನೇ ಭಾನುವಾರ, 3 ಕೋಟಿ ರೂ.ಗಳನ್ನು ಗಳಿಸಿದೆ. ಇದು ಶನಿವಾರ (ದಿನ 17) ಗಳಿಸಿದ್ದ 2.80 ಕೋಟಿ ರೂ. ಮತ್ತು ಶುಕ್ರವಾರ (ದಿನ 16) ಗಳಿಸಿದ್ದ 1.70 ಕೋಟಿ ರೂ.ಗಿಂತ ಹೆಚ್ಚಿನ ಗಳಿಕೆಯಾಗಿದೆ. ಸ್ಯಾಕ್ನಿಲ್ಕ್ ವರದಿ ಪ್ರಕಾರ, ಭಾರತದಲ್ಲಿ 'ಕೂಲಿ' ಚಿತ್ರದ ಒಟ್ಟು ಬಾಕ್ಸ್ ಆಫೀಸ್ ಸಂಗ್ರಹ ಈಗ 280 ಕೋಟಿ ರೂ. ತಲುಪಿದೆ.
'ಕೂಲಿ' ಚಿತ್ರದ ಗಳಿಕೆಯು ರಜನಿಕಾಂತ್ ಅವರ ಕಳೆದ ವರ್ಷ ಬಿಡುಗಡೆಯಾದ 'ವೆಟ್ಟೈಯನ್' (148 ಕೋಟಿ ರೂ.) ಸಿನಿಮಾದ ಗಳಿಕೆಗಿಂತ ಹೆಚ್ಚಾಗಿದೆ. ಆದರೆ, ಇದು ನೆಲ್ಸನ್ ದಿಲೀಪ್‌ಕುಮಾರ್ ನಿರ್ದೇಶನದ 2023ರ 'ಜೈಲರ್' (349 ಕೋಟಿ ರೂ.) ಮತ್ತು ಲೋಕೇಶ್ ಕನಕರಾಜ್ ನಿರ್ದೇಶನದ ದಳಪತಿ ವಿಜಯ್ ಅವರ 'ಲಿಯೋ' (399 ಕೋಟಿ ರೂ.) ಹಾಗೂ ಕಮಲ್ ಹಾಸನ್ ಅವರ 'ವಿಕ್ರಮ್' (289 ಕೋಟಿ ರೂ.) ಚಿತ್ರಗಳ ಗಳಿಕೆಗಿಂತ ಕಡಿಮೆಯಾಗಿದೆ.
ʻಕೂಲಿ' ಸಿನಿಮಾದ ತಮಿಳು ಭಾಗ ಹೆಚ್ಚಿನ ಆದಾಯ ಗಳಿಸಿದೆ. 'ವಾರ್ 2' ಸಿನಿಮಾ ಹಿಂದಿ, ತಮಿಳು ಮತ್ತು ತೆಲುಗು ಭಾಷೆಗಳಲ್ಲಿ ಭಾರತದಲ್ಲಿ 235 ಕೋಟಿ ರೂ. ಗಳಿಸಿದೆ. ಹಿಂದಿ ಮಾರುಕಟ್ಟೆಯಲ್ಲಿ, 'ಕೂಲಿ' ಈಗ ಸಿದ್ಧಾರ್ಥ್ ಮಲ್ಹೋತ್ರಾ ಮತ್ತು ಜಾನ್ವಿ ಕಪೂರ್ ನಟನೆಯ 'ಪರಮ್ ಸುಂದರಿ' ಚಿತ್ರದೊಂದಿಗೆ ಸ್ಪರ್ಧಿಸುತ್ತಿದೆ. ಇದು ಮೊದಲ ವಾರಾಂತ್ಯದಲ್ಲಿ 26.75 ಕೋಟಿ ರೂ. ಗಳಿಸಿದೆ.
'ಕೂಲಿ' ಸಿನಿಮಾಗೆ ಸಿಕ್ಕಿರುವ 'ಎ' (ವಯಸ್ಕರಿಗೆ ಮಾತ್ರ) ಪ್ರಮಾಣೀಕರಣವು ಅದರ ಬಾಕ್ಸ್ ಆಫೀಸ್ ಗಳಿಕೆಯ ಮೇಲೆ ಪರಿಣಾಮ ಬೀರಿದೆ ಎಂದು ಹೇಳಲಾಗುತ್ತಿದೆ. ರಜನಿಕಾಂತ್ ಅವರ ಹಲವಾರು ಯುವ ಅಭಿಮಾನಿಗಳು ಚಿತ್ರ ವೀಕ್ಷಣೆಯಿಂದ ವಂಚಿತರಾಗಿದ್ದಾರೆ ಎಂದು ನಿರ್ಮಾಪಕರು ಮದ್ರಾಸ್ ಹೈಕೋರ್ಟ್‌ನಲ್ಲಿ ಪ್ರಶ್ನಿಸಿದ್ದರು. ಆದರೆ, ಮಂಡಳಿ ಸೂಚಿಸಿದ ಕಡಿತಗಳನ್ನು ಒಪ್ಪಿಕೊಂಡು ಚಿತ್ರಮಂದಿರಗಳಲ್ಲಿ ಬಿಡುಗಡೆ ಮಾಡಲು ಅನುಮತಿ ಪಡೆದಿದ್ದರಿಂದ ಈ ಮೇಲ್ಮನವಿಯನ್ನು ನ್ಯಾಯಾಲಯ ತಿರಸ್ಕರಿಸಿದೆ. ಇದರಿಂದ, 'ಕೂಲಿ' ಚಿತ್ರವು 'ಯು/ಎ' ಪ್ರಮಾಣಪತ್ರ ಪಡೆಯುವ ಸಾಧ್ಯತೆಗಳು ಕಡಿಮೆಯಾಗಿವೆ. ಇದು ಅದರ ದೇಶಾದ್ಯಂತದ ಗಳಿಕೆ ಸಂಖ್ಯೆಗಳನ್ನು ಕಡಿಮೆ ಮಾಡುತ್ತಿದೆ. ರಜನಿಕಾಂತ್ ಅವರ ಹೆಚ್ಚಿನ ಚಲನಚಿತ್ರಗಳು ಕುಟುಂಬ ಸ್ನೇಹಿ ಚಿತ್ರಗಳಾಗಿದ್ದು, 'ಯು/ಎ' ಪ್ರಮಾಣಪತ್ರ ಪಡೆದಿವೆ. ಆದರೆ, ಹಿಂಸಾತ್ಮಕ ದೃಶ್ಯಗಳಿಂದಾಗಿ 'ಕೂಲಿ' 'ಎ' ಪ್ರಮಾಣ ಪತ್ರ ಪಡೆದಿದೆ.
ಕೂಲಿ ಸಿನಿಮಾದಲ್ಲಿ ಶ್ರುತಿ ಹಾಸನ್ ನಾಯಕಿಯಾಗಿ ಮತ್ತು ತೆಲುಗು ಸೂಪರ್‌ಸ್ಟಾರ್ ನಾಗಾರ್ಜುನ ಮುಖ್ಯ ಪ್ರತಿಸ್ಪರ್ಧಿಯಾಗಿ ನಟಿಸಿದ್ದಾರೆ. ಅಲ್ಲದೆ, ಬಾಲಿವುಡ್ ಸೂಪರ್‌ಸ್ಟಾರ್ ಆಮಿರ್ ಖಾನ್ ಅವರ ವಿಶೇಷ ಅತಿಥಿ ಪಾತ್ರವೂ ಈ ಚಿತ್ರದ ಮತ್ತೊಂದು ಪ್ರಮುಖ ಆಕರ್ಷಣೆಯಾಗಿದೆ. ಕನ್ನಡದ ನಟ ಉಪೇಂದ್ರ ಹಾಗೂ ನಟಿ ರಚಿತಾ ರಾಮ್‌ ಈ ಸಿನಿಮಾದಲ್ಲಿ ನಟಿಸಿದ್ದಾರೆ.