ಮೆಗಾ ಪವರ್‌ಸ್ಟಾರ್ ರಾಮ್ ಚರಣ್ ಅಭಿನಯದ 'ಪೆದ್ದಿ' ಚಿತ್ರದ ಮೊದಲ ಸಿಂಗಲ್ 'ಚಿಕಿರಿ ಚಿಕಿರಿ' ಬಿಡುಗಡೆ

ಮೆಗಾ ಪವರ್‌ಸ್ಟಾರ್ ರಾಮ್ ಚರಣ್ ಮತ್ತು ಜಾನ್ವಿ ಕಪೂರ್ ಮುಖ್ಯ ಭೂಮಿಕೆಯಲ್ಲಿ ನಟಿಸಿರುವ ಬಹುನಿರೀಕ್ಷಿತ ಚಿತ್ರ 'ಪೆದ್ದಿ'ಯ ಮೊದಲ ಹಾಡು 'ಚಿಕಿರಿ ಚಿಕಿರಿ' ಬಿಡುಗಡೆಯಾಗಿದೆ. ಈ ಹಾಡಿನಲ್ಲಿ ರಾಮ್ ಚರಣ್ ಅವರ ನೃತ್ಯ ಪ್ರೇಕ್ಷಕರನ್ನು ಮಂತ್ರಮುಗ್ಧಗೊಳಿಸಿದೆ. ನಾಯಕಿ ಜಾನ್ವಿ ಕಪೂರ್ ತಮ್ಮ ಪರದೆಯ  ಗ್ಲಾಮರ್ ಮೂಲಕ ಹಾಡಿನ ಸೌಂದರ್ಯವನ್ನು ಹೆಚ್ಚಿಸಿದ್ದಾರೆ.

ಈ ಹಾಡಿಗೆ ಆಸ್ಕರ್ ಪ್ರಶಸ್ತಿ ವಿಜೇತ ಎ.ಆರ್. ರೆಹಮಾನ್ ಸಂಗೀತ ಸಂಯೋಜನೆ ಮಾಡಿದ್ದು, ಖ್ಯಾತ ನೃತ್ಯ ಸಂಯೋಜಕ ಜಾನಿ ಮಾಸ್ಟರ್ ಕೊರಿಯೋಗ್ರಫಿ ಮಾಡಿದ್ದಾರೆ. ಬಾಲಿವುಡ್‌ನ ಗಾಯಕ ಮೋಹಿತ್ ಚೌಹಾಣ್ ಅವರ ಕಂಠದಲ್ಲಿ ಈ ಹಾಡು ಮೂಡಿಬಂದಿದೆ. ಬಾಲಾಜಿ ಬರೆದ ಸಾಹಿತ್ಯ ಸರಳವಾಗಿದ್ದರೂ ಸುಮಧುರವಾಗಿದೆ. 

ಸನಾ ಬುಚ್ಚಿಬಾಬು ನಿರ್ದೇಶನದ 'ಪೆದ್ದಿ' ದೊಡ್ಡ ಬಜೆಟ್ ಚಿತ್ರವಾಗಿದ್ದು, ರಾಮ್ ಚರಣ್ ಮತ್ತು ಜಾನ್ವಿ ಕಪೂರ್ ಇದರಲ್ಲಿ ಮೊದಲ ಬಾರಿಗೆ ಜೊತೆಯಾಗಿ ನಟಿಸಿದ್ದಾರೆ. ಮೈತ್ರಿ ಮೂವಿ ಮೇಕರ್ಸ್ ಮತ್ತು ಸುಕುಮಾರ್ ರೈಟಿಂಗ್ಸ್ ಪ್ರಸ್ತುತಪಡಿಸುತ್ತಿರುವ ಈ ಚಿತ್ರವನ್ನು ವೆಂಕಟ ಸತೀಶ್ ಕಿಲಾರು ನಿರ್ಮಿಸುತ್ತಿದ್ದಾರೆ. ಕನ್ನಡದ ಜನಪ್ರಿಯ ನಟ ಶಿವರಾಜ್‌ಕುಮಾರ್, 'ಮಿರ್ಜಾಪುರ' ಖ್ಯಾತಿಯ ದಿವ್ಯಾಂಶು ಶರ್ಮಾ ಮತ್ತು ಜಗಪತಿ ಬಾಬು ಸೇರಿದಂತೆ ಹಲವು ತಾರೆಯರು ಪ್ರಮುಖ ಪಾತ್ರಗಳಲ್ಲಿ ನಟಿಸಿದ್ದಾರೆ.

ಈ ಹಿಂದೆ ಬಿಡುಗಡೆಯಾದ ಫಸ್ಟ್ ಲುಕ್ ಪೋಸ್ಟರ್‌ಗಳು ಮತ್ತು ಗ್ಲಿಂಪ್ಸ್‌ಗಳು ಚಿತ್ರದ ಮೇಲೆ ಭಾರಿ ನಿರೀಕ್ಷೆಗಳನ್ನು ಹುಟ್ಟುಹಾಕಿವೆ. ಪೋಸ್ಟರ್‌ಗಳಲ್ಲಿ ರಾಮ್ ಚರಣ್ ಉದ್ದ ಕೂದಲು, ದಪ್ಪ ಗಡ್ಡ ಮತ್ತು ದೃಢ ಮೈಕಟ್ಟಿನೊಂದಿಗೆ ಸಂಪೂರ್ಣ ಮಾಸ್ ಲುಕ್‌ನಲ್ಲಿ ಕ್ರಿಕೆಟ್ ಬ್ಯಾಟ್ ಹಿಡಿದು ಕಾಣಿಸಿಕೊಂಡಿದ್ದಾರೆ. ಇದು ಸಾಮಾಜಿಕ ಮಾಧ್ಯಮದಲ್ಲಿ ವೈರಲ್ ಆಗಿತ್ತು. 

'ಚಿಕಿರಿ ಚಿಕಿರಿ' ಹಾಡಿನ ಪ್ರೋಮೋ ನೋಡಿ ಉತ್ಸುಕರಾಗಿದ್ದ ಅಭಿಮಾನಿಗಳು, ಇದೀಗ ಪೂರ್ಣ ವೀಡಿಯೊ ಹಾಡಿನ ಬಿಡುಗಡೆಯಿಂದಾಗಿ ಸಂಭ್ರಮಿಸುತ್ತಿದ್ದಾರೆ. ಹಾಡಿನಲ್ಲಿ ಚರಣ್ ಅವರ ನೃತ್ಯ ಮತ್ತು ಸೌಂದರ್ಯ ಅದ್ಭುತವಾಗಿದೆ ಎಂದು ಅವರು ಕಾಮೆಂಟ್ ಮಾಡುತ್ತಿದ್ದಾರೆ. ಇತ್ತೀಚೆಗೆ, 'ಪೆದ್ದಿ' ತಂಡವು 'ಚಿಕಿರಿ' ಪದದ ಅರ್ಥವನ್ನು ಬಹಿರಂಗಪಡಿಸಿದೆ. ಮೇಕಪ್ ಅಗತ್ಯವಿಲ್ಲದ ಹುಡುಗಿಯರನ್ನು ಪ್ರೀತಿಯಿಂದ 'ಚಿಕಿರಿ' ಎಂದು ಕರೆಯಲಾಗುತ್ತದೆ ಎಂದು ನಿರ್ದೇಶಕ ಬುಚಿ ಬಾಬು ಅವರು ಬಹಿರಂಗಪಡಿಸಿದ್ದರು. 

'ಪೆದ್ದಿ' ಚಿತ್ರವು ಮುಂದಿನ ವರ್ಷ ಮಾರ್ಚ್ 27 ರಂದು ರಾಮ್ ಚರಣ್ ಅವರ ಹುಟ್ಟುಹಬ್ಬದಂದು ಬಿಡುಗಡೆಯಾಗಲಿದೆ. ಬಿಡುಗಡೆಗೆ ಇನ್ನೂ ಐದು ತಿಂಗಳುಗಳು ಬಾಕಿ ಇರುವಾಗಲೇ, ಚಿತ್ರತಂಡವು ಪ್ರಚಾರ ಕಾರ್ಯಗಳನ್ನು ಪ್ರಾರಂಭಿಸಿ ಅಭಿಮಾನಿಗಳಲ್ಲಿ ಮತ್ತಷ್ಟು ಕ್ರೇಜ್ ಹೆಚ್ಚಿಸುತ್ತಿದೆ.