ಬಿಗ್‌ಬಾಸ್‌ಗೆ ಕಮಲ್ ಹಾಸನ್ ವಿದಾಯ; ಬಿಗ್‌ಬಾಸ್‌ ತಮಿಳು 9ಕ್ಕೆ ವಿಜಯ್‌ ಸೇತುಪತಿ ಚಾಲನೆ

2017ರಿಂದ ಪ್ರೇಕ್ಷಕರ ಮನಸ್ಸಿನಲ್ಲಿ ಸ್ಥಾನ ಪಡೆದಿರುವ ತಮಿಳಿನ ಅತ್ಯಂತ ಜನಪ್ರಿಯ ರಿಯಾಲಿಟಿ ಶೋ ‘ಬಿಗ್ ಬಾಸ್’ ತನ್ನ 9ನೇ ಸೀಸನ್‌ನೊಂದಿಗೆ ಮರಳಿದೆ. ಈ ಹೊಸ ಸೀಸನ್ ಅಕ್ಟೋಬರ್ 5ರಂದು ಅದ್ದೂರಿಯಾಗಿ ಆರಂಭಗೊಂಡಿದೆ. ಈ ಮೊದಲು 7 ಸೀಸನ್‌ಗಳವರೆಗೆ ನಟ ಕಮಲ್ ಹಾಸನ್ ಶೋವನ್ನು ನಿರೂಪಿಸಿದ್ದರು. ಆದರೆ ವೈಯಕ್ತಿಕ ಕಾರಣಗಳಿಂದ ಅವರು ಹಿಂದೆ ಸರಿದ ಬಳಿಕ, ವಿಜಯ್ ಸೇತುಪತಿ 8ನೇ ಸೀಸನ್‌ನ ನಿರೂಪಣೆ ವಹಿಸಿದ್ದರು. ಪ್ರೇಕ್ಷಕರಿಂದ ಉತ್ತಮ ಪ್ರತಿಕ್ರಿಯೆ ಪಡೆದ ಸೇತುಪತಿ, ಈ ವರ್ಷವೂ 9ನೇ ಸೀಸನ್‌ನ ನಿರೂಪಕರಾಗಿ ಮರಳಿದ್ದಾರೆ.

ಪ್ರತಿ ವರ್ಷ ಹೊಸ ವಿನ್ಯಾಸದಲ್ಲಿ ಕಾಣಿಸಿಕೊಳ್ಳುವ ಬಿಗ್ ಬಾಸ್ ಮನೆ, ಈ ಬಾರಿ ಈಜಿಪ್ಟಿನ ಅರಮನೆಯ ಶೈಲಿಯಲ್ಲಿ ಅಲಂಕರಿಸಲಾಗಿದೆ. ಶೋ ಪ್ರಾರಂಭದ ವೇಳೆ ವಿಜಯ್ ಸೇತುಪತಿ ವೇದಿಕೆಗೆ ಬಂದು ಸ್ಪರ್ಧಿಗಳನ್ನು ಪ್ರೇಕ್ಷಕರಿಗೆ ಪರಿಚಯಿಸಿದರು.

ಈ ಸೀಸನ್‌ನಲ್ಲಿ ಸಾಮಾಜಿಕ ಮಾಧ್ಯಮದ ತಾರೆಗಳು, ಯೂಟ್ಯೂಬರ್‌ಗಳು, ಧಾರಾವಾಹಿ ನಟರು ಮತ್ತು ಹಲವು ಹೊಸ ಮುಖಗಳು ಭಾಗಿಯಾಗಿದ್ದಾರೆ. ದಿವಾಕರ್, ಅರೋರಾ ಸಿಂಕ್ಲೇರ್, ಎಫ್‌ಜೆ, ವಿಜೆ ಪಾರ್ವತಿ, ತುಷಾರ್, ಕಣಿ, ಶಬರಿ, ಪ್ರವೀಣ್ ಗಾಂಧಿ, ಕೇಮಿ, ಅಧಿರೈ, ರಮ್ಯಾ ಜೋ, ಗಾನ ವಿನೋತ್, ವಿಯಾನಾ, ಪ್ರವೀಣ್, ಅಘೋರಿ ಕಲೈಯರಸನ್, ಕಮರುದ್ದೀನ್, 'ವಿಕಲ್ಸ್' ವಿಕ್ರಮ್, ನಂದಿನಿ, ಅಪ್ಸರಾ, ಸುಭಿಕ್ಷಾ ಮತ್ತು ಇತರರು ಇದ್ದರು. ಪ್ರತಿಯೊಂದರ ಪರಿಚಯದ ಕಿರು ವೀಡಿಯೊವನ್ನು ಎಂದಿನಂತೆ ಪ್ರಸಾರ ಮಾಡಲಾಯಿತು.

ಈ ಬಾರಿ ಸ್ಪರ್ಧಿಗಳ ಆಯ್ಕೆ ಕಳೆದ ಕೆಲವು ತಿಂಗಳಿನಿಂದ ನಡೆಯುತ್ತಿತ್ತು. ಪ್ರತಿ ಸ್ಪರ್ಧಿಯ ಪ್ರವೇಶದ ವೇಳೆ ಅವರ ಕಿರು ಪರಿಚಯ ವೀಡಿಯೊಗಳನ್ನು ಎಂದಿನಂತೆ ಪ್ರದರ್ಶಿಸಲಾಯಿತು. ಸಾಮಾಜಿಕ ಮಾಧ್ಯಮಗಳಲ್ಲಿ ಈಗಾಗಲೇ #BiggBossTamil9 ಟ್ರೆಂಡ್ ಆಗುತ್ತಿದ್ದು, ಪ್ರೇಕ್ಷಕರು ಹೊಸ ಸೀಸನ್‌ನ ತಿರುವುಗಳಿಗೆ  ಕಾತರರಾಗಿದ್ದಾರೆ.

ಆಯ್ಕೆ ಪ್ರಕ್ರಿಯೆ ಹಾಗೂ ವಿವಾದ

ಬಿಗ್ ಬಾಸ್ ಕಾರ್ಯಕ್ರಮದಲ್ಲಿ ಸ್ಪರ್ಧಿಯಾಗಿ ಭಾಗವಹಿಸಲು ಹಲವಾರು ಸುತ್ತಿನ ಆಯ್ಕೆ ಪ್ರಕ್ರಿಯೆಗಳ ಮೂಲಕ ಹೋಗಬೇಕಾಗುತ್ತದೆ. ಕೇವಲ ಶಿಫಾರಸ್ಸಿನ ಆಧಾರದ ಮೇಲೆ ಸ್ಪರ್ಧಿಗಳನ್ನು ಆಯ್ಕೆ ಮಾಡುವುದಿಲ್ಲ. ಆದರೆ, ಭೌತಚಿಕಿತ್ಸಕ ಹಾಗೂ ವಾಟರ್‌ಮೆಲನ್ ಸ್ಟಾರ್ ಎಂದು ಪ್ರಸಿದ್ಧರಾದ ದಿವಾಕರ್ ಈ ಸೀಸನ್‌ನಲ್ಲಿ ಸ್ಪರ್ಧಿಯಾಗಲಿದ್ದಾರೆ ಎಂಬ ಸುದ್ದಿ ಹೊರಬಂದ ಬಳಿಕ, ನೆಟಿಜನ್‌ಗಳು ಹಾಗೂ ಅಭಿಮಾನಿಗಳು ಬಿಗ್ ಬಾಸ್ ತಂಡದ ವಿರುದ್ಧ ಟೀಕೆಗಳನ್ನು ವ್ಯಕ್ತಪಡಿಸಿದರು.

ದಿವಾಕರ್ ಅವರ ವಿವಾದಾತ್ಮಕ ಹೇಳಿಕೆಗಳು ಹಾಗೂ ವರ್ತನೆಗಳ ಕಾರಣ ಅವರು ಸಾಮಾಜಿಕ ಮಾಧ್ಯಮಗಳಲ್ಲಿ ಹಲವು ಬಾರಿ ಟೀಕೆಗೆ ಗುರಿಯಾಗಿದ್ದರು. ಕೆಲವರು ಅವರಿಗೆ ಆತಂಕದ ಕಾಯಿಲೆ ಇದೆ ಎಂಬ ಆರೋಪವನ್ನೂ ಮಾಡಿದ್ದರು. ಈ ಹಿನ್ನೆಲೆಯಲ್ಲಿ ಅವರ ಆಯ್ಕೆ ಬಗ್ಗೆ ಪ್ರಶ್ನೆಗಳು ಎದ್ದವು.

ಆದರೆ, ನಟ ವಿಜಯ್ ಸೇತುಪತಿ ಈ ವಿಷಯಕ್ಕೆ ಸ್ಪಷ್ಟನೆ ನೀಡಿದ್ದು, ವಾಟರ್‌ಮೆಲನ್ ಸ್ಟಾರ್ ದಿವಾಕರ್ ಅವರನ್ನು ಬಿಗ್ ಬಾಸ್ ತಂಡವು ಹಲವು ಹಂತದ ಆಯ್ಕೆ ಪ್ರಕ್ರಿಯೆಯ ಬಳಿಕ ಮಾತ್ರ ಆಯ್ಕೆ ಮಾಡಿದೆ. ವೈದ್ಯಕೀಯ ಕ್ಷೇತ್ರ, ವಿಶೇಷವಾಗಿ ಅವರ ಭೌತಚಿಕಿತ್ಸೆಯ ಕುರಿತಂತೆ ಕೇಳಲಾದ ಪ್ರಶ್ನೆಗಳಿಗೆ ಅವರು ಸರಿಯಾದ ಉತ್ತರ ನೀಡಿದ್ದರು. ಅದರ ಆಧಾರದ ಮೇಲೆಯೇ ಅವರನ್ನು ಆಯ್ಕೆ ಮಾಡಲಾಗಿದೆ ಎಂದು ಸ್ಪಷ್ಟನೆ ನೀಡಿದ್ದಾರೆ.