ಕ್ರಿಕೆಟರ್‌ ದೀಪಕ್ ಚಹಾರ್ ಸಹೋದರಿ ಬಿಗ್‌ಬಾಸ್‌ ಮನೆಗೆ, ಯಾರವರು?

ಈಗಾಗಲೇ ನಾಟಕೀಯತೆ, ವಿವಾದ ಮತ್ತು ಭಾವೋದ್ವೇಗದಿಂದ ತುಂಬಿ ತುಳುಕುತ್ತಿರುವ ಹಿಂದಿ ಬಿಗ್‌ಬಾಸ್‌ 19 ಮನೆಯಲ್ಲಿ ಮತ್ತೊಂದು ದೊಡ್ಡ ತಿರುವು ಸಿಕ್ಕಿದೆ. ಭಾರತೀಯ ಕ್ರಿಕೆಟಿಗ ದೀಪಕ್ ಚಹಾರ್ ಅವರ ಸಹೋದರಿ ಮಾಲ್ತಿ ಚಹಾರ್, ವೈಲ್ಡ್ ಕಾರ್ಡ್ ಸ್ಪರ್ಧಿಯಾಗಿ ಮನೆಗೆ ಪ್ರವೇಶಿಸಿದ್ದು, ಮನೆಯ ವಾತಾವರಣದಲ್ಲಿ ಹೊಸ ಸಂಚಲನ ಮೂಡಿಸಿದೆ.

ವೇದಿಕೆಯ ಮೇಲೆ ಸಹೋದರ ದೀಪಕ್ ಚಹಾರ್ ಅವರಿಂದ ಪರಿಚಯಿಸಲ್ಪಟ್ಟ ಮಾಲ್ತಿ, ಮನೆಗೆ ಕಾಲಿಡುತ್ತಿದ್ದಂತೆ ಬಹುತೇಕ ಸ್ಪರ್ಧಿಗಳು ಆಕೆಯ ಸುತ್ತ ಸೇರಿದರು. ಆದರೆ, ಈ ಬೆಳವಣಿಗೆಯಿಂದ ಹೆಚ್ಚು ಪ್ರಭಾವಿತರಾದವರು ಸ್ಪರ್ಧಿ ತಾನ್ಯಾ ಮಿತ್ತಲ್. ಆಕೆಯ ಮುಖದಲ್ಲಿ ಅಸೂಯೆಯ ಭಾವನೆಗಳು ಸ್ಪಷ್ಟವಾಗಿ ಗೋಚರಿಸುತ್ತಿದ್ದವು.

ಶಹಬಾಜ್ ಬಡೇಶ ಮತ್ತು ಇತರರು ಮಾಲ್ತಿಯನ್ನು ಹೊಗಳುತ್ತಿದ್ದಾಗ, ನೀಲಂ ಗಿರಿ "ಮಾಲ್ತಿ ಸುಂದರವಾಗಿದ್ದಾಳೆ" ಎಂದರು. ಇದಕ್ಕೆ ತಕ್ಷಣವೇ ಪ್ರತಿಕ್ರಿಯಿಸಿದ ತಾನ್ಯಾ, "ನನಗೇನೂ ಹಾಗೆ ಅನಿಸುತ್ತಿಲ್ಲ" ಎಂದು ತೀಕ್ಷ್ಣವಾಗಿ ಉತ್ತರಿಸಿದಳು. ಅಷ್ಟೇ ಅಲ್ಲ, ಮಾಲ್ತಿಯ ಐಷಾರಾಮಿ ಜೀವನಶೈಲಿಯ ಕುರಿತ ಮಾತುಗಳನ್ನು ಅಣಕಿಸಿದ ತಾನ್ಯಾ, ತನ್ನನ್ನು ತಾನು "ಸ್ವಾರ್ಥಿ ಮತ್ತು ಹೆಮ್ಮೆಪಡುವವಳು" ಎಂದು ಹೇಳಿಕೊಂಡಳು.

ವಯಸ್ಸಿನ ಬಗ್ಗೆ ಅವಹೇಳನಕಾರಿ ಮಾತು

ಊಟದ ಸಮಯದಲ್ಲಿ ನೀಲಂ ಗಿರಿ ಜೊತೆ ಮಾತನಾಡುತ್ತಿದ್ದ ತಾನ್ಯಾ, ಮಾಲ್ತಿಯ ವಯಸ್ಸಿನ ಬಗ್ಗೆ ಅವಹೇಳನಕಾರಿ ವ್ಯಂಗ್ಯವಾಡಿದಳು. "ಮಾಲ್ತಿ ನೋಡಲು 61 ವರ್ಷದ ಕುನಿಕಾ ಸದಾನಂದ್ ಅವರಂತೆ ಕಾಣಿಸುತ್ತಾಳೆ" ಎಂದು ಹೇಳಿದಳು. ಇದಕ್ಕೆ ನೀಲಂ ನಕ್ಕರೂ, ಈ ಮಾತು ಸಾಮಾಜಿಕ ಮಾಧ್ಯಮಗಳಲ್ಲಿ ದೊಡ್ಡ ಚರ್ಚೆಗೆ ಕಾರಣವಾಗಿದೆ. ಅಸಲಿಗೆ, ಮಾಲ್ತಿ ಚಹಾರ್ ಅವರ ನಿಜವಾದ ವಯಸ್ಸು 34 ವರ್ಷ.

'ಮಾಟಗಾತಿ' ಅವತಾರದಲ್ಲಿ ಮಾಲ್ತಿ

ಈ ನಡುವೆ, ಬಿಗ್‌ಬಾಸ್‌ ಮಾಲ್ತಿಗೆ ಒಂದು ಪ್ರಮುಖ ಜವಾಬ್ದಾರಿ ನೀಡಿದ್ದಾರೆ. ಮುಂಬರುವ ನಾಮಿನೇಷನ್ ಪ್ರಕ್ರಿಯೆಯಲ್ಲಿ ಆಕೆ 'ಮಾಟಗಾತಿ' ಪಾತ್ರವನ್ನು ನಿರ್ವಹಿಸಲಿದ್ದಾಳೆ. ಈ ಕಾರ್ಯದಲ್ಲಿ ಫರ್ಹಾನಾ ಕೂಡ ಮತ್ತೊಬ್ಬ ಮಾಟಗಾತಿಯಾಗಿರುತ್ತಾರೆ. ಹೀಗಾಗಿ, ತಾನ್ಯಾ ಮತ್ತು ಫರ್ಹಾನಾ ನಡುವೆಯೂ ಜಗಳ ನಡೆಯುವ ಸಾಧ್ಯತೆಗಳಿವೆ.

ಒಟ್ಟಿನಲ್ಲಿ, ಮಾಲ್ತಿಯ ಆಗಮನ ಮನೆಯಲ್ಲಿನ ಸಂಬಂಧಗಳನ್ನು ಮತ್ತಷ್ಟು ಜಟಿಲಗೊಳಿಸುತ್ತದೆಯೇ ಅಥವಾ ಹೊಸ ಸಮೀಕರಣಗಳಿಗೆ ದಾರಿ ಮಾಡಿಕೊಡುತ್ತದೆಯೇ ಎಂಬುದನ್ನು ಕಾದುನೋಡಬೇಕಿದೆ.