Gold Smuggling: ದುಬೈಯಿಂದ ಅಷ್ಟೇ ಅಲ್ಲ ಆಫ್ರಿಕಾದಿಂದಲೂ ಗೋಲ್ಡ್ ಸ್ಮಗ್ಲಿಂಗ್

ನಟಿ ರನ್ಯಾ ರಾವ್ ಸಂಬಂಧಿs ಚಿನ್ನದ ಕಳ್ಳಸಾಗಣೆ ಪ್ರಕರಣವು ದಿನದಿಂದ ದಿನಕ್ಕೆ ಹೊಸ ತಿರುವುಗಳನ್ನು ಪಡೆಯುತ್ತಿದ್ದು, ಇದೀಗ ಈ ಕೇಸ್ ಕೇವಲ ದುಬೈ-ಭಾರತದ ಮಧ್ಯದ ವ್ಯವಹಾರವಾಗಿ ಮಾತ್ರ ಉಳಿದಿಲ್ಲ. ಡಿಆರ್‌ಐ (ಡೈರೆಕ್ಟರೇಟ್ ಆಫ್ ರೆವೆನ್ಯೂ ಇಂಟೆಲಿಜೆನ್ಸ್) ತನಿಖೆಯಿಂದ ತಿಳಿದುಬಂದ ಮಾಹಿತಿಯ ಪ್ರಕಾರ, ಈ ಪ್ರಕರಣವು ದಕ್ಷಿಣ ಆಫ್ರಿಕಾ-ಜಿನೇವಾ-ದುಬೈ-ಭಾರತವನ್ನು ಒಳಗೊಂಡ ಅಂತರರಾಷ್ಟ್ರೀಯ ಮಾಫಿಯಾ ಜಾಲದ ಭಾಗವಾಗಿದೆ ಎಂಬ ಆಘಾತಕಾರಿ ಸತ್ಯ ಬಯಲಾಗಿದೆ.

ತರುಣ್ ಕೊಂಡೂರನ ತಪ್ಪೊಪ್ಪಿಗೆ

ತನಿಖೆಯಲ್ಲಿ ಭಾಗಿಯಾಗಿರುವ ಆರೋಪಿ ತರುಣ್ ಕೊಂಡೂರು ತನ್ನ ಹೇಳಿಕೆಯಲ್ಲಿ ತಪ್ಪನ್ನು ಒಪ್ಪಿಕೊಂಡಿದ್ದಾನೆ. ಅವನು ತನ್ನ ಅಮೆರಿಕಾ ಪಾಸ್‌ಪೋರ್ಟ್ ಬಳಸಿ, ಜಿನೇವಾಗೆ ಹೋಗುವ ನೆಪದಲ್ಲಿ ದುಬೈ ಮೂಲಕ ಚಿನ್ನವನ್ನು ಸಾಗಿಸುತ್ತಿದ್ದ ಎಂಬುದು ಬಹಿರಂಗವಾಗಿದೆ. ಆದರೆ, ದುಬೈ ಏರ್‌ಪೋರ್ಟ್‌ನಲ್ಲಿ ಈ ಚಿನ್ನವನ್ನು ರನ್ಯಾ ರಾವ್‌ಗೆ ಹಸ್ತಾಂತರಿಸಲಾಗುತ್ತಿತ್ತು. ರನ್ಯಾ  ತನ್ನ ಅಪ್ಪನ ಹುದ್ದೆಯ ಪ್ರೋಟೋಕಾಲ್ ಅನುಕೂಲ  ಬಳಸಿ, ಚಿನ್ನವನ್ನು ಭಾರತಕ್ಕೆ ಸಾಗಿಸುತ್ತಿದ್ದಳು ಎಂಬುದು ತಿಳಿದುಬಂದಿದೆ. ಈ ರೀತಿಯ ಸಂಘಟಿತ ಕಾರ್ಯವೈಖರಿಯು ದೊಡ್ಡ ಮಟ್ಟದ ಜಾಲ ಇರುವುದು ಬೆಳಕಿಗೆ ಬಂದಿದೆ.

ದಕ್ಷಿಣ ಆಫ್ರಿಕಾದ ಸಂಪರ್ಕ

ಈ ಪ್ರಕರಣದಲ್ಲಿ ದಕ್ಷಿಣ ಆಫ್ರಿಕಾ ಹೊಸ ಪ್ರದೇಶವಾಗಿ ಬೆಳಕಿಗೆ ಬಂದಿದೆ.  ತನಿಖೆ ಪ್ರಕಾರ, ಚಿನ್ನವನ್ನು ಮೊದಲು ದಕ್ಷಿಣ ಆಫ್ರಿಕಾದಿಂದ ದುಬೈಗೆ ತರಲಾಗುತ್ತಿತ್ತು. ಅಲ್ಲಿಂದ ಜಿನೇವಾ ಮೂಲಕ ಭಾರತಕ್ಕೆ ಸಾಗಿಸುವ ಸಂಕೀರ್ಣ ವಿಧಾನವನ್ನು ಈ ಜಾಲವು ಅನುಸರಿಸುತ್ತಿತ್ತು. ಈ ಮಾದರಿಯು ಸಾಮಾನ್ಯ ಕಳ್ಳಸಾಗಣೆಗಿಂತ ಭಿನ್ನವಾಗಿದ್ದು, ಅಂತರರಾಷ್ಟ್ರೀಯ ಮಾಫಿಯಾ ಜಾಲದ ಭಾಗವಾಗಿರುವ ಸಾಧ್ಯತೆಯನ್ನು ತೋರಿಸುತ್ತದೆ. 

ವೈರಾ ಡೈಮಂಡ್ ಕಂಪನಿ: ಮುಖವಾಡವೇ?

ದುಬೈನಲ್ಲಿ ತರುಣ್ ಕೊಂಡೂರು ಮತ್ತು ರನ್ಯಾ ರಾವ್ ಸೇರಿದಂತೆ ತಂಡವು ನಡೆಸುತ್ತಿದ್ದ ವೈರಾ ಡೈಮಂಡ್ ಕಂಪನಿಯ ಬಗ್ಗೆಯೂ ಡಿಆರ್‌ಐಗೆ ಅನುಮಾನ ಮೂಡಿದೆ. ಈ ಕಂಪನಿಯು ಕೇವಲ ವ್ಯಾಪಾರಕ್ಕಾಗಿ ಸ್ಥಾಪಿಸಲಾದದ್ದಲ್ಲ, ಬದಲಿಗೆ ಚಿನ್ನದ ಕಳ್ಳಸಾಗಣೆಗಾಗಿ ಬಳಸಲಾಗಿತ್ತು ಎಂಬ ಶಂಕೆ ಉಂಟಾಗಿದೆ. ಈ ಕಂಪನಿಯ ಮೂಲಕ ದೊಡ್ಡ ಪ್ರಮಾಣದ ಚಿನ್ನ ಸಾಗಿಸುವ ದಂಧೆ ನಡೆದಿರುವ ಸಾಧ್ಯತೆಯನ್ನು ತನಿಖಾ ತಂಡ ಪರಿಶೀಲಿಸುತ್ತಿದೆ.

ರನ್ಯಾ ರಾವ್ ಜಾಮೀನು ತೀರ್ಪು

ರನ್ಯಾ ರಾವ್‌ಗೆ ಸಂಬಂಧಿಸಿದ ಜಾಮೀನು ಅರ್ಜಿಯ ತೀರ್ಪು ಗುರುವಾರ (ಮಾರ್ಚ್ 27, 2025) ಸಿಸಿಹೆಚ್-64ನೇ ನ್ಯಾಯಾಲಯದಲ್ಲಿ ಹೊರಬೀಳಲಿದೆ. ಈ ತೀರ್ಪಿನ ಮೇಲೆ ಎಲ್ಲರ ಕಣ್ಣು ನೆಟ್ಟಿದೆ. ಇದೇ ವೇಳೆ, ಈ ಪ್ರಕರಣದಲ್ಲಿ ಇನ್ನಷ್ಟು ಆರೋಪಿಗಳ ಹೆಸರು ಬಹಿರಂಗವಾಗುವ ಭೀತಿಯೂ ಇದೆ.