ಮಿಸಲ್, ಪರೋಟ.... ಟೇಸ್ಟ್ ಅಟ್ಲಾಸ್ ಟಾಪ್ 100ರಲ್ಲಿ ಭಾರತದ ಏಳು ಖಾದ್ಯಗಳಿಗೆ ಸ್ಥಾನ
ಟಾಪ್-100 ಪಟ್ಟಿಯಲ್ಲಿ ಇನ್ನೂ ಕೆಲವು ಭಾರತೀಯ ಉಪಹಾರಗಳು ಸ್ಥಾನ ಪಡೆದಿದ್ದು ನಿಹಾರಿ 55ನೇ ಸ್ಥಾನ, ಮಿಸಲ್ ಪಾವ್ 57ನೇ ಸ್ಥಾನ, ಶ್ರೀಖಂಡ್ 60ನೇ ಸ್ಥಾನ, ಮತ್ತು ಪಾಲಕ್ ಪನ್ನೀರ್‌ 95ನೇ ಸ್ಥಾನ ಪಡೆದಿವೆ.;
ಟೇಸ್ಟ್ ಅಟ್ಲಾಸ್‌ನ ವಿಶ್ವದ ಟಾಪ್ 50 ಅತ್ಯುತ್ತಮ ಉಪಹಾರಗಳಲ್ಲಿ 18ನೇ ಸ್ಥಾನ ಪಡೆದ ಮಿಸಾಲ್‌
ಭಾರತೀಯ ಪಾಕಪದ್ಧತಿಯ ವೈವಿಧ್ಯತೆ ಮತ್ತು ರುಚಿ ಜಾಗತಿಕವಾಗಿ ಜನಮನ ಸೆಳಯುತ್ತಿದೆ. ಅಂತೆಯೇ ನಮ್ಮ ದೇಶದ ಜನಪ್ರಿಯ ಬೆಳಗಿನ ತಿಂಡಿಗಳಾದ ಮಿಸಲ್, ಪರಾಠಾ, ಮತ್ತು ಛೋಲೆ ಭಟೂರೆ ಟೇಸ್ಟ್‌ಅಟ್ಲಾಸ್‌ನ ಜೂನ್ 2025ರ ವಿಶ್ವದ ಟಾಪ್ 50 ಉತ್ತಮ ಬೆಳಗಿನ ತಿಂಡಿಗಳ ಪಟ್ಟಿಯಲ್ಲಿ ಸ್ಥಾನ ಪಡೆದಿವೆ. ಟಾಪ್ 100ರಲ್ಲಿ ಇನ್ನೂ ನಾಲ್ಕು ಭಾರತೀಯ ಖಾದ್ಯಗಳು ಸೇರ್ಪಡೆಯಾಗಿದ್ದು, ಭಾರತದ ಶ್ರೀಮಂತ ಆಹಾರ ಸಂಸ್ಕೃತಿಯು ಜಾಗತಿಕ ವೇದಿಕೆಯಲ್ಲಿ ಮಿಂಚಿದೆ.
ಮಿಸಲ್ (18ನೇ ಸ್ಥಾನ)
ಮಹಾರಾಷ್ಟ್ರದ ಈ ಜನಪ್ರಿಯ ಖಾದ್ಯವು ತನ್ನ ಖಾರದ ರುಚಿ ಮತ್ತು ವರ್ಣರಂಜಿತ ನೋಟಕ್ಕೆ ಹೆಸರುವಾಸಿಯಾಗಿದೆ. ಟೇಸ್ಟ್‌ಅಟ್ಲಾಸ್ ಮಿಸಲ್‌ನ ವಿಶಿಷ್ಟತೆಯನ್ನು ವಿವರಿಸುತ್ತಾ, ಇದು ಮೊಸರು, ಕಾಳು ಅಥವಾ ಬಟಾಣಿ ಕರಿ, ಗ್ರೇವಿ, ಖಾರದ ಆಲೂಗಡ್ಡೆಯ ಮಿಶ್ರಣವಾಗಿದ್ದು, ಈರುಳ್ಳಿ, ಕೊತ್ತಂಬರಿ ಮತ್ತು ಟೊಮೇಟೊ ಹಾಕಿ ಅಲಂಕರಿಸಲಾಗುತ್ತದೆ, '' ಎಂದು ಹೇಳಿದೆ. "ಒಂದು ಒಳ್ಳೆಯ ಮಿಸಲ್, ಹೆಚ್ಚು ಖಾರವಾಗಿರಬೇಕು, ಗರಿಗರಿಯಾಗಿರುವ ತಳ ಹೊಂದಿರಬೇಕು. ನೋಟದಲ್ಲೂ ಕಲಾತ್ಮಕ ಮತ್ತು ವರ್ಣಮಯವಾಗಿ ಕಾಣಬೇಕು" ಎಂದು ಅಭಿಪ್ರಾಯಪಟ್ಟಿದೆ. ಉತ್ತರ ಕರ್ನಾಟಕ ಭಾಗದಲ್ಲೂ ಈ ತಿನಿಸು ಜನಪ್ರಿಯವಾಗಿದೆ. ಬೆಂಗಳೂರಿನಲ್ಲೂ ಕೆಲವು ಹೋಟೆಲ್ಗಳಲ್ಲಿ ಈ ತಿನಿಸು ಲಭ್ಯ.
ಪರೋಟ (23ನೇ ಸ್ಥಾನ)
ಭಾರತದಾದ್ಯಂತ ಜನಪ್ರಿಯವಾದ ಈ ಫ್ಲಾಟ್‌ಬ್ರೆಡ್ (ಪರೋಟ) ತನ್ನ ವಿಭಿನ್ನ ರುಚಿಯ ಮೂಲಕ ಟಾಪ್ 25ರಲ್ಲಿ ಸ್ಥಾನ ಗಳಿಸಿದೆ. ಟೇಸ್ಟ್‌ಅಟ್ಲಾಸ್ ಈ ತಿನಿಸಿನ ಮೂಲವನ್ನು "ಪರಾಟ್" (ಪದರ) ಮತ್ತು "ಆಟಾ" (ಹಿಟ್ಟು) ಎಂಬ ಪದಗಳ ಸಂಯೋಜನೆಯಿಂದ ಬಂದಿದೆ ಎಂದು ಹೇಳಿದೆ. ಇದು ಪದರ ಪದರವಾಗಿರುವ ಖಾದ್ಯ. ಈ ಬೆಳಗಿನ ತಿಂಡಿ ಪಾಕಿಸ್ತಾನದ ಪೇಶಾವರ್‌ನಲ್ಲಿ ಉಗಮವಾಗಿದ್ದರೂ ಭಾರತದಾದ್ಯಂತ ಜನಪ್ರಿಯತೆ ಪಡೆದಿದೆ. ದಕ್ಷಿಣ ಭಾರತದಲ್ಲಿ ಇದನ್ನು ಪರೋಟ್ಟಾ ಎಂದು ಕರೆಯಲಾಗುತ್ತದೆ. ಪರೋಟವನ್ನು ಕೊಳವೆಯಾಕಾರಕ್ಕೆ ಸುತ್ತಿ ಚಹಾದೊಂದಿಗೆ ತಿನ್ನುವ ವಿಶಿಷ್ಟ ರೀತಿಯನ್ನೂ ಟೇಸ್ಟ್‌ಅಟ್ಲಾಸ್ ಗಮನಿಸಿದೆ.
ಛೋಲೆ ಭಟೂರೆ (32ನೇ ಸ್ಥಾನ)
ದೆಹಲಿಯ ಈ ರುಚಿಕರ ಬೆಳಗಿನ ತಿಂಡಿಯು ಖಾರ ಕಡಲೆಕಾಯಿ ಕರಿ (ಛೋಲೆ) ಮತ್ತು ತುಪ್ಪದಲ್ಲಿ ಕರಿದ ಫ್ಲಾಟ್‌ಬ್ರೆಡ್ (ಭಟೂರೆ)ಯ ಸಮ್ಮಿಶ್ರಣ. ಇದರ ರುಚಿ ಮತ್ತು ತೃಪ್ತಿಕರ ಗುಣವು ಇದನ್ನು ವಿಶ್ವದ ಉತ್ತಮ ಬೆಳಗಿನ ತಿಂಡಿಗಳ ಪಟ್ಟಿಯಲ್ಲಿ ಸ್ಥಾನ ಗಳಿಸುವಂತೆ ಮಾಡಿದೆ.
ಟಾಪ್ 100ರಲ್ಲಿ ಇತರೆ ಭಾರತೀಯ ಖಾದ್ಯಗಳು
ನಿಹಾರಿ (55ನೇ ಸ್ಥಾನ): ಉತ್ತರ ಭಾರತದಲ್ಲಿ, ವಿಶೇಷವಾಗಿ ಮುಸ್ಲಿಂ ಸಮುದಾಯದಲ್ಲಿ ಜನಪ್ರಿಯವಾಗಿದೆ ಈ ಕರಿ. ಇದು ನಿಧಾನವಾಗಿ ಬೇಯಿಸಿದ ಮಾಂಸದ ಸ್ಟ್ಯೂ.
ಮಿಸಲ್ ಪಾವ್ (57ನೇ ಸ್ಥಾನ): ಮಿಸಲ್‌ನ ಮತ್ತೊಂದು ರೂಪ. ಇದನ್ನು ಬೆಣ್ಣೆ ಲೇಪಿತ ಬನ್‌ಗಳ (ಪಾವ್) ಜೊತೆಗೆ ಸವಿಯಲಾಗುತ್ತದೆ. ಇದು ಮತ್ತೊಮ್ಮೆ ಮಿಸಲ್‌ನ ಜನಪ್ರಿಯತೆಗೆ ಸಾಕ್ಷಿಯಾಗಿದೆ.
ಶ್ರೀಖಂಡ್ (60ನೇ ಸ್ಥಾನ): ಮಹಾರಾಷ್ಟ್ರ ಮತ್ತು ಗುಜರಾತ್‌ನಲ್ಲಿ ಈ ಕೆನೆ ಭರಿತ ಸಿಹಿ ಫೇಮಸ್. ಸಿಹಿ ಮೊಸರು ಆಧಾರಿತ ಸಿಹಿತಿಂಡಿ, ಇದನ್ನು ಬೆಳಗಿನ ತಿಂಡಿಯ ಭಾಗವಾಗಿ ಸವಿಯಲಾಗುತ್ತದೆ.
ಪಾಲಕ್ ಪನೀರ್ (95ನೇ ಸ್ಥಾನ): ಉತ್ತರ ಭಾರತದ ಈ ಖಾದ್ಯವು ಪಾಲಕ್ ಮತ್ತು ಪನೀರ್ನಿಂದ ತಯಾರಿಸುವ ರುಚಿಕರವಾದ ಬೆಳಗಿನ ತಿಂಡಿ.
ಜಗತ್ತಿನಲ್ಲಿ ಯಾವುದು ಫೇಮಸ್?
ಟೇಸ್ಟ್‌ಅಟ್ಲಾಸ್‌ನ ಜೂನ್ 2025ರ ಬೆಳಗಿನ ತಿಂಡಿಗಳ ಪಟ್ಟಿಯ ಮೊದಲ ಮೂರು ಸ್ಥಾನಗಳನ್ನು ಈ ಕೆಳಗಿನ ಖಾದ್ಯಗಳು ಪಡೆದಿವೆ.
ಟರ್ಕಿಶ್ ಕಹ್ವಾಲ್ಟಿ: ಬೆಳಗಿನ ಕಾಫಿಗೆ ಮೊದಲು ತಿನ್ನುವ ಭವ್ಯವಾದ ಭೋಜನ. ಇದರಲ್ಲಿ ಚೀಸ್, ಬ್ರೆಡ್, ಆಲಿವ್‌ಗಳು ಮತ್ತು ಇತರ ಆಹಾರ ಪದಾರ್ಥಗಳಿವೆ.
ಸರ್ಬಿಯಾದ ಕಾಂಪ್ಲೆಟ್ ಲಿಪಿಂಜಾ: ಕೆನೆಯಿಂದ ಲೇಪಿತವಾದ ಫ್ಲಾಟ್‌ಬ್ರೆಡ್, ಮೇಲೆ ಮೊಟ್ಟೆ ಸವರಿರುವ ಖಾದ್ಯ.
ಲಿಬಿಯಾದ ಸ್ಫಿನ್ಜ್: ಕರಿದು ತಯಾರಿಸಿವು ಒಂದು ಸರಳವಾದ ರುಚಿಕರ ಪೇಸ್ಟ್ರಿ.