ಬದುಕು ಕಟ್ಟಿಕೊಳ್ಳಲು ಬಂದಿದ್ದವರ ಬಲಿ ಪಡೆದ ದೆಹಲಿ ಸ್ಫೋಟ; ಯುಪಿ, ಬಿಹಾರ ಗ್ರಾಮಗಳಲ್ಲಿ ಶೋಕ

ರಾಜಧಾನಿ ದೆಹಲಿಯ ಹೃದಯಭಾಗ ಕೆಂಪು ಕೋಟೆಯ ಸಮೀಪ ನಡೆದ ಭೀಕರ ಸ್ಫೋಟವು ಕೇವಲ ನಗರದ ಶಾಂತಿಯನ್ನು ಮಾತ್ರ ಕದಡಲಿಲ್ಲ, ಅದು ನೂರಾರು ಮೈಲುಗಳಷ್ಟು ದೂರದಲ್ಲಿರುವ ಹಳ್ಳಿಗಳು ಮತ್ತು ಸಣ್ಣ ಪಟ್ಟಣಗಳ ಜೀವನದ ಆಧಾರ ಸ್ತಂಭಗಳನ್ನೇ ಅಲುಗಾಡಿಸಿದೆ. ದೆಹಲಿಯಲ್ಲಿ ದುಡಿದು ಬದುಕನ್ನು ಕಟ್ಟಿಕೊಳ್ಳುತ್ತಿದ್ದ ತಮ್ಮ ಪ್ರೀತಿಪಾತ್ರರ ಹಠಾತ್ ನಿಧನದಿಂದಾಗಿ ಉತ್ತರ ಪ್ರದೇಶ ಮತ್ತು ಬಿಹಾರದ ಕುಟುಂಬಗಳು ಈಗ ಅಪಾರ ದುಃಖದಲ್ಲಿ ಮುಳುಗಿಹೋಗಿವೆ. 

ಶ್ರಾವಸ್ತಿ, ದಿಯೋರಿಯಾದಂತಹ ಪ್ರಶಾಂತ ಲೇನ್‌ಗಳಿಂದ ಹಿಡಿದು ಮೀರತ್, ಅಮ್ರೋಹಾ ಮತ್ತು ಶಾಮ್ಲಿಯ ಗದ್ದಲದ ಬೀದಿಗಳವರೆಗೆ, ಈ ದುರಂತದ ಸಂತ್ರಸ್ತರು ಪ್ರತಿದಿನದ ಬದುಕಿಗಾಗಿ ಹೋರಾಡುತ್ತಿದ್ದ ಸಾಮಾನ್ಯ ಜನರು. ಟ್ಯಾಕ್ಸಿ ಚಾಲಕರು, ಇ-ರಿಕ್ಷಾ ಸಾರಥಿಗಳು, ಸಣ್ಣ ಅಂಗಡಿ ಮಾಲೀಕರು ಮತ್ತು ಡಿಟಿಸಿ ಬಸ್ ಕಂಡಕ್ಟರ್‌ಗಳು ಇವರೆಲ್ಲರೂ ತಮ್ಮ ಕುಟುಂಬಕ್ಕೆ ಉತ್ತಮ ಜೀವನ ನೀಡುವ ಕನಸನ್ನು ಕಣ್ಣಲ್ಲಿ ತುಂಬಿಕೊಂಡಿದ್ದರು. ಆದರೆ ಆ ಕನಸುಗಳು ಒಂದೇ ಕ್ಷಣದಲ್ಲಿ ಭಸ್ಮವಾಗಿ, ಅವರ ಬದುಕು ನುಚ್ಚುನೂರಾಗಿದೆ.

ಕುಟುಂಬದ ಆಧಾರಸ್ತಂಭ ನೆಲಸಮನ 

ಶ್ರಾವಸ್ತಿ ಜಿಲ್ಲೆಯ ಗಣೇಶಪುರದ 32 ವರ್ಷದ ದಿನೇಶ್ ಮಿಶ್ರಾ ಅವರ ಮರಣವು ಅವರ ಕುಟುಂಬಕ್ಕೆ ಭರಿಸಲಾಗದ ನೋವು ತಂದಿದೆ. ದೆಹಲಿಯ ಚಾವರಿ ಬಜಾರ್‌ನ ಮುದ್ರಣಾಲಯದಲ್ಲಿ ಕೆಲಸ ಮಾಡುತ್ತಿದ್ದ ದಿನೇಶ್, ತಮ್ಮ ಪತ್ನಿ ಮತ್ತು ಮೂವರು ಮಕ್ಕಳಿಗೆ ಉತ್ತಮ ಭವಿಷ್ಯ ರೂಪಿಸಲು ಹಗಲಿರುಳು ಶ್ರಮಿಸುತ್ತಿದ್ದರು. ಅವರಿಗೆ ಮಕ್ಕಳಿಗೆ ಉತ್ತಮ ಶಿಕ್ಷಣ ಕೊಡಬೇಕೆಂಬ ಆಸೆ ಇತ್ತು. ಅವರು ನಮ್ಮ ಜೊತೆ ಇಲ್ಲ ಎಂಬುದನ್ನು ನಮಗೆ ಇನ್ನೂ ನಂಬಲು ಸಾಧ್ಯವಾಗುತ್ತಿಲ್ಲ ಎಂದು ಅವರ ತಂದೆ ಭೂರೆ ಮಿಶ್ರಾ ದುಃಖತಪ್ತರಾಗಿ ಹೇಳಿಕೊಂಡಿದ್ದಾರೆ. ಜಿಲ್ಲಾ ಮ್ಯಾಜಿಸ್ಟ್ರೇಟ್‌ಗಳು ಕುಟುಂಬಕ್ಕೆ ಆರ್ಥಿಕ ಮತ್ತು ನೈತಿಕ ನೆರವು ನೀಡುವುದಾಗಿ ಭರವಸೆ ನೀಡಿದ್ದಾರೆ.

ಸತ್ತ ನಂತರವೂ ಸಮಾಧಿ ವಿವಾದ

ಮೀರತ್‌ನ 32 ವರ್ಷದ ಇ-ರಿಕ್ಷಾ ಚಾಲಕ ಮೊಹ್ಸಿನ್ ಅವರ ಕಥೆ ಹೃದಯ ಕಲಕುವಂತಿದೆ. ಪ್ರಯಾಣಿಕರನ್ನು ಕರೆದೊಯ್ಯುತ್ತಿದ್ದಾಗ ಸ್ಫೋಟಕ್ಕೆ ಬಲಿಯಾದ ಅವರ ಮೃತದೇಹ ಲೋಹಿಯಾ ನಗರದಲ್ಲಿರುವ ಅವರ ಊರನ್ನು ತಲುಪಿದಾಗ ಪರಿಸ್ಥಿತಿ ಉದ್ವಿಗ್ನವಾಯಿತು. ಅವರ ಪತ್ನಿ ಸುಲ್ತಾನಾ ಅವರು ತಮ್ಮ ಗಂಡನನ್ನು ತಾವು ನೆಲೆಸಿದ್ದ ದೆಹಲಿಯಲ್ಲೇ ಸಮಾಧಿ ಮಾಡಲು ಬಯಸಿದರೆ, ಪೋಷಕರು ಮೀರತ್‌ನಲ್ಲಿ ಅಂತ್ಯಕ್ರಿಯೆ ನಡೆಸಬೇಕೆಂದು ಒತ್ತಾಯಿಸಿದರು. ಹಲವಾರು ಗಂಟೆಗಳ ಭಾವನಾತ್ಮಕ ಸಂಘರ್ಷ ಮತ್ತು ಪೊಲೀಸರ ಮಧ್ಯಸ್ಥಿಕೆಯ ನಂತರ, ಕೊನೆಗೂ ಪತ್ನಿ ಸುಲ್ತಾನಾ ಅವರ ನಿರ್ಧಾರಕ್ಕೆ ಮಣಿಯಲಾಯಿತು. ಸ್ಫೋಟವು ಮೊಹ್ಸಿನ್ ಅವರನ್ನು ಕರೆದುಕೊಂಡು ಹೋಗಿದೆ. ಈಗ ಕುಟುಂಬವೂ ವಿಭಜನೆಯಾಗಿದೆ ಎಂದು ನೆರೆಹೊರೆಯವರು ಕಣ್ಣೀರಿಟ್ಟರು.

ಆರು ಗಂಟೆಗಳ ಪ್ರಯಾಣಕ್ಕೆ ಹೊರಟು ಮರಳದ ಯುವಕರು

ಶಾಮ್ಲಿಯ 18 ವರ್ಷದ ನೌಮನ್ ಅನ್ಸಾರಿ, ತಮ್ಮ ಸಣ್ಣ ಅಂಗಡಿಗಾಗಿ ಸೌಂದರ್ಯವರ್ಧಕಗಳನ್ನು ಖರೀದಿಸಲು ದೆಹಲಿಗೆ ಹೋಗಿದ್ದರು. ಆದರೆ, ಆ ದಿನವೇ ಅವರಿಗೆ ಕೊನೆಯ ದಿನವಾಗಿತ್ತು. ನೌಮನ್ ಸ್ಥಳದಲ್ಲೇ ಮೃತಪಟ್ಟರೆ, ಅವರ ಸೋದರಸಂಬಂಧಿ ಅಮನ್ ಗಾಯಗೊಂಡು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಅದೇ ರೀತಿ, ಅಮ್ರೋಹಾ ಜಿಲ್ಲೆಯ ಹಸನ್‌ಪುರದ 34 ವರ್ಷದ ಡಿಟಿಸಿ ಕಂಡಕ್ಟರ್ ಅಶೋಕ್ ಕುಮಾರ್ ಕೂಡ ದುರಂತದಲ್ಲಿ ಮೃತಪಟ್ಟಿದ್ದಾರೆ. ಇಡೀ ಕುಟುಂಬದ ಜವಾಬ್ದಾರಿ ಹೊತ್ತಿದ್ದ ಅಶೋಕ್ ಅವರು, ಪತ್ನಿ ಮತ್ತು ಮೂರು ಚಿಕ್ಕ ಮಕ್ಕಳನ್ನು ಅಗಲಿದ್ದಾರೆ. ಬಿಹಾರದ 22 ವರ್ಷದ ಟ್ಯಾಕ್ಸಿ ಚಾಲಕ ಪಂಕಜ್ ಸಾಹ್ನಿ ಕೂಡ ತಮ್ಮ ಕುಟುಂಬಕ್ಕೆ ನೆರವಾಗಲು ಶ್ರಮಿಸುತ್ತಿದ್ದವರು, ಟ್ಯಾಕ್ಸಿ ಸಂಪೂರ್ಣ ಹಾನಿಗೊಳಗಾಗಿದ್ದು, ಅವರು ತೀವ್ರ ಗಾಯಗಳಿಂದ ಮೃತಪಟ್ಟಿದ್ದಾರೆ. 

ಬದುಕುಳಿದರೂ ಆತಂಕದಲ್ಲಿರುವ ಶಿವ ಜೈಸ್ವಾಲ್

ದೇವರಿಯಾದ 22 ವರ್ಷದ ಸಿದ್ಧ ಉಡುಪು ಅಂಗಡಿ ಮಾಲೀಕ ಶಿವ ಜೈಸ್ವಾಲ್ ಅವರು ಈ ಸ್ಫೋಟದಲ್ಲಿ ಗಾಯಗೊಂಡಿದ್ದರೂ, ಪವಾಡ ಸದೃಶವಾಗಿ ಬದುಕುಳಿದಿದ್ದಾರೆ. ಹಬ್ಬಗಳಿಗಾಗಿ ಹೊಸ ದಾಸ್ತಾನು ಖರೀದಿಸಲು ದೆಹಲಿಗೆ ಹೋಗಿದ್ದ ಶಿವ, ಸ್ಫೋಟದಲ್ಲಿ ಸಿಲುಕಿಕೊಂಡಿದ್ದರು. ಟಿವಿಯಲ್ಲಿ ಸ್ಫೋಟದ ಸುದ್ದಿ ಕೇಳಿದ ನಂತರ ಅವರ ಫೋನ್ ಸಂಪರ್ಕ ಕಡಿತಗೊಂಡಿತ್ತು ಎಂದು ಅವರ ಸಹೋದರಿ ಪೂರ್ಣಿಮಾ ಜೈಸ್ವಾಲ್ ವಿವರಿಸಿದರು. ತಮ್ಮ ಮಗ ಬದುಕುಳಿದಿದ್ದಕ್ಕೆ ಸಂತೋಷ ಪಟ್ಟರೂ, ದುರಂತ ಎಷ್ಟು ಹತ್ತಿರ ಬಂದಿದೆ ಎಂದು ಅವರ ತಾಯಿ ಮಾಯಾ ಜೈಸ್ವಾಲ್ ಆಘಾತಕ್ಕೊಳಗಾಗಿದ್ದಾರೆ.

ಈ ಭಯೋತ್ಪಾದಕ ದಾಳಿಯೆಂದು ಶಂಕಿಸಲಾಗಿರುವ ಘಟನೆಯಲ್ಲಿ ಒಟ್ಟು 12 ಜನರು ಮೃತಪಟ್ಟಿದ್ದು, 20 ಕ್ಕೂ ಹೆಚ್ಚು ಜನರು ಗಾಯಗೊಂಡಿದ್ದಾರೆ. ರಾಷ್ಟ್ರೀಯ ತನಿಖಾ ಸಂಸ್ಥೆ  ತನಿಖೆಯನ್ನು ಕೈಗೆತ್ತಿಕೊಂಡಿದ್ದು, ದೆಹಲಿ ಮತ್ತು ನೆರೆಯ ರಾಜ್ಯಗಳಲ್ಲಿ ಹೈ ಅಲರ್ಟ್ ಘೋಷಿಸಲಾಗಿದೆ.