ಇಸ್ರೇಲ್-ಹಮಾಸ್ ಕದನ ವಿರಾಮಕ್ಕೆ ಹಮಾಸ್ ಒಪ್ಪಿಗೆ? ಅಮೆರಿಕದ ಪ್ರಸ್ತಾಪಕ್ಕೆ ಷರತ್ತುಬದ್ಧ ಸಮ್ಮತಿ
ಯುದ್ಧದ ಸಂಪೂರ್ಣ ಅಂತ್ಯ, ಗಾಜಾ ಪಟ್ಟಿಯಿಂದ ಇಸ್ರೇಲಿ ಪಡೆಗಳ ಹಿಂಪಡೆಯುವಿಕೆ ಮತ್ತು ಮಾತುಕತೆಗಳಿಗಾಗಿ "ಕ್ಷೇತ್ರ ಪರಿಸ್ಥಿತಿಗಳು" ಅನುಕೂಲಕರವಾಗಿರಬೇಕು ಎಂಬಂತಹ ಷರತ್ತುಗಳನ್ನು ವಿಧಿಸಿದೆ.
ಸಾಂದರ್ಭಿಕ ಚಿತ್ರ
ಸುಮಾರು ಎರಡು ವರ್ಷಗಳಿಂದ ನಡೆಯುತ್ತಿರುವ ಇಸ್ರೇಲ್ ಮತ್ತು ಹಮಾಸ್ ನಡುವಿನ ಯುದ್ಧವು ಅಂತ್ಯಗೊಳ್ಳುವ ಲಕ್ಷಣಗಳು ಗೋಚರಿಸುತ್ತಿವೆ. ಅಮೆರಿಕ ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಮಂಡಿಸಿದ ಕದನ ವಿರಾಮ ಪ್ರಸ್ತಾವನೆಯ ಪ್ರಮುಖ ಅಂಶಗಳಿಗೆ ಹಮಾಸ್ ಸಂಘಟನೆ ಷರತ್ತುಬದ್ಧ ಒಪ್ಪಿಗೆ ಸೂಚಿಸಿದೆ. ಈ ಬೆಳವಣಿಗೆಯ ನಂತರ, ಅಧ್ಯಕ್ಷ ಟ್ರಂಪ್ ಅವರು ಗಾಜಾದ ಮೇಲಿನ ಬಾಂಬ್ ದಾಳಿಯನ್ನು ತಕ್ಷಣವೇ ನಿಲ್ಲಿಸುವಂತೆ ಇಸ್ರೇಲ್‌ಗೆ ಕರೆ ನೀಡಿದ್ದಾರೆ.
ಶುಕ್ರವಾರ ಹಮಾಸ್ ನೀಡಿದ ಹೇಳಿಕೆಯಲ್ಲಿ, ಅಮೆರಿಕದ ಪ್ರಸ್ತಾವನೆಯನ್ನು ಸ್ವಾಗತಿಸುವುದಾಗಿ ತಿಳಿಸಿದ್ದು, ಒತ್ತೆಯಾಳುಗಳ ಬಿಡುಗಡೆ ಮತ್ತು ಗಾಜಾದ ಆಡಳಿತವನ್ನು ಪ್ಯಾಲೆಸ್ತೀನ್ ತಂತ್ರಜ್ಞರಿಗೆ ಹಸ್ತಾಂತರಿಸಲು ಸಿದ್ಧವಿರುವುದಾಗಿ ಪುನರುಚ್ಚರಿಸಿದೆ. ಆದಾಗ್ಯೂ, ಪ್ರಸ್ತಾವನೆಯ ಕೆಲವು ಅಂಶಗಳ ಬಗ್ಗೆ ಹೆಚ್ಚಿನ ಮಾತುಕತೆ ಅಗತ್ಯವಿದೆ ಎಂದು ಸ್ಪಷ್ಟಪಡಿಸಿದೆ. ಯುದ್ಧದ ಸಂಪೂರ್ಣ ಅಂತ್ಯ, ಗಾಜಾ ಪಟ್ಟಿಯಿಂದ ಇಸ್ರೇಲಿ ಪಡೆಗಳ ಹಿಂಪಡೆಯುವಿಕೆ ಮತ್ತು ಮಾತುಕತೆಗಳಿಗಾಗಿ "ಕ್ಷೇತ್ರ ಪರಿಸ್ಥಿತಿಗಳು" ಅನುಕೂಲಕರವಾಗಿರಬೇಕು ಎಂಬಂತಹ ಷರತ್ತುಗಳನ್ನು ವಿಧಿಸಿದೆ
ಹಮಾಸ್‌ನ ಸಕಾರಾತ್ಮಕ ಪ್ರತಿಕ್ರಿಯೆಯನ್ನು ಸ್ವಾಗತಿಸಿದ ಅಧ್ಯಕ್ಷ ಟ್ರಂಪ್, "ಹಮಾಸ್ ಶಾಶ್ವತ ಶಾಂತಿಗೆ ಸಿದ್ಧವಾಗಿದೆ ಎಂದು ನಾನು ನಂಬುತ್ತೇನೆ. ಒತ್ತೆಯಾಳುಗಳನ್ನು ಸುರಕ್ಷಿತವಾಗಿ ಹೊರತರಲು ಇಸ್ರೇಲ್ ತಕ್ಷಣ ಬಾಂಬ್ ದಾಳಿ ನಿಲ್ಲಿಸಬೇಕು," ಎಂದು ತಮ್ಮ 'ಟ್ರುತ್ ಸೋಶಿಯಲ್' ಖಾತೆಯಲ್ಲಿ ಹೇಳಿದ್ದಾರೆ. ಈ ಬೆಳವಣಿಗೆಗೂ ಮುನ್ನ, ಟ್ರಂಪ್ ಅವರು ತಮ್ಮ ಪ್ರಸ್ತಾವನೆಯನ್ನು ಒಪ್ಪಿಕೊಳ್ಳಲು ಹಮಾಸ್‌ಗೆ ಭಾನುವಾರ ಸಂಜೆಯವರೆಗೆ ಗಡುವು ನೀಡಿದ್ದರು ಮತ್ತು ತಪ್ಪಿದಲ್ಲಿ ಕಠಿಣ ಪರಿಣಾಮ ಎದುರಿಸಬೇಕಾದೀತು ಎಂದು ಎಚ್ಚರಿಸಿದ್ದರು.
ಹಮಾಸ್‌ನ ಈ ಪ್ರತಿಕ್ರಿಯೆಯು ದೀರ್ಘಕಾಲದ ಸಂಘರ್ಷಕ್ಕೆ ಅಂತ್ಯ ಹಾಡುವ ಆಶಾವಾದವನ್ನು ಮೂಡಿಸಿದೆ. ಆದರೆ, ಹಮಾಸ್‌ನ ಷರತ್ತುಗಳಿಗೆ ಇಸ್ರೇಲ್ ಮತ್ತು ಅಮೆರಿಕ ಹೇಗೆ ಪ್ರತಿಕ್ರಿಯಿಸುತ್ತವೆ ಎಂಬುದರ ಮೇಲೆ ಮುಂದಿನ ಬೆಳವಣಿಗೆಗಳು ಅವಲಂಬಿತವಾಗಿವೆ.