Kyasanur Forest Disease | ಸೋಂಕು ಹೆಚ್ಚಳ: ಮಲೆನಾಡಿಗರನ್ನು ಸಾವಿನ ಎದುರು ಬರಿಗೈ ಸಮರಕ್ಕೆ ಬಿಟ್ಟಿತೇ ಸರ್ಕಾರ?
ಅತ್ತ ಲಸಿಕೆಯೂ ಇಲ್ಲ; ಇತ್ತ ಕನಿಷ್ಟ ದೀಪ್‌ ಆಯಿಲ್‌ ಕೂಡ ಇಲ್ಲದೆ ಮಲೆನಾಡಿಗರು ಈ ಬಾರಿ ಮಂಗನಕಾಯಿಲೆಯ ವೈರಸ್ ವಿರುದ್ಧ ಬರಿಗೈ ಸಮರ ನಡೆಸಬೇಕಾದ ಸ್ಥಿತಿ ನಿರ್ಮಾಣವಾಗಿದೆ.;
ಮಲೆನಾಡಿನ ಜಿಲ್ಲೆಗಳಲ್ಲಿ ಮಂಗನಕಾಯಿಲೆ ಸೋಂಕು (ಕ್ಯಾಸನೂರು ಫಾರೆಸ್ಟ್ ಡಿಸೀಸ್-ಕೆಎಫ್‌ಡಿ) ಆತಂಕಕಾರಿ ಪ್ರಮಾಣದಲ್ಲಿ ಏರಿಕೆಯಾಗುತ್ತಿದೆ. ಶಿವಮೊಗ್ಗ, ಉತ್ತರಕನ್ನಡ ಹಾಗೂ ಚಿಕ್ಕಮಗಳೂರು ಜಿಲ್ಲೆಗಳಲ್ಲಿ ಸೋಂಕು ದಿನದಿಂದ ದಿನಕ್ಕೆ ಹೆಚ್ಚಾಗುತ್ತಿದ್ದರೂ, ಸೋಂಕಿನ ನಿರ್ವಹಣೆಯಲ್ಲಿ ಸರ್ಕಾರ ಪ್ರತಿಬಾರಿಯಂತೆ ಈ ಬಾರಿಯೂ ಎಡವಿದೆ.
ಮಂಗನಕಾಯಿಲೆಗೆ ನೀಡುತ್ತಿದ್ದ ಸಾಂಪ್ರದಾಯಿಕ ಲಸಿಕೆ ಉತ್ಪಾದನೆ ಸ್ಥಗಿತಗೊಂಡು ಎರಡು ವರ್ಷ ಕಳೆದಿದೆ. ಈವರೆಗೂ ಕೆಎಫ್‌ಡಿಗೆ ಹೊಸ ಲಸಿಕೆ ಕಂಡು ಹಿಡಿದಿಲ್ಲ. ಹೀಗಿರುವಾಗ ಮಂಗನಕಾಯಿಲೆ ವಿರುದ್ಧ ಮಲೆನಾಡಿಗರು ಬರಿಗೈ ಹೋರಾಟ ಮಾಡಬೇಕಾದ ಪರಿಸ್ಥಿತಿ ಎದುರಾಗಿದೆ.
ಮಂಗನಕಾಯಿಲೆ ʼಹಾಟ್ ಸ್ಪಾಟ್ʼಗಳಾದ ಚಿಕ್ಕಮಗಳೂರು, ಶಿವಮೊಗ್ಗ ಮತ್ತು ಉತ್ತರಕನ್ನಡ ಜಿಲ್ಲೆಯಲ್ಲಿ ಕೆಎಫ್‌ಡಿ ಪ್ರಕರಣಗಳು ನಿಧಾನವಾಗಿ ಏರಿಕೆಯಾಗುತ್ತಿವೆ. ಚಿಕ್ಕಮಗಳೂರಿನ ಕೊಪ್ಪ ತಾಲೂಕಿನಲ್ಲಿ ಈಗಾಗಲೇ ಆರು ಪ್ರಕರಣಗಳು ಬೆಳಕಿಗೆ ಬಂದಿವೆ. ಶಿವಮೊಗ್ಗ ಜಿಲ್ಲೆಯಲ್ಲಿ ಈವರೆಗೆ ಒಂದು ಪಾಸಿಟಿವ್‌ ಪ್ರಕರಣ ವರದಿಯಾಗಿದೆ. ಆ ಹಿನ್ನೆಲೆಯಲ್ಲಿ ಜಿಲ್ಲಾ ಆರೋಗ್ಯ ಇಲಾಖೆಗಳು ಈಗಾಗಲೇ, ಈ ಬಾರಿಯ ಪಾಸಿಟಿವ್‌ ಪ್ರಕರಣಗಳು ವರದಿಯಾಗಿರುವ ಮತ್ತು ಕಳೆದ ವರ್ಷ ಪಾಸಿಟಿವ್‌ ಪ್ರಕರಣ ಕಂಡುಬಂದಿದ್ದ ಗ್ರಾಮ ಪಂಚಾಯ್ತಿಗಳನ್ನು ʼಹಾಟ್‌ಸ್ಪಾಟ್‌ʼ ಎಂದು ಗುರುತು ಮಾಡಿವೆ.
ಆದರೆ, ಆ ಬಳಿಕ ಅಂತಹ ಹಾಟ್‌ಸ್ಪಾಟ್‌ಗಳಲ್ಲಿ ಸೋಂಕು ನಿಯಂತ್ರಣಕ್ಕೆ ಕೈಗೊಳ್ಳಬೇಕಾದ ಕ್ರಮಗಳನ್ನು ಮಾತ್ರ ಸಮರ್ಪಕವಾಗಿ ಕೈಗೊಂಡಿಲ್ಲ ಎಂಬ ದೂರು ಎರಡೂ ಜಿಲ್ಲೆಯಲ್ಲೂ ಕೇಳಿಬರುತ್ತಿದೆ.
ಎದ್ದು ಕಾಣುತ್ತಿದೆ ಸರ್ಕಾರದ ವೈಫಲ್ಯ
ಮಂಗನಕಾಯಿಲೆ ಸೋಂಕು ಹರಡದಂತೆ ಮುನ್ನೆಚ್ಚರಿಕೆ ಕ್ರಮ ಕೈಗೊಳ್ಳುವಲ್ಲಿ ರಾಜ್ಯ ಸರ್ಕಾರದ ವಿಫಲವಾಗಿದೆ. ಕೊಪ್ಪ, ಎನ್‌.ಆರ್‌.ಪುರ ತಾಲೂಕಿನಲ್ಲಿ ಮಂಗನಕಾಯಿಲೆಯ ಹಾಟ್ ಸ್ಪಾಟ್ ಪ್ರದೇಶಗಳನ್ನು ಗುರುತಿಸಲಾಗಿದೆ. ಸಾಮಾನ್ಯವಾಗಿ ಒಂದು ಹಳ್ಳಿಯಲ್ಲಿ ಸೋಂಕು ಪತ್ತೆಯಾದರೆ ಇಡೀ ಗ್ರಾಮ ಪಂಚಾಯ್ತಿಯನ್ನು ಹಾಟ್ ಸ್ಪಾಟ್ ಎಂದು ಪರಿಗಣಿಸಲಾಗುತ್ತದೆ. ಆದರೆ, ಆರೋಗ್ಯ ಇಲಾಖೆ ಸಿಬ್ಬಂದಿ ಇಡೀ ಪಂಚಾಯ್ತಿ ಬದಲು ಸೋಂಕಿತರು ಹಾಗೂ ಆಸುಪಾಸಿನ ಮನೆಗಳಿಗೆ ಮಾತ್ರ ಉಣುಗುನಿರೋಧಕ ʼದೀಪ್‌ʼ ತೈಲ ಹಂಚಿಕೆ ಮಾಡುತ್ತಿದ್ದು, ತೈಲ ಪಡೆಯದವರು ಮಂಗನಕಾಯಿಲೆಯ ವಿರುದ್ಧ ಬಲಿಗೈಲಿ ಹೋರಾಟ ಮಾಡಬೇಕಾಗಿದೆ.
ಕೆಎಫ್‌ಡಿ ಲಸಿಕೆ ಮುಂದಿನ ವರ್ಷದೊಳಗೆ ಬಿಡುಗಡೆಯಾಗಲಿದೆ ಎಂದು ಕಳೆದ ವರ್ಷ ಆರೋಗ್ಯ ಸಚಿವ ದಿನೇಶ್‌ ಗುಂಡೂರಾವ್‌ ಹೇಳಿದ್ದರು. ಈಗ ಸಂಶೋಧನೆ ವಿಳಂಬದ ಕಾರಣ ನೀಡಿ ಮತ್ತೊಂದು ವರ್ಷಕ್ಕೆ ಮುಂದೂಡಲಾಗಿದೆ. ಮಲೆನಾಡಿನ ಸೀಮಿತ ಭಾಗಗಳಲ್ಲಿ ಮಾತ್ರ ಮಂಗನಕಾಯಿಲೆ ಕಂಡು ಬರುವ ಹಿನ್ನೆಲೆಯಲ್ಲಿ ಕಡಿಮೆ ಲಸಿಕೆ ಉತ್ಪಾದನೆ ಮಾಡಬೇಕಾಗುತ್ತದೆ. ಲಸಿಕೆಯ ಉತ್ಪಾದನಾ ವೆಚ್ಚ ಅಧಿಕವಾಗಿರುವ ಕಾರಣ ಯಾವುದೇ ಖಾಸಗಿ ಸಂಸ್ಥೆಗಳು ಲಸಿಕೆ ಸಂಶೋಧನೆ ಮನಸ್ಸು ಮಾಡಿಲ್ಲ. ಹಾಗಾಗಿ ಐಸಿಎಂಆರ್‌(ಭಾರತೀಯ ವೈದ್ಯಕೀಯ ಸಂಶೋಧನಾ ಪರಿಷತ್‌) ಲಸಿಕೆಯ ಸಂಶೋಧನೆಯಲ್ಲಿ ತೊಡಗಿಸಿಕೊಂಡಿದೆ. ಆದರೆ, ಲಸಿಕೆ ವಿಷಯದಲ್ಲಿ ಸೋಂಕು ಪ್ರದೇಶ ವ್ಯಾಪ್ತಿಯ ಸಂಸದರು, ಶಾಸಕರು ಸೇರಿದಂತೆ ಜನಪ್ರತಿನಿಧಿಗಳ ನಿರಾಸಕ್ತಿ ಮತ್ತು ಸರ್ಕಾರದ ಮೇಲೆ ಒತ್ತಡ ಇಲ್ಲದ ಹಿನ್ನೆಲೆಯಲ್ಲಿ ಕೆಎಫ್‌ಡಿ ಲಸಿಕೆ ಸಂಶೋಧನೆಯ ವಿಷಯದಲ್ಲಿ ಹೆಚ್ಚಿನ ಪ್ರಗತಿ ಕಂಡುಬಂದಿಲ್ಲ ಎನ್ನಲಾಗುತ್ತಿದೆ.
ʼʼಕೊಪ್ಪ, ಎನ್‌.ಆರ್‌.ಪುರದಲ್ಲಿ ಮಂಗನಕಾಯಿಲೆ ಸೋಂಕು ಪ್ರಕರಣಗಳು ದೃಢಪಟ್ಟಿವೆ. ಆರೋಗ್ಯ ಇಲಾಖೆ ಮುಂಜಾಗ್ರತಾ ಕ್ರಮವಾಗಿ ಮನೆ ಮನೆಗೆ ʼದೀಪ್‌ʼ ತೈಲ ಹಂಚಿದೆ. ಸೋಂಕು ಪತ್ತೆಯಾದ ಪ್ರದೇಶಗಳಲ್ಲಿ ಉಣುಗುಗಳ ಸಂಗ್ರಹ, ಅವುಗಳಲ್ಲಿರುವ ವೈರಸ್ ಪತ್ತೆ ಮಾಡಲಾಗುತ್ತಿದೆ. ಜೊತೆಗೆ ಕೆಎಫ್‌ಡಿ ಸೋಂಕಿನ ಲಕ್ಷಣಗಳಿರುವ ವ್ಯಕ್ತಿಗಳಿಂದ ರಕ್ತದ ಮಾದರಿ ಸಂಗ್ರಹಿಸಿ ಪ್ರಯೋಗಾಲಯಕ್ಕೆ ಕಳುಹಿಸಲಾಗಿದೆ. ಅನಗತ್ಯವಾಗಿ ಕಾಡಿಗೆ ತೆರಳದಂತೆ ಕಾಡಂಚಿನ ನಿವಾಸಿಗಳಿಗೆ ಸೂಚಿಸಲಾಗಿದೆʼʼ ಎಂದು ಚಿಕ್ಕಮಗಳೂರು ಡಿಎಸ್‌ಒ ಡಾ.ಭರತ್‌ ಶೆಟ್ಟಿ ಅವರು ʼದ ಫೆಡರಲ್ ಕರ್ನಾಟಕʼಕ್ಕೆ ತಿಳಿಸಿದರು.
ʼʼಮಂಗನಕಾಯಿಲೆಗೆ ನಿರ್ದಿಷ್ಟ ಲಸಿಕೆ ಇಲ್ಲದಿರುವ ಕಾರಣ ಜನರಲ್ಲಿ ಕಾಯಿಲೆ ಹರಡುವಿಕೆ ಹಾಗೂ ಸ್ವಯಂ ನಿಯಂತ್ರಣ ಕುರಿತು ಜಾಗೃತಿ ಮೂಡಿಸಲಾಗುತ್ತಿದೆ. ಕಳೆದ ಬಾರಿ ಸೋಂಕು ದೃಢಪಟ್ಟವರ ಮನೆಗಳಿಗೂ ದೀಪ್‌ ತೈಲ ವಿತರಿಸಲಾಗುತ್ತಿದೆʼʼ ಎಂದು ವಿವರಿಸಿದರು.
ತೈಲವೂ ಇಲ್ಲ, ಕೇಳುವವರೂ ಇಲ್ಲ
ಇನ್ನು ಮಂಗನಕಾಯಿಲೆ ಸೋಂಕು ತಡೆಗೆ ಆರೋಗ್ಯ ಇಲಾಖೆ ಕೈಗೊಂಡಿರುವ ಕ್ರಮಗಳ ಕುರಿತು ಕೊಪ್ಪ ತಾಲೂಕಿನ ಹರಿಹರಪುರದ ನಿವಾಸಿ ರಾಜಾಶಂಕರ್ ಅವರು ʼದ ಫೆಡರಲ್ ಕರ್ನಾಟಕʼದೊಂದಿಗೆ ಮಾತನಾಡಿ, ʼʼಮಂಗನಕಾಯಿಲೆ ಕೊಪ್ಪ ತಾಲೂಕಿನ ನುಗ್ಗಿ ಗ್ರಾಮ ಪಂಚಾಯ್ತಿ ವ್ಯಾಪ್ತಿಯಲ್ಲಿ ಹೆಚ್ಚಿದೆ. ಆದರೆ, ಆರೋಗ್ಯ ಇಲಾಖೆ ಯಾವುದೇ ಮುಂಜಾಗ್ರತಾ ಕ್ರಮ ಕೈಗೊಂಡಿಲ್ಲ. ಆರೋಗ್ಯ ಇಲಾಖೆ ಅಧಿಕಾರಿಗಳು ಬಾಯಿ ಮಾತಿಗಷ್ಟೇ ಮನೆ ಮನೆಗೆ ದೀಪ್‌ ತೈಲ ವಿತರಿಸಿರುವುದಾಗಿ ಹೇಳುತ್ತಿದ್ದಾರೆ. ಆದರೆ, ಯಾರಿಗೂ ತೈಲ ವಿತರಣೆ ಮಾಡಿಲ್ಲ. ಇದರಿಂದ ಮಂಗನಕಾಯಿಲೆ ಆತಂಕ ಹೆಚ್ಚುತ್ತಿದೆʼʼ ಎಂದು ಅಸಮಾಧಾನ ವ್ಯಕ್ತಪಡಿಸಿದರು.
ʼʼಈಚೆಗೆ ನನ್ನ ಸ್ನೇಹಿತನಿಗೂ ಮಂಗನಕಾಯಿಲೆ ಸೋಂಕು ಹರಡಿತ್ತು. ಸರ್ಕಾರಿ ಆಸ್ಪತ್ರೆಯಲ್ಲಿ ಸರಿಯಾದ ಚಿಕಿತ್ಸೆ ದೊರೆತಿಲ್ಲ. ಸಾವಿರಾರು ರೂ. ಖರ್ಚು ಮಾಡಿ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆದು ಗುಣಮುಖನಾಗಿದ್ದಾನೆ. ಚಿಕ್ಕಮಗಳೂರು ಜಿಲ್ಲಾಸ್ಪತ್ರೆ ಸೇರಿದಂತೆ ಎಲ್ಲಿಯೂ ಸರ್ಕಾರಿ ಆಸ್ಪತ್ರೆಗಳಲ್ಲಿ ಮಂಗನಕಾಯಿಲೆಗೆ ಚಿಕಿತ್ಸೆ ಸಿಗುತ್ತಿಲ್ಲ. ಸರ್ಕಾರ ಕನಿಷ್ಟ ಜಿಲ್ಲಾಸ್ಪತ್ರೆಗಳಲ್ಲಾದರೂ ಸೂಕ್ತ ಚಿಕಿತ್ಸೆ ಕೊಡುವ ವ್ಯವಸ್ಥೆ ಮಾಡಬೇಕುʼʼ ಎಂದು ಹೇಳಿದರು.
ʼʼನವೆಂಬರ್‌ನಿಂದ ಜೂನ್‌ ವರೆಗೆ ಬೇಸಿಗೆ ಹಂಗಾಮಿನಲ್ಲಿ ಪ್ರತಿವರ್ಷ ಕೆಎಫ್‌ಡಿ ಸೋಂಕು ಹರಡುವ ಅವಧಿಯಾಗಿದ್ದು, ನವೆಂಬರ್‌ನಲ್ಲಿ ಉಣುಗುಗಳು ಮೊಟ್ಟೆ ಇಡುತ್ತವೆ. ಜನವರಿ ವೇಳೆಗೆ ಮರಿಯಾಗಿ ಹರಡುತ್ತವೆ. ಫೆಬ್ರವರಿಯಿಂದ ಮೇ ತಿಂಗಳವರೆಗೆ ಸೋಂಕಿತ ತೀವ್ರತೆ ಹೆಚ್ಚಾಗುವ ಸಾಧ್ಯತೆ ಇದೆ. ಕಳೆದ ವರ್ಷ ಮಳೆಗಾಲ ಹೆಚ್ಚಿದ್ದರಿಂದ ಸೋಂಕಿತ ತೀವ್ರತೆ ಅಷ್ಟೇನು ಭಾದಿಸಿರಲಿಲ್ಲ.ಸಾಗರ ತಾಲೂಕಿನಲ್ಲಿ ಈವರೆಗೂ ಇನ್ನೂ ಯಾವುದೇ ಪ್ರಕರಣ ವರದಿಯಾಗಿಲ್ಲ. ಆದರೆ, ಎರಡು ವರ್ಷದಿಂದ ಲಸಿಕೆಯನ್ನೂ ಕೊಡುತ್ತಿಲ್ಲ, ದೀಪ್‌ ಆಯಿಲ್‌ ಕೂಡ ನೀಡುತ್ತಿಲ್ಲ. ಇನ್ನು ಉಣುಗು ಹರಡುವ ದನಕರುಗಳಿಗೆ ನೀಡಬೇಕಾದ ಉಣುಗುನಿರೋಧಕ ಡೋರಾಮೆಕ್ಷನ್ ಇಂಜೆಕ್ಷನ್‌ ಕೂಡ ನೀಡುತ್ತಿಲ್ಲ. ಈ ಮೊದಲು ಡೊರೋಮೆಕ್ಷನ್ ಲಸಿಕೆಯನ್ನು ವರ್ಷಕ್ಕೆ ಎರಡು ಡೋಸ್ ನೀಡುವ ಮೂಲಕ ಜಾನುವಾರುಗಳಲ್ಲಿ ಉಣುಗುಗಳ ಮೂಲಕ ವೈರಸ್ ಹರಡಂತೆ ತಡೆಯುವ ಪ್ರಯತ್ನ ನಡೆಯುತ್ತಿತ್ತು. ಈ ಬಾರಿ ಅದೇನನ್ನೂ ಮಾಡಿಲ್ಲ. ಒಟ್ಟಾರೆ, ಸರ್ಕಾರ ಕೆಎಫ್‌ಡಿ ವಿಷಯದಲ್ಲಿ ಮಲೆನಾಡಿನ ಜನರನ್ನು ಸಂಪೂರ್ಣ ನಿರ್ಲಕ್ಷಿಸಿದೆ. ಸಾವಿನ ಎದುರು ಬರಿಗೈಲಿ ಬಡಿದಾಡಲು ಬಿಟ್ಟಿದೆ" ಎಂದು ತುಮರಿ ಗ್ರಾಮದ ಮಧು ʼದ ಫೆಡರಲ್ ಕರ್ನಾಟಕʼಕ್ಕೆ ತಿಳಿಸಿದರು.
ʼʼಸಾಗರ ತಾಲೂಕಿನಲ್ಲಿ ಪ್ರಕರಣಗಳು ಕಂಡು ಬಂದಿಲ್ಲವಾದ್ದರಿಂದ ದೀಪ್‌ ತೈಲವನ್ನು ಮನೆ ಮನೆಗೆ ಹಂಚಿಲ್ಲ. ಆಸ್ಪತ್ರೆಯಲ್ಲಿ ಮಾತ್ರ ಲಭ್ಯವಿದೆ. ಪ್ರಕರಣ ಪತ್ತೆಯಾಗದ ಒಂದೇ ಕಾರಣಕ್ಕೆ ನಿರ್ಲಕ್ಷ್ಯ ವಹಿಸಬಾರದುʼʼ ಎಂದೂ ಅವರು ಹೇಳಿದರು.
ಫೆಬ್ರುವರಿ ಹಾಗೂ ಮಾರ್ಚ್‌ ತಿಂಗಳಲ್ಲಿ ಉಣುಗುಗಳ ಸಂತಾನೋತ್ಪತ್ತಿ ಹೆಚ್ಚಿರುತ್ತದೆ. ಈ ಅವಧಿಯಲ್ಲಿ ಕಾಡಂಚಿನ ಜನರು ಕಾಫಿ, ಅಡಿಕೆ ತೋಟಗಳಿಗೆ ಹೋಗುವಾಗ ದೀಪ್‌ ತೈಲ ಹಚ್ಚಿಕೊಂಡು ಹೋಗಬೇಕು. ಅದೇ ರೀತಿ ಕಾಡಿನಿಂದ ಬಂದ ಜಾನುವಾರುಗಳನ್ನು ಸ್ವಚ್ಛಗೊಳಿಸಬೇಕು. ದನದ ಕೊಟ್ಟಿಗೆಗಳನ್ನು ಆಗಿಂದಾಗ್ಗೆ ಸ್ವಚ್ಛವಾಗಿಟ್ಟುಕೊಳ್ಳಬೇಕು ಎಂದು ಆರೋಗ್ಯ ಇಲಾಖೆ ಸಲಹೆ ನೀಡಿದೆ.
ಕೆಎಫ್‌ಡಿ ಲಕ್ಷಣಗಳೇನು?
ಮಂಗನಕಾಯಿಲೆ ಸೋಂಕಿತರಿಗೆ ಸಾಮಾನ್ಯವಾಗಿ ಜ್ವರ, ತಲೆನೋವು, ಮೈ ಕೈ ನೋವು, ವಾಂತಿ, ಅತಿಸಾರ ಕಂಡು ಬರುತ್ತಿದೆ. ಬಿಳಿ ರಕ್ತ ಕಣಗಳ ಸಂಖ್ಯೆ ಇಳಿಮುಖವಾಗುವ ಜೊತೆಗೆ ಒಸಡಿನಲ್ಲಿನ ರಕ್ತಸ್ರಾವವಾಗಲಿದೆ. ಈ ಲಕ್ಷಣಗಳು ಕಂಡು ಬಂದರೆ ಕೂಡಲೇ ಸರ್ಕಾರಿ ಆಸ್ಪತ್ರೆಗೆ ಭೇಟಿ ನೀಡಿ, ಚಿಕಿತ್ಸೆ ಪಡೆಯಬೇಕು ಎಂದು ಆರೋಗ್ಯ ಇಲಾಖೆ ತಿಳಿಸಿದೆ.
ರಾಜ್ಯದ ಮಲೆನಾಡಿನ ಶಿವಮೊಗ್ಗ, ಚಿಕ್ಕಮಗಳೂರು, ಉತ್ತರಕನ್ನಡ, ಉಡುಪಿ ಜಿಲ್ಲೆಗಳಲ್ಲಿ ಅತಿ ಹೆಚ್ಚು ಪ್ರಕರಣಗಳು ವರದಿಯಾಗುತ್ತಿದ್ದರೂ, ರಾಜ್ಯದ ಸುಮಾರು 16 ಜಿಲ್ಲೆಗಳಲ್ಲಿ ಕೆಎಫ್‌ಡಿ ಸೋಂಕು ಪ್ರಕರಣಗಳು ವರದಿಯಾದ ದಾಖಲೆ ಇದೆ. ಅಷ್ಟೇ ಅಲ್ಲದೆ, ಶಿವಮೊಗ್ಗ ಜಿಲ್ಲೆಯ ಸೊರಬ ತಾಲೂಕಿನ ಕ್ಯಾಸನೂರಿನಲ್ಲಿ 1956-57ರಲ್ಲಿ ಮೊದಲು ಕಂಡುಬಂದ ಈ ಸೋಂಕು, ಇದೀಗ ರಾಜ್ಯದ ಹಲವು ಜಿಲ್ಲೆಗಳಷ್ಟೇ ಅಲ್ಲದೆ, ನೆರೆಯ ಗೋವಾ, ಮಹಾರಾಷ್ಟ್ರ, ಕೇರಳ ಮತ್ತು ತಮಿಳುನಾಡು ರಾಜ್ಯಗಳಿಗೂ ವ್ಯಾಪಿಸಿದೆ. ಆ ರಾಜ್ಯಗಳ ಅರಣ್ಯದಂಚಿನ ಗ್ರಾಮಗಳಲ್ಲೂ ಕಳೆದ ಹತ್ತು ವರ್ಷಗಳ ಅವಧಿಯಲ್ಲಿ ಕೆಎಫ್‌ಡಿ ಪ್ರಕರಣಗಳು ವರದಿಯಾಗಿವೆ.