ಬಾಂಗ್ಲಾದೇಶದ ಹಿಂದೂಗಳ ಪರ ಒಗ್ಗಟ್ಟು ಪ್ರದರ್ಶಿಸಲು ಆರ್​ಎಸ್​​ಎಸ್​ ನಿರ್ಣಯ

ಬಾಂಗ್ಲಾದೇಶದಲ್ಲಿ ಆಡಳಿತ ಬದಲಾವಣೆಯ ನಂತರ ತೀವ್ರಗೊಂಡ ಇಸ್ಲಾಮಿಕ್​ ಮೂಲಭೂತವಾದಿಗಳು. ಹಿಂದೂಗಳು ಮತ್ತು ಇತರ ಅಲ್ಪಸಂಖ್ಯಾತ ಸಮುದಾಯಗಳ ಮೇಲೆ ನಡೆಸುತ್ತಿರುವ ಯೋಜಿತ ಹಿಂಸಾಚಾರ, ಅನ್ಯಾಯ ಮತ್ತು ದೌರ್ಜನ್ಯದ ಬಗ್ಗೆ ರಾಷ್ಟ್ರೀಯ ಸ್ವಯಂಸೇವಕ ಸಂಘ (ಆರ್‌ಎಸ್‌ಎಸ್) ಶನಿವಾರ ಗಂಭೀರ ಕಳವಳ ವ್ಯಕ್ತಪಡಿಸಿದೆ.

ಬೆಂಗಳೂರಿನಲ್ಲಿ ನಡೆಯುತ್ತಿರುವ ಅಖಿಲ ಭಾರತೀಯ ಪ್ರತಿನಿಧಿ ಸಭೆಯ (ಎಬಿಪಿಎಸ್), ಎರಡನೇ ದಿನ ಬಾಂಗ್ಲಾದೇಶದ ಬಗ್ಗೆ ಒಂದು ನಿರ್ಣಯ ಅಂಗೀಕರಿಸಲಾಯಿತು. ಈ ವೇಳೆ ಹಿಂದೂಗಳ ಮೇಲಿನ ದೌರ್ಜನ್ಯವು ಮಾನವ ಹಕ್ಕುಗಳ ಗಂಭೀರ ಉಲ್ಲಂಘನೆ ಎಂದು ಪ್ರತಿಪಾದಿಸಿದೆ.

"ಬಾಂಗ್ಲಾದೇಶದಲ್ಲಿ ತೀವ್ರಗೊಂಡ ಇಸ್ಲಾಮಿಕ್​ ಮೂಲಭೂತವಾದಿ ಶಕ್ತಿಗಳಿಂದ ಹಿಂದೂ ಮತ್ತು ಇತರ ಅಲ್ಪಸಂಖ್ಯಾತ ಸಮುದಾಯಗಳು ಎದುರಿಸುತ್ತಿರುವ ನಿರಂತರ ಮತ್ತು ಯೋಜಿತ ಹಿಂಸಾಚಾರ, ಅನ್ಯಾಯ ಮತ್ತು ದೌರ್ಜನ್ಯದ ಬಗ್ಗೆ ಅಖಿಲ ಭಾರತೀಯ ಪ್ರತಿನಿಧಿ ಸಭೆ ಗಂಭೀರ ಕಳವಳ ವ್ಯಕ್ತಪಡಿಸುತ್ತದೆ," ಎಂದು ನಿರ್ಣಯದಲ್ಲಿ ತಿಳಿಸಲಾಗಿದೆ.

ಹಿಂದೂಗಳ ಸ್ಥಾಪನೆಗಳ ಮೇಲೆ ದಾಳಿ

ಇತ್ತೀಚಿನ ಆಡಳಿತ ಬದಲಾವಣೆಯ ಸಮಯದಲ್ಲಿ ಬಾಂಗ್ಲಾದೇಶದಲ್ಲಿ ಮಠಗಳು, ದೇವಾಲಯಗಳು, ದುರ್ಗಾಪೂಜಾ ಪೆಂಡಾಲ್‌ಗಳು ಮತ್ತು ಶಿಕ್ಷಣ ಸಂಸ್ಥೆಗಳ ಮೇಲೆ ಹಲವಾರು ದಾಳಿಗಳು ನಡೆದಿವೆ. ದೇವರನ್ನು ಅಪವಿತ್ರಗೊಳಿಸುವ, ಕೊಲೆಗಳು, ಆಸ್ತಿಪಾಸ್ತಿ ಲೂಟಿ, ಮಹಿಳೆಯರ ಅಪಹರಣ ಮತ್ತು ಅತ್ಯಾಚಾರ ಹಾಗೂ ಬಲವಂತದ ಮತಾಂತರಗಳು ನಿರಂತರವಾಗಿ ವರದಿಯಾಗುತ್ತಿವೆ ಎಂದು ನಿರ್ಣಯದಲ್ಲಿ ವಿವರಿಸಲಾಗಿದೆ.

"ಈ ಘಟನೆಗಳ ಧಾರ್ಮಿಕ ಆಯಾಮವನ್ನು ರಾಜಕೀಯ ಎಂದು ಮಾತ್ರ ಹೇಳಿ ನಿರಾಕರಿಸುವುದು ಸತ್ಯವನ್ನು ತಿರಸ್ಕರಿಸುವಂತಿದೆ, ಏಕೆಂದರೆ ಈ ಘಟನೆಗಳ ಬಹುತೇಕ ಬಲಿಪಶುಗಳು ಹಿಂದೂ ಮತ್ತು ಇತರ ಅಲ್ಪಸಂಖ್ಯಾತ ಸಮುದಾಯಗಳಿಗೆ ಸೇರಿದವರು," ಎಂದು ಎಬಿಪಿಎಸ್ ಹೇಳಿದೆ.

ಬುಡಕಟ್ಟು ಸಮುದಾಯಗಳ ಮೇಲೆ ದಾಳಿ

ಹಿಂದೂಗಳ ಮೇಲೆ ಮತ್ತು ಇತರ ಅಲ್ಪಸಂಖ್ಯಾತ ಸಮುದಾಯಗಳ ಮೇಲೆ, ವಿಶೇಷವಾಗಿ ಬಾಂಗ್ಲಾದೇಶದಲ್ಲಿ ಪರಿಶಿಷ್ಟ ಜಾತಿ ಮತ್ತು ಪರಿಶಿಷ್ಟ ಬುಡಕಟ್ಟು ಸಮುದಾಯಗಳ ಮೇಲೆ ಧಾರ್ಮಿಕ ಉನ್ಮಾದಿ ಇಸ್ಲಾಮೀ ಶಕ್ತಿಗಳಿಂದ ನಡೆಯುತ್ತಿರುವ ದೌರ್ಜನ್ಯವು ಹೊಸದೇನಲ್ಲ ಎಂದು ನಿರ್ಣಯದಲ್ಲಿ ತಿಳಿಸಲಾಗಿದೆ.

"ಬಾಂಗ್ಲಾದೇಶದಲ್ಲಿ ಹಿಂದೂ ಜನಸಂಖ್ಯೆಯ ನಿರಂತರ ಕುಸಿತ (1951ರಲ್ಲಿ ಶೇಕಡಾ 22ರಿಂದ ಇಂದು ಶೇಕಡಾ 7.95ಕ್ಕೆ) ಅವರ ಅಸ್ತಿತ್ವದ ಪ್ರಶ್ನೆಯನ್ನು ಎತ್ತಿದೆ," ಎಂದು ಎಬಿಪಿಎಸ್ ಹೇಳಿದೆ.

ಪ್ರಾದೇಶಿಕ ಸಮಸ್ಯೆಗೆ ನಾಂದಿ 

"ಈ ಪ್ರದೇಶವು ಒಂದೇ ಸಂಸ್ಕೃತಿ, ಇತಿಹಾಸ ಮತ್ತು ಸಾಮಾಜಿಕ ಬಂಧಗಳನ್ನು ಹೊಂದಿದೆ, ಇದರಿಂದ ಒಂದೆಡೆ ಉಂಟಾಗುವ ಯಾವುದೇ ಗೊಂದಲವು ಇಡೀ ಪ್ರದೇಶದಲ್ಲಿ ಕಳವಳ ಉಂಟುಮಾಡುತ್ತದೆ. ಭಾರತ ಮತ್ತು ನೆರೆಯ ದೇಶಗಳ ಈ ಸಹಕಾರದ ಪರಂಪರೆಯನ್ನು ಬಲಪಡಿಸಲು ಎಲ್ಲರೂ ಜನರು ಪ್ರಯತ್ನಿಸಬೇಕು ಎಂದು ಎಬಿಪಿಎಸ್ ತನ್ನ ನಿರ್ಣಯದಲ್ಲಿ ಹೇಳಿದೆ.

ಭಾರತ ಸರ್ಕಾರವು ಬಾಂಗ್ಲಾದೇಶದ ಹಿಂದೂ ಮತ್ತು ಇತರ ಅಲ್ಪಸಂಖ್ಯಾತ ಸಮುದಾಯಗಳ ಜೊತೆಗೆ ನಿಲ್ಲುವ ತನ್ನ ಸಂಕಲ್ಪವನ್ನು ವ್ಯಕ್ತಪಡಿಸಿದೆ ಮತ್ತು ಅವರ ರಕ್ಷಣೆಯ ಅಗತ್ಯತೆಯನ್ನು ಒತ್ತಿಹೇಳಿದೆ ಎಂದು ಆರ್‌ಎಸ್‌ಎಸ್ ಹೇಳಿದೆ. ಭಾರತ ಸರ್ಕಾರವು ಈ ವಿಷಯವನ್ನು ಬಾಂಗ್ಲಾದೇಶದ ಮಧ್ಯಂತರ ಸರ್ಕಾರದ ಜೊತೆಗೆ ಹಾಗೂ ಹಲವಾರು ಜಾಗತಿಕ ವೇದಿಕೆಗಳಲ್ಲಿ ಎತ್ತಿದೆ ಎಂದು ಮತ್ತಷ್ಟು ತಿಳಿಸಲಾಗಿದೆ.