'ದ ಫೆಡರಲ್ ಕರ್ನಾಟಕ' ಮಾಧ್ಯಮ ಸಹಯೋಗ: ಬೆಂಗಳೂರು ಕೌಶಲ್ಯ ಶೃಂಗಸಭೆ 2025'ಕ್ಕೆ ಚಾಲನೆ

ಕರ್ನಾಟಕವನ್ನು 'ಜಗತ್ತಿಗೆ ಕೌಶಲ್ಯದ ಹೆಬ್ಬಾಗಿಲು' (Skill Gateway to the World) ಆಗಿ ರೂಪಿಸುವ ಬೃಹತ್ ದೂರದೃಷ್ಟಿಯೊಂದಿಗೆ, 'ಬೆಂಗಳೂರು ಕೌಶಲ್ಯ ಶೃಂಗಸಭೆ 2025'ರ ಮೊದಲ ಆವೃತ್ತಿಗೆ ಮಂಗಳವಾರ (ನ. 4) ಬೆಂಗಳೂರಿನ 'ದಿ ಲಲಿತ್ ಅಶೋಕ್' ಹೋಟೆಲ್‌ನಲ್ಲಿ ಅದ್ದೂರಿ ಚಾಲನೆ ದೊರೆಯಿತು.

ದ ಫೆಡರಲ್ ಕರ್ನಾಟಕ  ಸಹಭಾಗಿತ್ವದಲ್ಲಿ, ಕರ್ನಾಟಕ ಕೌಶಲ್ಯ ಅಭಿವೃದ್ಧಿ ನಿಗಮ (KSDC), ಕರ್ನಾಟಕ ಕೌಶಲ್ಯ ಅಭಿವೃದ್ಧಿ ಪ್ರಾಧಿಕಾರ ಮತ್ತು ಕರ್ನಾಟಕ ಡಿಜಿಟಲ್ ಎಕಾನಮಿ ಮಿಷನ್ (KDEM) ಸಹಭಾಗಿತ್ವದಲ್ಲಿ ಈ ಮೂರು ದಿನಗಳ ಶೃಂಗಸಭೆಯನ್ನು ಆಯೋಜಿಸಲಾಗಿದೆ.

ಶೃಂಗಸಭೆಯನ್ನು ಉದ್ಘಾಟಿಸಿ ಮಾತನಾಡಿದ ಮುಖ್ಯಮಂತ್ರಿ ಸಿದ್ದರಾಮಯ್ಯ, "2032ರ ವೇಳೆಗೆ ಕರ್ನಾಟಕವನ್ನು 1 ಟ್ರಿಲಿಯನ್ ಡಾಲರ್ ಆರ್ಥಿಕತೆಯನ್ನಾಗಿ ಮಾಡುವುದು ನಮ್ಮ ಧ್ಯೇಯ. ಇದಕ್ಕೆ ನಮ್ಮ ಜನರ ಕೌಶಲ್ಯವೇ ಅಡಿಪಾಯ. ಪ್ರತಿಭೆ, ತಂತ್ರಜ್ಞಾನ ಮತ್ತು ದೃಢತೆಯಿಂದ ನಡೆಸಲ್ಪಡುವ ಕರ್ನಾಟಕವು, 2032ರ ವೇಳೆಗೆ ಭಾರತದ ಕೌಶಲ್ಯ ರಾಜಧಾನಿಯಾಗಲಿದೆ," ಎಂದು ವಿಶ್ವಾಸ ವ್ಯಕ್ತಪಡಿಸಿದರು.

ಕರ್ನಾಟಕವನ್ನು ಕೌಶಲ್ಯ ರಾಜಧಾನಿಯನ್ನಾಗಿಸುವ ದೃಷ್ಟಿಕೋನ

ಸಿಎಂ ಸಿದ್ದರಾಮಯ್ಯ ಅವರು ತಮ್ಮ ಭಾಷಣದಲ್ಲಿ, ಕೌಶಲ್ಯ ಅಭಿವೃದ್ಧಿಯ ಮಹತ್ವವನ್ನು ಒತ್ತಿಹೇಳಿದರು. "ಒಂದು ರಾಷ್ಟ್ರದ ನಿಜವಾದ ಸಂಪತ್ತು ಅದರ ನೈಸರ್ಗಿಕ ಸಂಪನ್ಮೂಲಗಳಲ್ಲ, ಬದಲಾಗಿ ಅದರ ಜನರ ಸಾಮರ್ಥ್ಯಗಳಲ್ಲಿದೆ. ಕರ್ನಾಟಕವು ಇಂದು ವಿಶಿಷ್ಟ ಜನಸಂಖ್ಯಾ ಅಡ್ಡಹಾದಿಯಲ್ಲಿದೆ; ನಮ್ಮ ಜನಸಂಖ್ಯೆಯ 60% ಕ್ಕಿಂತ ಹೆಚ್ಚು ಜನರು 35 ವರ್ಷಕ್ಕಿಂತ ಕಡಿಮೆ ವಯಸ್ಸಿನವರು. ಈ ಪೀಳಿಗೆಯನ್ನು ಸರಿಯಾದ ಕೌಶಲ್ಯ ಮತ್ತು ಆತ್ಮವಿಶ್ವಾಸದಿಂದ ಸಜ್ಜುಗೊಳಿಸಿದರೆ, ಇದು ಒಂದು ಅಸಾಧಾರಣ ಅವಕಾಶ," ಎಂದು ಅವರು ಹೇಳಿದರು.

2013-18ರ ತಮ್ಮ ಸರ್ಕಾರದ ಅವಧಿಯಲ್ಲಿ, 100 ಹೊಸ ಸರ್ಕಾರಿ ಐಟಿಐಗಳನ್ನು ಪ್ರಾರಂಭಿಸಿದ್ದು, ಮುಖ್ಯಮಂತ್ರಿ ಕೌಶಲ್ಯ ಕರ್ನಾಟಕ ಯೋಜನೆ (CMKKY) ಮೂಲಕ 5 ಲಕ್ಷಕ್ಕೂ ಹೆಚ್ಚು ಯುವಕರಿಗೆ ತರಬೇತಿ ನೀಡಿದ್ದು, ಮತ್ತು 16 ಮೆಗಾ ಉದ್ಯೋಗ ಮೇಳಗಳನ್ನು ಆಯೋಜಿಸಿದ್ದನ್ನು ಅವರು ಸ್ಮರಿಸಿದರು. "ಇದು ಕರ್ನಾಟಕ ಮಾದರಿ: ಸಬಲೀಕರಣ, ಸಕ್ರಿಯಗೊಳಿಸುವಿಕೆ ಮತ್ತು ಉನ್ನತೀಕರಣ ನೀಡುವ ಸರ್ಕಾರ," ಎಂದು ಅವರು ಬಣ್ಣಿಸಿದರು.

'ಕರ್ನಾಟಕ ಕೌಶಲ್ಯ ಅಭಿವೃದ್ಧಿ ನೀತಿ 2025-32'

ತಮ್ಮ ಇತ್ತೀಚಿನ ಬಜೆಟ್‌ನಲ್ಲಿ ಘೋಷಿಸಲಾದ 'ಕರ್ನಾಟಕ ಕೌಶಲ್ಯ ಅಭಿವೃದ್ಧಿ ನೀತಿ 2025-32'ರ ಬಗ್ಗೆ ಮಾತನಾಡಿದ ಸಿಎಂ, "4,432 ಕೋಟಿ ರೂಪಾಯಿಗಳ ವೆಚ್ಚದ ಈ 7 ವರ್ಷಗಳ ಕಾರ್ಯತಂತ್ರದ ನೀಲನಕ್ಷೆಯು, 2032ರ ವೇಳೆಗೆ 3 ಮಿಲಿಯನ್ ಯುವಕರಿಗೆ ಕೌಶಲ್ಯ ನೀಡುವುದು, ಮಹಿಳೆಯರ ಐಟಿಐ ದಾಖಲಾತಿಯನ್ನು 33% ಕ್ಕೆ ಹೆಚ್ಚಿಸುವುದು, ಮತ್ತು ಅಂತರರಾಷ್ಟ್ರೀಯ ವಲಸೆ ಕೇಂದ್ರದ (IMC-K) ಮೂಲಕ ಜಾಗತಿಕ ಉದ್ಯೋಗ ಸಂಪರ್ಕಗಳನ್ನು ಬಲಪಡಿಸುವ ಗುರಿಗಳನ್ನು ಹೊಂದಿದೆ," ಎಂದು ವಿವರಿಸಿದರು.

ಈ ಶೃಂಗಸಭೆಯು, 'ಕಾರ್ಯಪಡೆ 2030: ಸ್ಕೇಲ್, ಸಿಸ್ಟಮ್ಸ್, ಸಿನರ್ಜಿ' (Workforce 2030: Scale, Systems, Synergy) ಎಂಬ ಧ್ಯೇಯದೊಂದಿಗೆ, ESDM, AI/ML, ಏರೋಸ್ಪೇಸ್, ಮತ್ತು ಹಸಿರು ಇಂಧನದಂತಹ ನಾವೀನ್ಯತೆ-ಚಾಲಿತ ವಲಯಗಳ ಮೇಲೆ ಗಮನಹರಿಸಲಿದೆ.

ಉಪಮುಖ್ಯಮಂತ್ರಿ ಡಿ.ಕೆ. ಶಿವಕುಮಾರ್, ಕೌಶಲ್ಯಾಭಿವೃದ್ಧಿ ಸಚಿವ ಡಾ. ಶರಣಪ್ರಕಾಶ್ ಪಾಟೀಲ್, ಮಾರಿಷಸ್ ಗಣರಾಜ್ಯದ ಸಚಿವರು, ಮತ್ತು ಜರ್ಮನಿ ರಾಯಭಾರಿ ಸೇರಿದಂತೆ ಹಲವು ರಾಷ್ಟ್ರೀಯ ಮತ್ತು ಅಂತರರಾಷ್ಟ್ರೀಯ ಗಣ್ಯರು ಈ ಕಾರ್ಯಕ್ರಮದಲ್ಲಿ ಉಪಸ್ಥಿತರಿದ್ದರು.