ಮದರಾಸಿ ಸಿನಿಮಾ ಪ್ರಚಾರ; ಕನ್ನಡದ 'ಪುಟ್ಟಿ' ರುಕ್ಮಿಣಿ ವಸಂತ್‌ಗೆ ತಮಿಳುನಾಡಿನಲ್ಲಿ ಜೈಕಾರ!
'ಬೀರಬಲ್ಲ್' ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಪದಾರ್ಪಣೆ ಮಾಡಿದ ರುಕ್ಮಿಣಿ, 'ಸಪ್ತ ಸಾಗರದಾಚೆ ಎಲ್ಲೋ' ಚಿತ್ರದ ಮೂಲಕ ಮನೆಮಾತಾದರು.;
'ಸಪ್ತ ಸಾಗರದಾಚೆ ಎಲ್ಲೋ' ಸಿನಿಮಾದ 'ಪ್ರಿಯಾ' ಆಗಿ ಕನ್ನಡಿಗರ ಹೃದಯ ಗೆದ್ದ ನಟಿ ರುಕ್ಮಿಣಿ ವಸಂತ್, ಈಗ ತಮಿಳು ಚಿತ್ರರಂಗದಲ್ಲಿ ಸದ್ದು ಮಾಡುತ್ತಿದ್ದಾರೆ. ತಮಿಳಿನ ಸೂಪರ್‌ಸ್ಟಾರ್ ಶಿವಕಾರ್ತಿಕೆಯನ್ ಅವರ ಬಹುನಿರೀಕ್ಷಿತ 'ಮದರಾಸಿ' ಚಿತ್ರಕ್ಕೆ ನಾಯಕಿಯಾಗಿ ಆಯ್ಕೆಯಾಗುವ ಮೂಲಕ, ರುಕ್ಮಿಣಿ ತಮ್ಮ ಸಿನಿ ಪಯಣದಲ್ಲಿ ಮತ್ತೊಂದು ಮಹತ್ವದ ಹೆಜ್ಜೆ ಇಟ್ಟಿದ್ದಾರೆ.
'ಮದರಾಸಿ' ಚಿತ್ರದ ಪ್ರಚಾರಕ್ಕಾಗಿ ಬೆಂಗಳೂರಿನ ಕೋರಮಂಗಲಕ್ಕೆ ಇಡೀ ಚಿತ್ರತಂಡ ಆಗಮಿಸಿತ್ತು. ಈ ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಯೇ ನಮ್ಮ ಕನ್ನಡದ ಹುಡುಗಿ ರುಕ್ಮಿಣಿ ವಸಂತ್. ತಮ್ಮೂರಿನ ಹುಡುಗಿ ತಮಿಳಿನ ದೊಡ್ಡ ಸ್ಟಾರ್ ಜೊತೆ ನಟಿಸುತ್ತಿರುವುದನ್ನು ನೋಡಲು ಸಾವಿರಾರು ಅಭಿಮಾನಿಗಳು ಸೇರಿದ್ದರು. ರುಕ್ಮಿಣಿ ವೇದಿಕೆಗೆ ಬರುತ್ತಿದ್ದಂತೆ ಕರತಾಡನ, ಶಿಳ್ಳೆಗಳ ಸುರಿಮಳೆಯಾಯಿತು.
ರುಕ್ಮಿಣಿ ಖ್ಯಾತಿ, 'ಮದರಾಸಿ' ನಿರೀಕ್ಷೆ
'ಬೀರಬಲ್ಲ್' ಚಿತ್ರದ ಮೂಲಕ ಸ್ಯಾಂಡಲ್‌ವುಡ್‌ಗೆ ಪದಾರ್ಪಣೆ ಮಾಡಿದ ರುಕ್ಮಿಣಿ, 'ಸಪ್ತ ಸಾಗರದಾಚೆ ಎಲ್ಲೋ' ಚಿತ್ರದ ಮೂಲಕ ಮನೆಮಾತಾದರು. ಸದ್ಯ ಅವರು 'ಕಾಂತಾರ: ಚಾಪ್ಟರ್ 1' ನಲ್ಲಿ 'ಕನಕವತಿ'ಯಾಗಿ ಮತ್ತು ಯಶ್ ಅಭಿನಯದ 'ಟಾಕ್ಸಿಕ್' ನಂತಹ ಪ್ಯಾನ್-ಇಂಡಿಯಾ ಪ್ರಾಜೆಕ್ಟ್‌ಗಳಲ್ಲಿ ಬ್ಯುಸಿಯಾಗಿದ್ದಾರೆ.
ಈಗ, 'ಗಜನಿ' ಖ್ಯಾತಿಯ ನಿರ್ದೇಶಕ ಎ.ಆರ್. ಮುರುಗದಾಸ್ ಅವರ ನಿರ್ದೇಶನದಲ್ಲಿ, ಶಿವಕಾರ್ತಿಕೆಯನ್ ಜೊತೆ 'ಮದರಾಸಿ'ಯಲ್ಲಿ ನಟಿಸುತ್ತಿರುವುದು ಅವರ ವೃತ್ತಿಜೀವನಕ್ಕೆ ದೊಡ್ಡ ತಿರುವು ನೀಡಲಿದೆ. ಇದೊಂದು ಸೈಕಲಾಜಿಕಲ್ ಥ್ರಿಲ್ಲರ್ ಆಗಿದ್ದು, ಶಿವಕಾರ್ತಿಕೆಯನ್ ಮತ್ತು ರುಕ್ಮಿಣಿ ಅವರ ಹೊಸ ಜೋಡಿ ಈಗಾಗಲೇ ಭಾರಿ ಕುತೂಹಲ ಮೂಡಿಸಿದೆ.
ಕಾರ್ಯಕ್ರಮದಲ್ಲಿ ಮಾತನಾಡಿದ ಶಿವಕಾರ್ತಿಕೆಯನ್, ಕನ್ನಡದಲ್ಲೇ ಎಲ್ಲರಿಗೂ ಧನ್ಯವಾದ ಹೇಳಿ, ರುಕ್ಮಿಣಿ ಅವರ ಪ್ರತಿಭೆಯನ್ನು ಕೊಂಡಾಡಿದರು. ಸೆಪ್ಟೆಂಬರ್ 5 ರಂದು ತೆರೆಕಾಣಲಿರುವ 'ಮದರಾಸಿ' ಚಿತ್ರದ ಮೂಲಕ ಕನ್ನಡದ ಮತ್ತೊಂದು ಪ್ರತಿಭೆ ರಾಷ್ಟ್ರಮಟ್ಟದಲ್ಲಿ ಮಿಂಚಲು ಸಜ್ಜಾಗಿದೆ.