ತೂಕ ಇಳಿಸುವ ಔಷಧ 'ವೆಗೋವಿ' ಭಾರತದ ಮಾರುಕಟ್ಟೆಗೆ: ಬೆಲೆ ಎಷ್ಟು? ಪರಿಣಾಮಕಾರಿಯೇ?
ಹೃದಯ ಸಮಸ್ಯೆಗಳಿಂದ ಬಳಲುತ್ತಿರುವವರಲ್ಲಿ ಸ್ಟ್ರೋಕ್, ಹೃದಯಾಘಾತ ಮತ್ತು ಮಾರಣಾಂತಿಕ ಹೃದಯರಕ್ತನಾಳದ ಕಾಯಿಲೆಗಳ ಅಪಾಯವನ್ನು ಕಡಿಮೆ ಮಾಡುತ್ತದೆ ಎಂದು ಅಧ್ಯಯನಗಳು ತೋರಿಸಿವೆ.;
ಡ್ಯಾನಿಶ್ ಔಷಧ ಕಂಪನಿ ನೋವೊ ನಾರ್ಡಿಸ್ಕ್ (Novo Nordisk) ತನ್ನ ಬಹು ನಿರೀಕ್ಷಿತ ತೂಕ ಇಳಿಕೆ ಔಷಧ 'ವೆಗೋವಿ' (Wegovy) ಯನ್ನು ಭಾರತದಲ್ಲಿ ಬಿಡುಗಡೆ ಮಾಡಿದೆ. ಸೆಮಾಗ್ಲುಟೈಡ್ (Semaglutide) ಸಂಯುಕ್ತ ಹೊಂದಿರುವ ಈ ಔಷಧವು ದೀರ್ಘಕಾಲೀನ ತೂಕ ನಿರ್ವಹಣೆಗೆ ಮತ್ತು ಸ್ಥೂಲಕಾಯ ಅಥವಾ ಅಧಿಕ ತೂಕವಿರುವವರಲ್ಲಿ ಹೃದಯ ಸಂಬಂಧಿ ಸಮಸ್ಯೆಗಳ ಅಪಾಯವನ್ನು ತಗ್ಗಿಸಲು ದೇಶದಲ್ಲಿ ಅನುಮೋದನೆ ಪಡೆದ ಮೊದಲ ಔಷಧ ಎನ್ನಲಾಗಿದೆ.
ವೆಗೋವಿಯು ದೇಹದ ನೈಸರ್ಗಿಕ ಹಾರ್ಮೋನ್ ಆದ ಜಿಎಲ್‌ಪಿ-1 (ಗ್ಲೂಕಾಗನ್-ಲೈಕ್ ಪೆಪ್ಟೈಡ್-1) ಪರಿಣಾಮಗಳನ್ನು ಅನುಕರಿಸುವ ಮೂಲಕ ಕೆಲಸ ಮಾಡುತ್ತದೆ. ಇದು ಮೆದುಳಿನ ಜಿಎಲ್‌ಪಿ-1 ಗ್ರಾಹಕಗಳಿಗೆ ಸೇರಿಕೊಂಡು, ಹಸಿವನ್ನು ಕಡಿಮೆ ಮಾಡುತ್ತದೆ, ಆಹಾರದ ಮೇಲಿನ ತೃಷೆಯನ್ನು ತಗ್ಗಿಸುತ್ತದೆ ಮತ್ತು ರಕ್ತದಲ್ಲಿನ ಸಕ್ಕರೆ ಮಟ್ಟವನ್ನು ನಿಯಂತ್ರಿಸುತ್ತದೆ. ಇದು ಸ್ಥೂಲಕಾಯದಿಂದ ಬಳಲುತ್ತಿರುವ ವ್ಯಕ್ತಿಗಳು ಕಡಿಮೆ ಕ್ಯಾಲೊರಿ ಆಹಾರ ಕ್ರಮವನ್ನು ಅನುಸರಿಸಲು ಸಹಾಯ ಮಾಡುತ್ತದೆ.
ಕ್ಲಿನಿಕಲ್ ಪರೀಕ್ಷೆಗಳ ಪ್ರಕಾರ, ವೆಗೋವಿ ತೆಗೆದುಕೊಳ್ಳುವವರಲ್ಲಿ ಮೂವರಲ್ಲಿ ಒಬ್ಬರು ಸುಮಾರು 68 ವಾರಗಳಲ್ಲಿ ಶೇಕಡ 20ರಷ್ಟು ತೂಕ ಇಳಿಕೆ ಕಾಣಬಹುದು. ಅಲ್ಲದೆ, ಇದು ಸ್ಥೂಲಕಾಯ ಮತ್ತು ಹೃದಯ ಸಮಸ್ಯೆಗಳಿಂದ ಬಳಲುತ್ತಿರುವವರಲ್ಲಿ ಸ್ಟ್ರೋಕ್, ಹೃದಯಾಘಾತ ಮತ್ತು ಮಾರಣಾಂತಿಕ ಹೃದಯರಕ್ತನಾಳದ ಕಾಯಿಲೆಗಳ ಅಪಾಯವನ್ನು ಕಡಿಮೆ ಮಾಡುತ್ತದೆ ಎಂದು ಅಧ್ಯಯನಗಳು ತೋರಿಸಿವೆ.
ಬಳಕೆಯ ವಿಧಾನ ಮತ್ತು ಬೆಲೆ ವಿವರ
ವೆಗೋವಿಯನ್ನು ವಾರಕ್ಕೊಮ್ಮೆ ಇಂಜೆಕ್ಷನ್ ಪೆನ್ ಮೂಲಕ ಚುಚ್ಚಿಕೊಳ್ಳಬಹುದು. ಇದು 0.25 ಮಿಗ್ರಾಂನಿಂದ 2.4 ಮಿಗ್ರಾಂವರೆಗೆ ಐದು ವಿಭಿನ್ನ ಡೋಸೇಜ್‌ಗಳಲ್ಲಿ ಲಭ್ಯವಿದೆ. ಸಾಮಾನ್ಯವಾಗಿ ಕಡಿಮೆ ಡೋಸ್‌ನಿಂದ ಪ್ರಾರಂಭಿಸಿ, ವೈದ್ಯರ ಮೇಲ್ವಿಚಾರಣೆಯಲ್ಲಿ ಕ್ರಮೇಣ ಡೋಸ್ ಹೆಚ್ಚಿಸಲಾಗುತ್ತದೆ.
ಬೆಲೆಯ ವಿಚಾರದಲ್ಲಿ, ವೆಗೋವಿಯು ತಿಂಗಳಿಗೆ ₹17,345 ರಿಂದ (ಮೊದಲ ಮೂರು ಡೋಸ್‌ಗಳು) ₹26,015 (ಪೂರ್ಣ ಡೋಸ್ 2.4 ಮಿಗ್ರಾಂ) ವರೆಗೆ ವೆಚ್ಚವಾಗಲಿದೆ.
ಕಳವಳಗಳೇನು?
2023ರ ಐಸಿಎಂಆರ್ (ICMR) ಮತ್ತು ಮದ್ರಾಸ್ ಡಯಾಬಿಟೀಸ್ ರಿಸರ್ಚ್ ಫೌಂಡೇಶನ್ ಅಧ್ಯಯನಗಳ ಪ್ರಕಾರ, ಭಾರತದ ಜನಸಂಖ್ಯೆಯ ಸುಮಾರು ಶೇಕಡ 29ರಷ್ಟು (254 ಮಿಲಿಯನ್) ಜನರು ಸ್ಥೂಲಕಾಯದಿಂದ ಬಳಲುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ವೆಗೋವಿ ಬಿಡುಗಡೆ ಮಹತ್ವ ಪಡೆದಿದೆ. ಬಾಡಿ ಮಾಸ್ ಇಂಡೆಕ್ಸ್ (BMI) 30 ಅಥವಾ ಅದಕ್ಕಿಂತ ಹೆಚ್ಚಿನ ವಯಸ್ಕರಿಗೆ, ಅಥವಾ BMI 27 ಅಥವಾ ಅದಕ್ಕಿಂತ ಹೆಚ್ಚಿನವರಲ್ಲಿ ತೂಕ ಸಂಬಂಧಿತ ಆರೋಗ್ಯ ಸಮಸ್ಯೆಗಳಿದ್ದರೆ ಇದನ್ನು ವೈದ್ಯಕೀಯ ಮೇಲ್ವಿಚಾರಣೆಯಲ್ಲಿ ಬಳಸಲು ಉದ್ದೇಶಿಸಲಾಗಿದೆ.
ಈ ಔಷಧವು ವಿವಾದಗಳಿಂದ ಹೊರತಾಗಿಲ್ಲ. 2023ರ ರಾಯಿಟರ್ಸ್ ವರದಿಯ ಪ್ರಕಾರ, ಯು.ಎಸ್. ಫೂಡ್ ಅಂಡ್ ಡ್ರಗ್ ಅಡ್ಮಿನಿಸ್ಟ್ರೇಶನ್ (FDA) 2010 ರಿಂದ ಈ ಔಷಧ ಅಥವಾ ಇದೇ ರೀತಿಯ ಔಷಧಿಗಳನ್ನು ತೆಗೆದುಕೊಂಡ ರೋಗಿಗಳಲ್ಲಿ 265 ಆತ್ಮಹತ್ಯೆಯ ಆಲೋಚನೆಗಳು ಅಥವಾ ವರ್ತನೆಗಳ ವರದಿಗಳನ್ನು ಪಡೆದಿದೆ. ಇದರಲ್ಲಿ 36 ಆತ್ಮಹತ್ಯೆ ಅಥವಾ ಶಂಕಿತ ಆತ್ಮಹತ್ಯೆಯಿಂದ ಸಾವನ್ನಪ್ಪಿದವರ ಕುರಿತ ವರದಿಗಳೂ ಸೇರಿವೆ. ಈ ಕಾರಣದಿಂದ, ವೆಗೋವಿಯನ್ನು ಕೇವಲ ವೈದ್ಯಕೀಯ ಮೇಲ್ವಿಚಾರಣೆಯಲ್ಲಿ ಮಾತ್ರ ಬಳಸಬೇಕೆಂದು ಕಂಪನಿ ಎಚ್ಚರಿಸಿದೆ.