ಷೇರು ಮಾರುಕಟ್ಟೆಯಲ್ಲಿ ರಕ್ತಪಾತ: ಸೆನ್ಸೆಕ್ಸ್ 2500 ಪಾಯಿಂಟ್‌ಗಳಷ್ಟು ಕುಸಿತ

ಡೊನಾಲ್ಡ್ ಟ್ರಂಪ್ ಘೋಷಿಸಿರುವ ವ್ಯಾಪಕ ಸುಂಕಗಳು ಜಾಗತಿಕ ಷೇರು ಮಾರುಕಟ್ಟೆಗಳಲ್ಲಿ ಭಾರೀ ತಲ್ಲಣ ಉಂಟುಮಾಡಿದ್ದು, ಭಾರತದ ಷೇರು ಮಾರುಕಟ್ಟೆಯೂ ಪರಿಣಾಮ ಎದುರಿಸಿದೆ. ಸೋಮವಾರ ಬೆಳಿಗ್ಗೆ ಭಾರತೀಯ ಷೇರು ಮಾರುಕಟ್ಟೆಯ ಪ್ರಮುಖ ಸೂಚ್ಯಂಕಗಳಾದ ಬಿಎಸ್‌ಇ ಸೆನ್ಸೆಕ್ಸ್ 2500 ಪಾಯಿಂಟ್‌ಗಳಷ್ಟು ಕುಸಿದರೆ, ಎನ್‌ಎಸ್‌ಇ ನಿಫ್ಟಿ 1000 ಪಾಯಿಂಟ್‌ಗಳಷ್ಟು ಇಳಿಕೆ ಕಂಡಿದೆ. ಈ ಘಟನೆಯನ್ನು ಆರ್ಥಿಕ ತಜ್ಞರು "ಬ್ಲ್ಯಾಕ್ ಮಂಡೇ" ಎಂದು ಕರೆದಿದ್ದಾರೆ.

ಡೊನಾಲ್ಡ್ ಟ್ರಂಪ್ ಅವರು ಏಪ್ರಿಲ್ 5 ರಿಂದ ಜಾರಿಗೆ ಬಂದಂತೆ, ಅಮೆರಿಕಕ್ಕೆ ಆಮದಾಗುವ ಎಲ್ಲಾ ಸರಕುಗಳ ಮೇಲೆ ಕನಿಷ್ಠ ಶೇಕಡಾ 10 ಸುಂಕವನ್ನು ವಿಧಿಸುವುದಾಗಿ ಘೋಷಿಸಿದರು. ಭಾರತದಂತಹ ದೇಶಗಳಿಗೆ ಈ ಸುಂಕವು ಶೇ. 26 ರವರೆಗೆ ಏರಿಕೆಯಾಗಿದೆ. ಟ್ರಂಪ್ ಈ ನೀತಿಯನ್ನು "ಅಮೆರಿಕದ ವಿಮೋಚನಾ ದಿನ" ಎಂದು ಕರೆದಿದ್ದಾರೆ. ಆದರೆ ಈ ನೀತಿ ಜಾಗತಿಕ ವ್ಯಾಪಾರ ಯುದ್ಧವನ್ನು ತೀವ್ರಗೊಳಿಸಿದೆ. ಇದಕ್ಕೆ ಪ್ರತಿಕ್ರಿಯೆಯಾಗಿ, ಚೀನಾವು ಅಮೆರಿಕದ ಸರಕುಗಳ ಮೇಲೆ ಶೇಕಡಾ 34 ಸುಂಕ ವಿಧಿಸಿದ್ದು, ಏಪ್ರಿಲ್ 10ರಿಂದ ಇದು ಜಾರಿಗೆ ಬರಲಿದೆ.

ಭಾರತದ ಮಾರುಕಟ್ಟೆಯ ಮೇಲೆ ಪರಿಣಾಮ

ಸೆನ್ಸೆಕ್ಸ್ ಇಂದು ಬೆಳಿಗ್ಗೆ 2500 ಪಾಯಿಂಟ್‌ಗಳಷ್ಟು ಕುಸಿದು 73,000 ಗಿಂತ ಕೆಳಗೆ ಇಳಿದಿದೆ. ಇದೇ ವೇಳೆ ನಿಫ್ಟಿ 1000 ಪಾಯಿಂಟ್‌ಗಳಷ್ಟು ಇಳಿಕೆಯಾಗಿ 22,000ಗಿಂತ ಕಡಿಮೆಯಾಗಿದೆ. ಈ ಕುಸಿತದಿಂದ ಭಾರತೀಯ ಹೂಡಿಕೆದಾರರ ಸಂಪತ್ತು ಕೇವಲ ಒಂದು ಗಂಟೆಯಲ್ಲಿ ಸುಮಾರು 15 ಲಕ್ಷ ಕೋಟಿ ರೂಪಾಯಿಗಳಷ್ಟು ಕರಗಿದೆ ಎಂದು ಅಂದಾಜಿಸಲಾಗಿದೆ. ಐಟಿ, ಲೋಹ, ಆಟೋಮೊಬೈಲ್ ಮತ್ತು ಫಾರ್ಮಾ ಕ್ಷೇತ್ರಗಳ ಷೇರುಗಳು ಶೇಕಡಾ 6 ರಿಂದ 10 ರಷ್ಟು ಕುಸಿತ ಕಂಡಿವೆ.

ಭಾರತದ ರಫ್ತುಗಳು, ವಿಶೇಷವಾಗಿ ಯುಎಸ್‌ಗೆ ಹೋಗುವ ಉತ್ಪನ್ನಗಳು ಈಗ ಹೆಚ್ಚುವರಿ ವೆಚ್ಚ ಎದುರಿಸಬೇಕಾಗಿದೆ. ಇದರ ಜೊತೆಗೆ, ಚೀನಾದ ಪ್ರತೀಕಾರದ ಸುಂಕಗಳು ಏಷ್ಯಾದ ಮಾರುಕಟ್ಟೆಗಳಲ್ಲಿ ಚೀನೀ ಸರಕುಗಳ ಒತ್ತಡವನ್ನು ಹೆಚ್ಚಿಸಬಹುದು ಎಂಬ ಆತಂಕವೂ ಇದೆ.

ಜಾಗತಿಕ ಪ್ರತಿಕ್ರಿಯೆ

ಜಾಗತಿಕ ಮಾರುಕಟ್ಟೆಗಳು ಸಹ ಈ ಸುಂಕಗಳಿಗೆ ತೀವ್ರವಾಗಿ ಪ್ರತಿಕ್ರಿಯಿಸಿವೆ. ಯುಎಸ್‌ನ ಡೌ ಜೋನ್ಸ್ ಸೂಚ್ಯಂಕವು ಶುಕ್ರವಾರ 2000 ಪಾಯಿಂಟ್‌ಗಳಷ್ಟು ಕುಸಿದಿದ್ದು, ಇದು ಕೋವಿಡ್ ಸಾಂಕ್ರಾಮಿಕದ ನಂತರದ ಅತ್ಯಂತ ಕೆಟ್ಟ ವ್ಯವಸ್ಥೆಯಾಗಿದೆ. ಏಷ್ಯಾದ ಮಾರುಕಟ್ಟೆಗಳಲ್ಲಿ ಜಪಾನ್‌ನ ನಿಕ್ಕೀ ಶೇಕಡಾ 7 , ದಕ್ಷಿಣ ಕೊರಿಯಾದ ಕೊಸ್ಪಿ ಶೇಕಾಡ 5, ಮತ್ತು ಆಸ್ಟ್ರೇಲಿಯಾದ ಎಸ್‌ಎಂಡ್‌ಪಿ/ಎಎಸ್‌ಎಕ್ಸ್ 200 ಸೂಚ್ಯಂಕಗಳು ಶೇಕಾ 6 ರಷ್ಟು ಕುಸಿದಿವೆ. ಈ ಘಟನೆಯಿಂದ ಜಾಗತಿಕ ಷೇರು ಮಾರುಕಟ್ಟೆಗಳಲ್ಲಿ ಸುಮಾರು 5 ಟ್ರಿಲಿಯನ್ ಡಾಲರ್‌ಗಳಷ್ಟು ಮೌಲ್ಯ ಕರಗಿದೆ ಎಂದು ಅಂದಾಜಿಸಲಾಗಿದೆ.

ಟ್ರಂಪ್‌ ಸಮರ್ಥನೆ

ಟ್ರಂಪ್ ತಮ್ಮ ನೀತಿಯನ್ನು ಸಮರ್ಥಿಸಿಕೊಂಡಿದ್ದಾರೆ. "ಈ ಸುಂಕಗಳು ಅಮೆರಿಕಕ್ಕೆ ಶಕ್ತಿಯುತ ಸಂಗಾತಿಯಾಗಿ ಮಾತುಕತೆಗೆ ಶಕ್ತಿ ನೀಡುತ್ತವೆ. ಇದು ನಮ್ಮ ಆರ್ಥಿಕತೆಯನ್ನು ಉತ್ತೇಜಿಸುತ್ತದೆ," ಎಂದು ಅವರು ಹೇಳಿದ್ದಾರೆ. ಆದರೆ, ಈ "ಕಠಿಣ ಔಷಧ" ಎಂಬ ಅವರ ಮಾತುಗಳು ಹೂಡಿಕೆದಾರರಲ್ಲಿ ಭಯವನ್ನು ಉಂಟುಮಾಡಿವೆ.

ಮುಂದಿನ ಹೆಜ್ಜೆಗಳು

ಭಾರತ ಸರ್ಕಾರ ಈಗಾಗಲೇ ಯುಎಸ್ ಜೊತೆ ಮಾತುಕತೆ ಪ್ರಾರಂಭಿಸಿದೆ ಎಂದು ತಿಳಿದುಬಂದಿದೆ. ಈ ಸುಂಕಗಳ ದೀರ್ಘಕಾಲೀನ ಪರಿಣಾಮವನ್ನು ಗಮನಿಸಲು ಜಗತ್ತು ಕಾತರದಿಂದ ಕಾಯುತ್ತಿದೆ. ಮುಂದಿನ ಕೆಲವು ದಿನಗಳಲ್ಲಿ ಮಾರುಕಟ್ಟೆ ಸ್ಥಿರಗೊಳ್ಳುತ್ತದೆಯೇ ಅಥವಾ ಇನ್ನಷ್ಟು ಕುಸಿಯುತ್ತದೆಯೇ ಎಂಬುದು ಎಲ್ಲರ ಗಮನದಲ್ಲಿದೆ.