ಮಧ್ಯಪ್ರದೇಶ: ಮಾಂಡ್ಲಾದಲ್ಲಿ ಅತಿಸಾರ, ನೀರಿನಿಂದ ಹರಡುವ ರೋಗದಿಂದ 7 ಮಂದಿ ಸಾವು, 150 ಮಂದಿ ಅಸ್ವಸ್ಥ

ಮಂಡ್ಲಾ: ಮಧ್ಯಪ್ರದೇಶದ ಬುಡಕಟ್ಟು ಪ್ರಾಬಲ್ಯವಿರುವ ಮಾಂಡ್ಲಾ ಜಿಲ್ಲೆಯಲ್ಲಿ ಕಳೆದ ಹತ್ತು ದಿನಗಳಲ್ಲಿ ಅತಿಸಾರ ಮತ್ತು ನೀರಿನಿಂದ ಹರಡುವ ರೋಗಗಳಿಂದ ಒಂದು ಮಗು ಸೇರಿದಂತೆ ಐದು ಮಹಿಳೆಯರು ಸೇರಿ  ಒಟ್ಟು ಏಳು ಜನರು ಸಾವನ್ನಪ್ಪಿ,  150 ಜನರು ಅಸ್ವಸ್ಥರಾಗಿದ್ದಾರೆ ಎಂದು ಅಧಿಕಾರಿಗಳು ಶನಿವಾರ ತಿಳಿಸಿದ್ದಾರೆ.  

ಘುಘ್ರಿ ಬ್ಲಾಕ್‌ನ ದೇವ್ರಹಾ ಬಹಮನಿ ಗ್ರಾಮದಲ್ಲಿ ನಾಲ್ವರು ಮತ್ತು ಬಿಚಿಯಾ ಬ್ಲಾಕ್‌ನ ಮಾಧೋಪುರ ಗ್ರಾಮದ ಮೂವರು ಅತಿಸಾರದಿಂದ ಸಾವನ್ನಪ್ಪಿದ್ದಾರೆ ಎಂದು ಜಿಲ್ಲಾ ಸಾಂಕ್ರಾಮಿಕ ನಿಯಂತ್ರಣ ಅಧಿಕಾರಿ ಡಾ.ಯತೀಂದ್ರ ಝರಿಯಾ ತಿಳಿಸಿದ್ದಾರೆ. ಮಾಧೋಪುರ ಗ್ರಾಮದ ನಿವಾಸಿ ಏಳನೇ ವ್ಯಕ್ತಿ ಶುಕ್ರವಾರ ಜಿಲ್ಲಾ ಆಸ್ಪತ್ರೆಯಲ್ಲಿ ಚಿಕಿತ್ಸೆ ವೇಳೆ ಮೃತಪಟ್ಟಿದ್ದಾರೆ. ಎರಡು ಬ್ಲಾಕ್‌ಗಳಲ್ಲಿ ಅತಿಸಾರ ಮತ್ತು ನೀರಿನಿಂದ ಹರಡುವ ರೋಗಗಳಿಂದ ಸುಮಾರು 150 ಜನರು ಅಸ್ವಸ್ಥರಾಗಿದ್ದಾರೆ ಎಂದು ಅವರು ಹೇಳಿದರು. ಘುಘ್ರಿ ಬ್ಲಾಕ್‌ನ ಕೆಲವು ರೋಗಿಗಳನ್ನು ಚಿಕಿತ್ಸೆಗಾಗಿ ಜಿಲ್ಲಾ ಆಸ್ಪತ್ರೆಗೆ ಶಿಫಾರಸು ಮಾಡಲಾಗಿದೆ.

ಜಾಗೃತಿ ಮೂಡಿಸುವುದರ ಜೊತೆಗೆ ಈ ಪ್ರದೇಶಗಳಲ್ಲಿ ಅತಿಸಾರವನ್ನು ನಿಯಂತ್ರಣಕ್ಕೆ ತರಲು ಆರೋಗ್ಯ ತಂಡಗಳು ಪ್ರಯತ್ನಿಸುತ್ತಿವೆ ಎಂದು ಜಾರಿಯಾ ಹೇಳಿದರು.

ಉಮಾರಿಯಾ ಜಿಲ್ಲೆಯ ಎರಡು ಗ್ರಾಮಗಳಲ್ಲಿ ತಂದೆ-ಮಗ ಸೇರಿದಂತೆ ಮೂವರು ಅತಿಸಾರದಿಂದ ಸಾವನ್ನಪ್ಪಿದ್ದಾರೆ ಮತ್ತು ಆರು ಮಂದಿ ರೋಗಕ್ಕೆ ತುತ್ತಾಗಿದ್ದಾರೆ ಎಂದು ಅಧಿಕಾರಿಯೊಬ್ಬರು ಶುಕ್ರವಾರ ತಿಳಿಸಿದ್ದಾರೆ. ಪ್ರಕರಣಗಳು ಬೆಳಕಿಗೆ ಬಂದ ಬಳಿಕ ಈ  ಪ್ರದೇಶದ ಆರೋಗ್ಯ ಮೇಲ್ವಿಚಾರಕರನ್ನು ಅಮಾನತುಗೊಳಿಸಲಾಗಿದ್ದು, ಇನ್ನಿಬ್ಬರು ಅಧಿಕಾರಿಗಳಿಗೆ ಶೋಕಾಸ್ ನೋಟಿಸ್ ನೀಡಲಾಗಿದೆ ಎಂದು ಅವರು ಹೇಳಿದರು.