ಚೆನ್ನೈನಲ್ಲಿ ಲ್ಯಾಂಡಿಂಗ್ ವೇಳೆ ಇಂಡಿಗೋ ವಿಮಾನದ ವಿಂಡ್‌ಶೀಲ್ಡ್‌ನಲ್ಲಿ ಬಿರುಕು

ಮಧುರೈನಿಂದ 76 ಪ್ರಯಾಣಿಕರನ್ನು ಹೊತ್ತು ಚೆನ್ನೈಗೆ ಬರುತ್ತಿದ್ದ ಇಂಡಿಗೋ ವಿಮಾನವು ಲ್ಯಾಂಡಿಂಗ್‌ಗೆ ಸಿದ್ಧವಾಗುತ್ತಿದ್ದಂತೆ, ವಿಮಾನದ ಮುಂಭಾಗದ ಗಾಜಿನಲ್ಲಿ (ವಿಂಡ್‌ಶೀಲ್ಡ್) ಬಿರುಕು ಕಾಣಿಸಿಕೊಂಡ ಘಟನೆ ಶನಿವಾರ (ಅಕ್ಟೋಬರ್ 11) ನಡೆದಿದೆ.

ಪೈಲಟ್ ಸಮಯಪ್ರಜ್ಞೆಯಿಂದ ತಕ್ಷಣವೇ ಚೆನ್ನೈ ವಿಮಾನ ನಿಲ್ದಾಣದ ಏರ್ ಟ್ರಾಫಿಕ್ ಕಂಟ್ರೋಲರ್‌ಗೆ (ATC) ಮಾಹಿತಿ ನೀಡಿದರು. ಇದನ್ನು ಅನುಸರಿಸಿ, ವಿಮಾನದ ಸುರಕ್ಷಿತ ಲ್ಯಾಂಡಿಂಗ್‌ಗಾಗಿ ಎಲ್ಲಾ ವ್ಯವಸ್ಥೆಗಳನ್ನು ಮಾಡಲಾಯಿತು.

ವಿಮಾನವು ಸುರಕ್ಷಿತವಾಗಿ ಲ್ಯಾಂಡ್ ಆದ ನಂತರ, ಅದನ್ನು ಪ್ರತ್ಯೇಕ ಪಾರ್ಕಿಂಗ್ ಬೇ (ಬೇ ನಂ. 95) ಗೆ ಕೊಂಡೊಯ್ಯಲಾಯಿತು ಮತ್ತು ಎಲ್ಲಾ ಪ್ರಯಾಣಿಕರನ್ನು ಸುರಕ್ಷಿತವಾಗಿ ಕೆಳಗಿಳಿಸಲಾಯಿತು. ಸದ್ಯ, ಬಿರುಕು ಬಿಟ್ಟಿರುವ ವಿಂಡ್‌ಶೀಲ್ಡ್ ಅನ್ನು ಬದಲಾಯಿಸುವ ವ್ಯವಸ್ಥೆ ಮಾಡಲಾಗುತ್ತಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಹಿಂತಿರುಗುವ ವಿಮಾನ ರದ್ದು

ವಿಂಡ್‌ಶೀಲ್ಡ್‌ನಲ್ಲಿ ಬಿರುಕು ಕಾಣಿಸಿಕೊಳ್ಳಲು ನಿಖರವಾದ ಕಾರಣ ಇನ್ನೂ ತಿಳಿದುಬಂದಿಲ್ಲ. ಈ ಘಟನೆಯಿಂದಾಗಿ, ವಿಮಾನದ ಮಧುರೈಗೆ ಹಿಂತಿರುಗುವ ಪ್ರಯಾಣವನ್ನು ರದ್ದುಗೊಳಿಸಲಾಗಿದೆ. ಈ ಘಟನೆಯ ಬಗ್ಗೆ ಇಂಡಿಗೋ ತನ್ನ ಅಧಿಕೃತ ಹೇಳಿಕೆಯಲ್ಲಿ, ವಿಂಡ್‌ಶೀಲ್ಡ್‌ನಲ್ಲಿನ ಬಿರುಕಿನ ಬಗ್ಗೆ ಪ್ರಸ್ತಾಪಿಸಿಲ್ಲ. ಬದಲಾಗಿ, "ನಿರ್ವಹಣೆಯ ಅವಶ್ಯಕತೆ"ಯಿಂದಾಗಿ ವಿಮಾನವನ್ನು ಸ್ಥಗಿತಗೊಳಿಸಲಾಗಿದೆ ಎಂದು ಮಾತ್ರ ತಿಳಿಸಿದೆ.

"ಅಕ್ಟೋಬರ್ 10ರಂದು ಮಧುರೈನಿಂದ ಚೆನ್ನೈಗೆ ಸಂಚರಿಸಬೇಕಾಗಿದ್ದ ಇಂಡಿಗೋ ಫ್ಲೈಟ್ 6E 7253, ತನ್ನ ಗಮ್ಯಸ್ಥಾನದಲ್ಲಿ ಇಳಿಯುವ ಮೊದಲು ನಿರ್ವಹಣೆಯ ಅವಶ್ಯಕತೆ ಕಂಡುಬಂದಿದೆ" ಎಂದು ಇಂಡಿಗೋ ವಕ್ತಾರರು ಪಿಟಿಐಗೆ ತಿಳಿಸಿದ್ದಾರೆ.

"ಪ್ರಮಾಣಿತ ಕಾರ್ಯಾಚರಣಾ ಕಾರ್ಯವಿಧಾನಗಳನ್ನು ಅನುಸರಿಸಿ, ವಿಮಾನವು ಚೆನ್ನೈನಲ್ಲಿ ಸುರಕ್ಷಿತವಾಗಿ ಇಳಿದಿದೆ ಮತ್ತು ಅಗತ್ಯ ತಪಾಸಣೆ ಮತ್ತು ಅನುಮತಿಗಳ ನಂತರವೇ ಮತ್ತೆ ಕಾರ್ಯಾಚರಣೆಯನ್ನು ಪುನರಾರಂಭಿಸುತ್ತದೆ," ಎಂದು ಹೇಳಿಕೆ ತಿಳಿಸಿದೆ.