ರಾಜ್ಯಸಭೆ ಕಲಾಪ ಹೇಗೆ ನಡೆಸಿಯಾರು ಹೊಸ ಸಭಾಪತಿ: ವಿರೋಧ ಪಕ್ಷಗಳಿಗೀಗ ಕದನ ಕುತೂಹಲ

ಎನ್‌ಡಿಎ ಅಭ್ಯರ್ಥಿ ಸಿ.ಪಿ. ರಾಧಾಕೃಷ್ಣನ್ ಅವರು ಮಂಗಳವಾರ (ಸೆಪ್ಟೆಂಬರ್ 9) ನೂತನ ಉಪಾಧ್ಯಕ್ಷರಾಗಿ ಆಯ್ಕೆಯಾಗಿದ್ದಾರೆ. ರಾಜ್ಯಸಭೆಯ ಪದನಿಮಿತ್ತ ಸಭಾಪತಿಯಾಗಿಯೂ ಆಗಿರುವ ರಾಧಾಕೃಷ್ಣನ್ ಅವರು ಮೇಲ್ಮನೆಯ ಕಲಾಪಗಳನ್ನು ಹೇಗೆ ನಡೆಸುತ್ತಾರೆ ಎಂಬುದನ್ನು ವಿರೋಧ ಪಕ್ಷವು ಅತ್ಯಂತ ಎಚ್ಚರಿಕೆ ಹಾಗೂ ಆಶಾವಾದದೊಂದಿಗೆ ಕಾದು ಕುಳಿತಿದೆ.

ರಾಧಾಕೃಷ್ಣನ್ ಅವರು ಈಗ ಜಗದೀಪ್ ಧನಕರ್ ಅವರ ಸ್ಥಾನವನ್ನು ಅಲಂಕರಿಸಲಿದ್ದಾರೆ, ಜುಲೈ 21 ರಂದು ಧನಕರ್ ಅವರ ಹಠಾತ್ ರಾಜೀನಾಮೆ ಮಂಗಳವಾರದ ಚುನಾವಣೆಗೆ ಕಾರಣವಾಯಿತು. ಮಹಾರಾಷ್ಟ್ರದ ರಾಜಭವನದಿಂದ ದೇಶದ ಎರಡನೇ ಅತಿ ದೊಡ್ಡ ಸಾಂವಿಧಾನಿಕ ಹುದ್ದೆಗೆ ರಾಧಾಕೃಷ್ಣನ್ ಅವರ ಆಯ್ಕೆಯು ಆಡಳಿತಾರೂಢ ಬಿಜೆಪಿಗೆ ಹೆಗ್ಗಳಿಕೆ ತಂದುಕೊಟ್ಟಿದೆ, ಏಕೆಂದರೆ ಅವರು ವಿರೋಧ ಪಕ್ಷದ ನ್ಯಾಯಮೂರ್ತಿ ಬಿ. ಸುದರ್ಶನ್ ರೆಡ್ಡಿ ಅವರ ವಿರುದ್ಧ ತಮ್ಮ ಉಮೇದುವಾರಿಕೆಯನ್ನು ಬೆಂಬಲಿಸಿದ ಎನ್ಡಿಎ ಮೈತ್ರಿಕೂಟದ ಅಧಿಕೃತ ಬಲಕ್ಕಿಂತ ಕನಿಷ್ಠ 30 ಮತಗಳನ್ನು ಹೆಚ್ಚು ಗಳಿಸಿದ್ದಾರೆ.

ಅಡ್ಡ ಮತದಾನದ ಅನುಮಾನ

ಆದಾಗ್ಯೂ, ಈ ವಿಜಯವು ರಾಧಾಕೃಷ್ಣನ್ ಅವರ ಬೆಂಬಲಿಗರು ಪ್ರತಿಸ್ಪರ್ಧಿ ಪಾಳಯದ ಸದಸ್ಯರಿಂದ ಅಡ್ಡ ಮತದಾನಕ್ಕೆ ಪ್ರೋತ್ಸಾಹ ನೀಡಿದ್ದಾರೆ ಎಂಬ ಅನುಮಾನ ಮೂಡಿದೆ. ಇದು ಪ್ರಧಾನಿ ನರೇಂದ್ರ ಮೋದಿ ಅವರ ಸರ್ಕಾರವು 'ವೋಟ್ ಚೋರಿ' ಕಾರಣದಿಂದ ಮೂರನೇ ಬಾರಿಗೆ ಅಧಿಕಾರವನ್ನು ಅನುಭವಿಸುತ್ತಿದೆ ಎಂದು ವಿರೋಧ ಪಕ್ಷವು ಆರೋಪಿಸುತ್ತಿರುವ ಹೊತ್ತಿನಲ್ಲಿಯೇ ಇಂತಹುದೊಂದು ಯಡವಟ್ಟು ಸಂಭವಿಸಿದೆ.

ಮಂಗಳವಾರದ ಚುನಾವಣೆಯಲ್ಲಿ ಚಲಾವಣೆಯಾದ ಒಟ್ಟು 767 ಮತಗಳಲ್ಲಿ ರಾಧಾಕೃಷ್ಣನ್ ಪಡೆದಿದ್ದು 452 ಮತಗಳನ್ನು. ಇದು 2022ರ ಉಪ ರಾಷ್ಟ್ರಪತಿ ಚುನಾವಣೆಯ ವಿಚಿತ್ರ ಮರುಪ್ರಸಾರದಂತೆ ಇತ್ತು. ಮತ್ತೊಮ್ಮೆ 15 ಮತಗಳನ್ನು ಅಸಿಂಧು ಎಂದು ಘೋಷಿಸಲಾಯಿತು, ಇದರಿಂದಾಗಿ ಬಹುಮತದ ಸಂಖ್ಯೆ 377ಕ್ಕೆ ಇಳಿಯಿತು. ಇಂಡಿಯಾ ಬಣದ 308 ಸಂಸದರು ಮಾತ್ರವಲ್ಲದೆ ಹೆಚ್ಚುವರಿ 17 ಮತಗಳು ಬಂದವು. ಅವುಗಳಲ್ಲಿ ಆಪ್(11), ಆಜಾದ್ ಸಮಾಜ ಪಕ್ಷದ ಚಂದ್ರಶೇಖರ್ ಆಜಾದ್, ಎಐಎಂಐಎಂನ ಅಸಾದುದ್ದೀನ್ ಓವೈಸಿ ಮತ್ತು ನಾಲ್ಕು ಸ್ವತಂತ್ರ ಸಂಸದರ ಮತಗಳು ಸೇರಿದ್ದವು. ಇದರೊಂದಿಗೆ ಪ್ರತಿಸ್ಪರ್ಧಿ ಸುದರ್ಶನ್ ರೆಡ್ಡಿ ಅವರು ಕೇವಲ 300 ಮತಗಳನ್ನು ಗಳಿಸಲು ಸಾಧ್ಯವಾಯಿತು.

ರೆಡ್ಡಿ ಅವರ ಉಮೇದುವಾರಿಕೆಯನ್ನು ಬೆಂಬಲಿಸಲು ಇತರ ಇಂಡಿಯಾ ಬ್ಲಾಕ್ ಪಕ್ಷಗಳನ್ನು ಮನವೊಲಿಸಿದ್ದ ಕಾಂಗ್ರೆಸ್ ಪಕ್ಷದ ಮೂಲಗಳು, ಅಸಿಂಧು ಎಂದು ಘೋಷಿಸಲಾದ ಎಲ್ಲಾ 15 ಮತಗಳು ವಿರೋಧ ಪಕ್ಷದ ಸಂಸದರದ್ದೇ ಎಂದು ಭಾವಿಸಿದರೂ, ಅವರ ಅಭ್ಯರ್ಥಿ ನಿರೀಕ್ಷಿಸಿದ್ದಕ್ಕಿಂತ 10 ಮತಗಳನ್ನು ಕಡಿಮೆ ಗಳಿಸಿದ್ದಾರೆ. "ಖಂಡಿತವಾಗಿಯೂ ಅಡ್ಡ-ಮತದಾನ ನಡೆದಿದೆ ಮತ್ತು ನಮಗೆ ಕೆಲವು ವ್ಯಕ್ತಿಗಳ ಬಗ್ಗೆ ಸ್ಪಷ್ಟವಾಗಿ ಅನುಮಾನವಿದೆ ಎಂದು ಹೇಳುತ್ತವೆ.

ಬಿಜೆಪಿ ಸ್ವಭಾವದಲ್ಲೇ ಇದೆ ವೋಟ್ ಚೋರಿ

“ಆದರೆ ಈಗ ಬೆರಳು ತೋರಿಸುವುದರಿಂದ ನಮಗೆ ಏನು ಸಿಗುತ್ತದೆ?" ಎಂದು ರೆಡ್ಡಿ ಅವರ ಚುನಾವಣಾ ಪ್ರಚಾರದಲ್ಲಿ ನಿಕಟವಾಗಿ ತೊಡಗಿಸಿಕೊಂಡಿದ್ದ ಹಿರಿಯ ಕಾಂಗ್ರೆಸ್ ಸಂಸದರೊಬ್ಬರು ಹೇಳುತ್ತಾರೆ. ಬಿಜೆಪಿ "ಮತ್ತೊಮ್ಮೆ ಸಾಬೀತುಪಡಿಸಿದೆ, ಮತಗಳ ಕಳ್ಳತನ ಅದರ ಸ್ವಭಾವದಲ್ಲಿಯೇ ಇದೆ. ಅವರು ಅದನ್ನು ಗೆಲ್ಲಬಹುದು ಎಂದು ತಿಳಿದಿದ್ದರೂ ಸಹ ಅದನ್ನು ಮಾಡುತ್ತಾರೆ" ಎಂದು ಅವರು ‘ದ ಫೆಡರಲ್’ಗೆ ತಿಳಿಸಿದರು.

ಈಗ ಚುನಾವಣೆ ಮುಗಿದ ಅಧ್ಠಾಯ. ವಿರೋಧ ಪಕ್ಷವು ಈಗ ಉಪರಾಷ್ಟ್ರಪತಿ ರಾಧಾಕೃಷ್ಣನ್ ಅವರು ರಾಜ್ಯಸಭೆಯ ಪದನಿಮಿತ್ತ ಸಭಾಪತಿಯಾಗಿ ಹೇಗೆ ಕಾರ್ಯನಿರ್ವಹಿಸುತ್ತಾರೆ ಎಂಬುದನ್ನು ಎದುರು ನೋಡುತ್ತಿದೆ. ಯಾಕೆಂದರೆ ರಾಧಾಕೃಷ್ಣನ್ ಅವರಿಗೂ ಮೊದಲು ಸಭಾಪತಿಯಾಗಿದ್ದ ಧನಕರ್ ಅವರ ಅಧಿಕಾರವಧಿಯ ಎರಡು ವರ್ಷಗಳು ವಿರೋಧ ಪಕ್ಷಗಳ ಪಾಲಿಗೆ ಹತಾಶೆಯ ಹೋರಾಟವಾಗಿತ್ತು. ರಾಜ್ಯಸಭೆಯಲ್ಲಿ ವಿರೋಧಪಕ್ಷಗಳ ಧ್ವನಿ ಕೇಳದಂತೆ ನಿರಂತರ ಕಡಿವಾಣ ಹಾಕಲಾಗುತ್ತಿತ್ತು.

ವಿರೋಧಪಕ್ಷದ ಔದಾರ್ಯದ ಲಾಭ

ಧನಕರ್ ಅವರ ಹಠಾತ್ ನಿರ್ಗಮನ ಮತ್ತು ಅವರ ನಂತರದ ಸ್ವಯಂ-ನಿರ್ಬಂಧಿತ ಮೌನವ್ರತ ಹಾಗೂ ಸಾರ್ವಜನಿಕ ಜೀವನದಿಂದ ಕಣ್ಮರೆಯಾಗಿದ್ದು, ಕೆಲ ಸಮಯದ ಹಿಂದೆ ಅವರ ಪದಚ್ಯುತಿಗೆ ಆಗ್ರಹಿಸಿದ್ದ ವಿರೋಧ ಪಕ್ಷದ ಸಂಸದರೇ ಅವರ ಬಗ್ಗೆ ಕಾಳಜಿ ವಹಿಸುವಂತೆ ಮಾಡಿತ್ತು. ಅದು ವಿರೋಧಪಕ್ಷದ ಔದಾರ್ಯವೂ ಆಗಿತ್ತು. ಆದರೂ, ಈ ಡಿಸೆಂಬರ್ನಲ್ಲಿ ಸಂಸತ್ತಿನ ಚಳಿಗಾಲದ ಅಧಿವೇಶನದಲ್ಲಿ ರಾಧಾಕೃಷ್ಣನ್ ಅವರು ರಾಜ್ಯಸಭೆಯ ಸಭಾಪತಿಯಾಗಿ ತಮ್ಮ ಇನ್ನಿಂಗ್ಸ್ ಪ್ರಾರಂಭಿಸಿದಾಗ ವಿರೋಧ ಪಕ್ಷದ ಈ ಹೊಸದಾಗಿ ಕಂಡುಕೊಂಡ ಔದಾರ್ಯ ಮನೋಭಾವವು ಅವರಿಗೂ ಸಿಗುತ್ತದೆಯೇ ಎಂದು ಹೇಳುವುದು ಕಷ್ಟ.

ಧನಕರ್ ಅವರು ಸದನದ ಕಲಾಪಗಳನ್ನು ಸ್ಪಷ್ಟವಾಗಿ ಪಕ್ಷಪಾತದಿಂದ ನಡೆಸುತ್ತಿದ್ದರೂ ಮತ್ತು ನಿರ್ಣಾಯಕ ವಿಷಯಗಳ ಬಗ್ಗೆ ಚರ್ಚೆ ಅಥವಾ ಚೂರೇ ಚೂರು ಮಧ್ಯಪ್ರವೇಶ ಮಾಡಲು ವಿರೋಧ ಪಕ್ಷಕ್ಕೆ ಅವಕಾಶವನ್ನೇ ನೀಡದೆ ಕಠಿಣವಾಗಿ ವರ್ತಿಸುತ್ತಿದ್ದರೂ, ಅವರ ಹಿಂದಿನ ಒಡನಾಟದಿಂದಾಗಿ ಅನೇಕ ಇಂಡಿಯಾ ಬ್ಲಾಕ್ ನಾಯಕರೊಂದಿಗೆ ವೈಯಕ್ತಿಕ ಬಾಂಧವ್ಯವನ್ನು ಹೊಂದಿದ್ದರು.

ಈ ಎಲ್ಲ ಹಿನ್ನೆಲೆಯಿಂದ ನೋಡಿದರೆ, ರಾಧಾಕೃಷ್ಣನ್ ಅವರು ಬಹುತೇಕ ವಿರೋಧ ಪಕ್ಷದ ನಾಯಕರು ಮತ್ತು ಹಿರಿಯ ಸಂಸದರಿಗೆ ಬಹುತೇಕ 'ಅಪರಿಚಿತ ವ್ಯಕ್ತಿ'. ಇದಕ್ಕೆ ಅವರ ಸಾಧಾರಣ ಚುನಾವಣಾ ಹಿನ್ನೆಲೆ, ರಾಜಕೀಯವಾಗಿಯೂ ಹೆಚ್ಚು ಪ್ರಸಿದ್ಧರಲ್ಲದೆ ಇರುವುದು ಮತ್ತು ಬಿಜೆಪಿಯೇತರ ನಾಯಕರೊಂದಿಗೆ ಅವರಿಗಿರುವ ವೈಯಕ್ತಿಕ ಸಂಪರ್ಕದ ಕೊರತೆಯೇ ಕಾರಣ. ಅವರು ತೆಲಂಗಾಣ, ಜಾರ್ಖಂಡ್ ಮತ್ತು ಮಹಾರಾಷ್ಟ್ರದಂತಹ ಪ್ರಮುಖ ರಾಜ್ಯಗಳ ರಾಜ್ಯಪಾಲರಾಗಿ ನಾನಾ ಅವಧಿಗಳಲ್ಲಿ ಸೇವೆ ಸಲ್ಲಿಸಿದ್ದರೂ, ಅವರು ನಿರ್ವಹಿಸಿದ ಹುದ್ದೆಗೆ ಅಗತ್ಯಕ್ಕಿಂತ ಹೆಚ್ಚು ರಾಜಕೀಯ ಸಂಬಂಧಗಳನ್ನು ಬೆಳೆಸಲು ಮಾಡಿದ ಪ್ರಯತ್ನ ತೀರಾ ಅಪರೂಪ ಎಂದು ಈ ರಾಜ್ಯಗಳ ವಿರೋಧ ಪಕ್ಷದ ನಾಯಕರು ದಿ ಫೆಡರಲ್ಗೆ ತಿಳಿಸಿದ್ದಾರೆ.

ರಾಧಾಕೃಷ್ಣನ್ ಅವರನ್ನು ಅವರ ರಾಜ್ಯಪಾಲರ ಅವಧಿಗಳಿಂದ ತಿಳಿದಿರುವ ವಿರೋಧ ಪಕ್ಷದ ನಾಯಕರು, ಅವರು ಸಂಘರ್ಷದ ಪ್ರವೃತ್ತಿಯವರಲ್ಲ ಎಂಬುದನ್ನು ಒಪ್ಪಿಕೊಳ್ಳುತ್ತಾರೆ. ಹಾಗಿದ್ದೂ ಅವರ ಬಿಜೆಪಿಯ ಸೈದ್ಧಾಂತಿಕ ಮೂಲವಾದ ಆರ್‌ಎಸ್‌ಎಸ್‌ನೊಂದಿಗೆ ಅವರು ಹೊಂದಿರುವ ಸುದೀರ್ಘ ಸಂಬಂಧವನ್ನು ಎಚ್ಚರಿಕೆಯ ರೂಪದಲ್ಲಿಯೂ ಸೇರಿಸುವುದನ್ನು ಮರೆಯುವುದಿಲ್ಲ.

ಕಟ್ಟಾ ಸಂಘ ಪರಿವಾರದ ಮನುಷ್ಯ

ಧನಕರ್ ಅವರಾದರೆ ಈ ಹಿಂದೆ ತಮ್ಮ ರಾಜಕೀಯ ಜೀವನದಲ್ಲಿ ಜನತಾದಳ, ಕಾಂಗ್ರೆಸ್ ಮತ್ತು ಬಿಜೆಪಿಯಲ್ಲಿ ಇದ್ದವರು. ಅವರು ಬಿಜೆಪಿಯೊಂದಿಗೆ ಕಾಯ್ದುಕೊಂಡುಬಂದಿದ್ದ ಬದ್ಧತೆ ಅವಕಾಶವಾದಿ ಉದ್ದೇಶವೇ ಹೊರತು ಸೈದ್ಧಾಂತಿಕವಾದುದಲ್ಲ. ಆದರೆ ರಾಧಾಕೃಷ್ಣನ್ ಹಾಗಲ್ಲ, ಅವರು ಕಟ್ಟಾ ಸಂಘ ಪರಿವಾರದ ಮನುಷ್ಯ ಮತ್ತು ಸಂಪ್ರದಾಯವಾದಿ ಸ್ವರೂಪದವರು ಎಂದು ಅವರ ಕೊನೆಯ ರಾಜ್ಯಪಾಲರ ತಾಣವಾದ ಮಹಾರಾಷ್ಟ್ರದ ಹಿರಿಯ ವಿರೋಧ ಪಕ್ಷದ ಸಂಸದರೊಬ್ಬರು ‘ದ ಫೆಡರಲ್’ಗೆ ತಿಳಿಸಿದರು.

“ಗತಕಾಲದ ಒಂದು ನಿರ್ದಿಷ್ಟ ಅವಧಿಯ ಸಂಘದ ಸದಸ್ಯರನ್ನು ನೀವು ಗಮನಿಸಿದ್ದೇ ಹೌದಾದರೆ, ಹಿಂದುತ್ವಕ್ಕೆ ಅವರು ಎಷ್ಟೇ ಸೈದ್ಧಾಂತಿಕವಾಗಿ ಬದ್ಧತೆಯನ್ನು ಹೊಂದಿದ್ದರೂ ಅವರಲ್ಲಿ ಆಳವಾಗಿ ಬೇರುಬಿಟ್ಟಿರುವ ಕೋಮುವಾದಿ ದ್ವೇಷವನ್ನು ಸಾರ್ವಜನಿಕವಾಗಿ ಪ್ರದರ್ಶಿಸುವವರು ತೀರಾ ಕಡಿಮೆ. ಅವರು ಯಾವಾಗಲೂ ತುಂಬಾ ಸಭ್ಯ, ನಾಗರಿಕರಾಗಿರುತ್ತಾರೆ ಮತ್ತು ತಮ್ಮ ಎಂದಿನ ಮುಸ್ಲಿಂ ನಿಂದನೆಯನ್ನು ನಿರ್ದಿಷ್ಟ ಜನಸಂದಣಿಯಲ್ಲಿ ಮಾತ್ರ ಮಾಡುತ್ತಾರೆ, ಇಲ್ಲದೇ ಹೋದಾಗ ಅವರು ಧರ್ಮಗ್ರಂಥಗಳು, ಸಂಸ್ಕೃತಿ, ಮೌಲ್ಯಗಳು ಮತ್ತು ಎಲ್ಲದರ ಬಗ್ಗೆ ಮಾತನಾಡುತ್ತಾರೆ. ರಾಧಾಕೃಷ್ಣನ್ ಅವರು ವಯಸ್ಸಿನಲ್ಲಿ ತುಂಬಾ ಹಿರಿಯರಲ್ಲದಿದ್ದರೂ (ಅವರಿಗೆ 67 ವರ್ಷ), ಅವರು ಹದಿಹರೆಯದಲ್ಲಿ ಸಂಘಕ್ಕೆ ಸೇರಿದ್ದರು ಮತ್ತು ಆದ್ದರಿಂದ ಅವರು ಆ ಸಂಘದ ಸಂಪ್ರದಾಯವನ್ನು ಮೈಗೂಡಿಸಿಕೊಂಡಿದ್ದಾರೆ” ಎಂದು ಮಹಾರಾಷ್ಟ್ರ ಆ ಸಂಸದರು ಹೇಳಿದರು.

ವಿಶ್ವಾಸಾರ್ಹತೆ ಸಾಬೀತುಪಡಿಸಬೇಕಿಲ್ಲ

"ಲೋಕಸಭೆಯಲ್ಲಿ ಅವರ ಅವಧಿಯ ಬಳಿಕ ನಾನು ಅವರನ್ನು ಕೆಲವೊಮ್ಮೆ ಸಾಮಾಜಿಕವಾಗಿ ಮಾತ್ರ ಭೇಟಿಯಾಗಿದ್ದೇನೆ ಮತ್ತು ಅವರು ಯಾವಾಗಲೂ ತುಂಬಾ ಸಭ್ಯರು ಎಂಬುದನ್ನು ಕಂಡುಕೊಂಡಿದ್ದೇನೆ. ಆದರೆ ಅವರು ಈಗಿನ ಬಿಜೆಪಿ ಸದಸ್ಯರು ಅಥವಾ ಧನಕರ್ ಅಥವಾ ಹಿಮಂತ ಬಿಸ್ವಾ ಶರ್ಮಾ ಅವರಂತೆ ಪರಿವರ್ತಿತರಾಗಿ ಮೋದಿ ಅವರಿಗೆ ತಾವು ವಿಶ್ವಾಸಾರ್ಹರು ಎಂದು ಸಾಬೀತುಪಡಿಸಬೇಕಾಗಿಲ್ಲ. ಆದರೂ ಅವರು ಸರ್ಕಾರವು ಸಭಾಪತಿಯಾಗಿ ಏನು ಮಾಡಲು ಬಯಸುತ್ತದೆಯೋ ಅದಕ್ಕೆ ವಿರುದ್ಧವಾಗಿ ನಡೆದುಕೊಳ್ಳುತ್ತಾರೆ ಎಂಬಗ್ಗೆ ನನಗೆ ಸಂದೇಹವಿದೆ. ಬಹುಶಃ ಅವರು ಸದನವನ್ನು ನಡೆಸುವ ರೀತಿಯಲ್ಲಿ ಧನಕರ್ ಅವರಂತೆ ಇರದೆ ವೆಂಕಯ್ಯ ನಾಯ್ಡು ಅವರಂತೆ ಇರುತ್ತಾರೆ, ಅಂದರೆ ವಿರೋಧ ಪಕ್ಷಕ್ಕೆ ಸ್ವಲ್ಪ ಅವಕಾಶ ನೀಡುವಂತೆ ಕಾಣುತ್ತಾರೆ, ಆದರೆ ಕೊನೆಯಲ್ಲಿ ಸರ್ಕಾರಕ್ಕೆ ಬೇಕಾದುದನ್ನು ಮಾಡಲು ಬಿಡುತ್ತಾರೆ" ಎಂದು ರಾಧಾಕೃಷ್ಣನ್ ಅವರೊಂದಿಗೆ 13ನೇ ಲೋಕಸಭೆಗೆ ಆಯ್ಕೆಯಾಗಿದ್ದ (ಅವರ 2ನೇ ಮತ್ತು ಕೊನೆಯ ಸಂಸದರ ಅವಧಿ) ಮತ್ತೊಬ್ಬ ವಿರೋಧ ಪಕ್ಷದ ಸಂಸದರು ದ ಫೆಡರಲ್‌ಗೆ ತಿಳಿಸಿದರು.

ರಾಧಾಕೃಷ್ಣನ್ ಅವರು ಎಷ್ಟರ ಮಟ್ಟಿಗೆ ತಟಸ್ಥ ನಿಲುವನ್ನು ಹೊಂದಿದ್ದಾರೆ ಎನ್ನುವುದು ಸಂಸತ್ತಿನ ಚಳಿಗಾಲದ ಅಧಿವೇಶನ ಪ್ರಾರಂಭವಾದ ಕೂಡಲೇ ಪರೀಕ್ಷೆಗೆ ಒಳಪಡುತ್ತದೆ ಎಂದು ಹಲವು ವಿರೋಧ ಪಕ್ಷದ ನಾಯಕರು ನಂಬಿದ್ದಾರೆ. ಏಕೆಂದರೆ, ಇಂಡಿಯಾ ಬ್ಲಾಕ್ ಸಂಸದರು, ಅದರಲ್ಲೂ ವಿಶೇಷವಾಗಿ ಕಾಂಗ್ರೆಸ್ ಪಕ್ಷದವರು, ಅಲಹಾಬಾದ್ ಹೈಕೋರ್ಟ್ನ ನ್ಯಾಯಮೂರ್ತಿ ಶೇಖರ್ ಯಾದವ್ ಅವರನ್ನು ಕಿತ್ತುಹಾಕುವ ಬಗ್ಗೆ ಸಭಾಪತಿಯ ನಿರ್ಧಾರಕ್ಕಾಗಿ ಒತ್ತಾಯಿಸಲು ಸಿದ್ಧತೆ ಮಾಡಿಕೊಂಡಿದ್ದಾರೆ. ಕಳೆದ ಡಿಸೆಂಬರ್‌ನಲ್ಲಿ, ನ್ಯಾಯಮೂರ್ತಿ ಯಾದವ್ ಅವರು ವಿ.ಎಚ್.ಪಿ. ಆಯೋಜಿಸಿದ್ದ ಕಾರ್ಯಕ್ರಮದಲ್ಲಿ ಮುಸ್ಲಿಮರ ವಿರುದ್ಧ ಕೋಮುವಾದಿ ಹೇಳಿಕೆ ನೀಡಿದ ಕೆಲವೇ ದಿನಗಳ ನಂತರ, ಈ ನಿರ್ಣಯಕ್ಕೆ ವಿರೋಧ ಪಕ್ಷದ ಸಂಸದರು ಸಹಿ ಹಾಕಿ ಧನಕರ್ ಅವರಿಗೆ ಸಲ್ಲಿಸಿದ್ದರು.

ಆದರೆ, ಧನಕರ್ ತಮ್ಮ ಅಧಿಕಾರಾದ ಅವಧಿಯಲ್ಲಿ ಈ ಸೂಚನೆಯ ಮೇಲೆ ತೀರ್ಪು ನೀಡಲು ವಿಳಂಬ ಮಾಡಿದರು. ಉಪರಾಷ್ಟ್ರಪತಿ ಸ್ಥಾನಕ್ಕೆ ರಾಜೀನಾಮೆ ನೀಡುವ ಕೆಲವೇ ಗಂಟೆಗಳ ಮೊದಲು, ವಿರೋಧ ಪಕ್ಷವು ನ್ಯಾಯಮೂರ್ತಿ ಯಶವಂತ್ ವರ್ಮಾ ಅವರನ್ನು ವಜಾ ಮಾಡಲು ಸಹಿ ಹಾಕಿದ ಮತ್ತೊಂದು ಸೂಚನೆಯನ್ನು ಒಪ್ಪಿಕೊಳ್ಳಲು ತಾವು ಸಿದ್ಧರಿರುವುದಾಗಿ ಧನಕರ್ ರಾಜ್ಯಸಭೆಗೆ ಸೂಚಿಸಿದ್ದರು. ಈ ನಡೆಯೇ ಅವರ ಅನಿರೀಕ್ಷಿತ ನಿರ್ಗಮನಕ್ಕೆ ದಾರಿ ಮಾಡಿತು ಎಂಬುದು ಅನೇಕರ ನಂಬಿಕೆ. ಯಾಕೆಂದರೆ, ವಿರೋಧ ಪಕ್ಷದ ಈ ಸೂಚನೆಯನ್ನು ಒಪ್ಪಿಕೊಳ್ಳುವುದು ಸರ್ಕಾರಕ್ಕೆ ಅಪಥ್ಯವಾಗಿತ್ತು. ನ್ಯಾಯಮೂರ್ತಿ ಯಾದವ್ ವಿರುದ್ಧದ ಸೂಚನೆಯ ಬಗ್ಗೆ, ಧನಕರ್ ಅವರು ತಮ್ಮ ನಿರ್ಧಾರವನ್ನು ಶೀಘ್ರದಲ್ಲೇ ಸದನಕ್ಕೆ ತಿಳಿಸುವುದಾಗಿ ಹೇಳಿದರು. ಆದರೆ ಕೆಲವೇ ಗಂಟೆಗಳಲ್ಲಿ, ಧನಕರ್ ಅವರೇ ರಾಜೀನಾಮೆ ನೀಡಿದರು.

ನ್ಯಾಯಮೂರ್ತಿ ಯಾದವ್ ವಜಾ ಜವಾಬ್ದಾರಿ

ವೈದ್ಯಕೀಯ ಕಾರಣಗಳನ್ನು ಉಲ್ಲೇಖಿಸಿ ಧನಕರ್ ಹಠಾತ್ ರಾಜೀನಾಮೆ ನೀಡಿದಾಗ ನ್ಯಾಯಮೂರ್ತಿ ಯಾದವ್ ಅವರನ್ನು ವಜಾ ಮಾಡುವ ಸೂಚನೆಯನ್ನು ಅಂಗೀಕರಿಸುವ ಹಂತದಲ್ಲಿದ್ದರು. ಈಗ ಈ ಸೂಚನೆಯು ರಾಜ್ಯಸಭಾ ಸಭಾಪತಿಯ ನಿರ್ಧಾರಕ್ಕಾಗಿ ಕಾಯುತ್ತಿದ್ದು, ಈಗ ಈ ಜವಾಬ್ದಾರಿಯು ರಾಧಾಕೃಷ್ಣನ್ ಅವರ ಹೆಗಲೇರಲಿದೆ ಎಂದು ಜೈರಾಮ್ ರಮೇಶ್ ಅವರಂತಹ ವಿರೋಧ ಪಕ್ಷದ ಸಂಸದರು ಅಭಿಪ್ರಾಯಪಡುತ್ತಾರೆ.

"ಖಂಡಿತವಾಗಿಯೂ ನಾವು ಚಳಿಗಾಲದ ಅಧಿವೇಶನ ಶುರುವಾದ ತಕ್ಷಣ ತೀರ್ಪು ನೀಡಲು ಒತ್ತಾಯಿಸುತ್ತೇವೆ ಮತ್ತು ಅವರು (ರಾಧಾಕೃಷ್ಣನ್) ಹೇಗೆ ಸ್ಪಂದಿಸುತ್ತಾರೆ ಎಂಬುದು ಅವರು ಕಲಾಪಗಳನ್ನು ಹೇಗೆ ನಡೆಸಲು ಯೋಜಿಸಿದ್ದಾರೆ, ಅವರು ತಮ್ಮ ಉತ್ತರಾಧಿಕಾರಿಯಂತೆ ಪಕ್ಷಪಾತಿಯಾಗಿರುತ್ತಾರೆಯೇ ಅಥವಾ ಸಂವಿಧಾನವನ್ನು ಅನುಸರಿಸಿ ತಟಸ್ಥ ಸಭಾಪತಿಯಾಗಿ ಸದನವನ್ನು ನಡೆಸುತ್ತಾರೆಯೇ ಎಂಬುದಕ್ಕೆ ಸಾಕ್ಷಿಯಾಗುತ್ತದೆ" ಎಂದು ಇನ್ನೊಬ್ಬ ಕಾಂಗ್ರೆಸ್ ಸಂಸದರು ‘ದ ಫೆಡರಲ್’ಗೆ ತಿಳಿಸಿದರು.

ರಾಜ್ಯಸಭಾ ಸಭಾಪತಿಯಾಗಿದ್ದ ಧನಕರ್ ಅವರು ಈ ವರ್ಷದ ಮಾರ್ಚ್‌ನಲ್ಲಿ, ಬಿಜೆಪಿ ಸಂಸದ ಘನಶ್ಯಾಮ್ ತಿವಾರಿ ಅವರ ನೇತೃತ್ವದ ಸಂಸತ್ತಿನ ನೀತಿ ಸಮಿತಿಗೆ, ಸದಸ್ಯರು ಹಕ್ಕುಬಾಧ್ಯತಾ ಉಲ್ಲಂಘನೆಯನ್ನು ಯಾವ ವಿಷಯಗಳ ಮೇಲೆ ಆಹ್ವಾನಿಸಬಹುದು ಎಂಬುದಕ್ಕೆ ಸಂಬಂಧಿಸಿದಂತೆ ಒಂದು ಕಾರ್ಯವಿಧಾನ ಮತ್ತು ಹೊಸ ಮಾರ್ಗಸೂಚಿಗಳನ್ನು ರೂಪಿಸುವಂತೆ ನಿರ್ದೇಶಿಸಿದ್ದರು. ಕೇಂದ್ರ ಗೃಹ ಸಚಿವ ಅಮಿತ್ ಶಾ ಅವರು ಕಾಂಗ್ರೆಸ್ ಸಂಸದೀಯ ಪಕ್ಷದ ನಾಯಕಿ ಸೋನಿಯಾ ಗಾಂಧಿ ವಿರುದ್ಧ ಸದನದಲ್ಲಿ ತಪ್ಪುದಾರಿಗೆಳೆಯುವ ಮತ್ತು ಮಾನಹಾನಿಕರ ಹೇಳಿಕೆಗಳನ್ನು ನೀಡಿದ್ದಾರೆ ಎಂದು ಜೈರಾಮ್ ರಮೇಶ್ ಅವರು ಆರೋಪಿಸಿದ್ದರು. ಇದಾದ ಬಳಿಕ ವಿರೋಧ ಪಕ್ಷದ ಹಕ್ಕುಬಾಧ್ಯತಾ ಉಲ್ಲಂಘನೆಯ ಸೂಚನೆಯನ್ನು ತಿರಸ್ಕರಿಸಿದ ಧನಕರ್ ಅವರು ನೀತಿ ಸಮಿತಿಗೆ ಈ ನಿರ್ದೇಶನವನ್ನು ನೀಡಿದ್ದರು ಎಂದು ಮತ್ತೊಬ್ಬ ವಿರೋಧ ಪಕ್ಷದ ಸಂಸದರು ನೆನಪಿಸಿಕೊಳ್ಳುತ್ತಾರೆ.

ನೀತಿ ಸಮಿತಿಯ ಹೊಸ ಮಾರ್ಗಸೂಚಿಯ ನಿರೀಕ್ಷೆ

ಅಂದು ವಿರೋಧ ಪಕ್ಷದ ನೋಟಿಸ್-ನ್ನು ತಿರಸ್ಕರಿಸಿದ ಧನಕರ್, ರಾಜ್ಯಸಭೆಯ ನೀತಿ ಸಮಿತಿಯ ವ್ಯಾಪ್ತಿ ಮತ್ತು ಅಧಿಕಾರಗಳನ್ನು ವಿಸ್ತರಿಸುವ ಮತ್ತು ಸುಧಾರಿಸುವ ಕುರಿತು ಕಾಂಗ್ರೆಸ್ ಹಿರಿಯ ನಾಯಕ ದಿ. ಎಸ್.ಬಿ. ಚವಾಣ್ ಅವರು 1998ರಲ್ಲಿ ಸಂಸತ್ತಿಗೆ ಸಲ್ಲಿಸಿದ ವರದಿಯನ್ನು ಪರಿಶೀಲಿಸುವಂತೆ ತಿವಾರಿಗೆ ನಿರ್ದೇಶನ ನೀಡಿದ್ದರು. ಅಮಿತ್ ಶಾ ವಿರುದ್ಧದ ನೋಟಿಸ್‌ಗಾಗಿ ವಿರೋಧ ಪಕ್ಷವನ್ನು ತರಾಟೆಗೆ ತೆಗೆದುಕೊಂಡಿದ್ದ ಧನಕರ್, ರಾಜ್ಯಸಭೆಯನ್ನು "ಜನರ ಘನತೆಯನ್ನು ಹಾಳುಮಾಡುವ ವೇದಿಕೆಯಾಗಲು" ತಾನು ಬಿಡುವುದಿಲ್ಲ ಎಂದು ಹೇಳಿದ್ದರು.

ಧನಕರ್ ಅವರ ನಿರ್ದೇಶನಗಳು ವಿರೋಧ ಪಕ್ಷವನ್ನು ಮತ್ತಷ್ಟು ಹತ್ತಿಕ್ಕುವ ಉದ್ದೇಶವನ್ನು ಹೊಂದಿವೆ ಎಂದು ಇಂಡಿಯಾ ಬ್ಲಾಕ್‌ನ ಅನೇಕ ಸದಸ್ಯರು ನಂಬಿದ್ದರು. ತಿವಾರಿ ಅವರು, ನೀತಿ ಸಮಿತಿಯು ಸಭಾಪತಿ ನೀಡಿದ ನಿರ್ದೇಶನಗಳ ಮೇಲೆ ಕೆಲಸ ಮಾಡಲು ಪ್ರಾರಂಭಿಸಿದೆ ಎಂದು ರಾಜ್ಯಸಭೆಗೆ ತಿಳಿಸಿದ್ದರು, ಆದರೆ ಧನಕರ್ ಅವರ ಹಠಾತ್ ರಾಜೀನಾಮೆಯ ನಂತರ ಆ ವಿಷಯ ತಣ್ಣಗಾಗಿದೆ.

"ಆ ವಿಷಯದಲ್ಲಿ ಏನಾಗುತ್ತದೆ ಎಂದು ನೋಡೋಣ. ನೀತಿ ಸಮಿತಿಗೆ ಧನಕರ್ ಅವರ ನಿರ್ದೇಶನಗಳು ಸ್ಪಷ್ಟವಾಗಿ ವಿರೋಧ ಪಕ್ಷವನ್ನು ಬಾಯಿ ಮುಚ್ಚಿಸುವ ಉದ್ದೇಶವನ್ನು ಹೊಂದಿದ್ದವು. ಆದ್ದರಿಂದ ಅದು ಇನ್ನೂ ಟೇಬಲ್ ಮೇಲಿದೆ ಎಂದು ನಾನು ನಂಬುತ್ತೇನೆ. ಹೊಸ ಸಭಾಪತಿಯವರು ಈ ವಿಷಯವನ್ನು ಹೇಗೆ ನಿರ್ವಹಿಸುತ್ತಾರೆ ಎಂದು ಕಾದು ನೋಡೋಣ" ಎಂದು ಕಾಂಗ್ರೆಸ್ ರಾಜ್ಯಸಭಾ ಸಂಸದರೊಬ್ಬರು ಹೇಳಿದರು.