ಮಾಜಿ ಉಪರಾಷ್ಟ್ರಪತಿ ಜಗದೀಪ್ ಧನಕರ್ ಅವರಿಂದ ಶಾಸಕರ ಪಿಂಚಣಿಗೆ ಅರ್ಜಿ ಸಲ್ಲಿಕೆ

ಭಾರತದ ಮಾಜಿ ಉಪರಾಷ್ಟ್ರಪತಿ ಜಗದೀಪ್ ಧನಕರ್ ಅವರು, ರಾಜಸ್ಥಾನದ ಮಾಜಿ ಶಾಸಕರಾಗಿ ತಮಗೆ ಬರಬೇಕಾದ ಪಿಂಚಣಿಗಾಗಿ ಅರ್ಜಿ ಸಲ್ಲಿಸಿದ್ದಾರೆ. ಜುಲೈ 21ರಂದು ತಮ್ಮ ಉಪರಾಷ್ಟ್ರಪತಿ ಹುದ್ದೆಗೆ ರಾಜೀನಾಮೆ ನೀಡಿದ ನಂತರ, ಅವರು ಈ ಪಿಂಚಣಿಯನ್ನು ಪುನರಾರಂಭಿಸುವಂತೆ ಕೋರಿದ್ದಾರೆ.

ಜಗದೀಪ್ ಧನಕರ್ ಅವರು 1993ರಿಂದ 1998 ರವರೆಗೆ, ರಾಜಸ್ಥಾನದ ಕಿಶನ್‌ಗಢ ವಿಧಾನಸಭಾ ಕ್ಷೇತ್ರದಿಂದ ಕಾಂಗ್ರೆಸ್ ಶಾಸಕರಾಗಿ ಸೇವೆ ಸಲ್ಲಿಸಿದ್ದರು. ಈ ಅವಧಿಗಾಗಿ ಅವರು ಮಾಜಿ ಶಾಸಕರಾಗಿ ಪಿಂಚಣಿ ಪಡೆಯುತ್ತಿದ್ದರು. ಆದರೆ, ಜುಲೈ 2019 ರಲ್ಲಿ ಅವರು ಪಶ್ಚಿಮ ಬಂಗಾಳದ ರಾಜ್ಯಪಾಲರಾಗಿ ನೇಮಕಗೊಂಡ ನಂತರ, ಈ ಪಿಂಚಣಿಯನ್ನು ಸ್ಥಗಿತಗೊಳಿಸಲಾಗಿತ್ತು.

ಇದೀಗ, ಉಪರಾಷ್ಟ್ರಪತಿ ಹುದ್ದೆಯಿಂದ ಕೆಳಗಿಳಿದಿರುವ ಕಾರಣ, ಅವರು ರಾಜಸ್ಥಾನ ವಿಧಾನಸಭೆಯ ಸಚಿವಾಲಯಕ್ಕೆ ಹೊಸದಾಗಿ ಅರ್ಜಿ ಸಲ್ಲಿಸಿ, ತಮ್ಮ ಶಾಸಕರ ಪಿಂಚಣಿಯನ್ನು ಪುನಃ ಆರಂಭಿಸುವಂತೆ ಕೋರಿದ್ದಾರೆ. ಸಚಿವಾಲಯವು ಈಗಾಗಲೇ ಈ ಪ್ರಕ್ರಿಯೆಯನ್ನು ಆರಂಭಿಸಿದ್ದು, ಅವರ ರಾಜೀನಾಮೆ ಅಂಗೀಕಾರವಾದ ದಿನಾಂಕದಿಂದಲೇ ಪಿಂಚಣಿಯು ಅನ್ವಯವಾಗಲಿದೆ ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.

ಧನಕರ್ ಅವರಿಗೆ ಸಿಗುವ ಪಿಂಚಣಿ ಎಷ್ಟು?

ರಾಜಸ್ಥಾನದಲ್ಲಿ, ಮಾಜಿ ಶಾಸಕರಿಗೆ ಒಂದು ಅವಧಿಗೆ ತಿಂಗಳಿಗೆ 35,000 ರೂಪಾಯಿ ಪಿಂಚಣಿ ಸಿಗುತ್ತದೆ. 70 ವರ್ಷಕ್ಕಿಂತ ಮೇಲ್ಪಟ್ಟವರಿಗೆ ಶೇ. 20ರಷ್ಟು ಹೆಚ್ಚುವರಿ ಪಿಂಚಣಿ ಸೌಲಭ್ಯವಿದೆ. ಈ ನಿಯಮದ ಪ್ರಕಾರ, 74 ವರ್ಷದ ಜಗದೀಪ್ ಧನಕರ್ ಅವರು, ಮಾಜಿ ಶಾಸಕರಾಗಿ ತಿಂಗಳಿಗೆ 42,000 ರೂಪಾಯಿ ಪಿಂಚಣಿ ಪಡೆಯಲು ಅರ್ಹರಾಗಿದ್ದಾರೆ.

ಮೂರು ಪಿಂಚಣಿಗಳಿಗೆ ಅರ್ಹತೆ

ವರದಿಗಳ ಪ್ರಕಾರ, ಜಗದೀಪ್ ಧನಕರ್ ಅವರು ಒಟ್ಟು ಮೂರು ಪಿಂಚಣಿಗಳಿಗೆ ಅರ್ಹರಾಗಿದ್ದಾರೆ: ಮಾಜಿ ಉಪರಾಷ್ಟ್ರಪತಿಯಾಗಿ ತಿಂಗಳಿಗೆ ಸುಮಾರು 2 ಲಕ್ಷ ರೂಪಾಯಿ ಪಿಂಚಣಿ, ಟೈಪ್-8 ಬಂಗಲೆ, ಮತ್ತು ಇತರ ಸಿಬ್ಬಂದಿ ಸೌಲಭ್ಯಗಳು ಲಭಿಸುತ್ತವೆ. ಮಾಜಿ ಸಂಸದರಾಗಿ ಒಂದು ಅವಧಿಗೆ ತಿಂಗಳಿಗೆ 45,000 ರೂಪಾಯಿ ಪಿಂಚಣಿ ಹಾಗೂ ರಾಜಸ್ಥಾನದ ಮಾಜಿ ಶಾಸಕರಾಗಿ, ತಿಂಗಳಿಗೆ 42,000 ರೂಪಾಯಿ ಪಿಂಚಣಿ ದೊರೆಯುತ್ತದೆ.

ಮಾಜಿ ರಾಜ್ಯಪಾಲರಾಗಿ ಅವರಿಗೆ ಯಾವುದೇ ಪಿಂಚಣಿ ಸೌಲಭ್ಯವಿಲ್ಲದಿದ್ದರೂ, ತಿಂಗಳಿಗೆ 25,000 ರೂಪಾಯಿ ಮರುಪಾವತಿಯೊಂದಿಗೆ ಒಬ್ಬ ಕಾರ್ಯದರ್ಶಿ ಸಿಬ್ಬಂದಿ ನೇಮಕ ಮಾಡುವ ಅವಕಾಶವಿದೆ.

ಜುಲೈ 21ರಂದು, ಜಗದೀಪ್ ಧನಕರ್ ಅವರು ತಮ್ಮ ಉಪರಾಷ್ಟ್ರಪತಿ ಹುದ್ದೆಗೆ ದಿಢೀರ್ ರಾಜೀನಾಮೆ ನೀಡಿದ್ದು, ರಾಷ್ಟ್ರ ರಾಜಕಾರಣದಲ್ಲಿ ಹಲವು ಊಹಾಪೋಹಗಳಿಗೆ ಕಾರಣವಾಗಿತ್ತು.