ದೀರ್ಘಾವಧಿಯಿಂದ ಕನಿಷ್ಠಾವಧಿ ಸಿಎಂ: 7 ದಶಕ, 23 ಮುಖ್ಯಮಂತ್ರಿಗಳು: ಯಾರ್ಯಾರ ಅವಧಿ ಎಷ್ಟು?

ರಾಜ್ಯದ ರಾಜಕೀಯ ಇತಿಹಾಸವು ಅತ್ಯಂತ ರೋಚಕ ಮತ್ತು ಏರಿಳಿತಗಳಿಂದ ಕೂಡಿದೆ. 1947ರಲ್ಲಿ ಮೈಸೂರು ರಾಜ್ಯವಾಗಿ ಆರಂಭಗೊಂಡು, 1956ರಲ್ಲಿ ಏಕೀಕೃತಗೊಂಡು, ನಂತರ 1973ರಲ್ಲಿ 'ಕರ್ನಾಟಕ' ಎಂದು ಮರುನಾಮಕರಣಗೊಂಡ ಈ ರಾಜ್ಯವನ್ನು ಈವರೆಗೆ ಸುಮಾರು 23 ಜನ ಮುಖ್ಯಮಂತ್ರಿಗಳು ಆಳಿದ್ದಾರೆ. ಅತಿ ಹೆಚ್ಚು ಕಾಲ ಆಡಳಿತ ನಡೆಸಿದ ದಾಖಲೆ ಬರೆದ ಮುಖ್ಯಮಂತ್ರಿ ಸಿದ್ದರಾಮಯ್ಯನವರಿಂದ ಹಿಡಿದು, ಅತ್ಯಂತ ಕಡಿಮೆ ಅವಧಿಗೆ ಅಧಿಕಾರದಲ್ಲಿ ಕಡಿದಾಳ್ ಮಂಜಪ್ಪ ಮತ್ತು ಬಿ.ಎಸ್. ಯಡಿಯೂರಪ್ಪ ಹೆಸರು ದಾಖಲಾಗಿದೆ.

ಮಾಜಿ ಮುಖ್ಯಮಂತ್ರಿ ದಿವಂಗತ ಡಿ.ದೇವರಾಜ ಅರಸು ಅವರ ದಾಖಲೆಯನ್ನು ಮುರಿದ ಸಿದ್ದರಾಮಯ್ಯ ಇದೀಗ ಮುಂಚೂಣಿ ಸ್ಥಾನ ಪಡೆದುಕೊಂಡಿದ್ದಾರೆ. ಮಾಜಿ ಮುಖ್ಯಮಂತ್ರಿ ಬಿ.ಎಸ್‌.ಯಡಿಯೂರಪ್ಪ ಅಧಿಕಾರಾವಧಿ ಸುಮಾರು 5 ವರ್ಷಗಳಿಗೂ ಹೆಚ್ಚು ಕಾಲವಿದ್ದರೂ, ಸ್ಥಿರತೆಯ ಕೊರತೆ ಎದ್ದು ಕಂಡಿದೆ. ಕೇವಲ ಎರಡೇ ದಿನ ಮುಖ್ಯಮಂತ್ರಿಯಾಗಿದ್ದರು ಎಂಬ ದಾಖಲೆಯೂ ಇದೆ.

2013ರಲ್ಲಿ ಪೂರ್ಣ ಬಹುಮತದೊಂದಿಗೆ ಅಧಿಕಾರಕ್ಕೆ ಬಂದ ಸಿದ್ದರಾಮಯ್ಯನವರು, ಎರಡನೇ ಅವಧಿಗೆ ಮುಖ್ಯಮಂತ್ರಿಯಾಗಿ ರಾಜ್ಯದ ಇತಿಹಾಸದಲ್ಲಿ ಅತಿ ಹೆಚ್ಚು ದಿನಗಳ ಕಾಲ ಅಧಿಕಾರ ನಡೆಸಿದ ನಾಯಕರ ಪಟ್ಟಿಯಲ್ಲಿ ಮೊದಲ ಸ್ಥಾನಕ್ಕೇರಿದ್ದಾರೆ. ಸಿದ್ದರಾಮಯ್ಯನವರಿಗಿಂತ ಮೊದಲು ಸುಮಾರು 7 ವರ್ಷ 234 ದಿನಗಳ ಕಾಲ ಆಡಳಿತ ನಡೆಸಿದವರು ದೇವರಾಜ ಅರಸು. ಇವರ ಕಾಲಘಟ್ಟವನ್ನು ಕರ್ನಾಟಕದ 'ಸುವರ್ಣ ಯುಗ' ಎನ್ನಬಹುದು. ಭೂ ಸುಧಾರಣೆ ಕಾಯ್ದೆಯ ಮೂಲಕ ಶೋಷಿತ ವರ್ಗಗಳಿಗೆ ಭೂಮಿಯ ಹಕ್ಕನ್ನು ನೀಡಿದ್ದು ಇವರ ಸಾಧನೆ. ಏಕೀಕೃತ ಕರ್ನಾಟಕದ ಮೊದಲ ಮುಖ್ಯಮಂತ್ರಿಯಾಗಿ ಎಸ್. ನಿಜಲಿಂಗಪ್ಪನವರು ಸುಮಾರು 7 ವರ್ಷ 76 ದಿನಗಳ ಕಾಲ ಅಧಿಕಾರ ನಡೆಸಿದರು. ರಾಜ್ಯದ ನೀರಾವರಿ ಯೋಜನೆಗಳು ಮತ್ತು ಕೈಗಾರಿಕಾ ಕ್ಷೇತ್ರಕ್ಕೆ ಇವರು ನೀಡಿದ ಚಾಲನೆ ಇಂದಿಗೂ ಸ್ಮರಣೀಯ. ಇವರು ಮೂರು ಬಾರಿ ಮುಖ್ಯಮಂತ್ರಿಯಾಗಿದ್ದರೂ, ರಾಜ್ಯದ ಸಮಗ್ರ ವಿಕಾಸಕ್ಕೆ ಇವರ ಸುದೀರ್ಘ ಅವಧಿ ಪೂರಕವಾಗಿತ್ತು.

ಬಿ.ಎಸ್‌.ಯಡಿಯೂರಪ್ಪ ಅವರು ಮುಖ್ಯಮಂತ್ರಿಯಾಗಿ ಐದು ವರ್ಷ ಪೂರೈಸಿದರೂ ಸತತವಾಗಿ ಆಡಳಿತ ನಡೆಸಲೇ ಇಲ್ಲ. ಒಟ್ಟು ನಾಲ್ಕು ಬಾರಿ ಮುಖ್ಯಮಂತ್ರಿಯಾದರೂ, 2018ರಲ್ಲಿ ಅವರು ಕೇವಲ 2 ದಿನಗಳ ಕಾಲ ಮುಖ್ಯಮಂತ್ರಿ ಆಗಿದ್ದು ರಾಜ್ಯದ ಇತಿಹಾಸದಲ್ಲೇ ಅತಿ ಕಡಿಮೆ ಅವಧಿಯಾಗಿದೆ. ಸಂಖ್ಯಾಬಲದ ಕೊರತೆಯಿಂದಾಗಿ ಅವರು ಬಹುಮತ ಸಾಬೀತುಪಡಿಸದೆ ರಾಜೀನಾಮೆ ನೀಡಬೇಕಾಯಿತು. ಇದಕ್ಕೂ ಮುನ್ನ 2007ರಲ್ಲಿ ಅವರು ಕೇವಲ 7 ದಿನಗಳ ಕಾಲ ಅಧಿಕಾರದಲ್ಲಿದ್ದರು.

ಮಾಜಿ ಮುಖ್ಯಮಂತ್ರಿ ಎಸ್.ಆರ್. ಕಂಠಿ ಅವರು 96 ದಿನಗಳು ಕಾಲ ಮಾತ್ರ ಆಡಳಿತ ನಡೆಸಿದರು. 1962ರಲ್ಲಿ ನಿಜಲಿಂಗಪ್ಪನವರು ವಿಧಾನಸಭೆಗೆ ಆಯ್ಕೆಯಾಗಿ ಬರುವವರೆಗೂ ಕೇವಲ ಮೂರು ತಿಂಗಳ ಕಾಲ ಕಂಠಿಯವರು ಮುಖ್ಯಮಂತ್ರಿಯಾಗಿದ್ದರು. ಇದೊಂದು ತಾತ್ಕಾಲಿಕ ವ್ಯವಸ್ಥೆಯಾಗಿತ್ತು.

ಹಳೆಯ ಮೈಸೂರು ರಾಜ್ಯದ ಇತಿಹಾಸದಲ್ಲಿ ಕಡಿದಾಳ್ ಮಂಜಪ್ಪನವರು ಕೇವಲ 73 ದಿನಗಳ ಕಾಲ ಮುಖ್ಯಮಂತ್ರಿಯಾಗಿದ್ದರು. ಕೆಂಗಲ್ ಹನುಮಂತಯ್ಯನವರ ರಾಜೀನಾಮೆಯ ನಂತರ ಮತ್ತು ರಾಜ್ಯಗಳ ಪುನರ್ವಿಂಗಡಣೆಯ ಸಂಕ್ರಮಣ ಕಾಲದಲ್ಲಿ ಇವರು ಅಧಿಕಾರ ವಹಿಸಿಕೊಂಡಿದ್ದರು. ಇವರ ಅವಧಿ ಕಡಿಮೆಯಾದರೂ, ಇವರು ರಾಜ್ಯದ ಪ್ರಾಮಾಣಿಕ ರಾಜಕಾರಣಿಗಳಲ್ಲಿ ಒಬ್ಬರೆಂದು ಹೆಸರಾಗಿದ್ದಾರೆ.

ರಾಜ್ಯ ರಾಜಕೀಯದ ಸ್ಥಿರತೆ

ಕರ್ನಾಟಕದ ಇತಿಹಾಸವನ್ನು ಗಮನಿಸಿದರೆ, 1980ರ ನಂತರ ರಾಜಕೀಯ ಸ್ಥಿರತೆ ಬಹಳಷ್ಟು ಕಡಿಮೆಯಾಗಿತ್ತು. ಮಾಜಿ ಮುಖ್ಯಮಂತ್ರಿಗಳಾದ ರಾಮಕೃಷ್ಣ ಹೆಗಡೆ, ಎಸ್‌. ಬಂಗಾರಪ್ಪ, ವೀರಪ್ಪ ಮೊಯ್ಲಿ ಮುಂತಾದವರು ಪೂರ್ಣ ಅವಧಿ ಪೂರೈಸಲು ಹರಸಾಹಸ ಪಡಬೇಕಾಯಿತು. 2004 ರಿಂದ 2013 ರವರೆಗಿನ ಅವಧಿಯು ಸಮ್ಮಿಶ್ರ ಸರ್ಕಾರಗಳ ಪ್ರಯೋಗಕ್ಕೆ ಸಾಕ್ಷಿಯಾಯಿತು. ಧರ್ಮಸಿಂಗ್, ಕುಮಾರಸ್ವಾಮಿ, ಯಡಿಯೂರಪ್ಪ, ಸದಾನಂದ ಗೌಡ ಮತ್ತು ಜಗದೀಶ್ ಶೆಟ್ಟರ್ ಅವರ ಅವಧಿಗಳು ಈ ರಾಜಕೀಯ ಅಸ್ಥಿರತೆಯ ಭಾಗವಾಗಿದ್ದವು. ಇದು ಅಭಿವೃದ್ಧಿಯ ಮೇಲೆ ಪರಿಣಾಮ ಬೀರಿದರೂ, ಪ್ರಾದೇಶಿಕ ಪಕ್ಷಗಳ ಪ್ರಾಬಲ್ಯಕ್ಕೆ ನಾಂದಿ ಹಾಡಿತು.

ಅತಿ ಹೆಚ್ಚು ಬಾರಿ ಮುಖ್ಯಮಂತ್ರಿಗಳಾದವರು

ಬಿ.ಎಸ್. ಯಡಿಯೂರಪ್ಪ ನಾಲ್ಕು ಬಾರಿ ಮುಖ್ಯಮಂತ್ರಿಯಾದ ಏಕೈಕ ನಾಯಕರಾಗಿದ್ದಾರೆ. ಯಡಿಯೂರಪ್ಪನವರು ನಾಲ್ಕು ಬಾರಿ ಮುಖ್ಯಮಂತ್ರಿಯಾಗಿ ಪ್ರಮಾಣ ವಚನ ಸ್ವೀಕರಿಸುವ ಮೂಲಕ ಹೊಸ ದಾಖಲೆ ಬರೆದಿದ್ದಾರೆ.

ಮೊದಲ ಬಾರಿ (2007) ಕೇವಲ 7 ದಿನಗಳು ಮಾತ್ರ ಮುಖ್ಯಮಂತ್ರಿಯಾಗಿದ್ದರು. ಜೆಡಿಎಸ್ ಬೆಂಬಲ ಹಿಂತೆಗೆದುಕೊಂಡಿದ್ದರಿಂದ ಅಧಿಕಾರ ಕಳೆದುಕೊಂಡರು. ಎರಡನೇ ಬಾರಿ (2008-2011) ಸುಮಾರು 3 ವರ್ಷ 2 ತಿಂಗಳು ಕಾಲ ಇದ್ದರು. ಇದು ಅವರ ಸುದೀರ್ಘ ಅವಧಿಯಾಗಿದೆ. ಮೂರನೇ ಬಾರಿ (2018) ಕೇವಲ 2 ದಿನಗಳು ಮಾತ್ರ ಮುಖ್ಯಮಂತ್ರಿ ಸ್ಥಾನದಲ್ಲಿದ್ದರು. ಬಹುಮತ ಸಾಬೀತುಪಡಿಸಲು ಸಾಧ್ಯವಾಗದೆ ರಾಜೀನಾಮೆ ನೀಡಿದರು. ನಾಲ್ಕನೇ ಬಾರಿ (2019-2021) ಸುಮಾರು 2 ವರ್ಷ ಕಾಲ ಅಧಿಕಾರದಲ್ಲಿದ್ದರು. ಯಡಿಯೂರಪ್ಪನವರು ಅತಿ ಹೆಚ್ಚು ಬಾರಿ ಮುಖ್ಯಮಂತ್ರಿಯಾದರೂ, ಒಮ್ಮೆಯೂ ಪೂರ್ಣ 5 ವರ್ಷಗಳ ಅವಧಿಯನ್ನು ಸತತವಾಗಿ ಪೂರೈಸಲು ಅವರಿಗೆ ಸಾಧ್ಯವಾಗಲಿಲ್ಲ ಎಂಬುದು ವಿಶೇಷ.

ಎಸ್. ನಿಜಲಿಂಗಪ್ಪ ಅವರು ಏಕೀಕೃತ ಕರ್ನಾಟಕದ ಮೊದಲ ಮುಖ್ಯಮಂತ್ರಿಯಾಗಿದ್ದು, ಮೂರು ಬಾರಿ ಅಧಿಕಾರ ವಹಿಸಿಕೊಂಡಿದ್ದರು. ಮೊದಲ ಬಾರಿ (1956-1958) ಹೊಸದಾಗಿ ಅಸ್ತಿತ್ವಕ್ಕೆ ಬಂದ ಕರ್ನಾಟಕದ ಸಾರಥ್ಯ ವಹಿಸಿದ್ದರು. ಎರಡನೇ ಬಾರಿ (1962-1967) ಪೂರ್ಣ ಅವಧಿಯ ಹತ್ತಿರದ ಆಡಳಿತ ನಡೆಸಿದ್ದರು. ಮೂರನೇ ಬಾರಿ (1967-1968) ಕೇಂದ್ರ ರಾಜಕಾರಣಕ್ಕೆ ಹೋಗುವ ಮುನ್ನ ನಡೆಸಿದ ಅಲ್ಪಾವಧಿ ಆಡಳಿತಯಾಗಿದೆ. ನಿಜಲಿಂಗಪ್ಪನವರು ರಾಜ್ಯದ ಮೂಲಸೌಕರ್ಯ ಮತ್ತು ನೀರಾವರಿಗೆ ಭದ್ರ ಬುನಾದಿ ಹಾಕಿದವರು. ಇವರ ಕಾಲಘಟ್ಟದಲ್ಲಿ ರಾಜಕೀಯ ಸ್ಥಿರತೆ ಹೆಚ್ಚಿತ್ತು.

ಕರ್ನಾಟಕದ ಮೊದಲ ಕಾಂಗ್ರೆಸ್ಸೇತರ ಮುಖ್ಯಮಂತ್ರಿಯಾಗಿ ರಾಮಕೃಷ್ಣ ಹೆಗಡೆಯವರು ಮೂರು ಬಾರಿ ಅಧಿಕಾರ ಹಿಡಿದರು. ಮೊದಲ ಬಾರಿ (1983-1985) ಹೊರಗಿನಿಂದ ಬೆಂಬಲ ಪಡೆದ ಸರ್ಕಾರ ನಡೆಸಿದರು. ಎರಡನೇ ಬಾರಿ (1985-1986) ರಾಜೀನಾಮೆ ನೀಡಿ ಮತ್ತೆ ಚುನಾವಣೆ ಎದುರಿಸಿ ಬಹುಮತದೊಂದಿಗೆ ಗೆದ್ದ ಅವಧಿಯಾಗಿದೆ. ಮೂರನೇ ಬಾರಿ (1986-1988) ಮೌಲ್ಯಾಧಾರಿತ ರಾಜಕಾರಣದ ಹಿನ್ನೆಲೆಯಲ್ಲಿ ರಾಜೀನಾಮೆ ನೀಡುವವರೆಗೆ ಆಡಳಿತ ನಡೆಸಿದರು.

ಪೂರ್ಣ 5 ವರ್ಷ ಪೂರೈಸಿದ ಮುಖ್ಯಮಂತ್ರಿಗಳು

ಕಳೆದ 7 ದಶಕಗಳಲ್ಲಿ ಕೇವಲ ನಾಲ್ವರು ನಾಯಕರು ಮಾತ್ರ ಈ ಮೈಲಿಗಲ್ಲನ್ನು ಸಾಧಿಸಿದ್ದಾರೆ. ಎಸ್. ನಿಜಲಿಂಗಪ್ಪ ಅವರು ಜೂ. 21, 1962 ರಿಂದ ಮೇ 28, 1968 ರವರೆಗೆ ಒಂದು ಪೂರ್ಣ ಅವಧಿ ಸೇರಿದಂತೆ ಸತತ ಆಡಳಿತ ನಡೆಸಿದ್ದರು. ಏಕೀಕೃತ ಕರ್ನಾಟಕದ ನಿರ್ಮಾಣದ ನಂತರ ರಾಜ್ಯಕ್ಕೆ ಒಂದು ಸ್ಥಿರವಾದ ಆಡಳಿತ ನೀಡಿದವರು ನಿಜಲಿಂಗಪ್ಪನವರು. ಇವರ ಕಾಲದಲ್ಲಿ ಕಾಂಗ್ರೆಸ್ ಪಕ್ಷವು ಅತ್ಯಂತ ಬಲವಾಗಿತ್ತು. ನೀರಾವರಿ ಮತ್ತು ಕೈಗಾರಿಕೀಕರಣಕ್ಕೆ ಇವರು ನೀಡಿದ ಒತ್ತು ರಾಜ್ಯದ ಭವಿಷ್ಯಕ್ಕೆ ಅಡಿಪಾಯ ಹಾಕಿತು. ಪೂರ್ಣ ಅವಧಿ ಪೂರೈಸಿದ ಮೊದಲ ಮುಖ್ಯಮಂತ್ರಿ ಇವರೇ ಆಗಿದ್ದಾರೆ. ಡಿ. ದೇವರಾಜ ಅರಸು ಅವರು ಮಾ. 20, 1972 ರಿಂದ ಡಿ. 31, 1977 ರವರೆಗೆ ಆಡಳಿತ ನಡೆಸಿದ್ದರು. ಕರ್ನಾಟಕದ ರಾಜಕೀಯ ಇತಿಹಾಸದಲ್ಲಿ ಅತ್ಯಂತ ಪ್ರಭಾವಶಾಲಿ ಮುಖ್ಯಮಂತ್ರಿ ಎಂದರೆ ಅರಸು ಅವರಾಗಿದ್ದಾರೆ. ಕೇವಲ 5 ವರ್ಷ ಪೂರೈಸಿದ್ದಷ್ಟೇ ಅಲ್ಲ, ತುರ್ತುಪರಿಸ್ಥಿತಿಯ ಕಾರಣದಿಂದ ಇವರ ಅಧಿಕಾರಾವಧಿ ಸುಮಾರು 5 ವರ್ಷ 9 ತಿಂಗಳವರೆಗೆ ವಿಸ್ತರಣೆಯಾಗಿತ್ತು. ಹಿಂದುಳಿದ ವರ್ಗಗಳ ಸಬಲೀಕರಣ ಮತ್ತು ಭೂ ಸುಧಾರಣೆಯ ಮೂಲಕ ಇವರು ಜನಸಾಮಾನ್ಯರ ಮನಗೆದ್ದಿದ್ದರಿಂದ ಇವರಿಗೆ ಪೂರ್ಣ ಅವಧಿ ಪೂರೈಸಲು ಸಾಧ್ಯವಾಯಿತು.

ಎಸ್. ಎಂ. ಕೃಷ್ಣ ಅವರು ಅ. 11, 1999 ರಿಂದ ಮೇ 28, 2004 ರವರೆಗೆ ಮುಖ್ಯಮಂತ್ರಿಯಾಗಿ ಆಡಳಿತ ನಡೆಸಿದ್ದರು. ಅರಸು ಅವರ ನಂತರ ಸುಮಾರು 22 ವರ್ಷಗಳ ಕಾಲ ಯಾರೊಬ್ಬರೂ ಕರ್ನಾಟಕದಲ್ಲಿ 5 ವರ್ಷ ಪೂರೈಸಲು ಸಾಧ್ಯವಾಗಿರಲಿಲ್ಲ. ಆ 'ಶಾಪ'ವನ್ನು ಮುರಿದವರು ಎಸ್.ಎಂ. ಕೃಷ್ಣ. ಬೆಂಗಳೂರನ್ನು ಜಾಗತಿಕ ಭೂಪಟದಲ್ಲಿ ಗುರುತಿಸುವಂತೆ ಮಾಡಿದ ಇವರು, ಆಡಳಿತದಲ್ಲಿ ಆಧುನಿಕತೆಯನ್ನು ತಂದರು. ಇವರು ತಮ್ಮ ಅವಧಿಯನ್ನು ಯಶಸ್ವಿಯಾಗಿ ಪೂರೈಸಿ, ನಿಗದಿತ ಸಮಯಕ್ಕಿಂತ ಕೆಲವು ತಿಂಗಳು ಮುಂಚಿತವಾಗಿಯೇ ಚುನಾವಣೆಗೆ ಹೋದರು.

ಸಿದ್ದರಾಮಯ್ಯ ಅವರು ಮೇ 13, 2013 ರಿಂದ ಮೇ 17, 2018 ರವರೆಗೆ ಮತ್ತು 2023ರಿಂದ ಮುಖ್ಯಮಂತ್ರಿಯಾಗಿ ಮುಂದುವರಿದಿದ್ದಾರೆ. ಎಸ್.ಎಂ. ಕೃಷ್ಣ ಅವರ ನಂತರ ಮತ್ತೆ 9 ವರ್ಷಗಳ ಕಾಲ ಅಸ್ಥಿರತೆ ಇತ್ತು. ಎಚ್‌.ಡಿ.ದೇವೇಗೌಡ, ಧರ್ಮಸಿಂಗ್, ಎಚ್‌.ಡಿ.ಕುಮಾರಸ್ವಾಮಿ, ಯಡಿಯೂರಪ್ಪ, ಸದಾನಂದ ಗೌಡ, ಜಗದೀಶ್‌ ಶೆಟ್ಟರ್ ಅವಧಿಗಳು ಅಸ್ಥಿರತೆಯಿಂದ ಕೂಡಿದ್ದವು. 2013ರಲ್ಲಿ ಅಧಿಕಾರಕ್ಕೆ ಬಂದ ಸಿದ್ದರಾಮಯ್ಯನವರು 40 ವರ್ಷಗಳ ನಂತರ ಸುದೀರ್ಘ ಅವಧಿ ಮುಖ್ಯಮಂತ್ರಿಯಾಗಿದ್ದಾರೆ. 'ಭಾಗ್ಯ' ಯೋಜನೆಗಳ ಮೂಲಕ ಜನಪ್ರಿಯತೆ ಗಳಿಸಿದ್ದಾರೆ.

ರಾಜ್ಯದ ರಾಜಕೀಯ ಇತಿಹಾಸವು ಸ್ಥಿರತೆ ಮತ್ತು ಅಸ್ಥಿರತೆಯ ನಡುವಿನ ಹೋರಾಟವಾಗಿದೆ. ಸಿದ್ದರಾಮಯ್ಯನವರು ಸುದೀರ್ಘ ಅವಧಿಯ ಮುಖ್ಯಮಂತ್ರಿಯಾಗಿ ಹೊರಹೊಮ್ಮಿರುವುದು ಅವರ ರಾಜಕೀಯ ಚಾಣಾಕ್ಷತೆಯನ್ನು ತೋರಿಸುತ್ತದೆ. ಆದರೆ, ಕಡಿದಾಳ್ ಮಂಜಪ್ಪನವರಂತಹ ನಾಯಕರ ಅಲ್ಪಾವಧಿಯು ಅಂದಿನ ಸನ್ನಿವೇಶದ ಅನಿವಾರ್ಯತೆಯಾಗಿತ್ತು. ಸಿದ್ದರಾಮಯ್ಯನವರು ಸುದೀರ್ಘ ಕಾಲದ ಮುಖ್ಯಮಂತ್ರಿಯಾಗಿ ದಾಖಲೆ ಬರೆದಿರುವುದು ಅವರ ರಾಜಕೀಯ ಚಾಣಾಕ್ಷತನ ಮತ್ತು ಬದಲಾದ ಕಾಲಘಟ್ಟದ ರಾಜಕೀಯ ಸ್ಥಿರತೆಯನ್ನು ಸೂಚಿಸುತ್ತದೆ. ಕಡಿದಾಳ್ ಮಂಜಪ್ಪ ಅಥವಾ ಯಡಿಯೂರಪ್ಪನವರ ಅಲ್ಪಾವಧಿಗಳು ಅಂದಿನ ರಾಜಕೀಯ ಬಿಕ್ಕಟ್ಟು ಮತ್ತು ಸನ್ನಿವೇಶದ ಫಲಿತಾಂಶಗಳಾಗಿದ್ದವು. ಒಟ್ಟಾರೆಯಾಗಿ, ಕರ್ನಾಟಕವು ದೀರ್ಘಾವಧಿಯ ದೂರದೃಷ್ಟಿಯ ನಾಯಕರನ್ನು ಮತ್ತು ಸಂಕಷ್ಟ ಕಾಲದ ತಾತ್ಕಾಲಿಕ ಸಾರಥಿಗಳನ್ನೂ ಕಂಡಿದೆ.