'ಸಾರಾಭಾಯ್ vs ಸಾರಾಭಾಯ್' ಖ್ಯಾತಿಯ ಹಿರಿಯ ನಟ ಸತೀಶ್ ಶಾ ಇನ್ನಿಲ್ಲ

ಬಾಲಿವುಡ್‌ನ ಹಿರಿಯ ಸತೀಶ್ ಶಾ (74) ಅವರು ಶನಿವಾರ  ಮಧ್ಯಾಹ್ನ 2.30 ರ ಸುಮಾರಿಗೆ ಮುಂಬೈನ ಹಿಂದೂಜಾ ಆಸ್ಪತ್ರೆಯಲ್ಲಿ ನಿಧನರಾಗಿದ್ದಾರೆ. ಮೂತ್ರಪಿಂಡ ಸಂಬಂಧಿತ ತೊಂದರೆಗಳಿಂದ ಅವರು ದೀರ್ಘಕಾಲದಿಂದ ಬಳಲುತ್ತಿದ್ದರು ಮತ್ತು ಇತ್ತೀಚೆಗೆ ಕಸಿ ಶಸ್ತ್ರಚಿಕಿತ್ಸೆಗೆ ಒಳಗಾಗಿದ್ದರು ಎಂದು ತಿಳಿದುಬಂದಿದೆ.

ಅವರ ನಿಧನದ ಸುದ್ದಿಯನ್ನು ಸತೀಶ್ ಶಾ ಅವರ ಮ್ಯಾನೇಜರ್ ಅವರು ಖಚಿತಪಡಿಸಿದ್ದು, ಮೃತದೇಹವನ್ನು ಸದ್ಯ ಆಸ್ಪತ್ರೆಯಲ್ಲಿ ಇರಿಸಲಾಗಿದೆ. ಭಾನುವಾರ ಅಂತ್ಯಕ್ರಿಯೆ ನಡೆಯಲಿದೆ ಎಂದು ಮ್ಯಾನೇಜರ್ ಮಾಹಿತಿ ನೀಡಿದ್ದಾರೆ.

ನಾಲ್ಕು ದಶಕಗಳ ಕಾಲದ ಅದ್ಭುತ ಪಯಣ

ನಾಲ್ಕು ದಶಕಗಳಿಗೂ ಹೆಚ್ಚು ಕಾಲ ಚಿತ್ರರಂಗದಲ್ಲಿ ಸಕ್ರಿಯರಾಗಿದ್ದ ಸತೀಶ್ ಶಾ ಅವರು ಚಲನಚಿತ್ರ ಮತ್ತು ದೂರದರ್ಶನ ಎರಡರಲ್ಲೂ ತಮ್ಮ ಸ್ಮರಣೀಯ ಪಾತ್ರಗಳ ಮೂಲಕ ಭಾರತೀಯ ಮನರಂಜನಾ ಲೋಕದಲ್ಲಿ ಅಳಿಸಲಾಗದ ಛಾಪು ಮೂಡಿಸಿದ್ದಾರೆ.1983 ರ ವಿಡಂಬನಾತ್ಮಕ ಚಿತ್ರ 'ಜಾನೆ ಭಿ ದೋ ಯಾರೋ' ದಲ್ಲಿನ ಅವರ ಪಾತ್ರಗಳು ಅವರಿಗೆ ಒಂದು 'ಕಲ್ಟ್‌' ಸ್ಥಾನಮಾನವನ್ನು ತಂದುಕೊಟ್ಟಿತ್ತು.

ಟಿವಿ ಲೋಕದ ಇಂದ್ರವದನ್‌ 

ದೂರದರ್ಶನದಲ್ಲಿ, 'ಸಾರಾಭಾಯ್ vs ಸಾರಾಭಾಯ್' ಧಾರವಾಹಿಯಲ್ಲಿ ಅವರು ನಿರ್ವಹಿಸಿದ ಇಂದ್ರವದನ್ ಸಾರಾಭಾಯ್ ಪಾತ್ರವು ಭಾರತೀಯ ಟಿವಿ ಇತಿಹಾಸದಲ್ಲಿ ಅತ್ಯಂತ ಜನಪ್ರಿಯ ಮತ್ತು ಹಾಸ್ಯಮಯ ಪಾತ್ರಗಳಲ್ಲಿ ಒಂದಾಗಿ ಉಳಿದಿದೆ. 1984 ರ ಜನಪ್ರಿಯ ಧಾರಾವಾಹಿ 'ಯೇ ಜೋ ಹೈ ಜಿಂದಗಿ' ಯಲ್ಲಿನ ಅವರ ಅಭಿನಯವೂ ಮರೆಯುವಂತಿಲ್ಲ.

ಅವರು 'ಹಮ್ ಸಾಥ್-ಸಾಥ್ ಹೈ', 'ಮೈ ಹೂ ನಾ', 'ಕಲ್ ಹೋ ನಾ ಹೋ', 'ದಿಲ್ವಾಲೆ ದುಲ್ಹನಿಯಾ ಲೇ ಜಾಯೇಂಗೆ', 'ಕಭಿ ಹಾ ಕಭಿ ನಾ' ಮತ್ತು 'ಓಂ ಶಾಂತಿ ಓಂ' ನಂತಹ ಹಲವಾರು ಸೂಪರ್‌ಹಿಟ್ ಚಿತ್ರಗಳಲ್ಲಿ ನಟಿಸಿದ್ದಾರೆ. ಎಲ್ಲಾ ಪ್ರಕಾರದ ಪಾತ್ರಗಳಿಗೆ ಜೀವ ತುಂಬುವ ಅವರ ಸಾಮರ್ಥ್ಯವು ಅಪಾರವಾಗಿತ್ತು.

ಹಾಸ್ಯ ಮತ್ತು ಭಾವನಾತ್ಮಕ ಪಾತ್ರಗಳಲ್ಲಿ ಸಲೀಸಾಗಿ ಅಭಿನಯಿಸುತ್ತಿದ್ದ ಸತೀಶ್ ಶಾ ಅವರ ನಿಧನವು ಭಾರತೀಯ ಮನರಂಜನಾ ಜಗತ್ತಿನಲ್ಲಿ ಒಂದು ಯುಗದ ಅಂತ್ಯವನ್ನು ಸೂಚಿಸುತ್ತದೆ. ಚಲನಚಿತ್ರೋದ್ಯಮದ ಗಣ್ಯರು ಮತ್ತು ಅಭಿಮಾನಿಗಳು ಅವರ ನಿಧನಕ್ಕೆ ಸಂತಾಪ ವ್ಯಕ್ತಪಡಿಸಿದ್ದಾರೆ.