ಮುಂಗಾರು ಅಧಿವೇಶನ: ಸರ್ಕಾರವನ್ನು ಹಣಿಯಲು ಪ್ರತಿಪಕ್ಷಗಳಿಂದ ಸಿದ್ಧತೆ

18 ನೇ ಲೋಕಸಭೆಯ ಉದ್ಘಾಟನಾ ಅಧಿವೇಶನವು ಖಜಾನೆ ಮತ್ತು ಪ್ರತಿಪಕ್ಷಗಳ ನಡುವೆ ತೀವ್ರ ವಾಗ್ವಾದಕ್ಕೆ ಸಿಲುಕಿತು. ಸೋಮವಾರ (ಜುಲೈ 22) ಆರಂಭವಾದ ಸಂಸತ್ತಿನ ಬಜೆಟ್ ಅಧಿವೇಶನದ ಮೊದಲನೇ ದಿನ ಎರಡೂ ಸದನಗಳಲ್ಲಿ ಕಲಾಪಗಳು ಸುಗಮವಾಗಿ ನಡೆದಿವೆ. ಆದರೆ, ಮಂಗಳವಾರ ಲೋಕಸಭೆಯಲ್ಲಿ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರು ಬಜೆಟ್ ಮಂಡನೆ ಮಾಡಿದ ಬಳಿಕ ಕದನವಿರಾಮ ಉಳಿಯುವುದಿಲ್ಲ ಎಂಬ ಸ್ಪಷ್ಟ ಲಕ್ಷಣಗಳಿವೆ.

ಪ್ರಧಾನಿ ನರೇಂದ್ರ ಮೋದಿಯವರ ಒಂದು ಹೇಳಿಕೆ ಸೇರಿದಂತೆ ಆಡಳಿತ ಪಕ್ಷದ ʻಮೂರು ಹೇಳಿಕೆಗಳುʼ ಮತ್ತೊಂದು ಕೋಲಾಹಲದ ಅಧಿವೇಶನಕ್ಕೆ ವೇದಿಕೆಯನ್ನು ಸಿದ್ಧಪಡಿಸಿದೆ ಎಂದು ಇಂಡಿಯಾ ಒಕ್ಕೂಟದ ಮೂಲಗಳು ದ ಫೆಡರಲ್‌ಗೆ ತಿಳಿಸಿವೆ.

ಪ್ರತಿಪಕ್ಷಗಳ ವಿರುದ್ಧ ಪ್ರಧಾನಿ ವಾಗ್ದಾಳಿ: ಅಧಿವೇಶನಕ್ಕೆ ಮೊದಲು ಮಾಧ್ಯಮಗಳೊಡನೆ ಮಾತನಾಡಿದ್ದ ಪ್ರಧಾನಿ, ಈ ಹಿಂದೆ ಅವರು ಸೇರಿದಂತೆ ಹಲವು ಪ್ರಧಾನಿಗಳು ಪ್ರತಿಪಕ್ಷಗಳಿಗೆ ತೋರಿಸಿದ್ದ ಸೌಜನ್ಯವನ್ನು ತೋರಿಸಲು ನಿರಾಕರಿಸಿದರು.ರಾಜಿ ಸಂಧಾನದ ಬದಲು, ಜೂನ್ 24 ರಿಂದ ಜುಲೈ 3 ರವರೆಗೆ ನಡೆದ ಅಧಿವೇಶನದಲ್ಲಿ ʻಸರ್ಕಾರದ ಧ್ವನಿಯನ್ನು ಹತ್ತಿಕ್ಕಲುʼ ಪ್ರಯತ್ನಿಸಿದ್ದಕ್ಕಾಗಿ ಪ್ರತಿಪಕ್ಷಗಳನ್ನು ತರಾಟೆಗೆ ತೆಗೆದುಕೊಂಡರು.

ಅವರು ರಾಷ್ಟ್ರಪತಿಗಳ ಭಾಷಣದ ಮೇಲಿನ ಧನ್ಯವಾದ ನಿರ್ಣಯಕ್ಕೆ ಎರಡು ಗಂಟೆಗೂ ಹೆಚ್ಚು ಕಾಲ ಉತ್ತರ ನೀಡಿದ ಸಂದರ್ಭದಲ್ಲಿ ವಿರೋಧ ಪಕ್ಷದ ಸದಸ್ಯರು ನಿರಂತರ ಘೋಷಣೆ ಮೊಳಗಿಸಿದರು. ʻಎರಡೂವರೆ ಗಂಟೆ ಕಾಲ ತಮ್ಮ ಧ್ವನಿಯನ್ನು ಹತ್ತಿಕ್ಕುವ ಪ್ರಯತ್ನ ಮಾಡಲಾಯಿತು.ನನಗೆ ಸಂಸತ್ತಿನಲ್ಲಿ ಮಾತನಾಡಲು ಬಿಡಲಿಲ್ಲ,ʼ ಎಂದು ದೂರಿದರು.

ಒಂದು ದಶಕದಲ್ಲಿ ಮೊದಲ ಬಾರಿಗೆ ಲೋಕಸಭೆಯಲ್ಲಿ ಬಿಜೆಪಿಯ ಸಂಖ್ಯೆ ಬಹುಮತಕ್ಕಿಂತ ಕಡಿಮೆಯಿದ್ದು, ಪ್ರತಿಪಕ್ಷಗಳು, ವಿಶೇಷವಾಗಿ ಕಾಂಗ್ರೆಸ್, ಇದಕ್ಕಾಗಿ ಮೋದಿಯವರನ್ನು ಅಪಹಾಸ್ಯ ಮಾಡುತ್ತಿದೆ ಮತ್ತು ಅವರು ʻಜನಾದೇಶವನ್ನು ಕಳೆದುಕೊಂಡಿದ್ದಾರೆʼ ಎಂದು ಹೇಳು ತ್ತಿದೆ. ತಮ್ಮ ಸರ್ಕಾರ ಸತತ ಮೂರನೇ ಅವಧಿಗೆ ಆಳ್ವಿಕೆ ನಡೆಸಲು ಜನಾಭಿಪ್ರಾಯ ಗಳಿಸಿದೆ. ಪ್ರತಿ ಪಕ್ಷಗಳು ನಕಾರಾತ್ಮಕ ರಾಜಕೀಯದೊಂದಿಗೆ ಸಂಸತ್ತಿನ ಸಮಯವನ್ನು ವ್ಯರ್ಥಮಾಡುತ್ತಿದೆʼ ಎಂದು ಪ್ರಧಾನಿ ಆರೋಪಿಸಿದ್ದಾರೆ.

ಪ್ರಧಾನ್ ರಾಜೀನಾಮೆಗೆ ಒತ್ತಾಯ: ಇಂಡಿಯ ಒಕ್ಕೂಟವು ಪ್ರಧಾನಿ ಹೇಳಿಕೆಗಳನ್ನು ʻಉದ್ದೇಶಪೂರ್ವಕ ಪ್ರಚೋದನೆʼ ಎಂದು ಹೇಳಿದೆ. ʻಸಂಸತ್ತನ್ನು ಸುಗಮವಾಗಿ ನಡೆಸುವ ಹೊಣೆಗಾರಿಕೆಯು ಆಡಳಿತ ಪಕ್ಷದ ಮೇಲಿದೆ ಎಂಬುದು ಸಂಸದೀಯ ತತ್ವ. ಯುಪಿಎ ಸರ್ಕಾರದ 10 ವರ್ಷಗಳ ಅವಧಿಯಲ್ಲಿ ಬಿಜೆಪಿ ನಿರಂತರವಾಗಿ ಸದನದ ಕಲಾಪಕ್ಕೆ ಅಡ್ಡಿಪಡಿಸಿದೆ. ಪ್ರತಿಪಕ್ಷಗಳು ಸರ್ಕಾರವನ್ನು ಹಿಡಿತದಲ್ಲಿಟ್ಟು ಕೊಳ್ಳಬೇಕು ಎಂದು ಜನರು ಬಯಸುತ್ತಾರೆ. ನಾವು ಚುನಾವಣೆಯಲ್ಲಿ ಹೋರಾಡಿದ ವಿಷಯಗಳ ಬಗ್ಗೆ ಪ್ರಸ್ತಾಪಿಸಲು, ಜನರ ಧ್ವನಿಯನ್ನು ಕೇಳುವಂತೆ ಮಾಡಲು ನಮಗೆ ಅವಕಾಶ ನೀಡದಿದ್ದರೆ, ಅಧಿವೇಶನಕ್ಕೆ ಅಡ್ಡಿಪಡಿಸುವುದು ನಮಗಿರುವ ಏಕೈಕ ವಿಧಾನ,ʼ ಎಂದು ಕಾಂಗ್ರೆಸ್ ಸಂಸದ ಮಾಣಿಕಂ ಟ್ಯಾಗೋರ್ ದ ಫೆಡರಲ್‌ಗೆ ತಿಳಿಸಿದರು.

ಲೋಕಸಭೆಯಲ್ಲಿ ಕಾಂಗ್ರೆಸ್‌ನ ಉಪ ನಾಯಕ ಗೌರವ್ ಗೊಗೋಯ್, ʻಕಳೆದ ಅಧಿವೇಶನದಲ್ಲಿ ತಾವು ಮಾತನಾಡಿದಾಗ ಪ್ರತಿಪಕ್ಷಗಳು ಪ್ರತಿಭಟಿಸಿದ್ದರ ಬಗ್ಗೆ ಪ್ರಧಾನಿ ಈಗ ಅಳುತ್ತಿದ್ದಾರೆ. ಆದರೆ, ಅವರು 10 ವರ್ಷಗಳಿಂದ ವಿದ್ಯಾರ್ಥಿಗಳು, ರೈತರು, ಮಣಿಪುರ, ಅಗ್ನಿವೀರರು, ಯುವಜನರು ಮತ್ತು ಮಹಿಳೆಯರ ಧ್ವನಿಗಳನ್ನು ಹತ್ತಿಕ್ಕಿದ್ದರ ಬಗ್ಗೆ ಏನು ಹೇಳುತ್ತಾರೆ? ಅವರು ಈ ಪ್ರಹಸನವನ್ನು ನಿಲ್ಲಿಸಿ ಸಂಸತ್ತನ್ನು ಎದುರಿಸಲು ಸಿದ್ಧರಾಗಬೇಕು; ಇಂದು ಕೂಡ ಪ್ರಶ್ನೋತ್ತರ ವೇಳೆಯಲ್ಲಿ ನೀಟ್ ವಿಷಯದ ಬಗ್ಗೆ ಚರ್ಚೆ ನಡೆದಾಗ ಅವರು ಸದನದಲ್ಲಿ ಇರಲಿಲ್ಲ,ʼ ಎಂದು ಹೇಳಿದರು.

ಮೋದಿಯವರ ನಿಲುವು ಪ್ರತಿಪಕ್ಷಗಳ ಒಗ್ಗಟ್ಟನ್ನು ಸ್ಥಿರಗೊಳಿಸಿದ್ದು, ಸಂಸತ್ತಿನ ಒಳಗೆ ಬಿಜೆಪಿ ಮಂತ್ರಿಗಳು ನೀಡಿದ ಇನ್ನೆರಡು ಹೇಳಿಕೆಗಳು ಆಕ್ರೋಶಕ್ಕೆ ಕಾರಣವಾಗಿವೆ. ನೀಟ್ ಪರೀಕ್ಷೆ ಅವ್ಯವಹಾರಕ್ಕೆ ಸರಕಾರವನ್ನು ಹೊಣೆಗಾರರನ್ನಾಗಿಸುವ ಉದ್ದೇಶವಿದೆ ಎಂದು ಸಂಸತ್ತಿನ ಅಧಿವೇಶನಕ್ಕೂ ಮುನ್ನ ಕರೆದಿದ್ದ ಸರ್ವಪಕ್ಷಗಳ ಸಭೆಯಲ್ಲೂ ಪ್ರತಿಪಕ್ಷಗಳು ಹೇಳಿದ್ದವು. ಕೇಂದ್ರ ಸರಕಾರ ಈ ಬಗ್ಗೆ ಸಂಧಾನದ ಬದಲು ಹಗೆತನಕ್ಕೆ ಮುಂದಾಗಿದೆ.

ಲೋಕಸಭೆಯ ಪ್ರಶ್ನೋತ್ತರ ಕಲಾಪ ಆರಂಭವಾದ ತಕ್ಷಣವೇ ಕೇಂದ್ರ ಶಿಕ್ಷಣ ಸಚಿವ ಧರ್ಮೇಂದ್ರ ಪ್ರಧಾನ್ ಮತ್ತು ಪ್ರತಿಪಕ್ಷಗಳ ನಡುವೆ ನೀಟ್ ವಿವಾದವು ಮಾತಿನ ಸಮರಕ್ಕೆ ಕಾರಣವಾಯಿತು. ʻಕಳೆದ ಏಳು ವರ್ಷಗಳಲ್ಲಿ 70 ಪ್ರಶ್ನೆಪತ್ರಿಕೆ ಸೋರಿಕೆ ಪ್ರಕರಣʼ ನಡೆದಿದ್ದು, ಪರೀ ಕ್ಷೆಯಲ್ಲಿ ಅಕ್ರಮಗಳನ್ನು ತಡೆಯುವಲ್ಲಿ ವಿಫಲವಾದ ಪ್ರಧಾನ್ ಅವರ ರಾಜೀನಾಮೆಗೆ ಕಾಂಗ್ರೆಸ್ ಸಂಸದ ಮಾಣಿಕಂ ಟ್ಯಾಗೋರ್ ಒತ್ತಾಯಿಸಿದರು. ಆನಂತರ, ಸಮಾಜವಾದಿ ಪಕ್ಷದ ಮುಖ್ಯಸ್ಥ ಮತ್ತು ಕನೌಜ್ ಸಂಸದ ಅಖಿಲೇಶ್ ಯಾದವ್ ಕೂಡ ಪ್ರಧಾನ್ ಅವರು ಶಿಕ್ಷಣ ಸಚಿವರಾಗಿ ಇರುವವರೆಗೆ ನೀಟ್ ಬಗ್ಗೆ ನ್ಯಾಯಯುತ ತನಿಖೆ ನಡೆಯುವುದಿಲ್ಲ ಎಂದು ಹೇಳಿದರು.

ನೀಟ್ ಅಥವಾ ಇನ್ನಾವುದೇ ಪರೀಕ್ಷೆಯ ಪ್ರಶ್ನೆಪತ್ರಿಕೆಗಳು ಸೋರಿಕೆಯಾಗಿವೆ ಎಂದು ಸಾಬೀತುಪಡಿಸಲು ʻಯಾವುದೇ ಪುರಾವೆಗಳಿಲ್ಲʼ ಎಂದು ಪ್ರಧಾನ್ ಪ್ರತಿಕ್ರಿಯಿಸಿದರು.ʻತಾವು ಪ್ರಧಾನಿ ನರೇಂದ್ರ ಮೋದಿ ಅವರ ಕರುಣೆಯಿಂದ ಸಚಿವನಾಗಿದ್ದೇನೆ,ʼ ಎಂದು ಪ್ರತಿಕ್ರಿಯಿಸಿದರು.

ಎಲ್ಲರನ್ನೂ ದೂರುತ್ತಿರುವ ಪ್ರಧಾನ್: ರಾಹುಲ್-‌ ನೀಟ್‌ ಪ್ರಶ್ನೆಪತ್ರಿಕೆಗಳು ಸೋರಿಕೆಯಾಗಿವೆ ಎಂಬುದನ್ನು ಪ್ರಧಾನ್‌ ನಿರಾಕರಿಸಿದ್ದರಿಂದ, ಮಧ್ಯಪ್ರವೇಶಿಸಿದ ಪ್ರತಿಪಕ್ಷದ ನಾಯಕ ರಾಹುಲ್ ಗಾಂಧಿ, ʻಪ್ರಧಾನ್ ತಮ್ಮನ್ನು ಹೊರತುಪಡಿಸಿ ಉಳಿದ ಎಲ್ಲರನ್ನೂ ದೂಷಿಸುತ್ತಿದ್ದಾರೆ. ಅವರಿಗೆ ಏನು ನಡೆಯುತ್ತಿದೆ ಎಂದು ಅರ್ಥವಾಗುತ್ತಿಲ್ಲ ಎಂದು ಭಾವಿಸುತ್ತೇನೆ. ದೇಶದ ಪರೀಕ್ಷಾ ಪದ್ಧತಿಯೇ ಮೋಸ; ಶ್ರೀಮಂತರು ಪರೀಕ್ಷಾ ವ್ಯವಸ್ಥೆಯನ್ನೇ ಕೊಳ್ಳಬಹುದು ಎಂದು ಮನಗಂಡಿರುವ ಲಕ್ಷಾಂತರ ವಿದ್ಯಾರ್ಥಿಗಳು ಇದ್ದಾರೆ. ವಿರೋಧ ಪಕ್ಷದವರಾದ ನಮಗೂ ಇದೇ ಭಾವನೆ ಇದೆ,ʼ ಎಂದರು. 

ಪರೀಕ್ಷೆ ವ್ಯವಸ್ಥೆ ಬಗ್ಗೆ ಪ್ರಶ್ನೆಗಳನ್ನು ಎತ್ತಿದ್ದಕ್ಕಾಗಿ ರಾಹುಲ್ ಮತ್ತು ಇತರ ವಿರೋಧ ಪಕ್ಷದ ನಾಯಕರನ್ನು ಖಂಡಿಸಿದ ಲೋಕಸಭೆ ಸ್ಪೀಕರ್ ಓಂ ಬಿರ್ಲಾ ಅವರು ಪ್ರಧಾನ್ ನೆರವಿಗೆ ಧಾವಿಸಿದರು. ಯುಪಿಎ ಸರ್ಕಾರವು ʻಖಾಸಗಿ ಕಾಲೇಜುಗಳ ಲಾಬಿಯ ಒತ್ತಡದಿಂದ 2010 ರಲ್ಲಿ ಶಿಕ್ಷಣ ಸುಧಾರಣಾ ಮಸೂದೆಗಳನ್ನು ಹಿಂಪಡೆದಿದೆ,ʼ ಎಂದು ಪ್ರಧಾನ್‌ ಆರೋಪಿಸಿದರು. 

ನೀಟ್‌ ಕುರಿತು ಉಭಯ ಸದನಗಳಲ್ಲಿ ವಿವರವಾದ ಚರ್ಚೆಗೆ ಸರ್ಕಾರ ಒಪ್ಪುವವರೆಗೂ, ವಿರೋಧವನ್ನು ಮುಂದುವರಿಸಲು ಪ್ರತಿಪಕ್ಷಗಳು ನಿರ್ಧರಿಸಿವೆ. ಪ್ರಧಾನ್ ಅವರ ರಾಜೀನಾಮೆ ಬೇಡಿಕೆಯನ್ನು ತೀವ್ರಗೊಳಿಸಲು ಇಂಡಿಯಾ ಬ್ಲಾಕ್ ನಾಯಕರಲ್ಲಿ ಒಮ್ಮತವಿದೆ ಎಂದು ಮೂಲಗಳು ತಿಳಿಸಿವೆ. 

ಸೋಮವಾರ ಸಂಜೆ ನಡೆದ ಸಭೆಯಲ್ಲಿ ಕಾಂಗ್ರೆಸ್ ಸಂಸದೀಯ ಪಕ್ಷದ ಅಧ್ಯಕ್ಷೆ ಸೋನಿಯಾ ಗಾಂಧಿ ಅವರು, ವಿವಾದಾತ್ಮಕ ಅಗ್ನಿವೀರ್ ಯೋಜನೆ, ನೀಟ್, ನಿರುದ್ಯೋಗ, ಬೆಲೆ ಏರಿಕೆ, ಬಿಹಾರ ಮತ್ತು ಆಂಧ್ರಪ್ರದೇಶಕ್ಕೆ ವಿಶೇಷ ಸ್ಥಾನಮಾನ ಕುರಿತು ಧ್ವನಿ ಎತ್ತಬೇಕು ಎಂದು ಹೇಳಿದರು. 

ʻಸಿಪಿಪಿ ಸಭೆಯಲ್ಲಿ ಸೋನಿಯಾ ಅವರು ಪಕ್ಷದ ಎಲ್ಲಾ ಸಂಸದರಿಗೆ ಇದೇ ಸಂದೇಶ ನೀಡಿದ್ದಾರೆ,ʼ ಎಂದು ಕಾಂಗ್ರೆಸ್‌ನ ರಾಜ್ಯಸಭೆ ಸದಸ್ಯ ಪ್ರಮೋದ್ ತಿವಾರಿ ದ ಫೆಡರಲ್‌ಗೆ ತಿಳಿಸಿದರು.

ಬಜೆಟ್ ಭಾಷಣಕ್ಕೆ ಅಡ್ಡಿಪಡಿಸಬಾರದು: ನಿರುದ್ಯೋಗ, ಬೆಲೆ ಏರಿಕೆ, ರೈಲ್ವೆ ಅಪಘಾತಗಳು ಮತ್ತು ಬಿಹಾರ- ಆಂಧ್ರಪ್ರದೇಶಕ್ಕೆ ವಿಶೇಷ ಪ್ಯಾಕೇಜ್ ಹೊರತುಪಡಿಸಿ, ಮಂಗಳವಾರ ಲೋಕಸಭೆಯಲ್ಲಿ ಹಣಕಾಸು ಸಚಿವೆ ನಿರ್ಮಲಾ ಸೀತಾರಾಮನ್ ಅವರ ಬಜೆಟ್ ಭಾಷಣಕ್ಕೆ ಅಡ್ಡಿಪಡಿಸುವುದಿಲ್ಲ ಎಂದು ಭಾರತ ಒಕ್ಕೂಟದ ನಾಯಕರು ಹೇಳಿದ್ದಾರೆ. ಆದರೆ, ಹಿರಿಯ ನಾಯಕರು ಮಂಗಳವಾರ ಸಂಜೆ ಕಾಂಗ್ರೆಸ್ ಅಧ್ಯಕ್ಷ ಮತ್ತು ರಾಜ್ಯಸಭೆ ವಿರೋಧ ಪಕ್ಷದ ನಾಯಕ ಮಲ್ಲಿಕಾರ್ಜುನ ಖರ್ಗೆ ಅವರ ನಿವಾಸದಲ್ಲಿ ಭೇಟಿಯಾಗಲಿದ್ದು, ಬಜೆಟ್ ಅಧಿವೇಶನಕ್ಕೆ ಸಂಯೋಜಿತ ಕಾರ್ಯತಂತ್ರವನ್ನು ರೂಪಿಸಲಿದ್ದಾರೆ. 

ಕೇಂದ್ರ ಸಚಿವ ಪಂಕಜ್ ಚೌಧರಿ ಸೋಮವಾರ ಲೋಕಸಭೆಯಲ್ಲಿ ನೀಡಿದ ಹೇಳಿಕೆಯನ್ನು ಆಧರಿಸಿ, ಕಾಂಗ್ರೆಸ್, ಆರ್‌ಜೆಡಿ ಮತ್ತು ಸಿಪಿಐ-ಎಂಎಲ್ ನಾಯಕರು ಬಿಹಾರಕ್ಕೆ ವಿಶೇಷ ಸ್ಥಾನಮಾನ ಮತ್ತು ಪ್ಯಾಕೇಜ್‌ ನೀಡಬೇಕೆಂಬ ಬೇಡಿಕೆಯನ್ನು ತೀವ್ರಗೊಳಿಸಲಿದ್ದಾರೆ ಎಂದು ಮೂಲಗಳು ತಿಳಿಸಿವೆ. ಜೆಡಿ (ಯು) ಸಂಸದ ರಾಮ್‌ಪ್ರೀತ್ ಮಂಡಲ್ ಅವರ ಪ್ರಶ್ನೆಗೆ ಉತ್ತರಿಸಿದ ಹಣಕಾಸು ಖಾತೆ ಕಿರಿಯ ಸಚಿವ ಚೌಧರಿ, ಬಿಹಾರಕ್ಕೆ ವಿಶೇಷ ವರ್ಗದ ಸ್ಥಾನಮಾನವನ್ನು ನೀಡುವುದಿಲ್ಲ ಎಂದು ತಿಳಿಸಿದ್ದರು. 

ಮೋದಿ ಸರ್ಕಾರದ ಸ್ಥಿರತೆಗೆ ನಿರ್ಣಾಯಕವಾಗಿರುವ ಜೆಡಿ (ಯು), ಬಿಹಾರದ ಸಾಮಾಜಿಕ-ಆರ್ಥಿಕ ಹಿಂದುಳಿದಿರುವಿಕೆಯನ್ನು ಗಮನದಲ್ಲಿ ಟ್ಟುಕೊಂಡು ವಿಶೇಷ ವರ್ಗದ ಸ್ಥಾನಮಾನ ಅಥವಾ ಹಣಕಾಸು ಪ್ಯಾಕೇಜ್ ನೀಡಬೇಕೆಂದು ಪ್ರತಿಪಾದಿಸುತ್ತಿದೆ. ಬಿಜೆಪಿಯ ಇತರ ಪ್ರಮುಖ ಮಿತ್ರಪಕ್ಷಗಳಾದ ಚಿರಾಗ್ ಪಾಸ್ವಾನ್ ಅವರ ಎಲ್‌ಜೆಪಿ (ರಾಮ್ ವಿಲಾಸ್) ಮತ್ತು ಜಿತನ್ ರಾಮ್ ಮಾಂಝಿ ಅವರ ಹಿಂದೂಸ್ತಾನ್ ಅವಾಮ್ ಮೋರ್ಚಾ (ಎಚ್‌ಎಎಂ) ಕೂಡ ಈ ಬೇಡಿಕೆಯನ್ನು ಬೆಂಬಲಿಸಿವೆ. 

ಬಿಹಾರಕ್ಕೆ ವಿಶೇಷ ವರ್ಗದ ಸ್ಥಾನಮಾನ ಮತ್ತು ವಿಶೇಷ ಪ್ಯಾಕೇಜನ್ನು ಕೇಂದ್ರ ಸಾರಾಸಗಟಾಗಿ ತಿರಸ್ಕರಿಸಿರುವುದರಿಂದ, ಎನ್‌ಡಿಎ ಒಕ್ಕೂಟದ ಲ್ಲಿ ʻಬಿರುಕು ಸೃಷ್ಟಿಸುತ್ತದೆʼ ಮತ್ತು ಮುಂದಿನ ವರ್ಷ ನಡೆಯಲಿರುವ ಬಿಹಾರ ವಿಧಾನಸಭೆ ಚುನಾವಣೆಯಲ್ಲಿ ಬಿಜೆಪಿ, ನಿತೀಶ್ ಕುಮಾರ್ ಅವರ ಜೆಡಿ (ಯು), ಎಲ್‌ಜೆಪಿ ಮತ್ತು ಎಚ್‌ಎಎಂ ವಿರುದ್ಧ ಪ್ರತಿಪಕ್ಷಗಳಿಗೆ ಆಯುಧವನ್ನು ನೀಡಲಿದೆ ಎಂದು ಇಂಡಿಯಾ ಬ್ಲಾಕ್ ನಂಬಿದೆ.

ಪ್ರಧಾನಿ, ನಿತೀಶ್‌ಗೆ ಆರ್‌ಜೆಡಿ ಪ್ರಶ್ನೆ: ಆರ್‌ಜೆಡಿಯ ಮುಖ್ಯ ವಕ್ತಾರ ಮತ್ತು ರಾಜ್ಯಸಭೆ ಸದಸ್ಯ ಮನೋಜ್ ಝಾ ದ ಫೆಡರಲ್‌ ಜೊತೆ ಮಾತನಾಡಿ, ಬಿಹಾರಕ್ಕೆ ವಿಶೇಷ ವರ್ಗದ ಸ್ಥಾನಮಾನ ಮತ್ತು ವಿಶೇಷ ಪ್ಯಾಕೇಜ್ ನಿರಾಕರಿಸಲು ಎನ್‌ಡಿಸಿ ನಿರ್ಧಾರ ಮತ್ತು 2012 ರ ಶಿಫಾರಸನ್ನು ಬಳಸುವ ಮೂಲಕ ಬಿಜೆಪಿ ಆಟ ಆಡುತ್ತಿದೆ. ಇದು ಬಿಹಾರದ ಜನರಿಗೆ ಮಾಡಿದ ವಂಚನೆ ಎಂದು ಹೇಳಿದರು.

ʼಇದು ಕಳಪೆ ನೆಪ. ಎನ್‌ಡಿಎ ಅಧಿಕಾರಕ್ಕೆ ಬಂದರೆ ರಾಜ್ಯಕ್ಕೆ ವಿಶೇಷ ಸ್ಥಾನಮಾನ ಮತ್ತು ವಿಶೇಷ ಪ್ಯಾಕೇಜ್ ಸಿಗುತ್ತದೆ ಎಂದು ಮೋದಿ ಮತ್ತು ನಿತೀಶ್ ಕುಮಾರ್ ಲೋಕಸಭೆ ಪ್ರಚಾರದ ಸಮಯದಲ್ಲಿ ಏಕೆ ಹೇಳಿದರು? ಜನರ ಮತ ಪಡೆಯಲು ಉದ್ದೇಶಪೂರ್ವಕವಾಗಿ ಸುಳ್ಳು ಹೇಳಿದಿರಾ?ʼ ಎಂದು ಝಾ ಹೇಳಿದ್ದಾರೆ.

ʻಸರ್ಕಾರಿ ‌ನೌಕರರ ಆರ್‌ಎಸ್‌ಎಸ್‌ ಸೇರ್ಪಡೆ ನಿಷೇಧ ಕುರಿತ 60 ವರ್ಷಗಳ ಹಿಂದಿನ ನಿರ್ಧಾರವನ್ನು ಬದಲಿಸಿದಂತೆ, ಎನ್‌ಡಿಸಿ ನಿರ್ಧಾರವನ್ನು ಒಂದು ಕಾರ್ಯಕಾರಿ ಆದೇಶದಿಂದ ಬದಲಿಸಬಹುದು. ವಾಸ್ತವ ಏನೆಂದರೆ, ಬಿಹಾರಕ್ಕೆ ವಿಶೇಷ ಪ್ಯಾಕೇಜ್ ನೀಡಲು ಬಿಜೆಪಿ ಎಂದಿಗೂ ಆಸಕ್ತಿ ಹೊಂದಿಲ್ಲ. ಆದರೆ, ಇಂಡಿಯ ಒಕ್ಕೂಟವು ಬಿಹಾರಕ್ಕೆ ವಿಶೇಷ ವರ್ಗದ ಸ್ಥಾನಮಾನ ಮತ್ತು ಪ್ಯಾಕೇಜ್ ಎರಡನ್ನೂ ನೀಡಬೇಕೆಂದು ಒತ್ತಾಯಿಸಲಿದೆ. ಅದಕ್ಕಾಗಿ ಬೀದಿಯಿಂದ ಸಂಸತ್ತಿನವರೆಗೆ ಹೋರಾಟ ಮಾಡುತ್ತೇವೆ,ʼ ಎಂದು ಹೇಳಿದರು.