ಬಂಗಾಳದಲ್ಲಿ ಮತದಾರರ ಪಟ್ಟಿ ಪರಿಷ್ಕರಣೆ ನಿಲ್ಲಿಸಲು ಆಯೋಗಕ್ಕೆ ಸಿಎಂ ಮಮತಾ ಪತ್ರ

ಪಶ್ಚಿಮ ಬಂಗಾಳದಲ್ಲಿ ನಡೆಯುತ್ತಿರುವ ಮತದಾರರ ಪಟ್ಟಿ ವಿಶೇಷ ಪರಿಷ್ಕರಣೆ (Special Intensive Revision - SIR) ಪ್ರಕ್ರಿಯೆಯ ವಿರುದ್ಧ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಈ ಪ್ರಕ್ರಿಯೆಯು "ಗೊಂದಲಮಯ, ಒತ್ತಾಯಪೂರ್ವಕ ಮತ್ತು ಅಪಾಯಕಾರಿ" ಎಂದು ಬಣ್ಣಿಸಿರುವ ಅವರು, ಇದನ್ನು ತಕ್ಷಣವೇ ನಿಲ್ಲಿಸುವಂತೆ ಒತ್ತಾಯಿಸಿ ಮುಖ್ಯ ಚುನಾವಣಾ ಆಯುಕ್ತ (ಸಿಇಸಿ) ಜ್ಞಾನೇಶ್ ಕುಮಾರ್ ಅವರಿಗೆ ಗುರುವಾರ ಕಟುವಾದ ಪತ್ರ ಬರೆದಿದ್ದಾರೆ.

ಪರಿಸ್ಥಿತಿ ಈಗಾಗಲೇ "ಆತಂಕಕಾರಿ ಹಂತ" ತಲುಪಿದ್ದು, ಪ್ರಕ್ರಿಯೆಯನ್ನು ಸ್ಥಗಿತಗೊಳಿಸಿ ಮರುಪರಿಶೀಲನೆ ನಡೆಸದಿದ್ದರೆ ವ್ಯವಸ್ಥೆಯ ಮೇಲೆ ಗಂಭೀರ ಪರಿಣಾಮ ಬೀರಲಿದೆ ಎಂದು ಮಮತಾ ಎಚ್ಚರಿಸಿದ್ದಾರೆ.

ಅವೈಜ್ಞಾನಿಕ ಜಾರಿ, ಅಧಿಕಾರಿಗಳ ಪರದಾಟ

ಚುನಾವಣಾ ಆಯೋಗವು ಯಾವುದೇ ಪೂರ್ವ ಸಿದ್ಧತೆ, ಸಮರ್ಪಕ ಯೋಜನೆ ಅಥವಾ ಸ್ಪಷ್ಟ ಸಂವಹನವಿಲ್ಲದೆ ಎಸ್‌ಐಆರ್ (SIR) ಪ್ರಕ್ರಿಯೆಯನ್ನು ಅಧಿಕಾರಿಗಳು ಮತ್ತು ನಾಗರಿಕರ ಮೇಲೆ ಹೇರಿದೆ ಎಂದು ಮಮತಾ ಆರೋಪಿಸಿದ್ದಾರೆ. ತರಬೇತಿಯ ಕೊರತೆ, ಅಗತ್ಯ ದಾಖಲೆಗಳ ಬಗ್ಗೆ ಇರುವ ಗೊಂದಲ ಮತ್ತು ಕೆಲಸದ ಸಮಯದಲ್ಲಿ ಮತದಾರರನ್ನು ಭೇಟಿಯಾಗಲು ಬಿಎಲ್‌ಒಗಳಿಗೆ (ಮತಗಟ್ಟೆ ಮಟ್ಟದ ಅಧಿಕಾರಿಗಳು) ಸಾಧ್ಯವಾಗದಿರುವುದು ಇಡೀ ಪ್ರಕ್ರಿಯೆಯನ್ನು ಅಸ್ತವ್ಯಸ್ತಗೊಳಿಸಿದೆ. ಹೀಗಾಗಿ ಇದೊಂದು "ರಚನಾತ್ಮಕವಾಗಿ ದೋಷಪೂರಿತ" ಪ್ರಕ್ರಿಯೆ ಎಂದು ಅವರು ಟೀಕಿಸಿದ್ದಾರೆ.

ಸಿಬ್ಬಂದಿಗಳ ಮೇಲೆ ಅಮಾನವೀಯ ಒತ್ತಡ

ಪತ್ರದಲ್ಲಿ ಮತಗಟ್ಟೆ ಮಟ್ಟದ ಅಧಿಕಾರಿಗಳ (ಬಿಎಲ್‌ಒ) ಸಂಕಷ್ಟವನ್ನು ಎಳೆಎಳೆಯಾಗಿ ಬಿಚ್ಚಿಡಲಾಗಿದೆ. "ಶಿಕ್ಷಕರು ಮತ್ತು ಅಂಗನವಾಡಿ ಕಾರ್ಯಕರ್ತರು ತಮ್ಮ ಮೂಲ ಕರ್ತವ್ಯಗಳ ಜೊತೆಗೆ ಮನೆ-ಮನೆ ಸಮೀಕ್ಷೆ ಮತ್ತು ಸಂಕೀರ್ಣವಾದ ಇ-ಸಲ್ಲಿಕೆಗಳನ್ನು ನಿರ್ವಹಿಸಬೇಕಾಗಿದೆ. ತರಬೇತಿಯಿಲ್ಲದೆ ಆನ್‌ಲೈನ್ ಫಾರ್ಮ್‌ಗಳನ್ನು ತುಂಬುವುದು, ಸರ್ವರ್ ವೈಫಲ್ಯಗಳು ಮತ್ತು ಡೇಟಾ ಹೊಂದಾಣಿಕೆಯಾಗದ ಸಮಸ್ಯೆಗಳಿಂದಾಗಿ ಸಿಬ್ಬಂದಿ ಹೈರಾಣಾಗಿದ್ದಾರೆ. ಡಿಸೆಂಬರ್ 4 ರೊಳಗೆ ನಿಖರವಾದ ದತ್ತಾಂಶವನ್ನು ಅಪ್‌ಲೋಡ್ ಮಾಡುವುದು ಅಸಾಧ್ಯದ ಮಾತು," ಎಂದು ಮಮತಾ ಬ್ಯಾನರ್ಜಿ ವಿವರಿಸಿದ್ದಾರೆ.

ಒತ್ತಡಕ್ಕೆ ಬಲಿಯಾದ ಜೀವಗಳು

ಕೆಲಸದ ವಿಪರೀತ ಒತ್ತಡವು ಮಾನವೀಯತೆಯ ಮಿತಿಯನ್ನು ಮೀರಿದೆ ಎಂದು ಮಮತಾ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಜಲ್ಪೈಗುರಿ ಜಿಲ್ಲೆಯ ಮಲ್ ಪ್ರದೇಶದಲ್ಲಿ ಬಿಎಲ್‌ಒ ಆಗಿ ಕಾರ್ಯನಿರ್ವಹಿಸುತ್ತಿದ್ದ ಅಂಗನವಾಡಿ ಕಾರ್ಯಕರ್ತೆಯೊಬ್ಬರು ಎಸ್‌ಐಆರ್ ಕೆಲಸದ ಒತ್ತಡ ತಾಳಲಾರದೆ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂದು ಅವರು ಪತ್ರದಲ್ಲಿ ಉಲ್ಲೇಖಿಸಿದ್ದಾರೆ. ಈ ಪ್ರಕ್ರಿಯೆ ಆರಂಭವಾದಾಗಿನಿಂದ ಇನ್ನೂ ಹಲವರು ಪ್ರಾಣ ಕಳೆದುಕೊಂಡಿದ್ದು, ಈ ಸಾವುಗಳಿಗೆ ಆಯೋಗದ ಅವೈಜ್ಞಾನಿಕ ನಿಲುವೇ ಕಾರಣ ಎಂದು ಅವರು ದೂರಿದ್ದಾರೆ.

ಕೃಷಿ ಚಟುವಟಿಕೆ ಮತ್ತು 3 ವರ್ಷದ ಕೆಲಸ 3 ತಿಂಗಳಲ್ಲಿ!

ರಾಜ್ಯದಲ್ಲಿ ಇದು ಭತ್ತದ ಕೊಯ್ಲು ಮತ್ತು ರಬಿ ಬೆಳೆ (ಮುಖ್ಯವಾಗಿ ಆಲೂಗಡ್ಡೆ) ಬಿತ್ತನೆಯ ಸಮಯವಾಗಿದೆ. ಲಕ್ಷಾಂತರ ರೈತರು ಮತ್ತು ಕೃಷಿ ಕಾರ್ಮಿಕರು ಹೊಲಗಳಲ್ಲಿ ಕೆಲಸ ಮಾಡುತ್ತಿದ್ದು, ಅವರನ್ನು ಎಣಿಕೆ ಕಾರ್ಯದಲ್ಲಿ ಭಾಗವಹಿಸಲು ಒತ್ತಾಯಿಸುವುದು ತಪ್ಪು. ಅಲ್ಲದೆ, ಹಿಂದೆ ಮೂರು ವರ್ಷಗಳ ಕಾಲಾವಕಾಶದಲ್ಲಿ ನಡೆಯುತ್ತಿದ್ದ ಮತದಾರರ ಪಟ್ಟಿ ಪರಿಷ್ಕರಣೆಯನ್ನು ಬಲವಂತವಾಗಿ ಕೇವಲ ಮೂರು ತಿಂಗಳಿಗೆ ಇಳಿಸಲಾಗಿದೆ. ಇದರಿಂದಾಗಿ ತಪ್ಪು ನಮೂದುಗಳು ದಾಖಲಾಗುವ ಮತ್ತು ಅರ್ಹ ಮತದಾರರು ಹಕ್ಕು ಕಳೆದುಕೊಳ್ಳುವ ಅಪಾಯವಿದ್ದು, ಇದು ಚುನಾವಣಾ ಪಟ್ಟಿಯ ವಿಶ್ವಾಸಾರ್ಹತೆಯನ್ನೇ ಹಾಳುಮಾಡುತ್ತದೆ ಎಂದು ಮುಖ್ಯಮಂತ್ರಿಗಳು ಎಚ್ಚರಿಸಿದ್ದಾರೆ.

ಅಧಿಕಾರಿಗಳಿಗೆ ಬೆಂಬಲ ನೀಡುವ ಬದಲು, ಚುನಾವಣಾ ಆಯೋಗವು ಶಿಸ್ತು ಕ್ರಮದ ಬೆದರಿಕೆ ಒಡ್ಡಿ ನೋಟಿಸ್ ಜಾರಿ ಮಾಡುತ್ತಿರುವುದು "ಸಮರ್ಥಿಸಲಾಗದ ನಡೆ" ಎಂದು ಮಮತಾ ತಮ್ಮ ಪತ್ರದಲ್ಲಿ ಕಿಡಿಕಾರಿದ್ದಾರೆ.