ದಕ್ಷಿಣ ಮುಂಬೈನ ಜಾರಿ ನಿರ್ದೇನಾಲಯ ಕಚೇರಿ ಕಟ್ಟಡದಲ್ಲಿ ಭಾರೀ ಅಗ್ನಿ ಅನಾಹುತ
ಮುಂಬೈ ಅಗ್ನಿಶಾಮಕ ದಳದ ಪ್ರಕಾರ, ಭಾನುವಾರ ಮುಂಜಾನೆ 2:31 ರ ಸುಮಾರಿಗೆ ಕರಿಮ್‌ಭಾಯ್ ರಸ್ತೆಯ ಗ್ರ್ಯಾಂಡ್ ಹೋಟೆಲ್ ಸಮೀಪದಲ್ಲಿರುವ ಬಹುಮಹಡಿ ಕೈಸರ್-ಇ-ಹಿಂದ್ ಕಟ್ಟಡದಲ್ಲಿ ಬೆಂಕಿಯ ಕುರಿತು ಕರೆ ಬಂದಿದೆ. ಈ ಕಟ್ಟಡದಲ್ಲಿ ಇಡಿ ಕಚೇರಿಯ ಜೊತೆಗೆ ಇತರ ಕಚೇರಿಗಳೂ ಕಾರ್ಯನಿರ್ವಹಿಸುತ್ತವೆ.;
ದಕ್ಷಿಣ ಮುಂಬೈನ ಬಲ್ಲಾರ್ಡ್ ಎಸ್ಟೇಟ್ ಪ್ರದೇಶದಲ್ಲಿರುವ ಎನ್‌ಫೋರ್ಸ್‌ಮೆಂಟ್ ಡೈರೆಕ್ಟರೇಟ್ (ಇಡಿ) ಕಚೇರಿಯನ್ನು ಒಳಗೊಂಡಿರುವ ಕೈಸರ್-ಇ-ಹಿಂದ್ ಕಟ್ಟಡದಲ್ಲಿ ಭಾನುವಾರ ಮುಂಜಾನೆ ಭಾರೀ ಅಗ್ನಿ ಅನಾಹುತ ಸಂಭವಿಸಿದೆ. ಈ ಘಟನೆಯಲ್ಲಿ ಯಾವುದೇ ಸಾವು-ನೋವುಗಳ ವರದಿಯಾಗಿಲ್ಲವಾದರೂ, ಕಟ್ಟಡದ ನಾಲ್ಕನೇ ಮಹಡಿಯಲ್ಲಿ ಬೆಂಕಿ ಕಾಣಿಸಿಕೊಂಡಿದ್ದು, ಇದನ್ನು ಮುಂಬೈ ಅಗ್ನಿಶಾಮಕ ದಳವು "ಲೆವೆಲ್-II" ಹಂತದ ಗಂಭೀರ ಬೆಂಕಿ ಅವಘಡ ಎಂದು ಹೇಳಿದೆ.
ಮುಂಬೈ ಅಗ್ನಿಶಾಮಕ ದಳದ ಪ್ರಕಾರ, ಭಾನುವಾರ ಮುಂಜಾನೆ 2:31 ರ ಸುಮಾರಿಗೆ ಕರಿಮ್‌ಭಾಯ್ ರಸ್ತೆಯ ಗ್ರ್ಯಾಂಡ್ ಹೋಟೆಲ್ ಸಮೀಪದಲ್ಲಿರುವ ಬಹುಮಹಡಿ ಕೈಸರ್-ಇ-ಹಿಂದ್ ಕಟ್ಟಡದಲ್ಲಿ ಬೆಂಕಿಯ ಕುರಿತು ಕರೆ ಬಂದಿದೆ. ಈ ಕಟ್ಟಡದಲ್ಲಿ ಇಡಿ ಕಚೇರಿಯ ಜೊತೆಗೆ ಇತರ ಕಚೇರಿಗಳೂ ಕಾರ್ಯನಿರ್ವಹಿಸುತ್ತವೆ. ಬೆಂಕಿಯ ಸುದ್ದಿ ತಿಳಿಯುತ್ತಿದ್ದಂತೆ ಅಗ್ನಿಶಾಮಕ ದಳದ ತಂಡಗಳು ತಕ್ಷಣವೇ ಸ್ಥಳಕ್ಕೆ ಧಾವಿಸಿ, ಬೆಂಕಿ ನಂದಿಸುವ ಕಾರ್ಯಾಚರಣೆ ಆರಂಭಿಸಿದವು.
ಅಗ್ನಿಶಾಮಕ ದಳದ ಅಧಿಕಾರಿಯೊಬ್ಬರ ಪ್ರಕಾರ, ಬೆಂಕಿಯು ಕಟ್ಟಡದ ಐದು ಮಹಡಿಗಳ ಪೈಕಿ ನಾಲ್ಕನೇ ಮಹಡಿಗೆ ಸೀಮಿತವಾಗಿತ್ತು. ಆದರೆ, ದಟ್ಟವಾದ ಹೊಗೆಯು ಕಟ್ಟಡವನ್ನು ಆವರಿಸಿದ್ದರಿಂದ ಅಗ್ನಿಶಾಮಕ ಕಾರ್ಯಾಚರಣೆಗೆ ಸವಾಲು ಎದುರಾಗಿತ್ತು. ಸ್ಥಳದಿಂದ ತೆಗೆದ ಚಿತ್ರಗಳು ಹಾಗೂ ವಿಡಿಯೊಗಳು ದಟ್ಟವಾದ ಕಪ್ಪು ಹೊಗೆ ಏರುತ್ತಿರುವುದನ್ನು ತೋರಿಸಿದವು.
ಅಗ್ನಿಶಾಮಕ ಕಾರ್ಯಾಚರಣೆ
ಒಟ್ಟು ಎಂಟು ಅಗ್ನಿಶಾಮಕ ವಾಹನಗಳು, ಆರು ಜಂಬೋ ಟ್ಯಾಂಕರ್‌ಗಳು, ಒಂದು ಏರಿಯಲ್ ವಾಟರ್ ಟವರ್, ಒಂದು ಉಸಿರಾಟ ಉಪಕರಣ ವ್ಯಾನ್, ಒಂದು ರಕ್ಷಣಾ ವ್ಯಾನ್, ಒಂದು ತ್ವರಿತ ಪ್ರತಿಕ್ರಿಯಾ ವಾಹನ ಮತ್ತು 108 ಸೇವೆಯ ಆಂಬ್ಯುಲೆನ್ಸ್ ಸ್ಥಳದಲ್ಲಿ ಕಾರ್ಯನಿರ್ವಹಿಸಿದವು. ಒಟ್ಟಾರೆ 12 ಅಗ್ನಿಶಾಮಕ ಯಂತ್ರಗಳನ್ನು ಬಳಸಲಾಯಿತು ಎಂದು ಅಧಿಕಾರಿಗಳು ತಿಳಿಸಿದ್ದಾರೆ.
ಕೈಸರ್-ಇ-ಹಿಂದ್ ಕಟ್ಟಡ
ಕೈಸರ್-ಇ-ಹಿಂದ್ ಕಟ್ಟಡವು ದಕ್ಷಿಣ ಮುಂಬೈನ ಬಲ್ಲಾರ್ಡ್ ಎಸ್ಟೇಟ್‌ನ ಪ್ರಮುಖ ವಾಣಿಜ್ಯ ಕೇಂದ್ರವಾಗಿದೆ. ಈ ಬಹುಮಹಡಿ ಕಟ್ಟಡವು ಇಡಿ ಕಚೇರಿಯ ಜೊತೆಗೆ ಇತರ ಸರ್ಕಾರಿ ಮತ್ತು ಖಾಸಗಿ ಕಚೇರಿಗಳನ್ನು ಹೊಂದಿದೆ. ಈ ಪ್ರದೇಶವು ಮುಂಬೈನ ಆರ್ಥಿಕ ಕೇಂದ್ರವಾಗಿದ್ದು, ಐತಿಹಾಸಿಕ ಮತ್ತು ವಾಣಿಜ್ಯ ಪ್ರಾಮುಖ್ಯತೆ ಹೊಂದಿದೆ.