ಪತಿ ವಿರುದ್ಧ ಕೌಟುಂಬಿಕ ದೌರ್ಜನ್ಯ ದೂರು ದಾಖಲಿಸಿದ ನಟಿ ಸೆಲಿನಾ ಜೇಟ್ಲಿ

ಜನಪ್ರಿಯ ನಟಿ ಹಾಗೂ ಮಾಜಿ ಮಿಸ್ ಇಂಡಿಯಾ ಸೆಲಿನಾ ಜೇಟ್ಲಿ ತಮ್ಮ ವೈವಾಹಿಕ ಜೀವನದ ಸಂಕಷ್ಟಗಳನ್ನು ಬಹಿರಂಗಪಡಿಸಿದ್ದು, ತಮ್ಮ ಪತಿ ಪೀಟರ್ ಹ್ಯಾಗ್ ವಿರುದ್ಧ ಗಂಭೀರ ಸ್ವರೂಪದ ಕೌಟುಂಬಿಕ ದೌರ್ಜನ್ಯದ ದೂರು ದಾಖಲಿಸಿದ್ದಾರೆ.

ಮುಂಬೈನ ಸ್ಥಳೀಯ ನ್ಯಾಯಾಲಯದಲ್ಲಿ ಮಂಗಳವಾರ ಈ ಅರ್ಜಿ ವಿಚಾರಣೆಗೆ ಬಂದಿದ್ದು, ನಟಿ ತಮ್ಮ ಪತಿಯಿಂದ ತೀವ್ರವಾದ ದೈಹಿಕ, ಮಾನಸಿಕ ಮತ್ತು ಮೌಖಿಕ ನಿಂದನೆಗೊಳಗಾಗಿರುವುದಾಗಿ ಆರೋಪಿಸಿದ್ದಾರೆ. ಈ ಪ್ರಕರಣದ ವಿಚಾರಣೆಯನ್ನು ಕೈಗೆತ್ತಿಕೊಂಡಿರುವ ನ್ಯಾಯಾಂಗ ಮ್ಯಾಜಿಸ್ಟ್ರೇಟ್ ಎಸ್.ಸಿ. ತಾಡ್ವೆ ಅವರು ಪ್ರತಿವಾದಿ ಪೀಟರ್ ಹ್ಯಾಗ್ ಅವರಿಗೆ ನೋಟಿಸ್ ಜಾರಿ ಮಾಡಿದ್ದು, ಮುಂದಿನ ವಿಚಾರಣೆಯನ್ನು ಡಿಸೆಂಬರ್ 12ಕ್ಕೆ ನಿಗದಿಪಡಿಸಿದ್ದಾರೆ.

ನಾರ್ಸಿಸಿಸ್ಟ್ ಪತಿ ಮತ್ತು 50 ಕೋಟಿ ಪರಿಹಾರದ ಬೇಡಿಕೆ

ಕರಣ್ಜವಾಲಾ ಆ್ಯಂಡ್​ ಕಂಪನಿ ಕಾನೂನು ಸಂಸ್ಥೆಯ ಮೂಲಕ ಸಲ್ಲಿಸಲಾದ ಅರ್ಜಿಯಲ್ಲಿ, ಸೆಲಿನಾ ಜೇಟ್ಲಿ ತಮ್ಮ ಪತಿಯನ್ನು "ನಾರ್ಸಿಸಿಸ್ಟ್" (ತನ್ನನ್ನೇ ತಾನು ಅತಿಯಾಗಿ ಪ್ರೀತಿಸುವವನು) ಮತ್ತು ಸ್ವಾರ್ಥಿ ಎಂದು ಬಣ್ಣಿಸಿದ್ದಾರೆ. ಪತಿಗೆ ವಿಪರೀತ ಮದ್ಯಪಾನದ ಚಟವಿದ್ದು, ಸಣ್ಣಪುಟ್ಟ ವಿಚಾರಕ್ಕೂ ಕೋಪಗೊಳ್ಳುವ ಸ್ವಭಾವದಿಂದಾಗಿ ತಾವು ನಿರಂತರವಾಗಿ ಒತ್ತಡ ಮತ್ತು ನೋವನ್ನು ಅನುಭವಿಸಬೇಕಾಯಿತು ಎಂದು ನಟಿ ದೂರಿದ್ದಾರೆ. ಮದುವೆಯ ನಂತರ ತಮ್ಮನ್ನು ನಟನಾ ವೃತ್ತಿಯಿಂದಲೂ ತಡೆಯಲಾಗಿತ್ತು ಎಂದು ಅವರು ಹೇಳಿಕೊಂಡಿದ್ದಾರೆ. ಈ ಎಲ್ಲಾ ಹಿನ್ನೆಲೆಯಲ್ಲಿ, ತಮಗೆ ಆಗಿರುವ ಅನ್ಯಾಯಕ್ಕೆ ಪ್ರತಿಯಾಗಿ 50 ಕೋಟಿ ರೂಪಾಯಿ ಪರಿಹಾರ ಮತ್ತು ಮಾಸಿಕ 10 ಲಕ್ಷ ರೂಪಾಯಿ ಜೀವನಾಂಶ ನೀಡಬೇಕೆಂದು ಅವರು ನ್ಯಾಯಾಲಯಕ್ಕೆ ಮನವಿ ಮಾಡಿದ್ದಾರೆ.

ಮಕ್ಕಳ ಭೇಟಿ ಮತ್ತು ಆಸ್ಟ್ರಿಯಾ ಸಂಕಷ್ಟ

2010ರ ಸೆಪ್ಟೆಂಬರ್‌ನಲ್ಲಿ ಆಸ್ಟ್ರಿಯಾ ಮೂಲದ ಹೋಟೆಲ್ ಉದ್ಯಮಿ ಪೀಟರ್ ಹ್ಯಾಗ್ ಅವರನ್ನು ವರಿಸಿದ್ದ ಸೆಲಿನಾ ಅವರಿಗೆ ಮೂವರು ಮಕ್ಕಳಿದ್ದಾರೆ. ಪ್ರಸ್ತುತ ಮಕ್ಕಳು ತಂದೆಯೊಂದಿಗೆ ಆಸ್ಟ್ರಿಯಾದಲ್ಲಿ ವಾಸವಾಗಿದ್ದು, ಅವರನ್ನು ಭೇಟಿಯಾಗಲು ಮತ್ತು ಸಂಪರ್ಕಿಸಲು ತಮಗೆ ಅವಕಾಶ ಕಲ್ಪಿಸಬೇಕೆಂದು ಸೆಲಿನಾ ಕೋರಿದ್ದಾರೆ. ಕಳೆದ ಆಗಸ್ಟ್ ತಿಂಗಳಲ್ಲಿ ಪತಿ ಪೀಟರ್ ಆಸ್ಟ್ರಿಯಾದ ನ್ಯಾಯಾಲಯದಲ್ಲಿ ವಿಚ್ಛೇದನಕ್ಕೆ ಅರ್ಜಿ ಸಲ್ಲಿಸಿದ್ದರು. ಆದರೆ, ಅಲ್ಲಿ ತಮಗೆ ಭಾಷೆಯ ಸಮಸ್ಯೆ ಇದ್ದುದರಿಂದ ಮತ್ತು ವಕೀಲರ ನೆರವು ಸಿಗದಂತೆ ಪತಿ ತಡೆಯೊಡ್ಡಿದ್ದರಿಂದ ತೀವ್ರ ಅನ್ಯಾಯವಾಯಿತು. ಅಲ್ಲಿನ ಕಿರುಕುಳ ತಾಳಲಾರದೆ ತಾವು ಆಸ್ಟ್ರಿಯಾದಿಂದ ಭಾರತಕ್ಕೆ ಓಡಿಬರಬೇಕಾಯಿತು ಎಂದು ಸೆಲಿನಾ ಅರ್ಜಿಯಲ್ಲಿ ಉಲ್ಲೇಖಿಸಿದ್ದಾರೆ.

ಭಾವನಾತ್ಮಕ ಪೋಸ್ಟ್: "ನಾನೊಬ್ಬ ಸೈನಿಕನ ಮಗಳು"

ಈ ಕಾನೂನು ಹೋರಾಟದ ನಡುವೆಯೇ ಸೆಲಿನಾ ಜೇಟ್ಲಿ ಸಾಮಾಜಿಕ ಜಾಲತಾಣದಲ್ಲಿ ಅತ್ಯಂತ ಭಾವುಕ ಪೋಸ್ಟ್ ಒಂದನ್ನು ಹಂಚಿಕೊಂಡಿದ್ದಾರೆ. "ನನ್ನ ಜೀವನದ ಅತ್ಯಂತ ಭಯಂಕರ ಚಂಡಮಾರುತದ ನಡುವೆ ನಾನು ಒಂಟಿಯಾಗಿದ್ದೇನೆ ಎಂದು ನಾನಂದುಕೊಂಡಿರಲಿಲ್ಲ. ನನ್ನ ರಕ್ಷಾಕವಚವಾಗಿದ್ದ ತಂದೆ-ತಾಯಿ ಈಗಿಲ್ಲ, ಪ್ರೀತಿಸುವುದಾಗಿ ಮಾತುಕೊಟ್ಟ ಪತಿ ಕೈಬಿಟ್ಟಿದ್ದಾರೆ, ಮಕ್ಕಳು ದೂರವಾಗಿದ್ದಾರೆ ಮತ್ತು ಸಹೋದರ ಸಂಕಷ್ಟದಲ್ಲಿದ್ದಾರೆ" ಎಂದು ಅವರು ನೋವು ತೋಡಿಕೊಂಡಿದ್ದಾರೆ. ತಮ್ಮ ಸಹೋದರ ನಿವೃತ್ತ ಯೋಧ ವಿಕ್ರಾಂತ್ ಕುಮಾರ್ ಜೇಟ್ಲಿ 2024ರಿಂದ ಮಧ್ಯಪ್ರಾಚ್ಯ ದೇಶವೊಂದರಲ್ಲಿ ಬಂಧನದಲ್ಲಿದ್ದು, ಅವರ ಬಿಡುಗಡೆಗೂ ತಾವು ಹೋರಾಡುತ್ತಿರುವುದಾಗಿ ತಿಳಿಸಿದ್ದಾರೆ. "ನಾನೊಬ್ಬ ಸೈನಿಕನ ಮಗಳು, ಧೈರ್ಯ ಮತ್ತು ಶಿಸ್ತಿನಿಂದಲೇ ಬೆಳೆದವಳು. ನನ್ನ ಘನತೆಗಾಗಿ ಮತ್ತು ಮಕ್ಕಳ ಪ್ರೀತಿಗಾಗಿ ಈ ಒಂಟಿ ಹೋರಾಟವನ್ನು ಮುಂದುವರಿಸುತ್ತೇನೆ" ಎಂದು ಅವರು ಸ್ಪಷ್ಟಪಡಿಸಿದ್ದಾರೆ.