ಹಿರಿಯ ನಟ ಅಸ್ರಾನಿ ನಿಧನ: ಪ್ರಧಾನಿ ಮೋದಿ, ಬಾಲಿವುಡ್ ಗಣ್ಯರಿಂದ ಕಂಬನಿ

ಬಾಲಿವುಡ್‌ನ ಹಿರಿಯ ಹಾಗೂ ಬಹುಮುಖ ಪ್ರತಿಭೆ ನಟ ಗೋವರ್ಧನ್ ಅಸ್ರಾನಿ ಅವರು ಸೋಮವಾರ ಮುಂಬೈನಲ್ಲಿ ನಿಧನರಾಗಿದ್ದಾರೆ. ಅವರಿಗೆ 84 ವರ್ಷ ವಯಸ್ಸಾಗಿತ್ತು. ದೀರ್ಘಕಾಲದ ಅನಾರೋಗ್ಯದಿಂದ ಬಳಲುತ್ತಿದ್ದ ಅವರು, ತಮ್ಮ ಹಾಸ್ಯ ಪ್ರತಿಭೆ ಮತ್ತು ಸ್ಮರಣೀಯ ಪಾತ್ರಗಳ ಮೂಲಕ ಚಿತ್ರರಂಗದ ಮೇಲೆ ಅಳಿಸಲಾಗದ ಛಾಪು ಮೂಡಿಸಿದ್ದಾರೆ.

ಅಸ್ರಾನಿ ಅವರು ಭಾರತೀಯ ಚಿತ್ರರಂಗದ ಜನಪ್ರಿಯ ಕಲಾವಿದರಲ್ಲಿ ಒಬ್ಬರು. ಹಿಂದಿ ಸಿನಿಮಾದಲ್ಲಿ ಹಾಸ್ಯಕ್ಕೆ ಹೊಸ ಆಯಾಮ ನೀಡಿದವರಲ್ಲಿ ಪ್ರಮುಖರಾಗಿದ್ದರು.

ಪ್ರಧಾನಿ ಮೋದಿ ಸಂತಾಪ

ಅಸ್ರಾನಿ ಅವರ ನಿಧನಕ್ಕೆ ಪ್ರಧಾನ ಮಂತ್ರಿ ನರೇಂದ್ರ ಮೋದಿ ಅವರು 'ಎಕ್ಸ್' ಮೂಲಕ ತೀವ್ರ ಸಂತಾಪ ವ್ಯಕ್ತಪಡಿಸಿದ್ದಾರೆ. "ಗೋವರ್ಧನ್ ಅಸ್ರಾನಿ ಅವರ ನಿಧನದಿಂದ ತೀವ್ರ ದುಃಖವಾಗಿದೆ. ಪ್ರತಿಭಾನ್ವಿತ ಮನರಂಜನೆಗಾರ ಮತ್ತು ಬಹುಮುಖ ಕಲಾವಿದರಾಗಿದ್ದ ಅವರು, ಹಲವು ತಲೆಮಾರುಗಳ ಪ್ರೇಕ್ಷಕರನ್ನು ರಂಜಿಸಿದ್ದಾರೆ. ತಮ್ಮ ಮರೆಯಲಾಗದ ಅಭಿನಯದ ಮೂಲಕ ಅಸಂಖ್ಯಾತ ಜೀವಗಳಿಗೆ ಸಂತೋಷ ಮತ್ತು ನಗು ತಂದಿದ್ದಾರೆ. ಭಾರತೀಯ ಚಿತ್ರರಂಗಕ್ಕೆ ಅವರ ಕೊಡುಗೆ ಸದಾ ಸ್ಮರಣೀಯವಾಗಿರುತ್ತದೆ. ಅವರ ಕುಟುಂಬ ಮತ್ತು ಅಭಿಮಾನಿಗಳಿಗೆ ನನ್ನ ಸಂತಾಪಗಳು. ಓಂ ಶಾಂತಿ," ಎಂದು ಪೋಸ್ಟ್‌ ಮಾಡಿದ್ದಾರೆ. 

ಅಕ್ಷಯ್ ಕುಮಾರ್, ಅನುಪಮ್ ಖೇರ್ ಗೌರವ

ನಟ ಅಕ್ಷಯ್ ಕುಮಾರ್ ಅವರು ಇನ್‌ಸ್ಟಾಗ್ರಾಂನಲ್ಲಿ ಭಾವನಾತ್ಮಕ ಪೋಸ್ಟ್ ಹಂಚಿಕೊಂಡಿದ್ದಾರೆ. "ಅಸ್ರಾನಿ ಜೀ ಅವರ ನಿಧನದಿಂದ ಮಾತುಗಳೇ ಹೊರಡುತ್ತಿಲ್ಲ. ಕೇವಲ ಒಂದು ವಾರದ ಹಿಂದೆ 'ಹೈವಾನ್' ಸೆಟ್‌ನಲ್ಲಿ ನಾವು ಅತೀ ಆತ್ಮೀಯವಾಗಿ ಅಪ್ಪಿಕೊಂಡಿದ್ದೆವು. ಅವರು ತುಂಬಾ ಪ್ರೀತಿಪಾತ್ರ ಮನುಷ್ಯರಾಗಿದ್ದರು. ಅವರದ್ದು ಅತ್ಯಂತ ಪೌರಾಣಿಕ ಹಾಸ್ಯ ಸಮಯವಿತ್ತು ಎಂದು ಬರೆದುಕೊಂಡಿದ್ದಾರೆ. 'ಹೇರಾ ಫೇರಿ', 'ಭಾಗಂ ಭಾಗ್', 'ದೇ ದಾನ ದನ್' ಮತ್ತು 'ವೆಲ್‌ಕಮ್'ನಂತಹ ಸಿನಿಮಾಗಳಲ್ಲಿನ ಸಹಯೋಗವನ್ನು ನೆನಪಿಸಿಕೊಂಡ ಅಕ್ಷಯ್, ಅವರೊಂದಿಗೆ ಕೆಲಸ ಮಾಡಿ ನಾನು ಬಹಳಷ್ಟು ಕಲಿತಿದ್ದೇನೆ. ನಮ್ಮ ಚಿತ್ರರಂಗಕ್ಕೆ ಇದು ದೊಡ್ಡ ನಷ್ಟ. ಅಸ್ರಾನಿ ಸರ್, ನಮಗೆ ನಗಲು ಲಕ್ಷಾಂತರ ಕಾರಣಗಳನ್ನು ನೀಡಿದ್ದಕ್ಕೆ ಧನ್ಯವಾದಗಳು. ಓಂ ಶಾಂತಿ," ಎಂದು ಶ್ರದ್ಧಾಂಜಲಿ ಎಂದು ಬರೆದಿದ್ದಾರೆ. 

ನಟ ಅನುಪಮ್ ಖೇರ್ ಕೂಡ ಸಾಮಾಜಿಕ ಮಾಧ್ಯಮದಲ್ಲಿ ಕಂಬನಿ ಮಿಡಿದಿದ್ದಾರೆ. "ಪ್ರಿಯ ಅಸ್ರಾನಿ ಜೀ! ಪರದೆ ಮೇಲೆ ಮತ್ತು ಆಚೆಗೆ ನಿಮ್ಮ ವ್ಯಕ್ತಿತ್ವದೊಂದಿಗೆ ಜಗತ್ತನ್ನು ಉತ್ತಮ ಸ್ಥಳವಾಗಿಸಿದ್ದಕ್ಕಾಗಿ ಧನ್ಯವಾದಗಳು. ನಿಮ್ಮ ಭೌತಿಕ ಸ್ವರೂಪವನ್ನು ನಾವು ಕಳೆದುಕೊಳ್ಳುತ್ತೇವೆ, ಆದರೆ ಸಿನಿಮಾ ಮತ್ತು ಜನರನ್ನು ನಗಿಸುವ ನಿಮ್ಮ ಸಾಮರ್ಥ್ಯವು ನಿಮ್ಮನ್ನು ವರ್ಷಗಳ ಕಾಲ ಜೀವಂತವಾಗಿರಿಸುತ್ತದೆ. ಓಂ ಶಾಂತಿ," ಎಂದು ಬರೆದಿದ್ದಾರೆ.

ಗಾಯಕ-ಸಂಗೀತ ಸಂಯೋಜಕ ಅದ್ನಾನ್ ಸಾಮಿ ಅವರು ಅಸ್ರಾನಿ ಅವರ ಬದ್ಧತೆಯನ್ನು ನೆನಪಿಸಿಕೊಂಡರು. ಅದ್ನಾನ್ ಅವರ 'ಲಿಫ್ಟ್ ಕರಾ ದೇ' ಮ್ಯೂಸಿಕ್ ವಿಡಿಯೋದಲ್ಲಿ ಅಸ್ರಾನಿ ಅವರು 'ಶೋಲೆ' ಸಿನಿಮಾದ ತಮ್ಮ ಐಕಾನಿಕ್ ಜೈಲರ್ ಪಾತ್ರವನ್ನು ಮರುಸೃಷ್ಟಿಸಲು ಎಷ್ಟು ಶ್ರಮಿಸಿದ್ದರು ಎಂಬುದನ್ನು ವಿವರಿಸಿದ್ದಾರೆ. ಅವರು ಅಷ್ಟೊಂದು ಬದ್ಧರಾಗಿದ್ದರು. ವಿಗ್, ಮೀಸೆ ಮತ್ತು ಸಮವಸ್ತ್ರ ಸೇರಿದಂತೆ ತಮ್ಮ ಪಾತ್ರದ ಪ್ರತಿಯೊಂದು ಭಾಗವೂ 'ಶೋಲೆ' ಚಿತ್ರದ ಮೂಲ ತಯಾರಕರಿಂದಲೇ ಬಂದಿದೆ ಎಂದು ಖಚಿತಪಡಿಸಿಕೊಂಡಿದ್ದರು ಎಂದು ಸಾಮಿ ತಿಳಿಸಿದ್ದಾರೆ.

ಮುಂಬೈನಲ್ಲಿ ಅಂತ್ಯಕ್ರಿಯೆ

ಹಿರಿಯ ನಟನ ಅಂತಿಮ ವಿಧಿವಿಧಾನಗಳು ಮುಂಬೈನ ಸಾಂತಾಕ್ರೂಜ್ ಸ್ಮಶಾನದಲ್ಲಿ ನೆರವೇರಿತ್ತು. ಈ ಸಮಯದಲ್ಲಿ ಅವರ ಆಪ್ತ ಸ್ನೇಹಿತರು, ಕುಟುಂಬ ಮತ್ತು ಚಿತ್ರರಂಗದ ಸಹೋದ್ಯೋಗಿಗಳು ಉಪಸ್ಥಿತರಿದ್ದರು. ಅಸ್ರಾನಿ ಅವರು ಮರಣೋತ್ತರವಾಗಿ ಪ್ರಿಯದರ್ಶನ್ ಅವರ ಮುಂಬರುವ ಚಿತ್ರಗಳಾದ 'ಭೂತ್ ಬಂಗ್ಲಾ' ಮತ್ತು 'ಹೈವಾನ್' ನಲ್ಲಿ ಕಾಣಿಸಿಕೊಳ್ಳಲಿದ್ದಾರೆ.