Mid-day Meal| ಬಿಸಿಯೂಟ ಯೋಜನೆ: ಮೊಟ್ಟೆಗೆ ಬೆಲೆಯೇರಿಕೆ ಬರೆ; ಶಿಕ್ಷಕರಿಗೆ ಹೊರೆ

ಮಾರುಕಟ್ಟೆಯಲ್ಲಿ ಮೊಟ್ಟೆ ಬೆಲೆ ಏರಿಕೆ ಮತ್ತು ಸರ್ಕಾರದ ಹಳೆಯ ಅನುದಾನದ ದರ ನಡುವಿನ ಕಂದಕವು ಶಾಲಾ ಮಕ್ಕಳಿಗೆ ಬಿಸಿಯೂಟ ವಿತರಣೆ ಯೋಜನೆಗೆ ಮುಳ್ಳಾಗಿ ಪರಿಣಮಿಸಿದೆ. ಇಕ್ಕಟ್ಟಿನಲ್ಲಿ ಸಿಲುಕಿರುವ ಶಿಕ್ಷಕರು ತಾವೇ ತಮ್ಮ ಕೈಯ್ಯಿಂದ ಹಣ ತೆತ್ತು ಮಕ್ಕಳಿಗೆ ಮೊಟ್ಟೆ ನೀಡುತ್ತಾ ʼಸಂಕಟʼ ಪಡುತ್ತಿರುವುದು ರಾಜ್ಯದಲ್ಲಿ ಕಂಡುಬಂದಿದೆ.

 ಈ ಹಿಂದೆ ವಾರಕ್ಕೆ ಎರಡು ದಿನಗಳಿಗೆ ಸೀಮಿತವಾಗಿದ್ದ ಈ ಯೋಜನೆಯನ್ನು, ಈಗ ಅಜೀಂ ಪ್ರೇಮ್‌ಜೀ ಫೌಂಡೇಶನ್‌ನ ಸಹಯೋಗದೊಂದಿಗೆ ವಾರದ ಆರು ದಿನಗಳಿಗೂ ವಿಸ್ತರಿಸಿರುವುದು ಐತಿಹಾಸಿಕ ಹೆಜ್ಜೆಯಾಗಿದೆ. ಆದರೆ, ಮಾರುಕಟ್ಟೆಯ ಬೆಲೆ ಏರಿಕೆ ಮತ್ತು ಸರ್ಕಾರದ ಹಳೆಯ ಅನುದಾನದ ದರಗಳ ನಡುವಿನ ಕಂದಕವು ಈ ಯೋಜನೆಯ ಯಶಸ್ಸಿಗೆ ಮುಳ್ಳಾಗಿ ಪರಿಣಮಿಸಿದ್ದು, ಮಹತ್ವಾಕಾಂಕ್ಷಿ ಯೋಜನೆಯನ್ನು ಸಂಕಷ್ಟಕ್ಕೆ ದೂಡಿದೆ.

ರಾಜ್ಯದ ಸರ್ಕಾರಿ ಮತ್ತು ಅನುದಾನಿತ ಶಾಲೆಗಳ 1 ರಿಂದ 10 ನೇ ತರಗತಿಯ ವಿದ್ಯಾರ್ಥಿಗಳಿಗೆ ಮೊಟ್ಟೆಯನ್ನು ನೀಡಲಾಗುತ್ತಿದೆ (ಮೊಟ್ಟೆ ತಿನ್ನದವರಿಗೆ ಬಾಳೆಹಣ್ಣು ಅಥವಾ ಶೇಂಗಾ ಚಿಕ್ಕಿ). ಮಕ್ಕಳಲ್ಲಿ ಪ್ರೋಟೀನ್ ಮತ್ತು ಜೀವಸತ್ವಗಳ ಕೊರತೆಯನ್ನು ನೀಗಿಸುವುದು ಇದರ ಮುಖ್ಯ ಗುರಿ. ಆದರೆ, ಯಾವುದೇ ಯೋಜನೆ ಯಶಸ್ವಿಯಾಗಬೇಕಾದರೆ ಅದರ ಆರ್ಥಿಕ ನಿರ್ವಹಣೆ ವಾಸ್ತವಕ್ಕೆ ಹತ್ತಿರವಾಗಿರಬೇಕು. ಪ್ರಸ್ತುತ ಸರ್ಕಾರ ಒಂದು ಮೊಟ್ಟೆಗೆ ನಿಗದಿಪಡಿಸಿರುವ 6 ರೂಪಾಯಿ ಅನುದಾನವು ಇಂದಿನ ಮಾರುಕಟ್ಟೆ ಸ್ಥಿತಿಯಲ್ಲಿ ಎಳ್ಳಷ್ಟೂ ಸಾಕಾಗುತ್ತಿಲ್ಲ.

ಸರ್ಕಾರ ನಿಗದಿಪಡಿಸಿರುವ 6 ರೂಪಾಯಿಗಳಲ್ಲಿ ಕೇವಲ ಮೊಟ್ಟೆಯ ಖರೀದಿ ಮಾತ್ರವಲ್ಲದೆ, ಅದನ್ನು ಬೇಯಿಸಲು ಬೇಕಾದ ಇಂಧನ (ಗ್ಯಾಸ್ ಅಥವಾ ಕಟ್ಟಿಗೆ), ಮೊಟ್ಟೆ ಒಡೆಯದಂತೆ ಎಚ್ಚರವಹಿಸುವ ಶ್ರಮ ಮತ್ತು ಸಿಪ್ಪೆ ಸುಲಿಯುವ ಕೆಲಸದ ಕೂಲಿಯೂ ಸೇರಿದೆ ಎಂದು ಹೇಳಲಾಗುತ್ತಿದೆ. ಆದರೆ ವಾಸ್ತವ ಏನೆಂದರೆ ಪ್ರಸ್ತುತ ಮಾರುಕಟ್ಟೆಯಲ್ಲಿ ಒಂದು ಮೊಟ್ಟೆಯ ಸಗಟು ದರವೇ 7 ರೂ.ಗಿಂತ ಹೆಚ್ಚಿದೆ. ಚಿಲ್ಲರೆ ಮಾರುಕಟ್ಟೆಯಲ್ಲಿ ಇದು 8 ರೂಪಾಯಿ ದಾಟುತ್ತದೆ. ಮೊಟ್ಟೆ ಬೇಯಿಸಲು ಬಳಸುವ ಎಲ್.ಪಿ.ಜಿ ಸಿಲಿಂಡರ್ ಬೆಲೆ ಗಗನಕ್ಕೇರಿದೆ.

ಒಂದು ಮೊಟ್ಟೆಗೆ ಸರ್ಕಾರ ನೀಡುವ 6 ರೂಪಾಯಿಯಲ್ಲಿ ಮೊಟ್ಟೆಯನ್ನೇ ಖರೀದಿಸಲು ಸಾಧ್ಯವಾಗದಿದ್ದಾಗ, ಇಂಧನ ವೆಚ್ಚವನ್ನು ಭರಿಸುವುದು ಹೇಗೆ ಎಂಬುದು ಬಿಸಿಯೂಟದ ಜವಾಬ್ದಾರಿ ಹೊತ್ತ ಶಿಕ್ಷಕರ ಪ್ರಶ್ನೆಯಾಗಿದೆ.  ಉದಾಹರಣೆಗೆ, 100 ಮಕ್ಕಳಿರುವ ಶಾಲೆಯಲ್ಲಿ ಒಂದು ದಿನದ ಮೊಟ್ಟೆ ವಿತರಣೆಗೆ ಸರ್ಕಾರ 600 ರೂಪಾಯಿ ನೀಡುತ್ತದೆ. ಆದರೆ ಶಿಕ್ಷಕರು ಮಾರುಕಟ್ಟೆಯಲ್ಲಿ 750 ರೂಪಾಯಿ ನೀಡಿ ಮೊಟ್ಟೆ ತರಬೇಕಾಗುತ್ತದೆ. ಅಂದರೆ ಪ್ರತಿ ಬಾರಿ 150 ರೂ. ವ್ಯತ್ಯಾಸ ಬೀಳುತ್ತದೆ.  ತಿಂಗಳಿಗೆ ಸುಮಾರು 1,200 ರಿಂದ 1,500 ರೂ. ಗಳನ್ನು ಶಿಕ್ಷಕರು ತಮ್ಮ ಸ್ವಂತ ಸಂಬಳದಿಂದ ಭರಿಸುತ್ತಿದ್ದಾರೆ.

ಬಿಸಿಯೂಟದ ಜತೆ ಮೊಟ್ಟೆ ಯೋಜನೆ

ಕರ್ನಾಟಕದ ಸರ್ಕಾರಿ ಶಾಲೆಗಳಲ್ಲಿ ಕಲಿಯುತ್ತಿರುವ ಲಕ್ಷಾಂತರ ವಿದ್ಯಾರ್ಥಿಗಳ ಪಾಲಿಗೆ 'ಬಿಸಿಯೂಟ' ಮತ್ತು 'ಮೊಟ್ಟೆ ವಿತರಣೆ' ಕೇವಲ ಆಹಾರವಲ್ಲ, ಅದು ಅವರ ಶಿಕ್ಷಣದ ಹಕ್ಕಿನ ಭಾಗವಾಗಿದೆ. ಅಲ್ಲದೇ, ಅದು ಅವರ ಶಾರೀರಿಕ ಮತ್ತು ಮಾನಸಿಕ ಬೆಳವಣಿಗೆಯ ಮೂಲಾಧಾರ. ಮಕ್ಕಳಲ್ಲಿ ಕಂಡುಬರುವ ತೀವ್ರ ಅಪೌಷ್ಟಿಕತೆ, ರಕ್ತಹೀನತೆಯನ್ನು ಹೋಗಲಾಡಿಸಲು ಮತ್ತು ಬಡ ಮಕ್ಕಳನ್ನು ಸರ್ಕಾರಿ ಶಾಲೆಗಳತ್ತ ಆಕರ್ಷಿಸಲು ರಾಜ್ಯ ಸರ್ಕಾರವು ಜಾರಿಗೆ ತಂದ 'ಮೊಟ್ಟೆ ಯೋಜನೆ' ದೇಶದಲ್ಲೇ ಒಂದು ಮಾದರಿ ಕಾರ್ಯಕ್ರಮವಾಗಿದೆ.

ಶಿಕ್ಷಕರ ಮೇಲಿನ ಆರ್ಥಿಕ ಮತ್ತು ಮಾನಸಿಕ ಹೊರೆ

ಶಾಲೆಯ ಮುಖ್ಯೋಪಾಧ್ಯಾಯರು ಮತ್ತು ಬಿಸಿಯೂಟದ ಜವಾಬ್ದಾರಿ ಹೊತ್ತ ಶಿಕ್ಷಕರು ಈ ಯೋಜನೆಯನ್ನು ಸ್ಥಗಿತಗೊಳಿಸುವಂತಿಲ್ಲ. ಮಕ್ಕಳಿಗೆ "ಇಂದು ಮೊಟ್ಟೆ ಇಲ್ಲ" ಎಂದು ಹೇಳುವುದು ಅವರ ಭಾವನೆಗಳಿಗೆ ಧಕ್ಕೆ ತರುತ್ತದೆ. ಹೀಗಾಗಿ, ಅನಿವಾರ್ಯವಾಗಿ ಶಿಕ್ಷಕರು ಸಂಕಷ್ಟಗಳನ್ನು ಎದುರಿಸುತ್ತಿದ್ದಾರೆ.  ಪ್ರತಿ ಮೊಟ್ಟೆಗೆ 1.50 ರಿಂದ 2 ರೂಪಾಯಿಗಳ ವ್ಯತ್ಯಾಸವನ್ನು ಶಿಕ್ಷಕರು ತಮ್ಮ ಜೇಬಿನಿಂದಲೇ ಭರಿಸುತ್ತಿದ್ದಾರೆ.

ತಿಂಗಳ ಅಂತ್ಯಕ್ಕೆ ಇದು ಸಾವಿರಾರು ರೂಪಾಯಿಗಳ ಹೊರೆಯಾಗುತ್ತಿದೆ. ಕೆಲವು ಶಾಲೆಗಳಲ್ಲಿ ಶಿಕ್ಷಕರು ಅನಿವಾರ್ಯವಾಗಿ ಗ್ರಾಮದ ಮುಖಂಡರ ಅಥವಾ ದಾನಿಗಳ ಮುಂದೆ ಕೈಚಾಚುವ ಪರಿಸ್ಥಿತಿ ನಿರ್ಮಾಣವಾಗಿದೆ. ಇದು ಶಿಕ್ಷಕರ ಘನತೆಗೆ ಕುಂದು ತರುತ್ತಿದೆ.  ಕಡಿಮೆ ಬೆಲೆಗೆ ಮೊಟ್ಟೆ ತರಲು ಹೋದರೆ ಸಣ್ಣ ಗಾತ್ರದ ಅಥವಾ ಹಳೆಯ ಮೊಟ್ಟೆಗಳು ಬರುವ ಸಾಧ್ಯತೆ ಇರುತ್ತದೆ ಎಂದು ಮೂಲಗಳು ಹೇಳಿವೆ. 

ಗುಣಮಟ್ಟ ಮತ್ತು ಒತ್ತಡದ ನಡುವೆ ಶಿಕ್ಷಕರು

ಮೊಟ್ಟೆ ಯೋಜನೆಯಲ್ಲಿ ಕೇವಲ ಮೊಟ್ಟೆಯ ಬೆಲೆಯಷ್ಟೇ ಮುಖ್ಯವಲ್ಲ. ವಾರದಲ್ಲಿ 6 ದಿನ ಮೊಟ್ಟೆ ಬೇಯಿಸಬೇಕೆಂದರೆ ಗ್ಯಾಸ್ ಸಿಲಿಂಡರ್ ಬಳಕೆ ದುಪ್ಪಟ್ಟಾಗುತ್ತದೆ. ಸರ್ಕಾರ ನೀಡುವ ಅಲ್ಪ ಮೊತ್ತದಲ್ಲಿ ಹೆಚ್ಚುವರಿ ಸಿಲಿಂಡರ್ ಪಡೆಯುವುದು ಅಸಾಧ್ಯ. ಗ್ರಾಮೀಣ ಭಾಗದ ಶಾಲೆಗಳಿಗೆ ಮಾರುಕಟ್ಟೆಯಿಂದ ಮೊಟ್ಟೆ ತರಲು ಹೋಗಿ ಬರುವ ಸಾರಿಗೆ ವೆಚ್ಚವೂ ಶಿಕ್ಷಕರ ಪಾಲಿಗೆ ದೊಡ್ಡ ಹೊರೆಯಾಗಿದೆ.

ಸರ್ಕಾರದ ಅನುದಾನ ಕಡಿಮೆ ಇದೆ ಎಂದು ಶಿಕ್ಷಕರು ಕಡಿಮೆ ದರದ ಅಥವಾ ಗಾತ್ರದಲ್ಲಿ ಸಣ್ಣದಿರುವ ಮೊಟ್ಟೆಗಳನ್ನು ತಂದರೆ, ಶಾಲಾ ಅಭಿವೃದ್ಧಿ ಮತ್ತು ಮೇಲುಸ್ತುವಾರಿ ಸಮಿತಿ (ಎಸ್‌ಡಿಎಂಸಿ ) ಹಾಗೂ ಪೋಷಕರು ಪ್ರಶ್ನಿಸುತ್ತಾರೆ. ಮಕ್ಕಳ ಆರೋಗ್ಯದ ವಿಷಯದಲ್ಲಿ ರಾಜಿ ಮಾಡಿಕೊಳ್ಳಲು ಸಾಧ್ಯವಿಲ್ಲ.

ಇತ್ತ ಹಣದ ಕೊರತೆ, ಅತ್ತ ಗುಣಮಟ್ಟದ ಒತ್ತಡ – ಈ ಎರಡರ ನಡುವೆ ಸಿಲುಕಿರುವ ಶಿಕ್ಷಕರು ಮಾನಸಿಕ ನೆಮ್ಮದಿ ಕಳೆದುಕೊಳ್ಳುತ್ತಿದ್ದಾರೆ. ಶಿಕ್ಷಕರು ಬೋಧನೆಯ ಕಡೆಗೆ ಗಮನ ಹರಿಸಬೇಕಾದ ಸಮಯದಲ್ಲಿ, ಮೊಟ್ಟೆಯ ಹರಾಜು ದರ ಮತ್ತು ಮಾರುಕಟ್ಟೆಯ ಚೌಕಾಶಿಯಲ್ಲಿ ತೊಡಗಬೇಕಾಗಿರುವುದು ದುರದೃಷ್ಟಕರ ಎಂದು ಹೆಸರೇಳಲು ಇಚ್ಛಿಸದ ಶಿಕ್ಷಕರೊಬ್ಬರು ದ ಫೆಡರಲ್‌ ಕರ್ನಾಟಕದೊಂದಿಗೆ ಅಳಲು ತೋಡಿಕೊಂಡಿದ್ದಾರೆ. 

ಋತುಮಾನದ ಏರಿಳಿತ ಮತ್ತು ತಾಂತ್ರಿಕ ಸಮಸ್ಯೆಗಳು

ಮೊಟ್ಟೆಯ ದರವು ವರ್ಷಪೂರ್ತಿ ಸ್ಥಿರವಾಗಿರುವುದಿಲ್ಲ. ಚಳಿಗಾಲದಲ್ಲಿ ಮತ್ತು ಹಬ್ಬದ ಸೀಸನ್‌ನಲ್ಲಿ ಮೊಟ್ಟೆಯ ಬೇಡಿಕೆ ಹೆಚ್ಚಾದಾಗ ದರ ಏರುತ್ತದೆ. ಆದರೆ ಸರ್ಕಾರದ ಅನುದಾನ ಮಾತ್ರ ವರ್ಷದ 365 ದಿನವೂ 6 ರೂಪಾಯಿಗೆ ಸ್ಥಿರವಾಗಿರುತ್ತದೆ. ಈ ಅವೈಜ್ಞಾನಿಕ ಪದ್ಧತಿಯಿಂದಾಗಿ ಶಿಕ್ಷಕರು ಆರ್ಥಿಕ ನಷ್ಟ ಅನುಭವಿಸುವುದು ಅನಿವಾರ್ಯವಾಗಿದೆ. ಅಲ್ಲದೆ, ಕೆಲವು ಶಾಲೆಗಳಿಗೆ ಅನುದಾನ ಬಿಡುಗಡೆಯಾಗುವುದು ಕೂಡ ವಿಳಂಬವಾಗುತ್ತದೆ, ಇದರಿಂದಾಗಿ ಶಿಕ್ಷಕರು ಕೈಗಡ ಸಾಲ ಮಾಡಿ ಯೋಜನೆಯನ್ನು ಮುಂದುವರಿಸಬೇಕಾದ ಪರಿಸ್ಥಿತಿ ಇದೆ ಎಂದು ಹೇಳಲಾಗಿದೆ. 

ಅಜೀಮ್ ಪ್ರೇಮ್‌ಜೀ ಫೌಂಡೇಶನ್ ಸಹಯೋಗದ ‘ಮೊಟ್ಟೆ ಯೋಜನೆ’

ಅಜೀಮ್ ಪ್ರೇಮ್‌ಜೀ ಫೌಂಡೇಶನ್ 1,500 ಕೋಟಿ ರೂ. ನೀಡಿದ್ದರೂ, ಆ ಹಣವು ನೇರವಾಗಿ ಮೊಟ್ಟೆಯ ಪೂರೈಕೆಗೆ ಬಳಕೆಯಾಗುವ ಬದಲಿಗೆ ಖರೀದಿ ಪ್ರಕ್ರಿಯೆಯಲ್ಲಿನ ಲೋಪಗಳಿಂದಾಗಿ ವ್ಯರ್ಥವಾಗುತ್ತಿದೆ. ಏಜೆನ್ಸಿಗಳು ಸರಿಯಾದ ಸಮಯಕ್ಕೆ ಮೊಟ್ಟೆ ನೀಡದಿದ್ದಾಗ, ಮಕ್ಕಳಿಗೆ ಮೊಟ್ಟೆ ತಪ್ಪಿಸಬಾರದು ಎಂಬ ಕಾರಣಕ್ಕೆ ಶಿಕ್ಷಕರು ಸಾಲ ಮಾಡಿಯಾದರೂ ಮೊಟ್ಟೆ ಖರೀದಿಸುತ್ತಿದ್ದಾರೆ. ಇದು ಶೈಕ್ಷಣಿಕ ವಾತಾವರಣದ ಮೇಲೆ ನಕಾರಾತ್ಮಕ ಪರಿಣಾಮ ಬೀರುತ್ತಿದೆ. ರಾಜ್ಯದ ಸರ್ಕಾರಿ ಶಾಲೆಗಳಲ್ಲಿ ಮಕ್ಕಳ ಪೌಷ್ಟಿಕಾಂಶದ ಮಟ್ಟವನ್ನು ಸುಧಾರಿಸಲು ರಾಜ್ಯ ಸರ್ಕಾರವು ಹಮ್ಮಿಕೊಂಡಿರುವ ‘ಮೊಟ್ಟೆ ವಿತರಣೆ’ ಯೋಜನೆಯು ಈಗ ಹೊಸ ಹಂತಕ್ಕೆ ತಲುಪಿದೆ.

ಅಜೀಮ್ ಪ್ರೇಮ್‌ಜೀ ಫೌಂಡೇಶನ್‌ ನೀಡಿದ 1,500 ಕೋಟಿ ರೂ.ಗಳ ಬೃಹತ್ ಅನುದಾನದ ನೆರವಿನಿಂದ, ಈ ಹಿಂದೆ ವಾರಕ್ಕೆ ಎರಡು ದಿನವಿದ್ದ ಯೋಜನೆಯನ್ನು ಈಗ ಆರು ದಿನಗಳಿಗೆ ವಿಸ್ತರಿಸಲಾಗಿದೆ.

ಆದರೆ, ಈ ವಿಸ್ತರಣೆಯು ಹೈನುಗಾರಿಕೆ ವಲಯ ಮತ್ತು ಶೈಕ್ಷಣಿಕ ವ್ಯವಸ್ಥೆಯ ಮೇಲೆ ಅಭೂತಪೂರ್ವ ಒತ್ತಡವನ್ನು ಸೃಷ್ಟಿಸಿದೆ. ಯೋಜನೆಯ ಉದ್ದೇಶ ಉನ್ನತವಾಗಿದ್ದರೂ, ಮಾರುಕಟ್ಟೆಯ ಏರಿಳಿತ ಮತ್ತು ಪೂರೈಕೆ ಸರಪಳಿಯ ದೋಷಗಳು ಶಿಕ್ಷಕರನ್ನು ಆರ್ಥಿಕ ಸಂಕಷ್ಟಕ್ಕೆ ತಳ್ಳಿವೆ.

ಪರಿಹಾರೋಪಾಯಗಳು ಮತ್ತು ಶಿಫಾರಸುಗಳು

ಈ ಮಹತ್ವಾಕಾಂಕ್ಷಿ ಯೋಜನೆಯು ವಿಫಲವಾಗದಂತೆ ತಡೆಯಲು ಸರ್ಕಾರ ಈ ಕೂಡಲೇ ಅಗತ್ಯ ಕ್ರಮಗಳನ್ನು ಕೈಗೊಳ್ಳಬೇಕಿದೆ. ಮಾರುಕಟ್ಟೆಯ ಇಂದಿನ ದರಕ್ಕೆ ಅನುಗುಣವಾಗಿ ಪ್ರತಿ ಮೊಟ್ಟೆಯ ಅನುದಾನವನ್ನು ತಕ್ಷಣವೇ 6 ರೂ.ಯಿಂದ ಕನಿಷ್ಠ 8.50 ರೂ.ನಿಂದ 9 ರೂ.ವರೆಗೆ ಹೆಚ್ಚಿಸಬೇಕು.

ವಾರದ ಎರಡು ದಿನ ಏಜೆನ್ಸಿಗಳು ನೀಡುವಂತೆ, ಉಳಿದ ನಾಲ್ಕು ದಿನಗಳಿಗೂ ಸರ್ಕಾರವೇ ಟೆಂಡರ್ ಮೂಲಕ ಅಥವಾ ಕುಕ್ಕುಟ ಮಂಡಳಿಯ ಮೂಲಕ ಶಾಲೆಗಳಿಗೆ ನೇರವಾಗಿ ಮೊಟ್ಟೆ ಪೂರೈಸುವ ವ್ಯವಸ್ಥೆ ಮಾಡಬೇಕು. ಇದರಿಂದ ಶಿಕ್ಷಕರು ಆರ್ಥಿಕ ಹೊಣೆಗಾರಿಕೆಯಿಂದ ಮುಕ್ತರಾಗುತ್ತಾರೆ.

ಮೊಟ್ಟೆ ಬೇಯಿಸಲು ತಗಲುವ ಇಂಧನ ವೆಚ್ಚಕ್ಕೆ ಪ್ರತ್ಯೇಕವಾದ ಅನುದಾನವನ್ನು ಬಿಸಿಯೂಟದ ನಿಧಿಯಿಂದ ಬಿಡುಗಡೆ ಮಾಡಬೇಕು. ಮೊಟ್ಟೆಯ ಬೆಲೆ ಸ್ಥಿರವಾಗಿರುವುದಿಲ್ಲ.

ಆದ್ದರಿಂದ, ಜಿಲ್ಲಾಧಿಕಾರಿಗಳ ನೇತೃತ್ವದ ಸಮಿತಿಯು ಪ್ರತಿ ತಿಂಗಳು ಮಾರುಕಟ್ಟೆ ದರವನ್ನು ಪರಿಶೀಲಿಸಿ, ಅದಕ್ಕೆ ತಕ್ಕಂತೆ ಅನುದಾನ ಬಿಡುಗಡೆ ಮಾಡುವ 'ಡೈನಾಮಿಕ್ ಪ್ರೈಸಿಂಗ್' ಪದ್ಧತಿಯನ್ನು ಜಾರಿಗೆ ತರಬೇಕು. ಶಾಲೆಯ ದೂರದ ಆಧಾರದ ಮೇಲೆ ಸಾರಿಗೆ ವೆಚ್ಚವನ್ನು ಬಿಲ್‌ನಲ್ಲಿ ಸೇರಿಸಲು ಅವಕಾಶ ನೀಡಬೇಕು. ಶಿಕ್ಷಕರನ್ನು ಕೇವಲ ಉಸ್ತುವಾರಿಗೆ ಸೀಮಿತಗೊಳಿಸಿ, ಖರೀದಿ ಮತ್ತು ಆರ್ಥಿಕ ವಹಿವಾಟಿನ ಹೊಣೆಯನ್ನು ಸರ್ಕಾರ ಅಥವಾ ಸ್ಥಳೀಯ ಸಂಸ್ಥೆಗಳೇ ವಹಿಸಿಕೊಳ್ಳಬೇಕು. ಬಿಸಿಯೂಟದ ಅಡುಗೆ ಸಿಬ್ಬಂದಿಗೆ ನೀಡುವ ಗೌರವಧನ ಹೆಚ್ಚಿಸಬೇಕು ಎಂಬ ಒತ್ತಾಯವು ಶಿಕ್ಷಕ ವರ್ಗದಿಂದ ಕೇಳಿಬಂದಿದೆ.

ಸರ್ಕಾರವು ಅನುದಾನ ಹೆಚ್ಚಿಸಬೇಕು

ಮೊಟ್ಟೆ ವಿತರಣೆಗೆ ಹಳೆಯ ದರ ನೀಡುತ್ತಿರುವ ಸರ್ಕಾರದ ಕ್ರಮದ ಕುರಿತು ದ ಫೆಡರಲ್‌ ಕರ್ನಾಟಕ ಜತೆ ಮಾತನಾಡಿದ ಶಾಲಾ ಮಕ್ಕಳ ಪರ ಹೋರಾಟಗಾರರಾದ ಮತ್ತು ಸಾರ್ವಜನಿಕ ಆರೋಗ್ಯ ವೈದ್ಯೆ ಡಾ. ಸಿಲ್ವಿಯಾ ಕರ್ಪಗಂ, ರಾಜ್ಯ ಸರ್ಕಾರವು ಮೊಟ್ಟೆ ವಿತರಣೆಯ ಯೋಜನೆ ಅನುಷ್ಠಾನಗೊಳಿಸಿರುವುದು ಉತ್ತಮ ಕಾರ್ಯ. ಆದರೆ, ಅದನ್ನು ಯಶಸ್ವಿಯಾಗಿ ಮುಂದುವರಿಸಿಕೊಂಡು ಹೋಗುವುದು ಸಹ ಅಷ್ಟೇ ಮುಖ್ಯವಾಗಿರುತ್ತದೆ. ಬಜೆಟ್‌ನಲ್ಲಿ ಸರಿಯಾಗಿ ಅನುದಾನ ನೀಡುತ್ತಿಲ್ಲ. 

ಇದರಿಂದ ಶಾಲೆಯ ಶಿಕ್ಷಕರಿಗೆ ಹೆಚ್ಚುವರಿ ಹೊಣೆಯಾಗಿದೆ. ಮೊಟ್ಟೆಯ ದರ ಹೆಚ್ಚಳವಾಗಿದ್ದರೂ ಸರ್ಕಾರ ಮಾತ್ರ ಅದಕ್ಕೆ ತಕ್ಕಂತೆ ಅನುದಾನ ಹೆಚ್ಚಳ ಮಾಡಿಲ್ಲ. ಇದರಿಂದ ಶಿಕ್ಷಕರು ತಮ್ಮ ಜೇಬಿನಿಂದ ನೀಡಬೇಕಾದ ಪರಿಸ್ಥಿತಿ ಇದೆ. ಹೀಗಾಗಿ ರಾಜ್ಯ ಸರ್ಕಾರವು ಅನುದಾನ ಹೆಚ್ಚಳ ಮಾಡಬೇಕು. ಇಲ್ಲದಿದ್ದರೆ ಉತ್ತಮ ಯೋಜನೆಗಳು ನೆನೆಗುದಿಗೆ ಬೀಳುವ ಸಾಧ್ಯತೆ ಇರುತ್ತದೆ. ಇದಕ್ಕೆ ಅವಕಾಶ ನೀಡದೆ ಸರ್ಕಾರವು ಯೋಜನೆ ಮುಂದುವರಿಸಲು ಅನುದಾನವನ್ನು ಹೆಚ್ಚಿಸಬೇಕಾಗಿದೆ ಎಂದು ಆಗ್ರಹಿಸಿದರು.