ಬೆಂಗಳೂರು ಸುರಂಗ ರಸ್ತೆ : 'ದುಬಾರಿ, ವಿನಾಶಕಾರಿ': ತಜ್ಞರಿಂದ ತೀವ್ರ ವಿರೋಧ

ರಾಜ್ಯ ಸರ್ಕಾರದ ಮಹತ್ವಾಕಾಂಕ್ಷೆಯ ಬೆಂಗಳೂರು ಸುರಂಗ ರಸ್ತೆ ಯೋಜನೆಯ ವಿರುದ್ಧ ನಾಗರಿಕ ಸಮಾಜ ಹಾಗೂ ತಜ್ಞರ ವಲಯದಿಂದ ತೀವ್ರ ವಿರೋಧ ವ್ಯಕ್ತವಾಗಿದೆ. "ಇದು ನಗರದ ಪರಿಸರ ಮತ್ತು ಆರ್ಥಿಕತೆಗೆ ಮರಣ ಶಾಸನವಾಗಲಿದ್ದು, ಕೇವಲ ಶ್ರೀಮಂತರಿಗಷ್ಟೇ ಸೀಮಿತವಾದ ಈ ಯೋಜನೆಯನ್ನು ತಕ್ಷಣವೇ ಕೈಬಿಡಬೇಕು," ಎಂದು ವಿವಿಧ ಕ್ಷೇತ್ರಗಳ ಪರಿಣಿತರು ಒಕ್ಕೊರಲಿನಿಂದ ಆಗ್ರಹಿಸಿದ್ದಾರೆ. 

ಭಾನುವಾರ (ನ.30) ನಗರದ ಮಿಷನ್ ರಸ್ತೆಯಲ್ಲಿರುವ ಎಸ್.ಸಿ.ಎಂ. ಹೌಸ್‌ನಲ್ಲಿ 'ಬೆಂಗಳೂರು ಉಳಿಸಿ ಸಮಿತಿ' ಆಯೋಜಿದ್ದ ಜನಸಮಾವೇಶದಲ್ಲಿ ಪರಿಸರ ವಿಜ್ಞಾನಿಗಳು, ಭೂವಿಜ್ಞಾನಿಗಳು ಹಾಗೂ ಸಾರಿಗೆ ತಜ್ಞರು ಯೋಜನೆಯ ಆತಂಕಕಾರಿ ಅಂಶಗಳನ್ನು ಬಿಚ್ಚಿಟ್ಟರು.

ಆರ್ಥಿಕ ಹೊರೆ ಮತ್ತು ಅವೈಜ್ಞಾನಿಕತೆ

ಕಾರ್ಯಕ್ರಮದ ನೇತೃತ್ವ ವಹಿಸಿದ್ದ ಬೆಂಗಳೂರು ಉಳಿಸಿ ಸಮಿತಿಯ ಸಂಚಾಲಕ ಡಾ. ಜಿ. ಶಶಿಕುಮಾರ್ ಅವರು ಮಾತನಾಡಿ, ಯೋಜನೆಯ ಆರ್ಥಿಕ ಮತ್ತು ವೈಜ್ಞಾನಿಕ ಲೋಪಗಳನ್ನು ಎತ್ತಿ ತೋರಿಸಿದರು. "ಈ ಯೋಜನೆಯ ವೆಚ್ಚವು ಅಂದಾಜು 70,000 ಕೋಟಿ ರೂಪಾಯಿಗೆ ಏರಿಕೆಯಾಗುವ ಸಾಧ್ಯತೆಯಿದೆ. ಇದರ ಹೊರೆಯನ್ನು ಮುಂದಿನ 40 ವರ್ಷಗಳ ಕಾಲ ನಾಗರಿಕರೇ ತೆರಿಗೆ ಮತ್ತು ಟೋಲ್ ರೂಪದಲ್ಲಿ ಹೊರಬೇಕಾಗುತ್ತದೆ," ಎಂದು ಎಚ್ಚರಿಸಿದರು.

ಅಂಕಿಅಂಶಗಳ ಮೂಲಕ ಯೋಜನೆಯ ವೈಫಲ್ಯವನ್ನು ವಿವರಿಸಿದ ಅವರು, "ಸುರಂಗ ರಸ್ತೆಯಲ್ಲಿ ಗಂಟೆಗೆ ಕೇವಲ 1,800 ಕಾರು ಪ್ರಯಾಣಿಕರು ಸಂಚರಿಸಬಹುದು. ಆದರೆ, ಸಾರ್ವಜನಿಕ ಸಾರಿಗೆಯಾದ ನಮ್ಮ ಮೆಟ್ರೋದಲ್ಲಿ ಗಂಟೆಗೆ 69,000 ಮತ್ತು ಬಿಎಂಟಿಸಿ ಬಸ್‌ಗಳಲ್ಲಿ 1.75 ಲಕ್ಷ ಜನರು ಪ್ರಯಾಣಿಸುತ್ತಾರೆ. ಬಹುಸಂಖ್ಯಾತರಿಗೆ ಉಪಯೋಗವಾಗದ ಈ ಯೋಜನೆ ಯಾರಿಗಾಗಿ?" ಎಂದು ಪ್ರಶ್ನಿಸಿದರು. 

ತಲೆಮಾರಿನ ತನಕ ಹಾನಿ

ಸಾರಿಗೆ ತಜ್ಞ ಹಾಗೂ ಭಾರತೀಯ ವಿಜ್ಞಾನ ಸಂಸ್ಥೆಯ ಐಎಸ್‌ಟಿ ಲ್ಯಾಬ್‌ನ ಸಂಚಾಲಕರಾದ ಪ್ರೊ. ಆಶೀಶ್ ವರ್ಮಾ ಅವರು ವಿಡಿಯೋ ಸಂದೇಶದ ಮೂಲಕ ಸುರಂಗ ರಸ್ತೆ ಯೋಜನೆಯನ್ನು ತೀವ್ರವಾಗಿ ಖಂಡಿಸಿದರು. ಈ ಯೋಜನೆಯು ಸಾರ್ವಜನಿಕ ಹಣದ ದುರ್ವ್ಯಯವೆಂದ ಅವರು, ಇದು ನಗರಕ್ಕೆ ತಲೆಮಾರುಗಳವರೆಗೆ ಹಾನಿಯುಂಟುಮಾಡಲಿದೆ ಎಂದು ಆತಂಕ ವ್ಯಕ್ತಪಡಿಸಿದರು. "ಖಾಸಗಿ ವಾಹನಗಳ ಬಳಕೆಯನ್ನು ಉತ್ತೇಜಿಸುವ ಈ ಯೋಜನೆಯು, ಮೆಟ್ರೋ ಮತ್ತು ಉಪನಗರ ರೈಲುಗಳ ಪ್ರಯಾಣಿಕರ ಸಂಖ್ಯೆಯನ್ನು ಕಡಿಮೆ ಮಾಡಲಿದೆ. ಇದರಿಂದ ಬೆಂಗಳೂರಿನ ಸಮಗ್ರ ಚಲನಶೀಲತಾ (mobility plan) ಯೋಜನೆಯೇ ದುರ್ಬಲಗೊಳ್ಳಲಿದೆ," ಎಂದು ವರ್ಮಾ ಅಭಿಪ್ರಾಯಪಟ್ಟರು. ಅಲ್ಲದೆ, "ಈ ಸುರಂಗ ಮಾರ್ಗದಲ್ಲಿ ಪ್ರತಿ ಟ್ರಿಪ್‌ಗೆ 300 ರೂಪಾಯಿ ರವರೆಗೆ ಸುಂಕ ವಿಧಿಸುವುದರಿಂದ, ಇದು ಕೇವಲ ಶ್ರೀಮಂತರು ಮಾತ್ರ ಬಳಸಬಲ್ಲ ಯೋಜನೆಯಾಗಲಿದೆ. ಪರಿಸರದ ದೃಷ್ಟಿಯಿಂದಲೂ ಇದು ಅಪಾಯಕಾರಿಯಾಗಿದ್ದು, ಪ್ರವಾಹ ಮತ್ತು ಮಣ್ಣಿನ ಅಸ್ಥಿರತೆಯಂತಹ ಗಂಭೀರ ಸಮಸ್ಯೆಗಳಿಗೆ ಕಾರಣವಾಗಲಿದೆ," ಎಂದು ಅವರು ಎಚ್ಚರಿಸಿದರು. 

ಭಾರತೀಯ ವಿಜ್ಞಾನ ಸಂಸ್ಥೆಯ ಪರಿಸರ ವಿಜ್ಞಾನ ಕೇಂದ್ರದ ಸೈಂಟಿಫಿಕ್ ಆಫೀಸರ್ ಡಾ. ಟಿ.ವಿ. ರಾಮಚಂದ್ರ ಅವರು ಸುರಂಗ ರಸ್ತೆ ಯೋಜನೆಯ ಪರಿಸರ ಹಾನಿಯ ಬಗ್ಗೆ ಗಂಭೀರ ಎಚ್ಚರಿಕೆ ನೀಡಿದರು. "ಸುರಂಗ ಕೊರೆಯುವ ಕಾಮಗಾರಿಯಿಂದ ಅಂತರ್ಜಲದ ನೈಸರ್ಗಿಕ ಹರಿವು ಮತ್ತು ಜಲಚರಗಳ ಆವಾಸಸ್ಥಾನಕ್ಕೆ ಧಕ್ಕೆಯಾಗುವ ಅಪಾಯವಿದೆ. ಇದರಿಂದ ಉಂಟಾಗುವ ಪರಿಸರ ವೆಚ್ಚ ಶಾಶ್ವತವಾಗಿದ್ದು, ಇದು ನಗರದ ನೀರಿನ ಭದ್ರತೆಯ ಮೇಲೆ ನೇರ ದುಷ್ಪರಿಣಾಮ ಬೀರಲಿದೆ," ಎಂದು ಅವರು ಕಳವಳ ವ್ಯಕ್ತಪಡಿಸಿದರು. "ಬೆಂಗಳೂರು ಈಗಾಗಲೇ ಮಳೆ ಮತ್ತು ಪ್ರವಾಹವನ್ನು ತಡೆದುಕೊಳ್ಳುವ ಸಾಮರ್ಥ್ಯವನ್ನು ಕಳೆದುಕೊಂಡಿದೆ. ತೀವ್ರ ನಗರೀಕರಣ, ಸಸ್ಯವರ್ಗದ ನಾಶ, ಜಲಮೂಲಗಳ ಅತಿಕ್ರಮಣ ಮತ್ತು ಅವೈಜ್ಞಾನಿಕ ಕಾಂಕ್ರೀಟೀಕರಣವು ನಗರದ ಹವಾಮಾನದ ಮೇಲೆ ಗಂಭೀರ ಪರಿಣಾಮ ಬೀರುತ್ತಿದೆ," ಎಂದು ರಾಮಚಂದ್ರ ಉಲ್ಲೇಖಿಸಿದರು.

ಭೂಕಂಪದಂಥ ಗಂಭೀರ ಪರಿಣಾಮ

ನ್ಯಾಷನಲ್ ಇನ್ಸ್ಟಿಟ್ಯೂಟ್ ಆಫ್ ಅಡ್ವಾನ್ಸ್ಡ್ ಸ್ಟಡೀಸ್‌ನ ಪ್ರೊಫೆಸರ್ ಸಿ.ಪಿ. ರಾಜೇಂದ್ರನ್ ಅವರು ಸುರಂಗ ರಸ್ತೆ ಯೋಜನೆಯ ಬಗ್ಗೆ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದರು. "ಈ ಯೋಜನೆಯು ಜನೋಪಯೋಗಿಯಾಗುವ ಬದಲು ಕೇವಲ ಅಡ್ಡಪರಿಣಾಮಗಳನ್ನು ಬೀರುವ ಸಾಧ್ಯತೆಯೇ ಹೆಚ್ಚು," ಎಂದು ಅವರು ಅಭಿಪ್ರಾಯಪಟ್ಟರು. ಭೂವಿಜ್ಞಾನದ ದೃಷ್ಟಿಕೋನದಿಂದ ಈ ಯೋಜನೆಯ ಅಪಾಯಗಳನ್ನು ವಿವರಿಸಿದ ಅವರು, "ಸೂಕ್ಷ್ಮ ಪ್ರದೇಶಗಳಲ್ಲಿ ಇಂತಹ ಬೃಹತ್ ಪ್ರಮಾಣದ ಸುರಂಗ ಮಾರ್ಗಗಳನ್ನು ನಿರ್ಮಿಸುವುದು ಅಪಾಯಕಾರಿ. ಈ ಯೋಜನೆಗಳು ಸಾಮಾನ್ಯವಾಗಿ ಸ್ಥಳೀಯ ಭೂವಿಜ್ಞಾನ, ಜಲಭೂವಿಜ್ಞಾನ (hydrogeology) ಮತ್ತು ಭೂಕಂಪನದಂತಹ ಗಂಭೀರ ಅಪಾಯಗಳನ್ನು ಕಡೆಗಣಿಸುತ್ತವೆ. ಇದು ಸರಿಪಡಿಸಲಾಗದಂತಹ ಶಾಶ್ವತ ಪರಿಸರ ಹಾನಿಗೆ ನಾಂದಿ ಹಾಡಬಹುದು," ಎಂದು ರಾಜೇಂದ್ರನ್ ಎಚ್ಚರಿಸಿದರು

ಬೆಂಗಳೂರಿನ ಸ್ವತಂತ್ರ ನಗರ ಸಾರಿಗೆ ಯೋಜನಾ ತಜ್ಞರಾದ ಪ್ರೊ. ಎಂ.ಎನ್. ಶ್ರೀಹರಿ ಅವರು, "ಸುರಂಗ ರಸ್ತೆ ಯೋಜನೆಯು ನಗರದ ಸಂಚಾರ ದಟ್ಟಣೆಯನ್ನು ಪರಿಹರಿಸಲು ಅತ್ಯಂತ ದುಬಾರಿ ಹಾಗೂ ನಿಷ್ಪರಿಣಾಮಕಾರಿ ವಿಧಾನವಾಗಿದೆ," ಎಂದು ತೀವ್ರವಾಗಿ ಟೀಕಿಸಿದರು. "ಈ ಯೋಜನೆಯು ಕೇವಲ ಖಾಸಗಿ ಕಾರು ಬಳಕೆದಾರರಿಗೆ ಮಾತ್ರ ಅನುಕೂಲ ಕಲ್ಪಿಸಲಿದ್ದು, ನಗರದ ಬಹುಮುಖ್ಯವಾದ ಸಾಮೂಹಿಕ ಸಾರಿಗೆ ಅಗತ್ಯಗಳನ್ನು ಸಂಪೂರ್ಣವಾಗಿ ಕಡೆಗಣಿಸಿದೆ. ಭೌಗೋಳಿಕವಾಗಿ ಸುರಂಗ ಮಾರ್ಗಗಳು ಮುಂಬೈ ಅಥವಾ ಚೆನ್ನೈನಂತಹ ಕರಾವಳಿ ನಗರಗಳಿಗೆ ಹೆಚ್ಚು ಸೂಕ್ತವೇ ಹೊರತು ಬೆಂಗಳೂರಿಗಲ್ಲ," ಎಂದು ಅವರು ವಿಶ್ಲೇಷಿಸಿದರು. ಮುಂದುವರಿದು, "ಜನಸಾಮಾನ್ಯರ ಪರವಾಗಿಲ್ಲದ ಈ ಅನಗತ್ಯ ಯೋಜನೆಯನ್ನು ಕೈಬಿಟ್ಟು, ಸಾಮೂಹಿಕ ಸಾರ್ವಜನಿಕ ಸಾರಿಗೆ ವ್ಯವಸ್ಥೆಯನ್ನು ವಿಸ್ತರಿಸುವಲ್ಲಿ ಸರ್ಕಾರ ಹೂಡಿಕೆ ಮಾಡಬೇಕು. ಬೆಂಗಳೂರಿನ ಸಂಚಾರ ಸಮಸ್ಯೆಗೆ ಸುರಂಗ ಮಾರ್ಗ ಪರಿಹಾರವಲ್ಲ; ಬದಲಾಗಿ ನಗರಕ್ಕೆ ವೈಜ್ಞಾನಿಕ, ಎಲ್ಲರನ್ನೂ ಒಳಗೊಳ್ಳುವ (ಅಂತರ್ಗತ) ಮತ್ತು ಸುಸ್ಥಿರವಾದ ಸಂಚಾರ ವ್ಯವಸ್ಥೆಯ ಅಗತ್ಯವಿದೆ," ಎಂದು ಅವರು ಪ್ರತಿಪಾದಿಸಿದರು.

ಬಸ್​​ಗಳ ಸಂಖ್ಯೆ ಹೆಚ್ಚಿಸಿ

ಸಿವಿಕ್ ಬೆಂಗಳೂರು ಸಂಸ್ಥೆಯ ಶ್ರೀಮತಿ ಕಾತ್ಯಾಯಿನಿ ಚಾಮರಾಜ್ ಅವರು, "ದುಬಾರಿ ಮತ್ತು ಕಾರು ಕೇಂದ್ರಿತ ಯೋಜನೆಗಳ ಬದಲಿಗೆ ಬಿಎಂಟಿಸಿ (BMTC) ಬಸ್‌ಗಳ ಸಂಖ್ಯೆಯನ್ನು ಹೆಚ್ಚಿಸಬೇಕು. ಉಪನಗರ ರೈಲು ವ್ಯವಸ್ಥೆಯನ್ನು ಸುಧಾರಿಸಿ, 'ಲಾಸ್ಟ್ ಮೈಲ್' ಸಂಪರ್ಕವನ್ನು ಖಚಿತಪಡಿಸುವ ಮೂಲಕ ಸಾರ್ವಜನಿಕ ಸಾರಿಗೆಯನ್ನು ಜನಸಾಮಾನ್ಯರಿಗೆ ಕೈಗೆಟುಕುವಂತೆ ಮಾಡಬೇಕು," ಎಂದು ಸರ್ಕಾರವನ್ನು ಒತ್ತಾಯಿಸಿದರು.

ಬೆಂಗಳೂರು ವಿಶ್ವವಿದ್ಯಾಲಯದ ಭೂವಿಜ್ಞಾನ ವಿಭಾಗದ ನಿಕಟಪೂರ್ವ ಮುಖ್ಯಸ್ಥರಾದ ಪ್ರೊ. ರೇಣುಕಾ ಪ್ರಸಾದ್ ಅವರು, "ಬೆಂಗಳೂರು ಸುರಂಗ ರಸ್ತೆ ಯೋಜನೆಗೆ ಸಮಗ್ರ ಭೂವೈಜ್ಞಾನಿಕ ಸಮೀಕ್ಷೆ (Geological Survey) ನಡೆಸದಿರುವುದು ಆಘಾತಕಾರಿ ಸಂಗತಿ," ಎಂದು ಗಂಭೀರ ಕಳವಳ ವ್ಯಕ್ತಪಡಿಸಿದರು. "ಇಷ್ಟೊಂದು ಬೃಹತ್ ಪ್ರಮಾಣದ ಯೋಜನೆಗಳು ಸಾಮಾನ್ಯವಾಗಿ ಪರಿಸರದ ಮೇಲಾಗುವ ಪರಿಣಾಮಗಳನ್ನು ಕಡೆಗಣಿಸುತ್ತವೆ. ಇದು ಕೇವಲ ಪರಿಸರವನ್ನಷ್ಟೇ ಅಲ್ಲದೆ, ನಗರದ ಭೌಗೋಳಿಕ ರಚನೆಯ ಮೇಲೆಯೇ ದುಷ್ಪರಿಣಾಮ ಬೀರಲಿದೆ," ಎಂದು ಅವರು ಎಚ್ಚರಿಸಿದರು.

ಈ ಸಭೆಯಲ್ಲಿ ಕರ್ನಾಟಕದ ಮಾಜಿ ಅಡ್ವೊಕೇಟ್ ಜನರಲ್ ಪ್ರೊ. ರವಿವರ್ಮ ಕುಮಾರ್, ಖ್ಯಾತ ಸಂಧಿವಾತ ತಜ್ಞ ಡಾ. ಧರ್ಮಾನಂದ್ ಹಾಗೂ ಭೂವಿಜ್ಞಾನ ಪ್ರಾಧ್ಯಾಪಕ ಶ್ರೀ ಶ್ರೀನಿವಾಸ್ ಅವರು ಉಪಸ್ಥಿತರಿದ್ದರು.

ಬೆಂಗಳೂರು ಉಳಿಸಿ ಸಮಿತಿಯ ಸದಸ್ಯರಾದ ಶ್ರೀ ರಾಜೇಶ್ ಭಟ್ ಮಾತನಾಡಿ, ಸಮಿತಿಯು ಕಳೆದ ಮೂರು ದಶಕಗಳಿಂದ ಬೆಂಗಳೂರಿನಲ್ಲಿ ಸಕ್ರಿಯವಾಗಿ ಕಾರ್ಯನಿರ್ವಹಿಸುತ್ತಿದೆ. ಸುರಂಗ ರಸ್ತೆ ಯೋಜನೆಯ ವಿರುದ್ಧ ಕಳೆದ ಎರಡು ತಿಂಗಳುಗಳಿಂದ ನಿರಂತರವಾಗಿ ಪ್ರಚಾರ ನಡೆಸಲಾಗುತ್ತಿದೆ ಎಂದು ಅವರು ತಿಳಿಸಿದರು.

"ಈ ಯೋಜನೆ ಜಾರಿಯಾಗದಂತೆ ತಡೆಯಲು ಮತ್ತು ನಾಗರಿಕರ ಈ ಚಳವಳಿಯನ್ನು ಇನ್ನಷ್ಟು ಬಲಪಡಿಸಲು ಸಮಿತಿಯು ತನ್ನ ಅಭಿಯಾನವನ್ನು ತೀವ್ರಗೊಳಿಸಲು ಸಿದ್ಧವಿದೆ," ಎಂದು ರಾಜೇಶ್ ಭಟ್ ಸ್ಪಷ್ಟಪಡಿಸಿದರು. ಈ ಯೋಜನೆಯು ಈಗಾಗಲೇ ವಿರೋಧ ಪಕ್ಷಗಳು ಮತ್ತು ನಾಗರಿಕರಿಂದ ತೀವ್ರ ವಿರೋಧ ಎದುರಿಸುತ್ತಿದ್ದು, ಸಾರ್ವಜನಿಕರ ಸಹಿ ಸಂಗ್ರಹ ಮತ್ತು ಪ್ರತಿಭಟನೆಗಳ ಮೂಲಕ ಹೋರಾಟ ಮುಂದುವರೆದಿದೆ.