ದುಬೈನಲ್ಲಿ ಸ್ಕೂಬಾ ಡೈವಿಂಗ್ ವೇಳೆ ಭಾರತೀಯ ಎಂಜಿನಿಯರ್ ಸಾವು

ಬಕ್ರಿದ್​ ರಜಾದಿನದಂದು ದುಬೈನ ಜುಮೈರಾ ಬೀಚ್‌ನಲ್ಲಿ ಕುಟುಂಬದೊಂದಿಗೆ ಸ್ಕೂಬಾ ಡೈವಿಂಗ್ ಸೆಷನ್‌ನಲ್ಲಿ ಭಾಗವಹಿಸುತ್ತಿದ್ದ 29 ವರ್ಷದ ಭಾರತೀಯ ಎಂಜಿನಿಯರ್ ಇಸಾಕ್ ಪೌಲ್ ಒಲಕ್ಕೆಂಗಿಲ್ ಎಂಬುವರು ಮೃತಪಟ್ಟಿದ್ದಾರೆ ಎಂದು ಖಲೀಜ್ ಟೈಮ್ಸ್ ವರದಿ ಮಾಡಿದೆ.

ಕೇರಳ ಮೂಲದವರಾದ ಇಸಾಕ್, ಯುಎಇಯಲ್ಲಿ ಎಂಜಿನಿಯರ್ ಆಗಿ ಕಾರ್ಯನಿರ್ವಹಿಸುತ್ತಿದ್ದರು. ಶುಕ್ರವಾರ ನಡೆದ ಈ ದುರ್ಘಟನೆಯಲ್ಲಿ, ಅವರು ನೀರಿನೊಳಗೆ ಉಸಿರಾಟದ ತೊಂದರೆಯಿಂದ ಬಳಲಿದ ನಂತರ ಹೃದಯಾಘಾತಕ್ಕೆ ಒಳಗಾಗಿದ್ದಾರೆ ಎಂದು ಅವರ ಸಂಬಂಧಿಕರೊಬ್ಬರು ತಿಳಿಸಿದ್ದಾರೆ.

ಇಸಾಕ್‌ರ ಚಿಕ್ಕಪ್ಪ ಡೇವಿಡ್ ಪೈರಿಲೋಸ್ ಅವರ ಪ್ರಕಾರ, ಈ ಘಟನೆ ದುಬೈನಲ್ಲಿ ಸ್ಕೂಬಾ ಡೈವಿಂಗ್ ಪ್ರದೇಶದಲ್ಲಿ ತರಬೇತಿ ಸೆಷನ್ ಸಂದರ್ಭದಲ್ಲಿ ಸಂಭವಿಸಿದೆ. "ಇಸಾಕ್​ ಆರಂಭಿಕರ ತರಬೇತಿ ಸೆಷನ್‌ನಲ್ಲಿ ಭಾಗವಹಿಸುತ್ತಿದ್ದಾಗ, ಇಸಾಕ್ ಉಸಿರಾಟದ ತೊಂದರೆಯಿಂದ ಬಳಲಿದರು ಮತ್ತು ಗುಂಪಿನಿಂದ ದೂರವಾದರು," ಎಂದು ಡೇವಿಡ್ ಪೈರಿಲೋಸ್ ಹೇಳಿದ್ದಾರೆ. ಇವರು ಪ್ರಸ್ತುತ ಇಸಾಕ್ ಕುಟುಂಬಕ್ಕೆ ಕಾನೂನು ಕಾರ್ಯವಿಧಾನಗಳಲ್ಲಿ ಸಹಾಯ ಮಾಡುತ್ತಿದ್ದಾರೆ.

ಇಸಾಕ್‌ರನ್ನು ತಕ್ಷಣವೇ ನೀರಿನಿಂದ ಹೊರತೆಗೆದು ಸಮೀಪದ ಆಸ್ಪತ್ರೆಗೆ ಕರೆದೊಯ್ಯಲಾಯಿತು, ಆದರೆ ವೈದ್ಯರು ಅವರು ಮೃತಪಟ್ಟಿದ್ದಾರೆ ಎಂದು ಘೋಷಿಸಿದ್ದರು.

"ನಾವು ಪ್ರಸ್ತುತ ಇಸಾಕ್‌ನ ಮೃತದೇಹವನ್ನು ಭಾರತಕ್ಕೆ ಕೊಂಡೊಯ್ಯಲು ಅಗತ್ಯ ದಾಖಲೆಗಳನ್ನು ಪೂರ್ಣಗೊಳಿಸಲು ಸಂಬಂಧಿತ ಅಧಿಕಾರಿಗಳೊಂದಿಗೆ ಸಮನ್ವಯ ಸಾಧಿಸುತ್ತಿದ್ದೇವೆ," ಎಂದು ಡೇವಿಡ್ ಪೈರಿಲೋಸ್ ಖಲೀಜ್ ಟೈಮ್ಸ್‌ಗೆ ತಿಳಿಸಿದ್ದಾರೆ.