ಯುಪಿಐ ವಹಿವಾಟು ಈಗ ಸಿಕ್ಕಾಪಟ್ಟೆ ವೇಗ: ಕೇವಲ 8 ಸೆಕೆಂಡ್‌ಗಳಲ್ಲಿ ಹಣ ವರ್ಗಾವಣೆ!
ಈ ಎಪಿಐಗಳ ಮೂಲಕವೇ ವಹಿವಾಟಿನ ಸಂದರ್ಭದಲ್ಲಿ ಪಾವತಿದಾರರ ಬ್ಯಾಂಕ್, ಪಾವತಿಗಾರರ ಬ್ಯಾಂಕ್ ಮತ್ತು ಯುಪಿಎಐ ಆಪ್‌ಗಳ ನಡುವೆ ಡೇಟಾವನ್ನು ವಿನಿಮಯ ಮಾಡಿಕೊಳ್ಳಲಾಗುತ್ತದೆ.;
ನಿಮ್ಮ ಯುಪಿಐ (UPI) ಮೂಲಕ ಹಣ ಕಳುಹಿಸುವ ಪ್ರಕ್ರಿಯೆ ಇನ್ನು ಮುಂದೆ ಕ್ಷಣಮಾತ್ರದಲ್ಲಿ ಮುಗಿಯಲಿದೆ! ಹಿಂದೆ 15ರಿಂದ 30 ಸೆಕೆಂಡುಗಳಷ್ಟು ಸಮಯ ತೆಗೆದುಕೊಳ್ಳುತ್ತಿದ್ದ ವಹಿವಾಟುಗಳು, ಇಂಟರ್ನೆಟ್ ವೇಗ ಆಧರಿಸಿ ಕೇವಲ 8 ಸೆಕೆಂಡ್‌ಗಳಲ್ಲಿ ಪೂರ್ಣಗೊಳ್ಳಲಿವೆ. ಈ ಮಹತ್ತರ ಬದಲಾವಣೆಗೆ ನ್ಯಾಷನಲ್ ಪೇಮೆಂಟ್ಸ್ ಕಾರ್ಪೊರೇಷನ್ ಆಫ್ ಇಂಡಿಯಾ (NPCI) ಕೈಗೊಂಡಿರುವ ಹೊಸ ತಾಂತ್ರಿಕ ಅಪ್‌ಡೇಟ್ ಕಾರಣವಾಗಿದೆ.
ಈ ಅಪ್‌ಡೇಟ್ ಭಾರತದ 35 ಕೋಟಿಗೂ ಹೆಚ್ಚು ಯುಪಿಐ ಬಳಕೆದಾರರಿಗೆ ಡಿಜಿಟಲ್ ಪಾವತಿಗಳನ್ನು ಮತ್ತಷ್ಟು ಸುಲಭ ಮತ್ತು ವೇಗವಾಗಿಸಲಿದೆ. ಏಪ್ರಿಲ್ 26ರಂದೇ ಎನ್ಪಿಸಿಐ, ಯುಪಿಐನ ಪ್ರಮುಖ ತಾಂತ್ರಿಕ ಭಾಗವಾದ API ಗಳಿಗೆ (ಅಪ್ಲಿಕೇಶನ್ ಪ್ರೋಗ್ರಾಮಿಂಗ್ ಇಂಟರ್‌ಫೇಸ್) ಹೊಸ ವೇಗದ ಮಾನದಂಡಗಳನ್ನು (ಟರ್ನ್‌ಅರೌಂಡ್ ಟೈಮ್ - TAT) ಅಳವಡಿಸಿರುವುದಾಗಿ ತಿಳಿಸಿತ್ತು.
ಈ ಎಪಿಐಗಳು, ನೀವು ಹಣ ಕಳುಹಿಸುವಾಗ ನಿಮ್ಮ ಬ್ಯಾಂಕ್, ಹಣ ಪಡೆಯುವವರ ಬ್ಯಾಂಕ್ ಮತ್ತು ನಿಮ್ಮ ಯುಪಿಐ ಆ್ಯಪ್ ನಡುವೆ ಮಾಹಿತಿ ವಿನಿಮಯಕ್ಕೆ ನೆರವಾಗುತ್ತವೆ. ಹಣದ ಸತ್ಯಾಸತ್ಯತೆಯನ್ನು ಪರಿಶೀಲಿಸುವುದು, ಪಾವತಿಯನ್ನು ನಡೆಸುವುದು ಮತ್ತು ಅಗತ್ಯವಿದ್ದರೆ ವಹಿವಾಟುಗಳನ್ನು ರದ್ದುಗೊಳಿಸುವುದು ಇವುಗಳ ಮುಖ್ಯ ಕೆಲಸ.
ಇನ್ನು ವಹಿವಾಟು ವಿಳಂಬವಿಲ್ಲ
ಈ ಹೊಸ ಬದಲಾವಣೆಯಿಂದಾಗಿ ಗೂಗಲ್ ಪೇ, ಫೋನ್‌ಪೇ, ಪೇಟಿಎಂ, ಭೀಮ್ ಯುಪಿಐ, ಅಮೆಜಾನ್ ಪೇ ಮತ್ತು ಕ್ರೆಡ್ ಯುಪಿಐನಂತಹ ಜನಪ್ರಿಯ ಆ್ಯಪ್‌ಗಳ ಮೂಲಕ ಹಣ ವರ್ಗಾಯಿಸುವುದು ಹೆಚ್ಚು ಸರಳ ಮತ್ತು ತ್ವರಿತವಾಗಲಿದೆ. ಇದು ಯುಪಿಐ ವಹಿವಾಟಿನ ವಿಳಂಬವನ್ನು ಶೇಕಡಾ 66ರಷ್ಟು ಕಡಿಮೆ ಮಾಡುತ್ತದೆ.
ಇದರಿಂದ ಹೆಚ್ಚು ದಟ್ಟಣೆಯ ಸಮಯದಲ್ಲೂ, ಹಬ್ಬದ ಮಾರಾಟದ ಸಂದರ್ಭದಲ್ಲೂ ಅಥವಾ ದೊಡ್ಡ ಮೊತ್ತದ ಹಣ ವರ್ಗಾವಣೆಯಲ್ಲೂ ನಿಮಗೆ ಯಾವುದೇ ತೊಂದರೆಯಾಗುವುದಿಲ್ಲ. ಪಾವತಿ ದೃಢೀಕರಣ ವೇಗಗೊಳ್ಳುತ್ತದೆ, ಕಾಯುವ ಸಮಯ ಕಡಿಮೆಯಾಗುತ್ತದೆ, ಮತ್ತು ವಹಿವಾಟು ವಿಫಲವಾಗುವ ಸಾಧ್ಯತೆಗಳೂ ಕಡಿಮೆಯಾಗುತ್ತವೆ.
ರೆಂಟೆನ್‌ಪೇನ ಸಿಇಒ ಮತ್ತು ಸಹ-ಸಂಸ್ಥಾಪಕ ಸಾರಿಕಾ ಶೆಟ್ಟಿ ಹೇಳುವಂತೆ, "15 ಸೆಕೆಂಡುಗಳಲ್ಲಿ ಯುಪಿಐ ಪ್ರಕ್ರಿಯೆಯೊಂದಿಗೆ, ಈಗ ಪಾವತಿಗಳು ವೇಗವಾಗಿ ಮತ್ತು ಹೆಚ್ಚು ವಿಶ್ವಾಸಾರ್ಹವಾಗಿವೆ. ಇದು ಭಾರತದ 35 ಕೋಟಿ ಬಳಕೆದಾರರಿಗೆ ಒಂದು ಅದ್ಭುತ ಅನುಭವ." ಅವರು, "ಇದು ಗರಿಷ್ಠ ಸಮಯದಲ್ಲಿ ಸಿಸ್ಟಮ್ ಮೇಲೆ ಬೀಳುವ ಒತ್ತಡವನ್ನು ಕಡಿಮೆ ಮಾಡುತ್ತದೆ, ಪಾವತಿ ಗೇಟ್‌ವೇಗಳ ದಕ್ಷತೆಯನ್ನು ಹೆಚ್ಚಿಸುತ್ತದೆ ಮತ್ತು ಗ್ರಾಮೀಣ ಹಾಗೂ ಜಾಗತಿಕ ಮಾರುಕಟ್ಟೆಗಳಲ್ಲಿ ಯುಪಿಐ ಬಳಕೆಯನ್ನು ಮತ್ತಷ್ಟು ಉತ್ತೇಜಿಸುತ್ತದೆ" ಎಂದಿದ್ದಾರೆ.
ಬ್ಯಾಂಕ್‌ಗಳಿಗೆ ಎನ್ಪಿಸಿಐ ಸೂಚನೆ
ಮೇ ತಿಂಗಳಲ್ಲಿ ಬರೋಬ್ಬರಿ 18.6 ಬಿಲಿಯನ್‌ಗಿಂತಲೂ ಹೆಚ್ಚು ಯುಪಿಐ ವಹಿವಾಟುಗಳನ್ನು ದಾಖಲಿಸಿದ ಎನ್ಪಿಸಿಐ, ಬ್ಯಾಂಕ್‌ಗಳು ಮತ್ತು ಆ್ಯಪ್‌ಗಳಿಗೆ ಹೊಸ ವೇಗದ ಮಾನದಂಡಗಳಿಗೆ ಅನುಗುಣವಾಗಿ ತಮ್ಮ ವ್ಯವಸ್ಥೆಗಳನ್ನು ಅಪ್‌ಡೇಟ್ ಮಾಡುವಂತೆ ನಿರ್ದೇಶನ ನೀಡಿದೆ. ವೇಗದ ಜೊತೆಗೆ ವಿಶ್ವಾಸಾರ್ಹತೆಯನ್ನು ಕಾಪಾಡುವಂತೆ ಮತ್ತು ತಾಂತ್ರಿಕ ದೋಷಗಳು ಹೆಚ್ಚಾಗದಂತೆ ಎಚ್ಚರಿಕೆ ವಹಿಸುವಂತೆ ಸಂಬಂಧಪಟ್ಟ ಎಲ್ಲರಿಗೂ ಸೂಚಿಸಿದೆ.
ಹಣಕಾಸು ಕಂಪನಿಗಳು ನಂಬುವಂತೆ, ಈ ವೇಗದ ವಹಿವಾಟುಗಳು ಯುಪಿಐ ಬಳಕೆಯನ್ನು ಕೇವಲ ವೈಯಕ್ತಿಕ ವರ್ಗಾವಣೆಗಳಿಗೆ ಸೀಮಿತಗೊಳಿಸದೆ, ದೊಡ್ಡ ಮೊತ್ತದ ವಾಣಿಜ್ಯ ವ್ಯವಹಾರಗಳು, ಮಾಸಿಕ ಬಿಲ್ ಪಾವತಿಗಳು ಮತ್ತು ಅಂತಾರಾಷ್ಟ್ರೀಯ ಪಾವತಿಗಳಿಗೂ ವಿಸ್ತರಿಸಲಿವೆ. ಇದು ಭವಿಷ್ಯದಲ್ಲಿ ಸಂಪೂರ್ಣ ಡಿಜಿಟಲ್ ಬ್ಯಾಂಕಿಂಗ್ ವ್ಯವಸ್ಥೆಗೆ ಒಂದು ಬಲವಾದ ಹೆಜ್ಜೆಯಾಗಿದೆ.