ಶಿಕ್ಷಕ, ಗುಮಾಸ್ತ, ಸೇವಕ, ಬಾಣಸಿಗ, ಸಮೀಕ್ಷೆದಾರ; ಭಾರತದ ಶಿಕ್ಷಕರ ಕಾಣದ ಕಷ್ಟಗಳು

ಶಿಕ್ಷಕರು ಒಂದು ಕಾಲದಲ್ಲಿ ಸಮಾಜದ ಮಾದರಿಗಳಾಗಿದ್ದರು. ಅವರನ್ನು ಸಮಾಜದ ಉನ್ನತ ಸ್ಥಾನದಲ್ಲಿಟ್ಟು ಪೂಜಿಸಲಾಗುತ್ತಿತ್ತು. ಆದರೆ ಇಂದಿನ ಬದಲಾಗುತ್ತಿರುವ ಸಾಮಾಜಿಕ ಪಲ್ಲಟಗಳಿಂದಾಗಿ ಶಿಕ್ಷಕರ ಹಾಗೂ ಶಿಕ್ಷಣದ ಮೌಲ್ಯ ನಿಧಾನವಾಗಿ ಕುಸಿಯುತ್ತಿದೆ ಎಂಬ ಭಾವನೆ ಸಮಾಜದಲ್ಲಿದೆ. ಅವರಿಗೆ ಹೊರಿಸುತ್ತಿರುವ ಹೊಸ, ಆಡಳಿತಾತ್ಮಕ ಜವಾಬ್ದಾರಿಗಳಿಂದಾಗಿ ಅವರು ಇಂದಿನ ಮಕ್ಕಳನ್ನು ಮುಂದಿನ ಪ್ರಜ್ಞಾವಂತ ಪ್ರಜೆಗಳಾಗಿ ರೂಪಿಸುವತ್ತ ಗಮನಹರಿಸಲು ಅವರಿಂದ ಸಾಧ್ಯವಾಗುತ್ತಿಲ್ಲ. ಏಕೆಂದರೆ ಅವರ ಬಹುಸಮಯ ಶಿಕ್ಷಣೇತರ ಜವಾಬ್ದಾರಿಯನ್ನು ನಿರ್ವಹಿಸುವಲ್ಲಿ ವ್ಯಯವಾಗುತ್ತಿದೆ.

ಭಾರತದಲ್ಲಿನ ಸರ್ಕಾರಿ, ಖಾಸಗಿ ಮತ್ತು ಪ್ರತಿಷ್ಠಿತ ಅಂತರರಾಷ್ಟ್ರೀಯ ಶಾಲೆಗಳಲ್ಲಿ ಶಿಕ್ಷಕರ ಜವಾಬ್ದಾರಿ ಕೇವಲ ಬೋಧನೆ ಮಾಡುವುದಷ್ಟಕ್ಕೆ ಸೀಮಿತಿವಾಗಿಲ್ಲ. ಅವರ ಕಪ್ಪು ಹಲಗೆಯ ಮುಂದು ನಿಂತು ಬೋಧಿಸುವ ತರಗತಿಗಳಿಗಿಂತ ಹೆಚ್ಚು ಕಾಲವನ್ನು ಬೇರೆ ಶಿಕ್ಷಣೇತರ ಜವಾಬ್ದಾರಿಯನ್ನು ನಿರ್ವಹಿಸುವಲ್ಲಿ ಕಳೆಯುವಂತಾಗಿದೆ. ಅವರ ಕೆಲಸದ ಹೊರೆ ಇತ್ತೀಚಿನ ವರ್ಷಗಳಲ್ಲಿ ಹೆಚ್ಚಿದೆ. ಅವರ ಜವಾಬ್ದಾರಿಗಳು ವಿರುದ್ಧಾರ್ಥದಲ್ಲಿ ತುಂಬಾ ʼವೈವಿಧ್ಯಮಯʼ ವಾಗಿವೆ ಎನ್ನಬಹುದು, ಈ ಜವಾಬ್ದಾರಿಗಳು ತರಗತಿಯ ಬೋಧನೆಯನ್ನು ಮೀರಿ ವಿಸ್ತರಿಸಿಕೊಂಡಿರುವುದು ಸ್ಪಷ್ಟವಾಗಿ ಕಾಣಿಸುತ್ತಿದೆ.

ಹಲವಾರು ಜವಾಬ್ದಾರಿಗಳು

ಡೇಟಾ ಎಂಟ್ರಿಯಿಂದ ಹಿಡಿದು ಮಧ್ಯಾಹ್ನದ ಊಟವನ್ನು ನಿರ್ವಹಿಸುವವರೆಗೆ ವಿದ್ಯಾರ್ಥಿಗಳಿಗೆ ಕೌನ್ಸೆಲಿಂಗ್ ಮಾಡುವವರೆಗೆ, ದೇಶದ ಸರ್ಕಾರಿ ಶಿಕ್ಷಕರು ಇವೆಲ್ಲವನ್ನೂ ಮತ್ತು ಹೆಚ್ಚಿನದನ್ನು ಮಾಡುತ್ತಿದ್ದಾರೆ. ಅವರು ಬಹು ಜವಾಬ್ದಾರಿಯ ʻಟೋಪಿʼ ಗಳನ್ನು ಧರಿಸುವಂತಾಗಿದೆ. ಇದು ಶಿಕ್ಷಕರಲ್ಲಿ ಶಿಕ್ಷಣ ನೀಡುವ ಹುಮ್ಮಸ್ಸನ್ನು ಕರಗಿಸಿ, ಅವರಲ್ಲಿ ಮಾನಸಿಕವಾಗಿ ಕೊರಗುವಂಥ ಸ್ಥಿತಿಗೆ ತಂದು ನಿಲ್ಲಿಸಿದೆ. ಅದಕ್ಕಿಂತ ಹೆಚ್ಚಾಗಿ, ಕೋವಿಡ್ ಸಂದರ್ಭದಲ್ಲಿ ಅವರು ನಿರ್ವಹಿಸಿದ ಹಲವು ಕರ್ತವ್ಯಗಳನ್ನು ಈಗಲೂ ಮುಂದುವರಿಸಬೇಕಾಗಿ ಬಂದಿರುವಂತೆ ತೋರುತ್ತಿದೆ.

ಅಂತರಾಷ್ಟ್ರೀಯ ಶಾಲಾ ಶಿಕ್ಷಕರೂ ಈ ಸಮಸ್ಯೆಗಳಿಂದ ಹೊರಗುಳಿದಿಲ್ಲ. ಅವರ ಸಮಸ್ಯೆ ಇದಕ್ಕಿಂತ ಹೆಚ್ಚಿನದಾಗಿದೆ. ಅವರು ಪೋಷಕರೊಂದಿಗೆ ಸಂವಹನ ಮತ್ತು ಈವೆಂಟ್ ಮ್ಯಾನೇಜ್‌ಮೆಂಟ್ ಸೇರಿದಂತೆ ಶೈಕ್ಷಣಿಕೇತರ ಕಾರ್ಯಗಳ ಒಂದು ದೊಡ್ಡ ಕರ್ತವ್ಯದ ಭಾರವನ್ನು ಹೊತ್ತಿದ್ದಾರೆ. ಈ ನಡುವೆಯೂ ತಮ್ಮ ಅಂತಾರಾಷ್ಟ್ರೀಯ ಮಟ್ಟದ ಶಾಲೆಯ ಗುಣಮಟ್ಟವನ್ನು ಕಾಪಾಡಿಕೊಳ್ಳಲು ಅಹರ್ನಿಶಿ ಶ್ರಮಿಸಬೇಕಾದ ಪರಿಸ್ಥಿತಿ ಅವರದಾಗಿದೆ. ಇದಕ್ಕಾಗಿ ಆಡಳಿತ ಮಂಡಳಿಯ ಎಲ್ಲ ರೀತಿಯ ಒತ್ತಡಗಳನ್ನೂ ಅವರು ಅನುಭವಿಸುತ್ತಿದ್ದಾರೆ. ಇವೆಲ್ಲವೂ ಕೆಲಸ-ಜೀವನದ ಸಮತೋಲನವನ್ನು ಕಾಪಾಡಿಕೊಳ್ಳುವ ವೃತ್ತಿಯಾಗಿ, ಒಟ್ಟಾರೆಯಾಗಿ ಬೋಧನೆಯೆಂಬ ಮೂಲಭೂತ ಕಲ್ಪನೆಗೆ ಧಕ್ಕೆ ತಂದಿದೆ.

ಬೋಧನೆಗೆ ಸಂಬಂಧವಿಲ್ಲ

ವಿವಿಧ ರಾಜ್ಯಗಳ ಸರ್ಕಾರಿ ಶಾಲೆಗಳಲ್ಲಿ ಶಿಕ್ಷಕರೊಂದಿಗೆ ಸಂವಾದಿಸಿದರೆ, ಆ ಮಾತುಕತೆಯ ಫಲಶ್ರುತಿ; ಅವರು ಮಾಡುವ ಕೆಲಸದ ಸ್ವರೂಪದ ಬಗ್ಗೆ ಒಂದು ನೋಟವನ್ನು ನೀಡುತ್ತದೆ. ಅದಕ್ಕೂ ಅವರ ಬೋಧನೆ ವೃತ್ತಿಗೂ ಯಾವುದೇ ಸಂಬಂಧವಿರುವಂತೆ ತೋರುವುದಿಲ್ಲ.

ತಮ್ಮ ಕೆಲಸದ ಹೊರೆ ಮತ್ತು ಬೋಧಕೇತರ ಜವಾಬ್ದಾರಿಗಳ ಕುರಿತು ಚರ್ಚೆಯ ಸಂದರ್ಭದಲ್ಲಿ, ದೆಹಲಿ ಸರ್ಕಾರಿ ಶಾಲೆಗಳ ಶಿಕ್ಷಣ ತಜ್ಞರು ತಾವು ಮಾಡುವ ಎಲ್ಲ ಕೆಲಸಗಳ ಪಟ್ಟಿಯನ್ನು ತೋರಿಸಿದರು.

ಶಿಕ್ಷಕರು ಹಾಜರಾತಿ ಮತ್ತು ಮಧ್ಯಾಹ್ನದ ಊಟದ ವ್ಯವಸ್ಥೆ ಡೇಟಾ ಎಂಟ್ರಿ, ಸರ್ಕಾರಿ ಯೋಜನೆಗಳ ಲಾಭವನ್ನು ವರ್ಗಾಯಿಸಲು ವಿದ್ಯಾರ್ಥಿಗಳಿಗೆ ಬ್ಯಾಂಕ್ ಖಾತೆ ತೆರೆಯುವುದು, ಪೋಷಕರ ಆಧಾರ್ ಕಾರ್ಡ್‌ಗಳನ್ನು ಪರಿಶೀಲಿಸುವುದು, ಸಂಬಳ ಬಿಲ್‌ಗಳನ್ನು ಸಿದ್ಧಪಡಿಸುವುದು, ಮಧ್ಯಾಹ್ನದ ಊಟ ವಿತರಣೆ, ಮಾರುಕಟ್ಟೆಯಿಂದ ತರಕಾರಿಗಳನ್ನು ತರುವುದು ಮತ್ತು ವಿವಿಧ ಜನಗಣತಿಯಲ್ಲಿ ಭಾಗವಹಿಸುವ ತಮ್ಮ ಶಿಕ್ಷಣೇತರ ಕರ್ತವ್ಯಗಳನ್ನು ಕುರಿತು ನೋಂದ ಮಾತುಗಳಿಂದ ತಮ್ಮ ನೋವನ್ನು ಶಮನಮಾಡಿಕೊಳ್ಳುತ್ತಾರೆ.

ಚುನಾವಣಾ ಕರ್ತವ್ಯಗಳು

ಹೆಚ್ಚುವರಿಯಾಗಿ, ಚುನಾವಣೆಯ ಸಮಯದಲ್ಲಿ, ಶಿಕ್ಷಕರಿಗೆ ಬೂತ್ ಮಟ್ಟದ ಅಧಿಕಾರಿ ಕರ್ತವ್ಯಗಳನ್ನು ನಿಯೋಜಿಸಲಾಗುತ್ತದೆ, ಆಗಾಗ್ಗೆ ಶಾಲೆಯ ಸಮಯದ ಹೊರಗೆ. ದೆಹಲಿ ಹೈಕೋರ್ಟ್ ಕೆಲವು ಚುನಾವಣಾ ಜವಾಬ್ದಾರಿಗಳಿಂದ ಮಹಿಳಾ ಶಿಕ್ಷಕರಿಗೆ ವಿನಾಯಿತಿ ನೀಡಿದ್ದರೂ, ಮಹಿಳೆಯರು ಇನ್ನೂ ಭಾಗವಹಿಸುವ ಸ್ಥಿತಿ ಮುಂದುವರಿದಿದೆ ಎಂದು ಅನೇಕ ಶಿಕ್ಷಕರು ಹೇಳಿಕೊಳ್ಳುತ್ತಾರೆ.

ಅಂತಹ ಹತಾಶೆಗೊಂಡ ಶಿಕ್ಷಕಿ ಸುಮಯಾ (ಇಲ್ಲಿ ಎಲ್ಲ ಹೆಸರುಗಳನ್ನು ಸೂಕ್ತ ಕಾರಣಗಳಿಗಾಗಿ ಬದಲಾಯಿಸಲಾಗಿದೆ) ವಿವಿಧ ಬೇಡಿಕೆಗಳ ಬಗ್ಗೆ ತನ್ನ ಅಸಮಾಧಾನವನ್ನು ವ್ಯಕ್ತಪಡಿಸಿದ್ದಾರೆ. “ನಾನು ಮದ್ಯಪಾನ ಮತ್ತು ಮಕ್ಕಳ ಮೇಲಿನ ದೌರ್ಜನ್ಯದ ಕುರಿತು ಈ ಸಮೀಕ್ಷೆಗೆ ಹೋಗಿದ್ದೆ ಮತ್ತು ಈ ಸಮೀಕ್ಷೆಯಲ್ಲಿ ಭಾಗವಹಿಸಲು ಪೋಷಕರನ್ನು ಮನವೊಲಿಸುವುದು ಸವಾಲಾಗಿತ್ತು. ಇದು ನಮ್ಮ ಕೆಲಸದ ಗೌರವದ ಕೊರತೆಯನ್ನು ತೋರಿಸುತ್ತದೆ ಮತ್ತು ನಾವು ನಮ್ಮ ಕಾಳಜಿಯನ್ನು ವ್ಯಕ್ತಪಡಿಸಿದಾಗ, ನಾವು ಅವರನ್ನು ಯಾವುದೇ ಹಿಂಜರಿಕೆಯಿಲ್ಲದೆ ಸರಳವಾಗಿ ವ್ಯವಸ್ಥೆಗೆ ಹೊಂದಿಕೊಳ್ಳಲು ಮನವಿ ಮಾಡುತ್ತೇವೆ ಎಂದು ಆಕೆ ಹೇಳಿದ್ದಾರೆ. 

ಶಿಕ್ಷಕರು ಪೋಷಕರಿಂದ ಜಾತಿ ಪ್ರಮಾಣಪತ್ರದ ವಿವರಗಳನ್ನು ಪಡೆದ ನಂತರ ಅವುಗಳನ್ನು ಸರಿಯಾದ ಕ್ರಮದಲ್ಲಿ ಸಂಗ್ರಹಿಸಿ, ಪರಿಶೀಲಿಸಬೇಕು ಮತ್ತು ನಮೂದಿಸಬೇಕು. ಇದು ನಿರುತ್ಸಾಹದ ಕೆಲಸ. ಆದರೆ ಈ ರೀತಿ ಸಂಗ್ರಹಿಸುವ ದತ್ತಾಂಶಗಳಲ್ಲಿನ ಯಾವುದೇ ದೋಷ ಸಂಬಂಧಿಸಿದವರಿಗೆ ಸರ್ಕಾರದ ಸವಲತ್ತುಗಳನ್ನು ನಿರಾಕರಿಸಲು ಕಾರಣವಾಗಬಹುದು ಎಂದು ಇನ್ನು ಕೆಲವು ಶಿಕ್ಷಕರು ಹೇಳಿದರು.

ಆಡಳಿತಾತ್ಮಕ ಹೊರೆಗಳು

ಕರ್ನಾಟಕದಲ್ಲಿ, ಶಿಕ್ಷಕರು ವಿದ್ಯಾರ್ಥಿಗಳಿಗೆ ಬ್ಯಾಂಕ್ ಖಾತೆಗಳನ್ನು ತೆರೆಯುವಲ್ಲಿ ಒಳಗೊಂಡಿರುವ ಕಷ್ಟಗಳನ್ನು ವಿವರಿಸಿದರು. ಶಿಕ್ಷಕರು ಜನ್ಮ ಪ್ರಮಾಣಪತ್ರಗಳನ್ನು ಸಂಗ್ರಹಿಸಬೇಕು ಮತ್ತು ಪೋಷಕರ ಆಧಾರ್ ವಿವರಗಳನ್ನು ಪರಿಶೀಲಿಸಬೇಕು, ಆಗಾಗ್ಗೆ ಪೋಷಕರ ವೈವಾಹಿಕ ಸನ್ನಿವೇಶಗಳಂತಹ ತೊಡಕುಗಳನ್ನು ಎದುರಿಸಬೇಕಾಗುತ್ತವೆ. ಅದನ್ನೂ ನಿವಾರಿಸಿಕೊಂಡು ಕೆಲಸ ಮಾಡಬೇಕಾಗುತ್ತದೆ ಎಂದು ಅವರು ವಿವರಿಸಿದರು.

“ಕೆಲವು ಪೋಷಕರು ತಮ್ಮ ನಿಜವಾದ ಪೋಷಕ ಜವಾಬ್ದಾರಿಯ ಬದಲಿಗೆ ತಮ್ಮ ಪ್ರಸ್ತುತ ʼಬದುಕಿನ ಜೊತೆಗಾರರ ʼ ಹೆಸರನ್ನು ಖಾತೆಯಲ್ಲಿ ಸೇರಿಸಲು ಬಯಸುತ್ತಾರೆ. ಅದು ಕಾನೂನುಬಾಹಿರವಾಗಿದೆ. ನಾವು ಇದನ್ನು ಪೋಷಕರಿಗೆ ವಿವರಿಸಬೇಕು. ಇಂಥ ಸಮಸ್ಯೆಗಳು ನಮ್ಮ ಕೆಲಸದ ಹೊರೆಯನ್ನು ಕಷ್ಟವಾಗಿಸುತ್ತದೆ. ನಾನು ಇದನ್ನೆಲ್ಲ ನಿಭಾಯಿಸುತ್ತಿದ್ದರೆ, ನನಗೆ ಶಿಕ್ಷಣ ನೀಡುವ ಕೆಲಸವನ್ನು ಮಾಡಲು ಸಮಯ ಯಾವಾಗ ಸಿಗುತ್ತದೆ? ಶಿಕ್ಷಕರಿಗೆ ಈ ಕೆಲಸಗಳನ್ನು ಹಚ್ಚಬಾರದೆಂಬ ನಿಬಂಧನೆ ಇದ್ದರೂ, ನ್ಯಾಯಾಲಯದ ಸೂಚನೆ ಇದ್ದರೂ, ಆಡಳಿತ ಸಿಬ್ಬಂದಿಯ ಕೊರತೆಯನ್ನು ಮುಂದುಮಾಡಿ ನಮಗೇ ಈ ಜವಾಬ್ದಾರಿಯನ್ನು ಹೊರಿಸುತ್ತಿದ್ದಾರೆ ”ಎಂದು ಅವರು ಅಸಮಾಧಾನವನ್ನು ವ್ಯಕ್ತಪಡಿಸಿದರು.

ಮಾತನಾಡಿಸಿದ ಅನೇಕ ಶಿಕ್ಷಕರು ಶಿಕ್ಷಣದ ಮೇಲೆ ಕೇಂದ್ರೀಕರಿಸಲು ಆಡಳಿತಾತ್ಮಕ ಹೊರೆಗಳನ್ನು ಕಡಿಮೆಯಾಗಬೇಕೆಂಬ ತಮ್ಮಿಚ್ಛೆಯನ್ನು ಹೇಳಿಕೊಂಡರು. ಕೋವಿಡ್‌ನಿಂದಾಗಿ, ಪರಿಸ್ಥಿತಿಯು ಒಟ್ಟಾರೆ ವ್ಯವಸ್ಥೆಯನ್ನು ಹದಗೆಡಿಸಿದೆ. ಶಿಕ್ಷಕರ ಕೆಲಸದ ಸಮಯವನ್ನು ಪ್ರತಿದಿನ ಸುಮಾರು 12 ಗಂಟೆಗಳವರೆಗೆ ವಿಸ್ತರಿಸಲಾಗಿದೆ ಎಂದು ಅವರು ಹೇಳುತ್ತಿದ್ದಾರೆ. ಮಧ್ಯಾಹ್ನದ ಊಟ, ಯುಡಿಎಸ್‌ಇ ಮತ್ತು ಪ್ರವೇಶಗಳ ಡೇಟಾವನ್ನು ನವೀಕರಿಸುವಂತಹ ತುರ್ತು ಕಾರ್ಯಗಳಿಗಾಗಿ ವಾಟ್ಸಾಪ್‌ನಲ್ಲಿ ನಿರಂತರವಾಗಿ ತೊಡಗಿಸಿಕೊಳ್ಳಬೇಕಾದಂಥ ಪರಿಸ್ಥಿತಿ ಎದುರಾಗಿದೆ, ಎಂದು ಹೇಳುತ್ತಾರೆ.

ಮತ್ತೊಬ್ಬ ಶಿಕ್ಷಕ ರಮೇಶ್, "ನಾವು ಪ್ರತಿ ತರಗತಿಯ ವಿದ್ಯಾರ್ಥಿಗಳ ಪಟ್ಟಿಗಳನ್ನು ನಿರಂತರವಾಗಿ ನವೀಕರಿಸುತ್ತೇವೆ - ಹುಡುಗರು ಮತ್ತು ಹುಡುಗಿಯರು, ಪ್ರವೇಶಗಳು ಮತ್ತು ಹಿಂಪಡೆಯುವಿಕೆಗಳು. ಈ ಡೇಟಾವು ಸೆಪ್ಟೆಂಬರ್ ವರೆಗೆ ಬದಲಾಗುತ್ತಲೇ ಇರುತ್ತದೆ” ಎನ್ನುತ್ತಾರೆ.

ಆರೋಗ್ಯ ಅಗತ್ಯತೆಗಳು

ಪ್ರಾಥಮಿಕ ಶಾಲೆಗೆ ಭೇಟಿ ನೀಡಿದ ಸಂದರ್ಭದಲ್ಲಿ ಅಲ್ಲಿನ ಮುಖ್ಯೋಪಾಧ್ಯಾಯಿನಿ ಜಂತುಹುಳು ನಿವಾರಣಾ ಮಾತ್ರೆಗಳ ದಾಸ್ತಾನು ತೋರಿಸಲು ರಟ್ಟಿನ ಪೆಟ್ಟಿಗೆ ತೆರೆದು ನಿಟ್ಟುಸಿರು ಬಿಟ್ಟರು, "ನಾವು ಇದನ್ನು ವಿತರಿಸಬೇಕಾಗಿದೆ, ಜಂತುಹುಳು ನಿವಾರಕ ಮತ್ತು ಐರನ್‌ ಕಂಟೆಂಟ್‌ ಮಾತ್ರೆಗಳನ್ನು ನೀಡುವಾಗ ನೀಡುವಾಗ ಶಿಕ್ಷಕರು ಮಗುವಿನ ಪಕ್ಕದಲ್ಲಿರಬೇಕು. ಪ್ರತಿಕೂಲ ಪರಿಣಾಮಗಳಿಗಾಗಿ ಮಗುವನ್ನು ಕನಿಷ್ಠ ಒಂದು ಗಂಟೆ ಗಮನಿಸಬೇಕು." ಎಂದು ತಿಳಿಸಿದರು.

ಕೆಲವು ಶಾಲೆಗಳಲ್ಲಿ, ಶಿಕ್ಷಕರು ಸರಬರಾಜು ಮಾಡುವ ಮಧ್ಯಾಹ್ನದ ಊಟವು ಉತ್ತಮ ಗುಣಮಟ್ಟದ್ದಾಗಿದೆ ಎಂದು ಖಚಿತಪಡಿಸಿರುವುದೂ ಉಂಟು. ಆಹಾರವು ಹಳೆಯದಾಗಿದ್ದರೆ, ಕೆಲವೊಮ್ಮೆ, ಶಿಕ್ಷಕರು ಮಾರಾಟಗಾರರ ಮೂಲಕ ಪರ್ಯಾಯ ವ್ಯವಸ್ಥೆಯನ್ನು ಏರ್ಪಾಡು ಮಾಡಬೇಕು ಮತ್ತು ತರಗತಿಗಳು ಪ್ರಾರಂಭವಾಗುವ ಮೊದಲು ಅದನ್ನು ಮಕ್ಕಳಿಗೆ ವಿತರಿಸಬೇಕು. ಆ ಜವಾಬ್ದಾರಿಯೂ ಶಿಕ್ಷಕರ ಮೇಲಿರುತ್ತದೆ ಎನ್ನುತ್ತಾರೆ.

ಪಡಿತರ ಪೂರೈಕೆ

ಕರ್ನಾಟಕದ ಶಿಕ್ಷಕ ಗೋವಿಂದರಾಜು ಅವರು ಬರಗಾಲದ ಸಮಯದಲ್ಲಿ ಅಥವಾ ಬೇಸಿಗೆಯಲ್ಲಿ ಶಾಲೆಗಳನ್ನು ಮೊದಲೇ ಮುಚ್ಚಿದಾಗ, ಅವರಿಗೆ ಪಡಿತರವನ್ನು ಪೂರೈಸುವ ಅಗತ್ಯವಿದೆ ಎಂದು ಹೇಳುತ್ತಾರೆ. “ಮೊದಲೆಲ್ಲ ಶಿಕ್ಷಕರನ್ನು ಗೌರವಿಸಲಾಗುತ್ತಿತ್ತು, ಆದರೆ ಈಗ ನಮಗೆ ಆ ಗೌರವ ದಕ್ಕುತ್ತಿಲ್ಲ. ಅಲೆಲ್ಲ ಕ್ಯಾಮೆರಾ ನಮ್ಮನ್ನು ಗಮನಿಸುತ್ತಿರುತ್ತದೆ. ನಾನು ಕುಳಿತರೂ ನನ್ನನ್ನು ಪ್ರಶ್ನಿಸಲಾಗುತ್ತದೆ, ”ಎಂದು ಅವರು ನೊಂದು ನುಡಿದರು.

"ಕೆಲಸದ ಹೊರೆ ಅಗಾಧವಾಗಿದೆ; ನಾವು ಈ ಪ್ರೌಢಶಾಲೆಯಲ್ಲಿ ಕೇವಲ ಏಳು ಶಿಕ್ಷಕರನ್ನು ಹೊಂದಿದ್ದೇವೆ ಮತ್ತು ನಾವು ಆಗಾಗ್ಗೆ ಹೆಚ್ಚಿನ ತರಗತಿಗಳನ್ನು ನಡೆಸುತ್ತೇವೆ. ಎಚ್‌ಎಂ ಆಗಿ, ನನಗೆ ನಿರಂತರವಾಗಿ ಮಾಹಿತಿಗಾಗಿ ಕೇಳಲಾಗುತ್ತದೆ ಮತ್ತು ಸಭೆಗಳಿಗೆ ಹಾಜರಾಗಲು ಒತ್ತಡ ಹೇರಲಾಗುತ್ತದೆ, ನನಗೆ ಕಲಿಸಲು ಸ್ವಲ್ಪ ಸಮಯವನ್ನು ಕೊಡಲಾಗುತ್ತದೆ. . ಜಿಲ್ಲೆಯ ಕಳಪೆ ಫಲಿತಾಂಶಗಳು ಈ ಆನ್‌ಲೈನ್ ಸಭೆಗಳಲ್ಲಿ ಪರೀಕ್ಷೆಗಳು ಮತ್ತು ಪರೀಕ್ಷೆಗಳ ಬಗ್ಗೆ ಸಭೆಗಳಿಗೆ ಹಾಜರಾಗಲು ವರ್ಷವು ಹೆಚ್ಚಿನ ಬೇಡಿಕೆಗಳಿಗೆ ಕಾರಣವಾಗಿದೆ. ಹಾಗಾಗಿ ಎಷ್ಟೋ ಬಾರಿ ಅಗತ್ಯ ಕರೆಯನ್ನು ಸಹ ತೆಗೆದುಕೊಳ್ಳಲು ಸಾಧ್ಯವಾಗುತ್ತಿಲ್ಲ.

ಬಹು ಬಣ್ಣದ ಟೋಪಿಗಳನ್ನು ಧರಿಸುವುದು

ಇನ್ನೊಬ್ಬ ಮುಖ್ಯೋಪಾಧ್ಯಾಯಿನಿಯೊಬ್ಬರು, “ಎಚ್‌ಎಂ ಆಗಿ, ನಾನು ಗುಮಾಸ್ತ, ಸೇವಕನಾಗಿ ಮತ್ತು ಅಡುಗೆಯಂತಹ ಪಾತ್ರಗಳನ್ನುಕಣ್ಣಲ್ಲಿ ಕಣ್ಣಿಟ್ಟು ನಿರ್ವಹಿಸಬೇಕು . ನಾವು ಹಲವು ಜವಾಬ್ದಾರಿಗಳ ಹಲವು ಬಣ್ಣದ ಟೋಪಿಗಳನ್ನು ಧರಿಸಬೇಕು; ಇದು ನಂಬಲಾಗದಷ್ಟು ಕ್ಲಿಷ್ಟವಾದ ಬೇಡಿಕೆಯಾಗಿ ಪರಿಣಮಿಸಿದೆ", ಎನ್ನುತ್ತಾರೆ.

ಕರ್ನಾಟಕದ ಶಿಕ್ಷಕರೊಬ್ಬರು ಗಮನಿಸಿದಂತೆ ವಿದ್ಯಾರ್ಥಿಗಳಿಗೆ ಕೌನ್ಸೆಲಿಂಗ್ ಮಾಡುವುದು ಕೆಲಸದ ಪ್ರಮುಖ ಭಾಗವಾಗಿದೆ. “ಬಾಲ್ಯ ವಿವಾಹದಂತಹ ಸಮಸ್ಯೆಗಳ ಬಗ್ಗೆ ನಾವು ಪೋಷಕರಿಗೆ ಸಲಹೆ ನೀಡಬೇಕಾಗಿದೆ. ನಮ್ಮ ಗ್ರಾಮದಲ್ಲಿ ಆರು ಬಾರಿ ಓಡಿಹೋದ ಪ್ರಕರಣಗಳು ನಡೆದಿದ್ದು, ಎಸ್‌ಟಿ ಮತ್ತು ಎಸ್‌ಸಿ ಮಕ್ಕಳು ಭಾಗಿಯಾಗಿದ್ದರೆ, ಒತ್ತಡ ಹೆಚ್ಚಾಗುತ್ತದೆ, ಪೊಲೀಸ್ ವಿಚಾರಣೆಯ ಅಗತ್ಯವಿರುತ್ತದೆ. ನಾವು ನಿಯಮಿತವಾಗಿ ವಿದ್ಯಾರ್ಥಿಗಳಿಗೆ ತಮ್ಮ ಅಧ್ಯಯನದ ಮೇಲೆ ಕೇಂದ್ರೀಕರಿಸಲು ಮತ್ತು ಮನೆಪಾಠದ ಅಭ್ಯಾಸಗಳನ್ನು ಪೂರ್ಣಗೊಳಿಸಲು ಸಲಹೆ ನೀಡುತ್ತೇವೆ. ಮದ್ಯಪಾನ ಅಥವಾ ಏಕ-ಪೋಷಕ ಮನೆಗಳಂತಹ ಅವರ ಕುಟುಂಬದ ಸಮಸ್ಯೆಗಳನ್ನು ನಾವು ಕೇಳುತ್ತೇವೆ" ಎಂದು ಫೆಡರಲ್ ಗೆ ಶಿಕ್ಷಕರಲ್ಲಿ ಒಬ್ಬರು ಹೇಳಿದರು.

ಒಬ್ಬ ಶಿಕ್ಷಕನನು ತರಬೇತಿಗಾಗಿ ಕಳುಹಿಸಿದರೆ, ಸಂಜೆ ಶಾಲೆಗೆ ಹಿಂತಿರುಗಿ ಆಡಳಿತಾತ್ಮಕ ಕಾರ್ಯಗಳನ್ನು ಪೂರ್ಣಗೊಳಿಸಬೇಕು. ಹಾಗಾಗಿ ಆಗಾಗ ಶಾಲೆಯಲ್ಲಿ ತಂಗುವ ಸಂದರ್ಭವೂ ಎದುರಾಗುತ್ತದೆ ಎಂದು ಮತ್ತೆ ಕೆಲವರು ಹೇಳುತ್ತಾರೆ.

ಕೆಲಸದಿಂದ ಮುಳುಗಿಹೋಗಿದೆ

ರಾಷ್ಟ್ರೀಯ ಸಾಧನೆ ಸಮೀಕ್ಷೆ 2021 ಹೇಳುವಂತೆ, ಕರ್ನಾಟಕದಲ್ಲಿ ಸುಮಾರು 40 ಪ್ರತಿಶತ ಶಿಕ್ಷಕರು ಬೋಧಿಸುವ ಕೆಲಸಕ್ಕಿಂತ ಇತರ "ಕೆಲಸಗಳಲ್ಲಿ ಮುಳುಗಿಹೋಗಿದ್ದಾರೆ". ಸರ್ಕಾರಿ ಶಾಲಾ ಶಿಕ್ಷಕರು ಬೋಧಕೇತರ ಜವಾಬ್ದಾರಿಯಿಂದ ಅಸಹಾಯಕತೆ ಮತ್ತು ಹತಾಶೆಯನ್ನು ಅನುಭವಿಸುತ್ತಿದ್ದಾರೆ, ಬೋಧನೆಯತ್ತ ಗಮನಹರಿಸಲು ಮತ್ತು ವಿದ್ಯಾರ್ಥಿಗಳೊಂದಿಗೆ ತೊಡಗಿಸಿಕೊಳ್ಳುವ ಅವರ ಸಂತೋಷದ ಕೆಲಸಕ್ಕೆ ಈ ಜವಾಬ್ದಾರಿಗಳು ಅಡ್ಡಿಯಾಗಿರುವುದು ಸ್ಪಷ್ಟವಾಗುತ್ತದೆ.

ಬ್ರಿಟಿಷ್, ಅಮೇರಿಕನ್ ಮತ್ತು IB ಪಠ್ಯಕ್ರಮಗಳನ್ನು ಅನುಸರಿಸುವ ಭಾರತದಲ್ಲಿನ ಅಂತರರಾಷ್ಟ್ರೀಯ ಶಾಲೆಗಳು ಹೆಚ್ಚು ಕಠಿಣವಾದ ವಿದ್ಯಾರ್ಥಿ-ಶಿಕ್ಷಕರ ಅನುಪಾತಗಳು ಮತ್ತು ಇತರ ಬೋಧನಾ ಮಾನದಂಡಗಳನ್ನು ಹೊಂದಿವೆ. ಹಾಗಾದರೆ, ಆ ಶಾಲೆಗಳಲ್ಲಿ ಶಿಕ್ಷಕರ ದುಸ್ಥಿತಿ ಏಕೆ ಉತ್ತಮವಾಗಿಲ್ಲ?

ಈ ಸರಣಿಯ ಭಾಗ II ರಲ್ಲಿ ಶೀಘ್ರದಲ್ಲೇ ಬರಲಿದೆ.