ನೂತನ ಕಾರ್ಯಾಲಯವನ್ನು ಉದ್ಘಾಟಿಸಿದ ಪಿಎಂ ನರೇಂದ್ರ ಮೋದಿ
PMO Office| ಸೌತ್ ಬ್ಲಾಕ್ನಿಂದ 'ಸೇವಾ ತೀರ್ಥ'ಕ್ಕೆ ಸ್ಥಳಾಂತರಗೊಂಡ ಪ್ರಧಾನಿ ಕಚೇರಿ
ಆರಂಭದಲ್ಲಿ 'ಎಕ್ಸಿಕ್ಯೂಟಿವ್ ಎನ್ಕ್ಲೇವ್' ಎಂದು ಕರೆಯಲ್ಪಡುತ್ತಿದ್ದ ಈ ಸಂಕೀರ್ಣಕ್ಕೆ 'ಸೇವಾ ತೀರ್ಥ' ಎಂದು ಮರುನಾಮಕರಣ ಮಾಡಲಾಗಿದ್ದು, ಇದು ಆಡಳಿತದ ಕೇಂದ್ರದಲ್ಲಿ 'ಸೇವೆ'ಯನ್ನು ಇರಿಸುವ ಸೈದ್ಧಾಂತಿಕ ಸಂದೇಶವನ್ನು ಸಾರುತ್ತದೆ.
ದೆಹಲಿಯ ದಕ್ಷಿಣ ಬ್ಲಾಕ್ನಲ್ಲಿದ್ದ ಪ್ರಧಾನಮಂತ್ರಿ ಕಾರ್ಯಾಲಯವನ್ನು ಹೊಸ ಸಮಗ್ರ ಆಡಳಿತ ಸಂಕೀರ್ಣಕ್ಕೆ ಸ್ಥಳಾಂತರಿಸಿದ್ದು, ಪ್ರಧಾನಿ ನರೇಂದ್ರ ಮೋದಿ ಮೊದಲ ದಿನವೇ ಜನಪರ ಯೋಜನೆಗಳ ಕಡತಗಳಿಗೆ ಸಹಿ ಹಾಕಿದ್ದಾರೆ.
ಶುಕ್ರವಾರ(ಫೆ.13) ಅಧಿಕೃತವಾಗಿ ಆರಂಭವಾದ ಪ್ರಧಾನ ಮಂತ್ರಿ ಕಾರ್ಯಾಲಯಕ್ಕೆ ʼಸೇವಾ ತೀರ್ಥ ʼ ಎಂದು ಹೆಸರಿಟ್ಟಿದ್ದು, ಕೇಂದ್ರ ಸರ್ಕಾರದ ಉನ್ನತ ಆಡಳಿತ ಕಚೇರಿಗಳನ್ನು ಒಂದೇ ಸ್ಥಳದಲ್ಲಿ ಒಗ್ಗೂಡಿಸುವ ಉದ್ದೇಶದಿಂದ 'ನೂತನ ಕಚೇರಿ' ನಿರ್ಮಿಸಲಾಗಿದೆ.
ಸೇವೆಯೇ ಪರಮ ಗುರಿ
ಆರಂಭದಲ್ಲಿ 'ಎಕ್ಸಿಕ್ಯೂಟಿವ್ ಎನ್ಕ್ಲೇವ್' ಎಂದು ಕರೆಯಲ್ಪಡುತ್ತಿದ್ದ ಈ ಸಂಕೀರ್ಣಕ್ಕೆ 'ಸೇವಾ ತೀರ್ಥ' ಎಂದು ಮರುನಾಮಕರಣ ಮಾಡಲಾಗಿದ್ದು, ಇದು ಆಡಳಿತದ ಕೇಂದ್ರದಲ್ಲಿ 'ಸೇವೆ'ಯನ್ನು ಇರಿಸುವ ಸೈದ್ಧಾಂತಿಕ ಸಂದೇಶವನ್ನು ಸಾರುತ್ತದೆ. ಐತಿಹಾಸಿಕ ಸೌತ್ ಮತ್ತು ನಾರ್ತ್ ಬ್ಲಾಕ್ಗಳನ್ನು 'ಯುಗ್ ಯುಗಿನ್ ಭಾರತ್ ಸಂಗ್ರಹಾಲಯ' ಎಂಬ ವಿಶ್ವದ ಅತಿದೊಡ್ಡ ವಸ್ತುಸಂಗ್ರಹಾಲಯವಾಗಿ ಪರಿವರ್ತಿಸಲಾಗುತ್ತಿದೆ. ಭಾರತದ 5,000 ವರ್ಷಗಳ ಸುದೀರ್ಘ ಇತಿಹಾಸವನ್ನು ಸಾರುವ ಈ ಮ್ಯೂಸಿಯಂ ಅಂತಿಮವಾಗಿ ಸಾರ್ವಜನಿಕರ ವೀಕ್ಷಣೆಗೆ ಮುಕ್ತವಾಗಲಿದೆ.
ಪ್ರಮುಖ ನಿರ್ಧಾರಗಳು
* ಹೊಸ ಕಚೇರಿಯಲ್ಲಿ ಕೆಲಸ ಆರಂಭಿಸಿದ ಕೂಡಲೇ ಪ್ರಧಾನಿ ಮೋದಿ ನಾಲ್ಕು ಪ್ರಮುಖ ಯೋಜನೆಗಳಿಗೆ ಅನುಮೋದನೆ ನೀಡಿದ್ದಾರೆ.
* ಸ್ಮಾರ್ಟ್ ಅಪ್ ಫಂಡ್ 2.0: ಯುವ ಉದ್ಯಮಿಗಳಿಗೆ ಉತ್ತೇಜನ ನೀಡಲು ಸಾವಿರಾರು ಕೋಟಿ ರೂ. ಮೀಸಲು.
* ಕೃಷಿ ಮೂಲಸೌಕರ್ಯ ನಿಧಿ ಹೆಚ್ಚಳ: ರೈತರಿಗೆ ಸಂಗ್ರಹಣೆ, ಪ್ರಾಸೆಸಿಂಗ್ ಮತ್ತು ಮೂಲಸೌಕರ್ಯ ಅಭಿವೃದ್ಧಿಗೆ ಹೆಚ್ಚಿನ ಆರ್ಥಿಕ ಬೆಂಬಲ.
* 'ಲಕ್ಷಪತಿ ದಿದಿ' ಯೋಜನೆ ವಿಸ್ತರಣೆ: ಮಹಿಳಾ ಸ್ವಸಹಾಯ ಗುಂಪುಗಳ ಸದಸ್ಯರನ್ನು ಆರ್ಥಿಕವಾಗಿ ಸಬಲಗೊಳಿಸಲು ಗುರಿ ಹೆಚ್ಚಳ.
* ರಸ್ತೆ ಅಪಘಾತ ಪೀಡಿತರಿಗೆ ನೆರವು: ಗಂಭೀರ ಅಪಘಾತದಲ್ಲಿ ಗಾಯಗೊಂಡವರಿಗೆ ನಿಗದಿತ ಮಿತಿವರೆಗೆ ನಗದುರಹಿತ (cashless) ಚಿಕಿತ್ಸೆಗೆ ಅವಕಾಶ ನೀಡುವ ಕಡತಗಳಿಗೆ ಸಹಿ ಹಾಕಿದ್ದಾರೆ.
ಹಲವು ಯೋಜನೆಗಳಿಗೆ ಸಹಿ ಹಾಕಿದ ಪಿಎಂ ಮೋದಿ
ಏನಿದು 'ಸೇವಾ ತೀರ್ಥ'? ಇದರ ವಿಶೇಷತೆಗಳೇನು?
ದಶಕಗಳ ಕಾಲ ಸೌತ್ ಬ್ಲಾಕ್ ಅಧಿಕಾರ ಮತ್ತು ಶ್ರೇಣೀಕೃತ ವ್ಯವಸ್ಥೆಯ ಸಂಕೇತವಾಗಿತ್ತು. ಆದರೆ 1,200 ಕೋಟಿ ವೆಚ್ಚದಲ್ಲಿ ನಿರ್ಮಿಸಲಾದ ಈ 'ಸೇವಾ ತೀರ್ಥ'ವು ಆ ಹಳೆಯ ವಸಾಹತುಶಾಹಿ ಮುದ್ರೆಯನ್ನು ಅಳಿಸಿ ಹಾಕಲು ಸಿದ್ಧವಾಗಿದೆ.
ಮೂರು ಶಕ್ತಿ ಕೇಂದ್ರಗಳ ಸಂಗಮ
ಇಲ್ಲಿ ಕೇವಲ ಪ್ರಧಾನಿ ಕಚೇರಿ (PMO) ಮಾತ್ರವಿಲ್ಲ. ಸೇವಾ ತೀರ್ಥದ ಮೂರು ವಿಭಾಗಗಳಲ್ಲಿ ದೇಶದ ಅತ್ಯುನ್ನತ ನಿರ್ಧಾರಗಳನ್ನು ತೆಗೆದುಕೊಳ್ಳುವ ಸಂಸ್ಥೆಗಳು ಇರಲಿವೆ. ಸೇವಾ ತೀರ್ಥವು ಪಿಎಂಒಗೆ ಕೇವಲ ಹೊಸ ವಿಳಾಸವಲ್ಲ. ಇದು ಆಡಳಿತದ ಅತ್ಯುನ್ನತ ಕೇಂದ್ರಗಳನ್ನು ಒಂದೇ ಕ್ಯಾಂಪಸ್ಗೆ ತರುತ್ತದೆ.
* ಪ್ರಧಾನ ಮಂತ್ರಿ ಕಾರ್ಯಾಲಯ (PMO).
* ಕ್ಯಾಬಿನೆಟ್ ಸಚಿವಾಲಯ.
* ರಾಷ್ಟ್ರೀಯ ಭದ್ರತಾ ಮಂಡಳಿ ಮತ್ತು ಅಜಿತ್ ದೋವಲ್ ಅವರ ಕಚೇರಿ.
ಮುಚ್ಚಿದ ಕೋಣೆಗಳಿಲ್ಲ
ಹೊಸ ಪ್ರಧಾನ ಮಂತ್ರಿ ಕಚೇರಿಯನ್ನು 'ಓಪನ್ ಫ್ಲೋರ್' (ಮುಕ್ತ ವಿನ್ಯಾಸ) ಮಾದರಿಯಲ್ಲಿ ನಿರ್ಮಿಸಲಾಗಿದೆ. ಇಲ್ಲಿ ಹಳೆಯ ಕಟ್ಟಡದಂತೆ ಮುಚ್ಚಿದ ಕೋಣೆಗಳಿಲ್ಲ. ಅಧಿಕಾರಿಗಳು ಮುಕ್ತವಾಗಿ ಚರ್ಚಿಸಿ ನಿರ್ಧಾರ ತೆಗೆದುಕೊಳ್ಳಲು ಸಹಕಾರಿಯಾಗುವಂತೆ 'ಓಪನ್ ಆಫೀಸ್' ಮಾದರಿಯಲ್ಲಿ ಇದನ್ನು ವಿನ್ಯಾಸಗೊಳಿಸಲಾಗಿದೆ. ಇದು ಪರಸ್ಪರ ಸಹಯೋಗ ಮತ್ತು ವೇಗವಾದ ಸಮನ್ವಯವನ್ನು ಪ್ರೋತ್ಸಾಹಿಸುವ ಉದ್ದೇಶವನ್ನು ಹೊಂದಿದೆ. ಸರ್ಕಾರ ಮತ್ತು ಜನರ ನಡುವಿನ ಅಂತರ ಕಡಿಮೆ ಮಾಡಿ ಪಾರದರ್ಶಕ ಆಡಳಿತಕ್ಕೆ ಅನುವು ಮಾಡಿಕೊಡುವ ಉದ್ದೇಶ ಇದರದ್ದಾಗಿದೆ ಎಂದು ಹಿರಿಯ ಅಧಿಕಾರಿಗಳು ತಿಳಿಸಿದ್ದಾರೆ.
ಆಧುನಿಕತೆ ಮತ್ತು ಭಾರತೀಯ ಪರಂಪರೆಯ ಸಮ್ಮಿಲನ
ಸೌತ್ ಬ್ಲಾಕ್ ವಸಾಹತುಶಾಹಿ ವಾಸ್ತುಶಿಲ್ಪದ ಮುದ್ರೆಯನ್ನು ಹೊಂದಿದ್ದರೆ, ಸೇವಾ ತೀರ್ಥವು ಆಧುನಿಕ ವಿನ್ಯಾಸವನ್ನು ಭಾರತೀಯ ನಾಗರಿಕತೆಯ ಅಂಶಗಳೊಂದಿಗೆ ಸಂಯೋಜಿಸುತ್ತದೆ. ಇದರ ಒಳಾಂಗಣ ವಿನ್ಯಾಸವು ಭಾರತದ ಪರಂಪರೆಯ ಸಾಂಸ್ಕೃತಿಕ ಲಕ್ಷಣಗಳನ್ನು ಪ್ರತಿಬಿಂಬಿಸುತ್ತದೆ. ವಿದೇಶಿ ನಾಯಕರು ಮತ್ತು ಅಂತರಾಷ್ಟ್ರೀಯ ನಿಯೋಗಗಳಿಗೆ ಆತಿಥ್ಯ ವಹಿಸಲು ಪ್ರಧಾನಮಂತ್ರಿಯವರ ಖಾಸಗಿ ಮತ್ತು ಔಪಚಾರಿಕ ಸಭೆ ಕೊಠಡಿಗಳನ್ನು ಸಂಪ್ರದಾಯ ಮತ್ತು ಸಮಕಾಲೀನ ಮೂಲಸೌಕರ್ಯಗಳ ಸಂಯೋಜನೆಯೊಂದಿಗೆ ಮರುರೂಪಿಸಲಾಗಿದೆ.
ತಂತ್ರಜ್ಞಾನ ಮತ್ತು ಭದ್ರತೆ
ಸೌತ್ ಬ್ಲಾಕ್ ಅನ್ನು ವರ್ಷಗಳ ಅವಧಿಯಲ್ಲಿ ಆಧುನಿಕ ಅಗತ್ಯಗಳಿಗೆ ಅನುಗುಣವಾಗಿ ಮಾರ್ಪಡಿಸಲಾಗಿತ್ತು. ಆದರೆ ಸೇವಾ ತೀರ್ಥವನ್ನು ಮೊದಲಿನಿಂದಲೂ ಎನ್ಕ್ರಿಪ್ಟ್ ಮಾಡಲಾದ ಸಂವಹನ ವ್ಯವಸ್ಥೆಗಳು, ಸುಧಾರಿತ ಸೈಬರ್ ಭದ್ರತಾ ಜಾಲಗಳು ಮತ್ತು ಸಮಗ್ರ ಭದ್ರತಾ ವಾಸ್ತುಶಿಲ್ಪದೊಂದಿಗೆ ನಿರ್ಮಿಸಲಾಗಿದೆ. ಈ ಕಟ್ಟಡವು ಭೂಕಂಪ ನಿರೋಧಕವಾಗಿದ್ದು, ಎಲ್ಲಾ ಪರಿಸ್ಥಿತಿಗಳಲ್ಲಿಯೂ ಕಾರ್ಯನಿರ್ವಹಿಸುವಂತೆ ವಿನ್ಯಾಸಗೊಳಿಸಲಾಗಿದೆ.
'ಇಂಡಿಯಾ ಹೌಸ್' ಮತ್ತು ಏಕೀಕೃತ ಆಡಳಿತ
ಪಿಎಂಒ ಸಂಕೀರ್ಣದೊಳಗೆ 'ಇಂಡಿಯಾ ಹೌಸ್' ಎಂಬ ಆಧುನಿಕ ಸಮ್ಮೇಳನ ಸೌಲಭ್ಯವನ್ನು ಸೇರಿಸಲಾಗಿದೆ. ಇದನ್ನು ಉನ್ನತ ಮಟ್ಟದ ದ್ವಿಪಕ್ಷೀಯ ಸಭೆಗಳು, ಅಂತರಾಷ್ಟ್ರೀಯ ಸಮ್ಮೇಳನಗಳು ಮತ್ತು ಪತ್ರಿಕಾಗೋಷ್ಠಿಗಳಿಗಾಗಿ ವಿನ್ಯಾಸಗೊಳಿಸಲಾಗಿದೆ. ಈ ಹಿಂದೆ ಪಿಎಂಒ ಒಳಗೆ ಇಂತಹ ಪ್ರತ್ಯೇಕ ಸ್ಥಳವಿರಲಿಲ್ಲ.
