ದೆಹಲಿಯಲ್ಲಿ ಮರ್ಸಿಡಿಸ್ ಕಾರು ಹರಿದು ಹೋಟೆಲ್ ಸಿಬ್ಬಂದಿ ಸಾವು

ಭಾನುವಾರ ನಸುಕಿನ ಜಾವ ದೆಹಲಿಯ ವಸಂತ್ ಕುಂಜ್ ಪ್ರದೇಶದಲ್ಲಿ ವೇಗವಾಗಿ ಬಂದ ಐಷಾರಾಮಿ ಮರ್ಸಿಡಿಸ್ ಕಾರೊಂದು ನಿಯಂತ್ರಣ ತಪ್ಪಿ ಪಾದಚಾರಿಗಳ ಮೇಲೆ ಹರಿದ ಪರಿಣಾಮ ಯುವಕನೊಬ್ಬ ಮೃತಪಟ್ಟು, ಇಬ್ಬರು ಗಂಭೀರವಾಗಿ ಗಾಯಗೊಂಡಿರುವ ದಾರುಣ ಘಟನೆ ನಡೆದಿದೆ. ಮೃತರು ಮತ್ತು ಗಾಯಾಳುಗಳು ಸ್ಥಳೀಯ ಮಾಲ್ ಒಂದರ ರೆಸ್ಟೋರೆಂಟ್ ಸಿಬ್ಬಂದಿಯಾಗಿದ್ದು, ಕೆಲಸ ಮುಗಿಸಿ ಮನೆಗೆ ಹೋಗಲು ಆಟೋಕ್ಕಾಗಿ ಕಾಯುತ್ತಿದ್ದ ವೇಳೆ ಈ ದುರಂತ ಸಂಭವಿಸಿದೆ.

ನಿಯಂತ್ರಣ ತಪ್ಪಿ ಆಟೋ ಸ್ಟ್ಯಾಂಡ್‌ಗೆ ನುಗ್ಗಿದ ಕಾರು

ಪೊಲೀಸರು ನೀಡಿರುವ ಮಾಹಿತಿಯ ಪ್ರಕಾರ, ಘಟನೆ ನಡೆದಿದ್ದು ಭಾನುವಾರ ಬೆಳಗಿನ ಜಾವ ಸುಮಾರು 2:33ರ ಸಮಯದಲ್ಲಿ. ನೆಲ್ಸನ್ ಮಂಡೇಲಾ ಮಾರ್ಗದಲ್ಲಿರುವ ಆಂಬಿಯನ್ಸ್ ಮಾಲ್ ಎದುರು, ಮರ್ಸಿಡಿಸ್ ಬೆಂಝ್ (G63 ಮಾಡೆಲ್) ಕಾರು ಅತಿ ವೇಗವಾಗಿ ಬಂದಿದೆ. ರಸ್ತೆಯಲ್ಲಿದ್ದ ಡೈವರ್ಷನ್ (ತಿರುವು) ಬಳಿ ಚಾಲಕನ ನಿಯಂತ್ರಣ ತಪ್ಪಿದ ಕಾರು, ನೇರವಾಗಿ ರಸ್ತೆ ಬದಿಯಲ್ಲಿದ್ದ ಆಟೋ ಸ್ಟ್ಯಾಂಡ್ ಕಡೆಗೆ ನುಗ್ಗಿದೆ. ಅಲ್ಲಿ ವಾಹನಕ್ಕಾಗಿ ಕಾಯುತ್ತಾ ನಿಂತಿದ್ದ ಮೂವರು ಅಮಾಯಕರಿಗೆ ಕಾರು ರಭಸವಾಗಿ ಡಿಕ್ಕಿ ಹೊಡೆದಿದೆ. ಡಿಕ್ಕಿಯ ತೀವ್ರತೆಗೆ ಕಾರಿನ ಮುಂಭಾಗ ನಜ್ಜುಗುಜ್ಜಾಗಿದೆ ಎಂದು ಡಿಸಿಪಿ (ನೈಋತ್ಯ) ಅಮಿತ್ ಗೋಯಲ್ ತಿಳಿಸಿದ್ದಾರೆ.

ಕೆಲಸ ಮುಗಿಸಿ ಮರಳುತ್ತಿದ್ದವರ ದುರಂತ ಅಂತ್ಯ

ಅಪಘಾತಕ್ಕೆ ಒಳಗಾದ ಮೂವರೂ ಆಂಬಿಯನ್ಸ್ ಮಾಲ್‌ನಲ್ಲಿರುವ ರೆಸ್ಟೋರೆಂಟ್ ಒಂದರಲ್ಲಿ ಕೆಲಸ ಮಾಡುತ್ತಿದ್ದರು. ರಾತ್ರಿ ಪಾಳಿ ಮುಗಿಸಿ ಮನೆಗೆ ತೆರಳಲು ಅವರು ಆಟೋ ರಿಕ್ಷಾಕ್ಕಾಗಿ ಕಾಯುತ್ತಿದ್ದರು. ಅಪಘಾತದ ನಂತರ ಅವರನ್ನು ತಕ್ಷಣವೇ ಹತ್ತಿರದ ಆಸ್ಪತ್ರೆಗೆ ಕರೆದೊಯ್ಯಲಾಯಿತು. ಆದರೆ, ಉತ್ತರಾಖಂಡದ ಚಮೋಲಿ ಮೂಲದ ರೋಹಿತ್ (23) ಎಂಬ ಯುವಕ ಆಸ್ಪತ್ರೆಗೆ ತಲುಪುವ ಮುನ್ನವೇ ಮೃತಪಟ್ಟಿದ್ದಾರೆ ಎಂದು ವೈದ್ಯರು ಘೋಷಿಸಿದ್ದಾರೆ. ಇನ್ನುಳಿದ ಇಬ್ಬರು ಸಹೋದ್ಯೋಗಿಗಳು (35 ಮತ್ತು 23 ವರ್ಷದವರು) ಗಂಭೀರ ಗಾಯಗಳೊಂದಿಗೆ ಚಿಕಿತ್ಸೆ ಪಡೆಯುತ್ತಿದ್ದಾರೆ.

ಮದುವೆ ಮನೆಯಿಂದ ಮರಳುತ್ತಿದ್ದ ಆರೋಪಿ

ಘಟನೆಗೆ ಸಂಬಂಧಿಸಿದಂತೆ ಕಾರು ಚಾಲಕ, ಕರೋಲ್ ಬಾಗ್ ನಿವಾಸಿ ಶಿವಮ್ (29) ಎಂಬಾತನನ್ನು ಪೊಲೀಸರು ಸ್ಥಳದಲ್ಲೇ ವಶಕ್ಕೆ ಪಡೆದಿದ್ದಾರೆ. ಆರೋಪಿ ಶಿವಮ್, ತನ್ನ ಪತ್ನಿ ಮತ್ತು ಅಣ್ಣನೊಂದಿಗೆ ಮದುವೆ ಸಮಾರಂಭವೊಂದರಲ್ಲಿ ಭಾಗವಹಿಸಿ ಮನೆಗೆ ಮರಳುತ್ತಿದ್ದ ಎಂದು ತಿಳಿದುಬಂದಿದೆ. ಪ್ರಾಥಮಿಕ ತನಿಖೆಯ ಪ್ರಕಾರ, ಅಪಘಾತಕ್ಕೀಡಾದ ಮರ್ಸಿಡಿಸ್ ಕಾರು ಶಿವಮ್ ಅವರದ್ದಲ್ಲ, ಬದಲಿಗೆ ಅದು ಅಭಿಷೇಕ್ ಎಂಬ ಸ್ನೇಹಿತನ ಹೆಸರಿನಲ್ಲಿ ನೋಂದಣಿಯಾಗಿದೆ. ಸದ್ಯ ಪೊಲೀಸರು ಪ್ರಕರಣ ದಾಖಲಿಸಿಕೊಂಡು ಮುಂದಿನ ಕಾನೂನು ಕ್ರಮ ಕೈಗೊಂಡಿದ್ದಾರೆ.