ಬೆಂಗಳೂರಿನಲ್ಲಿ ಮೊಳಗಲಿದೆ 'ಬಿಗೆಸ್ಟ್ ಮ್ಯೂಸಿಕಲ್ ನೈಟ್': ಒಂದೇ ಸ್ಥಳ, ಆರು ವೇದಿಕೆ, ಆರು ಬ್ಯಾಂಡ್‌

ಸಂಗೀತ ಪ್ರಿಯರಿಗೆ ಸಿಹಿಸುದ್ದಿ! ಇದೇ ಡಿಸೆಂಬರ್ 20ರಂದು ನಗರದಲ್ಲಿ ಅದ್ದೂರಿ ಸಂಗೀತ ಸಂಭ್ರಮವೊಂದು ನಡೆಯಲಿದೆ. ಖ್ಯಾತ ಇವೆಂಟ್ ಮ್ಯಾನೇಜ್‌ಮೆಂಟ್ ಸಂಸ್ಥೆ ‘JAM JUNXION’ (ಜಾಮ್ ಜಂಕ್ಷನ್), ಥಣಿಸಂದ್ರದ ಭಾರತೀಯ ಮಾಲ್‌ನಲ್ಲಿ 'ಬಿಗೆಸ್ಟ್ ಮ್ಯೂಸಿಕಲ್ ನೈಟ್' ಎಂಬ ಬೃಹತ್ ಕಾರ್ಯಕ್ರಮವನ್ನು ಆಯೋಜಿಸಿದೆ.

ಈ ಕುರಿತು ನಡೆದ ಪತ್ರಿಕಾಗೋಷ್ಠಿಯಲ್ಲಿ ಮಾತನಾಡಿದ ಆಯೋಜಕ ಶ್ರೀ ಅವರು, ಕಾರ್ಯಕ್ರಮದ ಪ್ರಮುಖ ಆಕರ್ಷಣೆಗಳನ್ನು ವಿವರಿಸಿದರು.

ಏನಿದು 6 ವೇದಿಕೆಗಳ ಪರಿಕಲ್ಪನೆ?

ಸಾಮಾನ್ಯವಾಗಿ ಸಂಗೀತ ಕಾರ್ಯಕ್ರಮಗಳಲ್ಲಿ ಒಂದು ವೇದಿಕೆ ಇರುತ್ತದೆ. ಆದರೆ, ಈ 'ಮ್ಯೂಸಿಕಲ್ ನೈಟ್' ವಿಶಿಷ್ಟವಾಗಿರಲಿದೆ. ಒಂದೇ ಸ್ಥಳದಲ್ಲಿ ಬರೋಬ್ಬರಿ ಆರು ಬೃಹತ್ ವೇದಿಕೆಗಳನ್ನು (ಒಟ್ಟು 220 ಅಡಿ ವಿಸ್ತಾರ) ನಿರ್ಮಿಸಲಾಗುತ್ತಿದೆ. ಒಂದು ವೇದಿಕೆಯಲ್ಲಿ ಕಾರ್ಯಕ್ರಮ ಮುಗಿದ ತಕ್ಷಣವೇ ಮತ್ತೊಂದು ವೇದಿಕೆಯಲ್ಲಿ ಪ್ರದರ್ಶನ ಆರಂಭವಾಗಲಿದೆ. ಹೀಗೆ ಪ್ರೇಕ್ಷಕರಿಗೆ ಯಾವುದೇ ವಿರಾಮವಿಲ್ಲದೆ, ಸತತ ಮನರಂಜನೆಯ ರಸದೌತಣ ಸಿಗಲಿದೆ.

ಚಂದನ್ ಶೆಟ್ಟಿ ಸೇರಿ 6 ಬ್ಯಾಂಡ್‌ಗಳ ಕಲರವ

ಸಂಜೆ 5 ಗಂಟೆಗೆ ಆರಂಭವಾಗುವ ಈ ಕಾರ್ಯಕ್ರಮವು ಸತತ ಆರು ಗಂಟೆಗಳ ಕಾಲ ನಡೆಯಲಿದೆ. ಕನ್ನಡದ ಖ್ಯಾತ ಗಾಯಕ, ಸಂಗೀತ ನಿರ್ದೇಶಕ ಚಂದನ್ ಶೆಟ್ಟಿ ಅವರ ಬ್ಯಾಂಡ್ ಸೇರಿದಂತೆ ಒಟ್ಟು ಆರು ಜನಪ್ರಿಯ ಬ್ಯಾಂಡ್‌ಗಳು ಪ್ರೇಕ್ಷಕರನ್ನು ರಂಜಿಸಲಿವೆ. ಕನ್ನಡ, ತೆಲುಗು ಹಾಗೂ ಹಿಂದಿ ಭಾಷೆಯ ಹಾಡುಗಳ ಮೂಲಕ ಗಾಯಕರು ಸಭಿಕರನ್ನು ಕುಣಿದು ಕುಪ್ಪಳಿಸುವಂತೆ ಮಾಡಲಿದ್ದಾರೆ.

ಈ ಕಾರ್ಯಕ್ರಮಕ್ಕೆ ನವರಸನ್ ಹಾಗೂ ಚಂದನ್ ಶೆಟ್ಟಿ ಅವರು ಪ್ರಮುಖವಾಗಿ ಸಹಕಾರ ನೀಡುತ್ತಿದ್ದಾರೆ. ಈಗಾಗಲೇ ಹೈದರಾಬಾದ್ ಮತ್ತು ವಿಶಾಖಪಟ್ಟಣಂನಲ್ಲಿ ಈ ಕಾರ್ಯಕ್ರಮ ಅಭೂತಪೂರ್ವ ಯಶಸ್ಸು ಕಂಡಿದ್ದು, ಈಗ ಮೊದಲ ಬಾರಿಗೆ ಬೆಂಗಳೂರಿಗೆ ಕಾಲಿಟ್ಟಿದೆ.

'ಕೊಟ್ಟ ದುಡ್ಡಿಗೆ ದುಪ್ಪಟ್ಟು ಮಜಾ': ಚಂದನ್ ಶೆಟ್ಟಿ

ಕಾರ್ಯಕ್ರಮದ ಕುರಿತು ಸಂತಸ ವ್ಯಕ್ತಪಡಿಸಿದ ಚಂದನ್ ಶೆಟ್ಟಿ, "ಜಾಮ್ ಜಂಕ್ಷನ್ ಸಂಸ್ಥೆಯು ಈ ಹಿಂದೆ ಎರಡು ಕಡೆ ಯಶಸ್ವಿ ಕಾರ್ಯಕ್ರಮಗಳನ್ನು ನೀಡಿದೆ. ಇದೀಗ ಬೆಂಗಳೂರಿನಲ್ಲಿ, ಅದೂ 220 ಅಡಿಯ ಆರು ವಿಶಾಲ ವೇದಿಕೆಗಳಲ್ಲಿ ಆರು ಪ್ರಸಿದ್ಧ ಕಲಾವಿದರು ಪ್ರದರ್ಶನ ನೀಡುತ್ತಿರುವುದು ವಿಶೇಷ. ಇದು ನೀವು ನೀಡುವ ಹಣಕ್ಕೆ ದುಪ್ಪಟ್ಟು ಮನರಂಜನೆ ನೀಡುವ ಕಾರ್ಯಕ್ರಮವಾಗಲಿದೆ," ಎಂದು ಭರವಸೆ ನೀಡಿದರು.

"ನೆರೆ ರಾಜ್ಯದಿಂದ ಬಂದು ಇಲ್ಲಿ ಇಷ್ಟು ದೊಡ್ಡ ಕಾರ್ಯಕ್ರಮ ಆಯೋಜಿಸುತ್ತಿರುವುದು ಮತ್ತು ಪ್ರಮುಖವಾಗಿ ನಾಲ್ಕು ವೇದಿಕೆಗಳಲ್ಲಿ ಕನ್ನಡಿಗರಿಗೆ ಅವಕಾಶ ನೀಡಿರುವುದು ನಾನು ಈ ಕಾರ್ಯಕ್ರಮ ಒಪ್ಪಿಕೊಳ್ಳಲು ಮುಖ್ಯ ಕಾರಣ," ಎಂದು ಚಂದನ್ ಶೆಟ್ಟಿ ತಿಳಿಸಿದರು.

ಪರಿಸರ ಕಾಳಜಿ: 'MY Tree' ಅಭಿಯಾನ

ಕೇವಲ ಮನರಂಜನೆಗಷ್ಟೇ ಸೀಮಿತವಾಗದೆ, 'ಜಾಮ್ ಜಂಕ್ಷನ್' ಸಾಮಾಜಿಕ ಕಳಕಳಿಯನ್ನೂ ಮೆರೆದಿದೆ. ಸಂಸ್ಥೆಯ ಮುಖ್ಯಸ್ಥ ಶ್ರೀ ಅವರು 'MY Tree' ಎಂಬ ಪರಿಸರ ಸ್ನೇಹಿ ಅಭಿಯಾನವನ್ನು ನಡೆಸುತ್ತಿದ್ದಾರೆ. ಇದರ ಅಡಿಯಲ್ಲಿ, ಕನಿಷ್ಠ 10 ರೂ. ನಿಂದ 50, 100 ರೂಪಾಯಿವರೆಗೆ ದೇಣಿಗೆ ನೀಡುವವರ ಹೆಸರಿನಲ್ಲಿ ಒಂದು ಗಿಡವನ್ನು ನೆಟ್ಟು, ಅದರ ಸಂಪೂರ್ಣ ಆರೈಕೆಯನ್ನು ಸಂಸ್ಥೆಯೇ ನೋಡಿಕೊಳ್ಳಲಿದೆ. ಅಷ್ಟೇ ಅಲ್ಲ, ಗಿಡದ ಬೆಳವಣಿಗೆಯ ಕುರಿತು ನಿಯಮಿತವಾಗಿ ವಾಟ್ಸ್‌ಆ್ಯಪ್ ಮೂಲಕ ದಾನಿಗಳಿಗೆ ಮಾಹಿತಿ ನೀಡುವ ವ್ಯವಸ್ಥೆಯನ್ನೂ ಮಾಡಲಾಗಿದೆ.